Month: December 2017

Автотээврийн үндэсний төвөөс ирэх онд хийх ажлаа танилцууллаа.

2018 онд Автотээврийн талаар төрөөс баримтлах бодлого, зорилтын хүрээнд хэрэглэгчийн эрэлт хэрэгцээнд нийцсэн, эдийн засгийн үр ашигтай, ая тухтай тээврийн цогц үйлчилгээг үзүүлэх үндсэн зорилгоо хэрэгжүүлж ажиллахаар төлөвлөөд байна.

Энэхүү зорилтын хүрээнд 2018-2022 онд авч хэрэгжүүлэх хөгжлийн бодлогын хөтөлбөрийг үр ашигтай хэрэгжүүлэх, 2018 онд ухаалаг тээврийн системийг нэвтрүүлэх ажлыг тууштай хэрэгжүүлж, тээвэрлэлтийн нэгдсэн системийг шинэчилж боловсронгуй болгоно гэдгийг Автотээврийн үндэсний төвийн үйлдвэрийн газрын захирал П.Дэлгэрнаран хэллээ. Тэрээр “Тээвэр төлөвлөлт, нэгдсэн зохицуулалтыг үр ашигтай, шуурхай зохион байгуулан ажиллах том зорилт бидний өмнө байна. 2017 онд төлөвлөгөөний дагуу хийгдсэн цаашид хийж гүйцэтгэх ажлуудын уялдаа холбоо, төлөвлөлтийг нарийн тооцож, жилийн туршид үр дүнтэй оновчтой зохион байгуулж, нийт ажилтан албан хаагчдынхаа нийгмийн асуудалд анхаарна” хэмээн онцлов.

ЦЕГ-аас Гэр бүлийн хүчирхийлэлтэй тэмцэх тухай хуулийн хэрэгжилтийг хангах зорилгоор НҮБ-ын Хүн амын сантай хамтран Цагдаагийн байгууллагын болон Нэг цэгийн үйлчилгээний төв, Түр хамгаалах байрны мэдээллийг нэгтгэсэн санг ашиглалтад оруулсан юм.

Тус сангийн мэдээлснээр Нийслэлийн 9 дүүргийн цагдаагийн хэлтсүүдийн эрүүгийн мөрдөгч, хэрэг бүртгэгч, хэсгийн мөрдөн байцаагч нар удаа дараа сургалтад хамрагдан ажиллаж багагүй ахиц гаргажээ. 2017 оны эхний 11 сарын байдлаар гэр бүлийн хүчирхийллийн 1262 гэмт хэрэг бүртгэгдэж, өмнө оны мөн үеэс 69 хэргээр буюу 5,2 хувиар буурч, гэр бүлийн хүчирхийллийн 4122 зөрчил бүртгэгдсэн, 2415 хүнийг хуулийн дагуу 7-30 хоногоор баривчилж шийтгэжээ.

Хэнтий аймгийн хэрлэн суманд оршин суух иргэн Л-ийн гэрт энэ сарын 07-12-ны өдрүүдэд хулгай орж, хоёр үе дамжсан Батноров хийцтэй их гарын мөнгөн тоноглолтой хоёр эмээл, мөнгөн хазаар, мөнгөн аяга зэрэг эд зүйлс алдагдсан байна.

Уг гэмт хэрэгт нийслэлийн цагдаагийн газрын мөрдөн шалгах газрын Хүнд гэмт хэрэгтэй тэмцэх хэлтэс болон Хэнтий аймгийн цагдаагийн газрын алба хаагчид хамтран шуурхай ажиллаж гэмт этгээдүүдийг илрүүлжээ. Улмаар хулгайлсан эд зүйлсийг эзэнд нь буцаан өгчээ. Дээрх хэргийн Хэнтий аймгийн харьяат Г,Төв аймгийн харьяат Д нар бүлэгдэн үйлдсэн байжээ.

Шинэ жил ирж байна. Энэ үеэр архи согтууруулах ундаа хэтрүүлэн хэрэглэснээс болж бие авч явах чадваргүй болсон иргэд осгож гэмтэх тохиолдол ихэсдэг. Энэ үеэр Гэмтэл согог судлалын үндэсний төвийн хүлээн авах яаралтай тасаг 24 цагаар ажиллах аж. Уншигч та бүхэндээ осгож хөлдөхөөс урьдчилан сэргийлэх зөвлөмжийг хүргэе.

Осгож хөлдөхөөс урьдчилан сэргийлэхийн тулд амин дэмтэй хоол хүнс хэрэглэх, хүйтэнд орчинд удаан хугацаагаар байхгүй байх. Мөн ууланд алхаж, ан, оторт удаан хугацаагаар явахгүй байж согтууруулах ундаа хэтрүүлэн хэрэглэхгүй байх хэрэгтэй гэдгийг холбогдох эмнэлгийн ажилтнууд зөвлөж байна. Осголтын үед арьсны гадаргуу улааж өвдөх, цайрч сааралтах, гөлгөр болж мэдээ алдах зэрэг шинж тэмдгүүд илэрдэг. Мөн энэ үеэр осгосон хөлөөр алхаж, ил галын ойролцоо суун, осгосон эрхтнээ үрж, массаж хийх зэргийг хориглодог байна.

Осгосон үед хамгийн түрүүнд эмнэлэгт хандах хэрэгтэй. Мөн осгосон хүнийг дулаан байранд байлган норсон хувцасыг нь тайлж, дулаан хувцас өмсгөн хөнжлөөр хучин бүлээн шингэн зүйл ихээр уулгах хэрэгтэй юм. Мөн зуун наст болон E витамин найрлаганд нь орсон тос түрхвал сайн аж.

Нийт ард иргэдэд анхааруулж хэлэхэд архи согтууруулах ундааг баяр ёслолын үеэр тааруулан хэрэглэж осол гэмтэл болон осголтоос урьдчилан сэргийлэх хэрэгтэй гэдгийг эмнэлгийн байгууллагын ажилтнууд зөвлөж байна.

Б.АМАРТҮВШИН

Нийслэл, дүүргүүдийн Засаг даргын Тамгын газрын Цэргийн штабын 2017 оны үйл ажиллагааны тайлангийн хурал өнөөдөр Хангарди ордонд боллоо. Тайлангийн хуралд НЗДТГ-ын дарга бөгөөд Цэрэг татлагын товчооны дарга М.Отгонбаяр, НЗДТГ-ын Цэргийн штабын дарга, хурандаа Ж.Болдбаатар болон дүүргүүдийн Цэргийн штабын дарга, бие бүрэлдэхүүн оролцов.

Хурлын эхэнд НЗДТГ-ын Цэргийн штабын орлогч дарга, хурандаа Ц.Анхбаяр нийслэлийн Цэргийн штабаас 2017 онд хийж гүйцэтгэсэн ажлын талаар танилцууллаа. Тэрбээр танилцуулгадаа “2017 оныг бид бүхэн хууль тогтоомж, сургалт, сурталчилгааны жил болгон үндсэн таван зорилтыг тавин ажилласан. Батлан хамгаалах хууль, тогтоомжийг иргэдэд сурталчлах, албан тушаалын хуулиар хүлээсэн үүргээ хэрэгжүүлэхэд мэргэжлийн туслалцаа үзүүлэх, цэргийн насны залуучуудын эрүүл мэндийг дээшлүүлэх, мэргэжлийн байгууллагуудтай хамтран ажиллах, иргэн цэргийн харилцааг бэхжүүлэх, цэрэг эх оронч үзлийг төлөвшүүлэхэд цэргийн мэргэжил, албан тушаалтны сургалтыг зохион байгуулах, байгууллага ААН, иргэдэд хуулиар хүлээсэн үүргээ хэрэгжүүлэхэд мэргэжлийн дэмжлэг туслалцаа үзүүлэх, цэргийн штаын албан тушаалтнуудын үлгэрлэх, манлайлах байдал, хууль эрх зүйн мэдлэгийг дээшлүүлж, ажиллах нөхцөлийг дээшлүүлэхээр зорилт тавин ажилласан” гэдгийг онцолж байв.

Тайлангийн хурлын үеэр нийслэл, дүүргийн Цэргийн штабын шилдгүүдийг тодрууллаа. Цэргийн штабын 2017 оны үйл ажиллагааны үр дүнгийн үнэлгээгээр

Түүнчлэн Цэргийн штабын 2017 оны “Тэргүүний офицер”-оор

Тайлангийн хурлын төгсгөлд НЗДТГ-ын дарга бөгөөд Цэрэг татлагын товчооны дарга М.Отгонбаяр нийслэл, дүүргүүдийн Цэргийн штабын дарга нарт хандаж “Бид 2017 оныг нийслэлийн төр захиргааны байгууллагын зүгээс “Иргэдийн оролцоотой эрхзүйн шинэтгэлийн жил” болгон зарласан. Цэргийн штабуудын хүрээнд хууль, тогтоомж сургалт, сурталчилгааны жил болгох зорилтыг дэвшүүлэн, амжилттай ажиллалаа. Энэ зорилтын хүрээнд бид иргэн цэргийн харилцааг ойртуулж, иргэдэд цэргийн боловсрол, цэргийн хууль, тогтоомжийг сурталчлах ажлыг нийслэлийн Цэргийн штабууд бүрэн дүүрэн хэрэгжүүлсэн гэдэгт итгэлтэй байна” хэмээгээд ирэх 2018 онд хэрхэн ажиллах талаар үүрэг, чиглэлийг өглөө хэмээн НЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Монголчууд Үндэсний эрх чөлөө, тусгаар тогтнолоо сэргээн мандуулсны 106 жилийн ойд зориулсан Монгол Улсын Ерөнхийлөгчийн цомын төлөөх чансаа өндөр шилдэг 128 бөхийн барилдаан энэ жил долоо дахь удаагаа 12 дугаар сарын 29-нд Бөхийн өргөөнд болно.

Өмнөх зургаан удаагийн барилдаанд Улсын аварга С.Мөнхбат, Улсын харцага Б.Пүрэвсайхан нар тус бүр хоёр удаа, Улсын заан М.Өсөхбаяр, Улсын арслан Р.Пүрэвдагва нар тус бүр нэг удаа түрүүлж цомын эзэн болж байв.

Энэ удаагийн чансаа өндөр бөхчүүдийг Улсын харцага О.Хангай, Улсын харцага Б.Бат-Өлзий, Улсын гарьд Ө.Бат-Орших, Улсын заан Н.Жаргалбаяр, Улсын арслан Н.Батсуурь нар тэргүүлж байгаа юм.

2017 оны цагаан сараас эхлүүлж тооцсон чансааны үзүүлэлтэд хамгийн сүүлд болсон Богдхан хайрханы хишиг барилдааныг оролцуулан, нийт 24 барилдааны амжилтыг хамааруулжээ. Арванхоёрдугаар сарын 29-нд болох Ерөнхийлөгчийн цомын барилдаанд энэ чансаагаар барилдах ажээ.

Авлигатай тэмцэх газрын даргын баталсан журмын дагуу тус газар сар бүрийн 25-ны өдөр иргэд, олон нийтэд зориулан үйл ажиллагааны мэдээллээ тогтмол хүргэж байхаар болсон билээ.

Энэ удаагийн хэвлэлийн бага хуралд Авлигатай тэмцэх газрын Тамгын хэлтсийн дарга, эрхэлсэн комиссар З.Баасанням, Урьдчилан сэргийлэх, соён гэгээрүүлэх хэлтсийн дарга, эрхэлсэн комиссар Т.Баярхүү, Хэвлэл, олон нийттэй харилцах ажилтан, комиссар Т.Мөнхтунгалаг нар оролцож, 2017 оны 12 дугаар сард хийж гүйцэтгэсэн ажил, авлигын эсрэг хууль тогтоомжийг хэрэгжүүлэх чиглэлээр авч хэрэгжүүлсэн арга хэмжээ, үйл ажиллагааны талаар сэтгүүлчдэд мэдээллээ.2017 оны 12 дугаар сарын 25-ны өдрийн хэвлэлийн бага хуралд хийсэн мэдээллийг товчоор танилцуулъя.

Арван зургаан улирал дараалан уншигчдынхаа оюуны хэрэгцээг хангаж, захиалагч олныхоо талархлыг хүлээсэн “Улирал ба зохиолч” сэтгүүлийн энэ оны өвлийн дугаар хэвлэгдэн гарлаа.

Уг дугаарт Монгол Улсын төрийн шагналт, эрдэмтэн зохиолч Пүрэвийн Хорлоогийн мэндэлсний 100 жилийн ойд зориулсан намтар цадиг, судалгааны өгүүлэл, соёлын гавьяат зүтгэлтэн, зохиолч Санжийн Пүрэвийн “Амгалан тэнгэрийн нүүдэл” кино тууж, МЗЭ-ийн шагналт, яруу найрагч А.Лхагвагийн “Нумын хөвч, сумын зэв” эрхин сонет.

Мөн зохиолч, орчуулагч Д.Гүн-Үйлсийн “Судага” өгүүллэг, нобелийн шагналт зохиолч Э.Хемингуэйн хөрөг, Д.Нацагдоржийн шагналт, яруу найрагч Л.Мягмарсүрэнгийн “Болор чулаанд туссан сарны гэрэл адил…” шүлгийн гар бичвэр, Горькийн нэрэмжит утга зохиолын дээд сургуулийн оюутан Д.Чинзоригоос яруу найрагч Цэндийн Чимиддоржид бичсэн захидал, яруу найрагч Ш.Сүхбаатар, Н.Пүрэв, Г.Жамьяан нарын шинэ шүлгүүд, нобелийн шагналт, шведийн зохиолч Элмар Сойдэрбергийн өгүүллэг , хятад хэлээр шүлэг бичдэг цөөн тоот үндэстний яруу найргийн цоморлиг, буриадын нэрт эрдэмтэн Людмила Пампиловагийн бичсэн “Лувсандамбын Дашнямын боинго мөрт яруу найраг” зэрэг онц сонирхолтой бүтээл тавиигджээ.

“Номын ордон” буландаа Говь-сүмбэр аймгийн номын сангийн хамт олны тухай танилцуулсан байна.

“Улирал ба Зохиолч” сэтгүүл улиралын онцлох зохиолчоор саяхан БНСУ-ын Гваньжиу хотод болсон Азийн утга зохиолын анхдугаар наадмаас “Азийн утга зохиолын шагнал”-ын анхны шагналыг хүртсэн яруу найрагч Д.Урианхайг тодруулж, “Утга зохиолын судлал, шинжлэл цуврал”-ыг нэрлэсэн байна.