Month: December 2017

Эрүүл мэндийн яамнаас томуугийн өвчлөл, авч буй арга хэмжээний талаар мэдээлэл хийлээ. Тандалтын 50 дахь долоо хоногийн байдлаар амбулаторийн үзлэгээр томуу, томуу төст өвчин 6.2 хувийг эзэлж байгаа аж. Шинэ жилийн баярын өдрүүдэд өвчлөл нэмэгдэх хандлагатай байгаа учраас бэлэн байдлыг ханган ажиллаж байна Энэ хүрээндээ Хууль зүй дотоод хэргийн сайд Ц.Нямдоржид Төрийн тусгай албан хаагчдын эмнэлэгт Хүүхдийн тасаг нээж, ажиллуулах хүсэлтийг хүргүүлжээ. 50-100 ортой хүүхдийн тасгийн хүний нөөцийг хэрхэн бүрдүүлэх, тоног төхөөрөмжөөр хэрхэн хангах тооцоог гаргасан байна.

Эрүүл мэндийн яамны Тандалт, шуурхай удирдлагын хэлтсийн дарга Д.Нарангэрэл ярихдаа “Энэ жил томуу, томуу төст өвчний амбулаторийн үзлэг цөөн байгаа ч бага насны хүүхэд уушгины хатгаагаар өвчлөх эрсдэл өндөр байна. Уушгины хатгаа өвчний вакциныг 2016 онд агаарын бохирдол ихтэй нийслэлийн гурван дүүргийн хүүхдүүдэд хийсэн. Энэ хүрээнд 87900 хүүхдийг дархлаажуулсан. 13 ам.долларын үнэтэй вакциныг 3.5 долларын үнээр хийж байхад хамралт бага, 80 хувьтай байна. Вакцин тариулсан хүүхдүүдийн дунд хатгаа өвчин 60 хувиар буурсан. Уушгины хатгаа өвчнөөр хүүхэд эндээгүй. Тиймээс бид 2018 онд сайдын багцаас нэг тэрбум төгрөгөөр вакцин авч, нийслэлийн бүх дүүргийн хүүхдүүдэд хийнэ.

Эмнэлэгт хэвтэж буй хүүхдүүдийн 40 хувь нь уушгины хүндэвтэр, хүнд хэлбэрийн хатгаатай байна. Харин үлдсэн 60 хувь нь эмнэлэгт хэвтэх шаардлагагүй, өрхийн болон амбулаторийн эмчийн хяналтад гэрээрээ эмчлүүлж болох хүүхдүүд байна. Ачааллыг нэмж, дахиж өөр вирусийн халдвар аван эмнэлэг рүү ирэхээсээ илүү өрхийн эмчийн зөвлөгөөг авах хэрэгтэй байна. Уушгины хатгаа бол маш олон төрлийн вирус, бактериар хүндэрдэг. Томуугийн вакцин хийлгэсний дараа уушгины хатгааны вакцин хийлгэх ёстой. Сүүлийн хоёр жилд хийсэн судалгаагаар эрүүл 2000 хүүхдийн 70 хувийн хамар, залгиурт нян илэрсэн. Тэгэхээр насанд хүрэгчдийн дунд өөрөө өвчлөөгүй ч халдвар тараагчид байна. Тиймээс эрүүл нян тээгчдээс хамгаалах гол арга бол вакцин. Хатгааны вакциныг үнэ төлбөргүй, товлосон дагуу 2, 4, 9 сартайд нь дүүргийн дархлаажуулалтын кабинетад хийнэ” гэв.

Малчид энэ онд үндэсний үйлдвэрт 20 111 кг ноос тушаажээ. Ингэснээр 86 465 малчны мэдээлэл баталгаажиж, 22.4 тэрбум төгрөгийн урамшуулал авахаар болсон байна.

“Нарантуул” олон улсын худалдааны төвд яг одоо гал гарч байгаа мэдээлэл ирлээ. Гал чухам юунаас болж гарсан талаар хараахан мэдээлэлгүй байна. Энэ талаар Нийслэлийн онцгой байдлын газраас тодруулахад, “Нарантуул захын хашаанд байх “Баялаг ундраа” төвийн арын цахилгаан барааны хэсэг шатсан гэх дуудлага 12:50 цагт ирсэн. Дуудлагын дагуу гал түймэр унтраах ангиуд ажиллаж байна” гэлээ.

Баянхонгор аймаг дахь Цагдаагийн газраас байгууллагын соён гэгээрүүлэх ажлын хүрээнд алба хаагчдын чөлөөт цагийг гэр бүлийн гишүүдийн хамт зөв боловсон өнгөрүүлэх, ажлын ачаалал, стресс ядаргааг тайлах зорилгоор алба хаагчид, тэдний гэр бүлийн гишүүдийн дунд “Аз жаргалтай гэр бүл” урлагийн наадмыг амжилттай зохион байгуулжээ.

Урлагийн наадамд алба хаагчид долоон төрлөөр өрсөлдсөнөөс Нийтийн хэв журам хамгаалах тасаг тэргүүн байр, сумдын хэсгийн цагдаа нар дэд байр, Эрүүгийн цагдаагийн тасаг гутгаар байранд тус тус шалгарлаа.

Мөн энэ үеэр алба хаагчдын хүүхдүүдэд аймгийн Цагдаагийн газрын даргын нэрэмжит гарын бэлэг гардуулж, идэвхтэй оролцсон тасаг хамт олонд талархал хадгалуулав.

Нийслэлийн шинэ жилийн баярын үйл ажиллагааг зохион байгуулах ажлын хүрээнд арванхоёрдугаар сарын 31-ний өдөр “Шинэ жилийн баярын цэнгүүн”-ийг Сүхбаатарын талбайд зохион байгуулна. Олон нийтийг хамарсан ёслолын арга хэмжээний дараа иргэдийг нийтийн тээврийн үйлчилгээгээр хангахаар дараах төлөвлөлтийг Нийслэлийн тээврийн газраас хийгээд байна.

Үүнд “Шинэ жилийн баярын цэнгүүн” нэгдсэн үйл ажиллагаа өндөрлөхөд их багтаамжийн автобусны 18 чиглэлд 18 автобус Сүхбаатарын талбайн баруун, зүүн болон урд зогсоол буюу зурагт тэмдэглэсэн “А”, “B”, “С” зогсоолоос суурьшлын цэгүүд рүү үнэ төлбөргүй үйлчлэхээр төлөвлөөд байгаа аж.

Шинэ жилийн баярын өдрүүдээр иргэдэд эмнэлгийн тусламж, үйлчилгээ үзүүлэх орон нутаг болон нийслэлийн дүүргийн эрүүл мэндийн төвүүдийн үзлэгийн кабинет болон томуу, томуу төст өвчний үед эмнэлгийн тусламж үзүүлэх байгууллагын утасны жагсаалтыг Эрүүл мэндийн яамнаас та бүхэнд хүргэж байна.

Энэ сарын 29-нөөс ирэх оны нэгдүгээр сарын 02-ны хооронд дүүргийн эрүүл мэндийн төвийн гэмтэл, мэс засал, дотор, шүдний кабинетууд, Шүд эрүү нүүрний төв, дүүргийн эрүүл мэндийн төвийн гэмтэл, мэс засал, дотор шүдний кабинет, Өрхийн эрүүл мэндийн төвүүд 10.00-16.00 цагийн хооронд ажиллана.

ТОМУУ, ТОМУУ ТӨСТ ӨВЧНИЙ ҮЕИЙН ЭМНЭЛГИЙН ТУСЛАМЖ, ҮЙЛЧИЛГЭЭ ҮЗҮҮЛЭХ ХУВААРЬ

Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газраас хүүхдийн хөгжих, нийгмийн амьдралд оролцох, өсвөр насныхны авьяас чадвар, давуу тал, ололт амжилт, үлгэр дуурайллыг алдаршуулах зорилгоор “Оны шилдэг хүүхэд”-ийг шалгаруулдаг уламжлалтай билээ.

Энэ жилийн хувьд “Сурлагын амжилт”, “Урлаг, уран бүтээл”, “Биеийн тамир спорт, бие бялдрын хөгжил”, “Эх орны түүх, соёл өв уламжлал”, “Хүүхдийн өөрөө удирдлагын байгууллага”, “Бүтээлч ажилч, хичээнгүй байдал, мэргэжлийн чиг баримжаа”, “Хүмүүнлэг энэрэнгүй үйлс”, “Техникийн сэтгэлгээ, шинийг сэдэх санал санаачилга”, “Байгаль хамгаалал, эрүүл аюулгүй орчин”, “Багийн амжилт” гэсэн 10 номинацид “Оны шилдэг хүүхэд”-ийг тодруулсан байна.

“Оны шилдэг хүүхэд” шалгаруулах үйл ажиллагаанд нийслэл болон орон нутагтаа шалгарсан нийт 136 хүүхдийн материал ирснээс арван номинацид шилдэг 38 хүүхэд шалгарчээ. Тэдгээр “Оны шилдэг хүүхэд”-үүдийг маргааш буюу 2017 оны арван хоёрдугаар сарын 27-ны өдрийн өглөөний 08:30 цагт Хөдөлмөр нийгмийн хамгааллын сайд С.Чинзориг хүлээн авч уулзах бол үүний дараа өглөөний 10:00 цагт Хүүхдийн төлөө үндэсний зөвлөлийн тэргүүн, Монгол Улсын Ерөнхий сайд У.Хүрэлсүх Төрийн ордонд хүлээн авч, батламж гардуулах юм.

Монгол Улс “Оны шилдэг хүүхэд” шалгаруулах үйл ажиллагааг 1991 оноос албан ёсоор зохион байгуулж эхэлсэн бөгөөд үе үеийн Хүүхдийн төлөө үндэсний зөвлөлийн тэргүүн, Монгол Улсын Ерөнхий сайд “Оны шилдэг хүүхэд”-ийн батламжийг гардуулан өгдөг.

Шинэ жилийн баяртай холбогдуулан Онцгой байдлын байгууллагаас Нийслэлийн Засаг даргын захирамж, нийслэлийн Онцгой байдлын газар, Улаанбаатар хотын цагдаагийн газар, Нийслэлийн Мэргэжлийн хяналтын газрын даргын хамтарсан удирдамжийн хүрээнд нийслэлийн нутаг дэвсгэрт байршилтай шинэ жилийн баяр тэмдэглэх, хүлээн авалт зохион байгуулах байгууллага, аж ахуйн нэгж, иргэдийн барилга байгууламжид гамшгаас хамгаалах болон гал түймрийн улсын хяналтыг хэрэгжүүлэх шалгалтыг зохион байгуулж байна.

Шалгалтад нийслэлийн нутаг дэвсгэрт байршилтай худалдааны төв, зах, үзвэр, үйлчилгээний газрууд, нийтийн эзэмшлийн зам, талбайд гар дээрээс шинэ жилийн тогтоом, хэрэгсэл худалдан борлуулж буй иргэд хамрагдаж байгаа юм.

Одоогоор шалгалтыг 88 объект хийж, 346 зөрчил илрүүлэн, 74 зөрчлийг газар дээр нь арилгуулж, бусад зөрчлүүдийг арилгуулах албан шаардлагыг 56 байгууллагад хүргүүлэн ажиллаж байна.

Иргэд пиротехникийн хэрэгслийг зөвшөөрөлгүй газраас худалдан авч, улмаар салют буудуулах, сүлд модыг чимэглэхдээ мэргэжлийн бус хүнээр дур мэдэн хийлгэдгээс болж бэртэж гэмтэх тохиолдол байдаг. 2010-2011 онд пиротехникийн хэрэгсэлд 11 хүн өртөж бие эрхтэнээ гэмтээжээ.

Иймд иргэн та пиротехникийн хэрэгслийг тусгай зөвшөөрөлтэй газраас худалдан авч, хэрэглэх заавар, санамжийг мөрдөх, сүлд модоо 12 вольтын хүчдэлтэй зориулалтын гэрлэн чимэглэлээр чимж, цахилгааны утасны холболтыг дүрмийн дагуу хийх, цагаан бенгалын галыг хялбар шатах материалын ойролцоо цацруулахгүй байх, цацарч дууссаны дараа цаас, хөвөн зэрэг шатамхай зүйл дээр хаяхгүй байх, оргилуурт гэрэл, тэсрэх бодист динамикийг орон байр, тасалгаанд, сүлд модны ойролцоо, шатах материалтай орчинд хэрэглэхгүй байх, аж ахуйн нэгж байгууллага сүлд мод, гэрлэн чимэглэлийг дүрмийн дагуу угсарч ашиглах, тухайн обьектыг харуул хамгаалалтын сонор сэрэмжийг сайжруулж ажиллахыг анхааруулж байна.

Шинэ жилийн баяр, амралтын өдрүүдэд иргэдийн аюулгүй байдлыг хангах чиглэлээр нийслэлийн Онцгой байдлын газар, мэргэжлийн хяналтын газар, цагдаагийн газрын хамтарсан үзлэг шалгалт 2017 оны 12 дугаар сарын 31-ний өдөр хүртэл үргэлжилнэ гэж Онцгой байдлын ерөнхий газраас мэдээллээ.

УИХ-ын Нийгмийн бодлого, боловсрол, соёл, шинжлэх ухааны байнгын хорооны хуралдааны үеэр БСШУС-ын сайд Ц.Цогзолмаа Нийслэлийн 29 дүгээр тусгай сургуулийн захирал Б.Батсайханыг үүрэгт ажлаас нь чөлөөлөхөө мэдэгдлээ. Тэрээр “Ёс зүйн алдаа гаргасан захирлыг үүрэгт ажлаас нь чөлөөлөхөөр шүүхийн байгууллага “Хууль бусаар халсан байна” гээд үзэж, буцаан томилж буй нь шүүхийн алдаа. Тиймээс би ирэх сарын 1-нээс Нийслэлийн 29 дүгээр тусгай сургуулийн захирал Б.Батсайханыг үүрэгт ажлаас нь чөлөөлнө. Түүгээр ч зогсохгүй тусгай статустай сургуульд багшлах эрхийг нь хязгаарлана” гэж тодотгов.

Нийслэлийн 29 дүгээр тусгай сургуулийн захирал асан Х.Батсайханыг өнгөрсөн дөрөвдүгээр сард үүрэгт ажлаас нь чөлөөлсөн билээ. Улмаар ажлаасаа хууль бусаар халагдсан гэх үндэслэлээр гомдол гаргаж, Чингэлтэй дүүргийн иргэний хэргийн анхан шатны шүүх хурал, Нийслэлийн давж заалдах шатны шүүх хуралд ялалт байгуулснаар албан тушаалд нь буцаан томилоод байгаа юм.