Month: December 2017

Онцгой байдлын албыг бэхжүүлэх, шаардлагатай тоног төхөөрөмжөөр хангах, аврах, гал унтраах үйл ажиллагаанд ашиглах нисдэг тэрэгтэй болгох зорилгоор ард түмний санаачлагаар эхлүүлсэн хандивын аян улс орон даяар өрнөсөн.

Онцгой байдлын албанд туслах энэхүү хандивын аян өнөөдөр ч үргэлжилсээр байна. Хандивын аянд төрийн болон төрийн бус байгууллага, иргэд, аж ахуйн нэгж байгууллагын хандивласан 809,6 сая гаруй төгрөг Онцгой байдлын ерөнхий газарт төвлөрөөд байгаа юм.

Тэгвэл өнөөдөр Худалдаа хөгжлийн банкны хамт олны зүгээс 10 сая төгрөгийн үнэ бүхий иж бүрэн таван ханатай дөрвөн гэрийг гардуулан өглөө.

Хандивыг тус банкны гүйцэтгэх захирлын орлогч С.Оргодол, захиргаа, хүний нөөцийн газрын захирал Л.Нямсүрэн, маркетингийн газрын захирал Б.Баярмаа нар ОБЕГ-ын тэргүүн дэд дарга, бригадын генерал Г.Ариунбуянд хүлээлгэн өгсөн юм гэж Онцгой байдлын ерөнхий газраас мэдээллээ.

БСШУС-ын сайд Ц.Цогзолмаа өнөөдөр “Тояа” Хүүхэд хөгжлийн академийн цээж тооллын аваргуудыг хүлээн авч уулзлаа.

Эх орныхоо нэрийг дэлхийн тавцанд өргөж байгаа сурагчдыг цаашид дэмжин ажиллана гэдгээ тэрбээр хэлээд Олон улсын хүүхдийн “Найрамдал” төвд багаараа амрах эрхийн бичгээр шагнав.
Малайз улсын Куала Лумпур хотод энэ сарын 10-11-нд болсон Олон улсын 22 дахь удаагийн “Соробан сампин, Цээж тооллын аварга шалгаруулах“ тэмцээнд Монгол Улсаа төлөөлөн 76 хүүхэд оролцож үнэмлэхүй амжилт үзүүлсэн. Манай сурагчид нийт 7 ангилалд өрсөлдөн Гранд Чампион-1,Чампион- 2, Алтан цом-20, Мөнгөн цом-33, Хүрэл цом-20-ыг хүртсэн юм. Дэлхийн 45 орны 5000 орчим хүүхэд оролцсон дэлхийд чансаагаараа 6-д эрэмбэлэгддэг тус тэмцээнд Улаанбаатар хот болон 9 аймгийн сургуулиас шалгарсан 5-14 насны сурагчид оролцсон байна.
“Тояа” Хүүхэд хөгжлийн академи нь 2008 оноос Соробан сампин, баруун тархи хөгжүүлэх сургалтыг улсын хэмжээнд явуулж буй аж.

Нийт нутгийн 40 гаруй хувь нь цастай байна. Булган аймгийн Баяннуур, Бугат, Бүрэгхангай, Гурванбулаг, Дашинчилэн, Рашаант сум, Завхан аймгийн Сонгино сум, Орхон аймгийн Баян-Өндөр, Жаргалант сум, Өвөрхангай аймгийн Бүрд, Есөнзүйл сум, Сэлэнгэ аймгийн Баруунбүрэн, Орхонтуул сум, Төв аймгийн Баян-Өнжүүл, Лүн сум гээд зургаан аймгийн 15 суманд орсон цасны зузаан 21-35 см-т хүрчээ.

Харин Баян-Өлгий аймгийн Сагсай сум, Булган аймгийн Могод, Сэлэнгэ, Хишиг-Өндөр сум, Дорнод аймгийн Халхгол сум, Завхан аймгийн Баянтэс, Баянхайрхан, Тосонцэнгэл, Түдэвтэй, Тэс, Цэцэн-Уул сум, Сүхбаатар аймгийн Асгат, Мөнххаан, Сүхбаатар сум, Сэлэнгэ аймгийн Ерөө сум, Төв аймгийн Бүрэн, Жаргалант, Цээл сум, Увс аймгийн Баруунтуруун, Малчин, Тариалан, Хяргас сум, Хэнтий аймгийн Өндөрхаан, Мөрөн гээд нийт есөн аймгийн 24 суманд 11-20 см зузаан цастай, өвөлжилт хүндхэн байгаа гэв.

АН-ын дэргэдэх Ардчилсан залуучуудын холбоо /АЗХ/-ноос “Андууд нэг гэр бүл” төслийн хүрээнд 21 аймаг, 9 дүүргийн Эрүүл мэндийн төвд хэвтэн эмчлүүлж буй нярай үрсэд зориулан үндэсний “Тоди” брэндийн 70 мянган живх хандивлах аяныг эхлүүлээд байна.

Нийслэлийн хэмжээнд гал түймрийн дуудлага нэмэгдэж, иргэд гал түймэрт өртөж эрүүл мэнд амь насаараа хохирох тохиолдол гарч байна.

Засгийн газрын хэрэг эрхлэх газрын Орон нутгийн удирдлага зохицуулалтын газраас 10 аймаг, нийслэлийн 3 дүүргийн ЗДТГ, түүний асуудал хариуцсан хэлтсийн удирдлагуудтай цахим хурал хийж, “Монгол Улсад Нийгмийн эгэх хариуцлагыг бэхжүүлэх нь” төслийн хэрэгжилтийн тайланг хэлэлцлээ.

Швейцарийн хөгжлийн агентлаг Дэлхийн банкнаас хамтран нийт гурван сая ам.долларын санхүүжилтээр Сэлэнгэ, Сүхбаатар, Дорнод, Хэнтий, Говь-Алтай, Өвөрхангай, Увс, Ховд, Говьсүмбэр, Хөвсгөл аймаг, нийслэлийн Баянзүрх, Сонгинохайрхан, Чингэлтэй дүүрэгт энэхүү төслийг 2015 оноос хэрэгжүүлж байна.

Тухайн орон нутгийн иргэдийн оролцоог удирдах төвшинд хангах, иргэд болоод төрийн бус байгууллагуудын чадавхийг нэмэгдүүлэх, тулгамдаж байгаа асуудлуудыг иргэдийнхээ санал дээр үндэслэн удирдлагын баг нь гаргаж, шийдвэрлэх гарцыг олж байх тогтолцоог бий болгож хэвшүүлэх нь энэхүү төслийн эцсийн зорилго юм. Ингэснээр засаг захиргааны нэгж бүрт удирдлага нь иргэдээ сонсдог, иргэд нь орон нутгийнхаа хөгжилд шууд бусаар оролцдог болох явдал.

Энэ онд Дархан-Уул, Булган аймгууд иргэдийнхээ дунд тандалт хийж төрийн бус байгууллагуудын тусламжтайгаар санал асуулга явуулсан байна. Тайлангийн хурлаар судалгааны дүнгээ танилцууллаа. Аймгийн төв, алслагдсан сум, хөдөө багийн малчид гэх мэт нийгмийн бүх давхаргын төлөөллөө хамруулахыг зорьжээ. Нийт 12 салбарыг хамруулсан 84 үзүүлэлттэй 32 асуулт бүхий судалгаанд аймаг тус бүрт 800 гаруй өрх хамрагдсан байна. Төрийн үйлчилгээ, эрүүл мэнд, боловсролын салбарын үйл ажиллагааны хүртээмж чанарт иргэдийн 50 гаруй хувь нь сэтгэл ханамжтай гэсэн хариулт өгчээ. Харин уул уурхай, зам тээвэр, хил гаалийн үйл ажиллагаатай холбоотой асуултуудад ихэвчлэн мэдэхгүй гэсэн хариулт ирүүлжээ.

Иргэдийн нийгмийн боловсролыг нэмэгдүүлэх, орон нутгийн удирдлагаас явуулж буй үйл ажиллагааг байнга сурталчлах, үнэн бодит мэдээллээр тогтмол хангаж байх нь чухал гэж судалгааны байгууллага зөвлөжээ.

Булган аймгийн ЗДТГ-аас энэхүү иргэдээс ирүүлсэн саналд үндэслэн ирэх оны ажлын төлөвлөгөөндөө 8 асуудлыг хэрэгжүүлэхээр тусгасан байна гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

УИХ-ын гишүүн НББСШУ-ны байнгын хорооны дарга Ё.Баатарбилэг, УИХ-ын гишүүн Д.Тэрбишдагва нар өнөөдөр (2017.12.27) Сонгинохайрхан дүүргийн зарим сургууль, цэцэрлэгийн үйл ажиллагаатай танилцав.

Нийслэлийн Засаг дарга бөгөөд Улаанбаатар хотын Захирагч С.Батболд 2016-2020 оны үйл ажиллагааны хөтөлбөртөө Улаанбаатар хотыг Зүүн хойд Азийн бизнес, аялал жуулчлал, соёлын төв болгох зорилт дэвшүүлэн ажиллаж байгаа бөгөөд өнөөдөр Улаанбаатар хотод тулгарч буй томоохон асуудлын нэг нь такси үйлчилгээний, чанар, хүртээмж, аюулгүй байдал болоод байна. Улаанбаатар хотын такси үйлчилгээний хүртээмж, стандарт хангалтгүй байгаагийн нэг жишээ нь өнгөрсөн 3 жилийн байдлаар такси үйлчилгээтэй холбоотой 20 мянга орчим гэмт хэрэг цагдаагийн байгууллагад бүртгэгдсэн тоо баримт байна. Тиймээс Нийслэлийн Засаг дарга С.Батболд дэлхийн томоохон хотуудын жишгийн дагуу Улаанбаатар хотод такси үйлчилгээ нэвтрүүлэх бэлтгэлийг хангаж, уг ажлыг хариуцан зохион байгуулах Ажлын хэсгийг байгуулан ажиллаж байна. Энэхүү Ажлын хэсгийг нийслэлийн Засаг даргын Ахлах зөвлөх ахлан ажиллаж байгаа юм. Ажлын хэсгийн бүрэлдэхүүнд нийслэлийн Засаг даргын тамгын газрын Төсөл, хөтөлбөр, хамтын ажиллагааны тасгийн дарга, нийслэлийн Тээврийн газрын дарга, нийслэлийн Мэдээлэл, технологийн газрын дарга, нийслэлийн Авто замын хөгжлийн газрын орлогч дарга, Замын цагдаагийн албаны Нийслэлийн замын хөдөлгөөний хяналтын газрын дарга, “Улаанбаатар хотын хөгжлийн корпорац”-ийн захирал тус тус ажиллаж байна.

Улаанбаатар хотын такси үйлчилгээ 1990 онд өмч хувьчлалаар түр зогссон боловч 1993 оноос үйл ажиллагаа нь дахин сэргэж, 2003 онд нийслэлийн такси үйлчилгээний тээврийн хэрэгслийн тоо дээд цэгтээ хүрч 61 байгууллагын 3960 тээврийн хэрэгсэл буюу нийслэлийн /2003 оны хүн ам 869,912/ 1000 иргэн тутамд 4 такси оногдон, дэлхийн хөгжингүй орнуудын жишиг төвшинд хүрч байсан статистик байдаг. Гэвч 2004 оноос энэ үзүүлэлт тогтмол буурсаар ирсэн бөгөөд 2017 оны байдлаар 12 аж ахуйн нэгжийн 539 тээврийн хэрэгсэл такси үйлчилгээг нийслэлийн иргэдэд үзүүлж байна. Дэлхийн томоохон хотуудын оршин суугчдын 1000 хүн тутамд 3-4 такси үйлчилж байвал эрэлт, хэрэгцээ хангагдана гэж үздэг стандартын дагуу өнөөдрийн такси үйлчилгээний хүртээмж дэлхийн жишгээс 8-10 дахин бага байгаа байгаа бөгөөд төлбөр тооцооны систем, үйлчилгээний стандарт томоохон хотуудын жишгээс хол хоцроод байгааг Ажлын хэсгийн дарга Д.Мөнх-Эрдэнэ хэлж байсан юм.

Мөн өнөөдөр нийслэлийн хэмжээнд 28 такси зогсоол байгаа нь 1,3 сая иргэнтэй хотын хувьд хангалтгүй гэж Ажлын хэсэг дүгнэж байгаа бөгөөд такси үйлчилгээ үзүүлж байгаа аж ахуйн нэгжүүдийн тээврийн хэрэгслийн дундаж наслалт 6,6 жил байгаа нь тээврийн хэрэгслийн бүрэн бүтэн, найдвартай байдал дээр анхаарлаа хандуулсан бодлого боловсруулахыг ч шаардаж байгаа юм. Технологийн дэвшилд буюу GPS, төлбөр тооцооны ухаалаг системд суурилсан такси тээврийн үйлчилгээг нэвтрүүлэхэд Ажлын хэсэг гол анхаарлаа хандуулан ажиллаж байгаа юм байна. 2018 оноос эхлэх энэхүү такси үйлчилгээг төр-хувийн хэвшлийн хамтын ажиллагааны хүрээнд хэрэгжүүлэх бөгөөд 500 гаруй ажлын байрыг шинээр бий болгох юм байна гэж нийслэлийн ЗДТГ-ын Хэвлэл мэдээлэл, олон нийттэй хаpилцах хэлтсээс мэдээллээ.

Онцгой байдлын ерөнхий газраас өндөржүүлсэн бэлэн байдал зарласантай холбогдуулж өнөөдөр мэдээлэл хийлээ. Энэ онд байгалийн онцгой үзэгдэл, ой хээрийн түймэр, галын болон үер усны гэх мэт 4182 дуудлага хүлээн авч, авран хамгаалах ажиллагааг ОБЕГ явуулжээ. Дээр дурдсан шалтгааны улмаас энэ жил 200 гаруй хүн амиа алдаж, 77.7 тэрбум төгрөгийн хохирол учирсан байна. Одоогийн байдлаар өвөлжилтын байдал хэвийн байна. Мөн өнгөрсөн жилүүдийг бодвол харьцангуй дулаан байгаа бөгөөд өвс тэжээлийн нөөцийг сайн бэлтгэсэн гэдгийг албаны хүмүүс онцолж байна. Ой хээрийн түймрээс улбаалан 585 га талбай түймэрт өртсөн гэв.

ХҮЙТНИЙ ЭРЧ ЧАНГАРНА ГЭВ

Энэ сарын 28-аас баруун аймгуудын нутгаар хүйтний эрч чангарч, цасан шуурга шуурна гэлээ. Ялангуяа Завхан аймгийн нутгаар онц хүйтрэх аж. Албаны хүмүүс онцын шаардлагагүй үед хөдөө орон нутгаар зорчихгүй байхыг анхаарууллаа. Арванхоёрдугаар сарын 30-нд төвийн аймгуудын нутгаар хүчтэй цасан шуурга шуурах төлөвтэй байна. Харин энэ сарын 29-нд ихэнхи нутгаар хүйтний эрч чангарна гэв. Энэ үеэр Хүрэн бэлчэрийн хөндий, Дархадын хотгор, Увс нуур, Идэр, Тэс, Завхан голын сав газраар 41-46 градус хүрэх төлөвтэй байна. Харин Хараа, Ерөө, Орхон, Сэлэнгэ, Туул, Хэрлэн, Онон голын сав нутгаар 36-42 градус хүрч хүйтэрнэ гэлээ. Харин бусад нутгаар 25-30 градус хүрч хүйтэрнэ.

ОБЕГ-аас “Хэдэн жилийн өмнө энэ жилийн нөхцөл байдалтай ижил тохиолдол гарч, долоон хүн амиа алдаж, 70 гаруй хүнийг эрэн хайх ажиллагаа явуулсан. Тиймээс цаг агаарын нөхцөл байдалтай холбоотойгоор малчид бага насны болон ахмад настнуудыг малд явуулахгүй байхыг зөвлөж байна. Мөн цасан шуурга шуурч, замын нөхцөл хүндэрч болзошгүй тул тээврийн хэрэгслийн бүрэн бүтэн байдлыг хангаж, баталгаатай тээврийн хэрэгсэл, зам сонгохыг сэрэмжлүүлж байна” гэлээ.

Б.АМАРТҮВШИН