Month: October 2017

Монгол Улсын их сургуулийн шинэ номын сан өнөөдөр үүд хаалгаа нээж байна. Нээлтийн үйл ажиллагааанд Монгол Улсын Ерөнхийлөгч Халтмаагийн Баттулга, БСШУСЯ-ны сайдын үүрэг гүйцэтгэгч Г.Чулуунбаатар, МУИС-ийн захирал Я.Төмөрбаатар нар оролцлоо.

Энэ үеэр Монгол Улсын Ерөнхийлөгч Х.Баттулга “Өнөөдөр их сайхан өдөр байна. Би Монгол Улсын Ерөнхийлөгч болчихоод Азидаа байхгүй номын сан нээгээд нээлтийг нь хийх юмсан гэж боддог байлаа. Харин Монгол Улсын их сургууль маань 75 жилийнхээ ойгоор энэ сайхан номын санг нээж байгаад тун баяртай байна. Ном бол ертөнцийг харах цонх гэж бидний багад сургадаг байлаа. Одоо ч сургадаг байх. Цаашдаа ч сургана гэдэгт итгэлтэй байна. 1942 онд дэлхийн хоёрдугаар дайны тэр хүнд үед 100 гаруйхан номтой нээгдэж байсан номын сан маань өнөөдөр 400 гаруй мянган номтой томоохон номын сан болж байгаад баярлаж, бахархахгүй байхын аргагүй. Энэ жишгээр олон сайхан сургуулиуд маань стандартад нийцсэн номын сантай болох болтугаа гэж ерөөе. Энэхүү жишиг номын сан маань цаашдаа ч иргэдэд нээлттэй номын сан болно гэж бодож байна. Мөн интерьер дизайн, тавилга гээд бүхий л зүйлсийг Монголын маань аж ахуй нэгж, компаниуд хийсэнд үнэхээр бахархалтай байна. Ингээд Монгол Улсын их сургуулийн эрдэмтэн багш нартаа түүхт ойн болоод шинэхэн номын сангаа нээж байгаад нь халуун баяр хүргэе” хэмээсэн юм.

2014 онд номын сангийн барилгын шавыг нь тавьж, хөрөнгө оруулалтын дийлэнхийг сургуулийнхаа нөөц бололцоогоор шийдэж, 16 тэрбум төгрөгөөр босгосон номын шинэ өргөөний зургаан давхар шилэн барилга нь МУИС-ийн хичээлийн нэг, хоёрдугаар байрны голд сүндэрлэв. Аливаа их, дээд сургуулийн хөгжлийн хэмжүүр, нүүр царай бол номын сан байдаг. 75 жилийн түүхтэй МУИС-ийн Номын сан 2017-2018 оны хичээлийн жилд орчин үеийн дизайны шийдэл бүхий ая тухтай орчинг бүрдүүлсэн номын сангийн шинэ байранд нүүн орж, МУИС төдийгүй Монголын дээд боловсролын салбарын номын сангийн нүүр царай болохуйц эрдэм шинжилгээ, сургалт судалгааны түшиц номын сан мэдээллийн төв ийнхүү нээгдэж байна.

Энэхүү номын сан нь 360 000 гаруй хэвлэмэл болон цахим ном, сонин, сэтгүүлийн сан хөмрөгтэй. 1000 орчим CD, зохиогчийн эрхтэй 20 гаруй цахим ном, 2000 орчим магистрын ажил, ОУ-ын 16 онлайн мэдээллийн санг ашиглах боломжтой цахим уншлагын танхимтай. Сүүлийн үеийн тоног төхөөрөмж бүхий иж бүрэн тохижилттой “Ном сэргээн засварлах лаборатори” ажиллана. МУИС-ийн багш, ажилтан, оюутнууд СиСи-д бүртгэлтэй үнэмлэхээр номын санд үйлчлүүлэх буюу цахим ном унших боломжтой юм байна.

Нийслэлийн Статистикийн газраас гаргасан, энэ долоо хоногийн өргөн хэрэглээний бараа бүтээгдэхүүний үнийн судалгааг хүргэж байна.

Махны үнэ

Хонины ястай мах нэг килограмм нь дунджаар 5910 төгрөг, үхрийн ястай мах нэг килограмм нь дунджаар 7000 төгрөгийн үнэтэй байна. Үхрийн ястай махны үнэ өмнөх долоо хоногтой харьцуулахад 2.5 хувиар буюу 180 төгрөгөөр, үхрийн цул махны үнэ 1.1 хувиар буюу 90 төгрөгөөр буурчээ. Ажиглалтаар үхрийн мах “Хархорин” хүнсний захад хамгийн хямд буюу 5400 төгрөг, харин “Бөмбөгөр” хүнсний захад хамгийн өндөр үнэтэй буюу 7300 төгрөг байна. Хонины ястай махны үнэ өмнөх долоо хоногтой харьцуулахад 3.8 хувиар буюу 235 төгрөг, хонины цул махны үнэ 2.2 хувиар буюу 130 төгрөгөөр тус тус буурчээ. Ажиглалтаар хонины мах “Хархорин” хүнсний захад хамгийн хямд буюу 4300 төгрөгөөр, харин “Меркури” хүнсний захад хамгийн өндөр үнэтэй буюу 6000 төгрөгөөр худалдаалж байна.

Гурилын үнэ

Хүнсний томоохон зах, дэлгүүрт “Алтан тариа” савласан нэг кг гурилын үнэ дээд зэрэг нь 1250-1500 төгрөг, 1-р зэргийнх 1000-1300 төгрөг, 2-р зэргийнх 819-900 төгрөг байна. Худалдан авагч олон байдаг “Хүчит шонхор”, “Таван эрдэнэ”, “Бөмбөгөр”, “Баянзүрх”, “Хархорин” хүнсний захуудад задгайгаар буюу шуудайгаар худалдаж буй нэг кг дээд зэргийн “Алтан тариа” гурилын үнэ 1300 төгрөгийн үнэ ханштай байв. Харин “Барс” хүнсний захад дээд зэргийн “Алтан тариа” гурил 1250 төгрөг, 1-р зэргийн гурил 1100 төгрөгөөр тус тус зарагдаж байна.

Төмс, хүнсний ногоо

Өмнөх долоо хоногтой харьцуулахад монгол төмс 0.8 хувиар буюу 10 төгрөгөөр, лууван 20.9 хувиар буюу 435 төгрөгөөр, байцаа 0.3 хувиар буюу 5 төгрөгөөр буурчээ.

Санхүүгийн зохицуулах хорооноос нэр бүхий есөн компанийн үнэт цаасны зах зээлд зохицуулалттай үйл ажиллагаа эрхлэх тусгай зөвшөөрлийг хүчингүй болгохоор болсон байна.

Тус хорооноос эрх зүйн байдлын тухай хуулийн 6.1.3, ҮЦЗЗТХ-ийн 30.1.2, Аж ахуйн үйл ажиллагааны тусгай зөвшөөрийн тухай хуулийн 10.1.4 заалтыг үндэслэн дээрх тусгай зөвшөөрлийг хүчингүй болгох тогтоол гаргажээ.

Тодруулбал, “Бага хээр ҮЦК” ХХК, “Бумбат шигтгээ ҮЦК”, “Превалент ҮЦК”, “Финанс линк групп ҮЦК”, “Говийн ноён нуруу ҮЦК”, “Би Би Эс ЭС ҮЦК”, “Зюс капитал ҮЦК”, “Эм Даблью Ти Эс ҮЦК”, “Сэлэнгэ түмэн ҮЦК” зэрэг компанийн тусгай зөвшөөрлийг хүчингүй болголоо.

“Оргил рашаан сувилал”-ын 115 ажилтан байгууллагыг нь хувьчилсан тул 12 ба түүнээс дээш сарын цалинтай тэнцэх хэмжээний мөнгөн төлбөр олгохыг төрөөс шаардаж байгаагаа мэдэгдлээ.

Рашаан сувилал тогтмол үйл ажиллагаа эрхэлж нийслэлчүүддээ төдийгүй улс орондоо танигдсан 40 жилийн түүхтэй, ашигтай ажиллаж байсан “Оргил” рашаан сувилал ТӨХК-ийг энэ сарын 3-ны өдөр дуудлага худалдаагаар зарсан байна.

Харин энэ нээлттэй дуудлага худалдаагаар 15 тэрбум төгрөгийн үнэ хүрчээ. Дуудлага худалдааны эцсийн шатанд “үйл ажиллагааны чиглэлийг өөрчлөхгүй” гэсэн болзлыг хассан тул тус байгууллагын ажилтнууд эсэргүүцэн хэвлэл мэдээлэлд ийнхүү хандаж байна.

1933 оноос хойш олон хүний хөдөлмөр, эрдэм мэдлэг дээр бүтсэн энэ байгууллагад 115 ажилтан ажилладаг. Энэ хувьчлалын асуудлаас үүдэн энэ ажилчдын эрх ашиг хөндөгдөж, ажлын байрны баталгаагүй болж байна хэмээн хурал зохион байгуулагчид онцолж байв. Иймд ажлаас чөлөөлөгдсөн эсэхээс үл хамааран 12 ба түүнээс дээш сарын цалинтай тэнцэх хэмжээний мөнгөн төлбөрийг төр олгох ёстой гэж тэд хэлж байна. Энэ нь ойролцоогоор 949 мянган төгрөг болох бөгөөд байгууллагыг зарсан 15 тэрбум төгрөгийн 6.3 хувьтай тэнцэнэ гэв.

Дорнод болон Сүхбаатар аймагт өчигдөр буюу энэ сарын 04-нд гарсан хээрийн гурван түймрийг бүрэн унтраасан талаар ОБЕГ-аас мэдээлэв.

Тухайлбал, Дорнод аймгийн Хөлөнбуйр сумын Баян-Өлзийт багийн “Баянцагаан” гэдэг газар хээрийн түймэр гарсан тухай дуудлага өчигдөр 13.30 цагт ирсэн бөгөөд аймгийн Онцгой байдлын газрын 12 алба хаагч, орон нутгийн 28 иргэн ажиллаж бүрэн унтраасан байна. Түймэрт “Баян Сэмитал” компанийн эзэмшлийн 62-93 УНҮ улсын дугаартай “Пикаб” загварын хагас ачааны автомашин шатжээ. Мөн өдөр тус аймгийн Чойбалсан сумын Сүмбэр багийн “Ар толгой” гэдэг газар хээрийн түймэр гарсныг бүрэн унтраажээ. Энэхүү түймэрт иргэн Б-гийн 700 боодол өвс, Э-гийн эзэмшлийн 66-29 ДОР улсын дугаартай “Приус-20” загварын суудлын автомашин шатсан байна.

Түүнчлэн Сүхбаатар аймгийн Сүхбаатар сумын Шинэбулаг багийн “Баруун бунхан” гэдэг газарт гарсан хээрийн түймрийг аймгийн Онцгой байдлын газрын 24 алба хаагч, орон нутгийн 33 иргэн хамтран бүрэн унтраажээ.

Дэлхийн багш нарын 23, Монголын багш нарын 51 дэх өдөр өнөөдөр тохиож байна. Багш нарын өдрийн ёслол хүндэтгэлийн арга хэмжээнд БСШУ-ны сайдын үүрэг гүйцэтгэгч Г.Чулуунбаатар, БСШУЯ-ны Төрийн нарийн бичгийн дарга Ж.Болормаа, Нийслэлийн Засаг дарга бөгөөд Улаанбаатар хотын Захирагч С.Батболд, нийслэлийн Засаг даргын орлогч Ш.Анхмаа, нийслэлийн Боловсролын газрын дарга Ж.Гантулга болон МУ-ын их, дээд сургууль, нийслэлийн төрийн болон төрийн бус өмчийн сургууль, цэцэрлэгийн багш ажилчид, удирдлагууд оролцлоо.

Ёслол хүндэтгэлийн арга хэмжээний үеэр нийслэлд үйл ажиллагаа явуулж буй төрийн болон төрийн бус өмчийн сургууль цэцэрлэгийн оны шилдгүүдийг тодруулсан юм.

Нийслэлийн 2017 оны тэргүүний төрийн бус өмчийн цэцэрлэгээр Ж.Наран эрхлэгчтэй Чингэлтэй дүүргийн “Басархан” цэцэрлэг тодорсон бол төрийн өмчийн цэцэрлэгээр н.Булган эрхлэгчтэй 96 дугаар цэцэрлэг шалгарлаа. Шагналын нийслэлийн Боловсролын газрын дарга Ж.Гантулга гардуулан өглөө.

Харин нийслэлийн 2017 оны тэргүүний төрийн бус өмчийн сургуулиар Сонгинохайрхан дүүргийн гадаад хэл, математикийн гүнзгийрүүлсэн сургалттай “ТОЛЬТ” бүрэн дунд сургууль шалгарсан бол төрийн өмчийн оны тэргүүний сургуулиар нийслэлийн Сүхбаатар дүүргийн физик, математикийн гүнзгийрүүлсэн сургалттай 11 дүгээр суургууль тодорсон юм. Шагналыг нийслэлийн Засаг даргын орлогч Ш.Анхмаа гардуулан өгч, баяр хүргэлээ.

Мөн энэ үеэр нийслэлийн Боловсролын газраас уламжлал болгон шалгаруулдаг “Боловсрол ээлтэй Засаг дарга” номинацийн эзнээр Хан-Уул дүүргийн Засаг дарга Ж.Алдаржавхланг тодруулж өргөмжлөл гардуулав гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

“Жорлонгийн нүхэн дотор хайрга дэвсэж өгснөөр бохир өтгөн хайрган дээр тунаж үлдэх бөгөөд түүнийг 3- 4 жилд нэг удаа цооногоор соруулж цэвэрлэх зориулалттайгаар ариун цэврийн байгууламжаа барьсан хэмээн Сайнцагаан сумын 5- р багийн иргэн Б. Дагвадорж ярилаа. Тэднийх шиг ариун цэврийн байгууламжаа бусдад үлгэр болохуйцаар сайжруулсан айл өрхүүдийг урамшуулав. Ийм болзолт аяныг “Дэлхийн Зөн- Дундговь” Орон нутгийн хөгжлийн хөтөлбөр, Сайнцагаан сумын ЗДТГ- тай хамтран зарлаад байсан юм.

Засгийн газрын тогтоолоор баталсан агаар, орчны бохирдлыг бууруулах үндэсний хөтөлбөрт сайжруулсан ариун цэврийн байгууламжид хамрагдсан хот суурин газрын хүн амыг 2019 он гэхэд 60, 2025 он гэхэд 80 хувьд хүргэх зорилт бий. Үүнд аймаг, нийслэлийн Засаг дарга нар гол анхаарал хандуулж ажиллах үүрэгтэй. Гэвч Дундговь аймгийн хувьд одоогоор ариун цэврийн байгууламжийг сайжруулах тал дээр өрнөсөн дорвитой ажил хараахан байхгүй байгаа юм. Харин дээрх аян гэр бүлийнхээ эрүүл мэндийн төлөө аж төрж буй орчноо сайжруулж, ариун цэврийн байгууламжаа тохижуулахад иргэдийг идэвхижүүлэх зорилготой бөгөөд аян хоёр дахь жилдээ ийнхүү өрнөсөн юм.

Өрх бүрийг сайжруулсан ариун цэврийн байгууламжтай болгох гурван сарын аянд идэвхитэй оролцсон Сайнцагаан сумын 20 гаруй айл өрхөөс 9 өрхийг шалгаруулсан байна. Ариун цэврийн байгууламжаа стандартын дагуу сайжруулсан Сайнцагаан сумын 6- р багийн иргэн Д. Эрдэнэхуяг, Ш. Эрдэнэбат, 5- р багийн иргэн Б. Дагвадорж, 9-р багийн иргэн А. Ганбат нарыг угаалгын машин, 9-р багийн иргэн А. Алтанхүү, 8- р багийн иргэн н.Лувсанбат, 6- р багийн иргэн н. Пүрэвсүрэн нарыг тоос сорогч, 9- р багийн иргэн С. Цэцэгмаа, 5-р багийн иргэн Б. Гийраа нарыг будаа агшаагчаар тус тус урамшуулж, эрүүл ахуйн орчноо бүрдүүлэхэд идэвхи гаргасанд нь аяныг зохион байгуулагчид талархал илэрхийлэв.

Иргэд Монгол Улсад мөрдөгдөж байгаа нүхэн жорлон, угаадасны нүхний эрүүл ахуйн стандарт шаардлагын дагуу ариун цэврийн байгууламжийг хашаандаа барьж байгуулахад анхаарсан бөгөөд ариун цэврийн байгууламж нь агааржуулагчтай, доторлогоо, гэрэлтүүлэгтэй байх, бохир усны цооног тусдаа, ариутгал хийсэн байх ёстой гэх зэргээр наад захын шаардлагыг бүрэн хангасан байна.

Дэлхийн багш нарын 23, Монголын багш нарын 51 дэх өдрийн хүндэтгэл ёслолын арга хэмжээ өнөөдөр боллоо. Ёслолын арга хэмжээнд Нийслэлийн Засаг дарга бөгөөд Улаанбаатар хотын Захирагч С.Батболд оролцож нийт багч ажилчдад баяр хүргэж үг хэллээ. Тэрбээр хэлсэн үгэндээ

“Эрхэм хүндэт багш сурган хүмүүжүүлэгчид ээ

Эрхэм зочид, боловсролын удирдах ажилтануудаа!

21-р зууны хөгжлийн түүчээ болсон эрхэм баян эрдэм мэдлэгийг түгээн дэлгэрүүлэгч багш сурган хүмүүжүүлэгчид, энэрэл хайр, дадлага туршлагаар залуу багш нараа халамжлан хүмүүжүүлэгч ахмад багш нар, ирсэн зочид төлөөлөгчид та бүхэндээ Нийслэлийн төр захиргааны байгууллагын нэрийн өмнөөс болон хувиасаа Монголын багш нарын 51 дэх өдрийн баярын мэндчилгээ дэвшүүлье.

Монгол Улсын Засгийн газрын болон нийслэлийн Засаг дарга бөгөөд Улаанбаатар хотын захирагчийн 2016-2020 оны үйл ажиллагааны хөтөлбөр, нийслэлийн нийгэм эдийн засгийн зорилтод сургууль цэцэрлэгийн хүртээмжийг нэмэгдүүлэх, багшийн ачааллыг бууруулах, сургуулийн өмнөх насны хүүхдийг цэцэрлэгт бүрэн хамруулах, хүүхдийг амьдрах ухаан, бие даах чадвар, харилцааны зөв дадал хэвшилд сургаж, үндэсний бахархал, глобал сэтгэлгээтэй иргэн болгон төлөвшүүлэх, багшийн мэргэжил, ур чадварыг хөгжүүлэх “Нийслэлийн багш” төсөл хэрэгжүүлэн, багшийн нийгмийн асуудалд дэмжлэг үзүүлж, ажиллах орчныг сайжруулах бодлого боловсруулан хэрэгжүүлэх зэрэг зорилтуудыг тусгасан юм. Мөн НИТХ-ын Тэргүүлэгчдийн хурлаар “Нийслэлийн боловсрол-2020” хөтөлбөрийг баталлаа.

Монгол Улсын хэмжээнд сургуулийн өмнөх болон ерөнхий боловсролын нийт 2132 байгууллага үйл ажиллагаа явуулж байгаагаас 848 нэгж байгууллага буюу 39,8 хувь нь нийслэл Улаанбаатар хотод байдаг.

2020 он гэхэд нийслэлийн сургууль, цэцэрлэгийн хүртээмжийг нэмэгдүүлэн, 50 сургууль шинээр баригдаж, 3 ээлжтэй сургуулиудыг 2 ээлжинд бүрэн шилжүүлнэ. Мөн цэцэрлэггүй байгаа 27 хороог цэцэрлэгтэй болгож, 60 цэцэрлэг шинээр бариулснаар сургуулийн өмнөх боловсролд хамрагдалтыг 85 хувьд хүргэнэ.

Өнөөдрийн байдлаар нийслэлийн хэмжээнд багшийн ачаалал өндөр, цэцэрлэгийн болон бага ангийн нэг багшид дунджаар 63 хүүхэд ногдож байна. Иймээс багшийн ажлын ачааллыг бид бууруулна.

Боловсролын байгууллагад сэтгэл зүйн таатай орчин бүрдүүлж, багш ажилтны ёс зүй, харилцаа хандлагыг сайжруулж, нэр хүндийг өсгөнө.

Ерөнхий боловсролын сургууль, цэцэрлэгийг мэргэжлийн багшаар 100 хувь хангаж, мэргэжлийн зэрэгтэй багшийн эзлэх хувийг 45 хувьд хүргэнэ.

Багш удирдах ажилтны нийгмийн асуудал, хөдөлмөрийн үнэлэмж, урамшуулал олгох эрх зүйн орчинг боловсронгуй болгох чиглэлээр судалгаа гарган холбогдох байгууллагуудад санал хүргүүлэн шийдвэрлүүлнэ.

Боловсролын үйлчилгээний чанарыг сайжруулж, эх хэлний боловсролын чанарын түвшинг ахиулна. Бидний өмнө хийж хэрэгжүүлэх олон ажил байгааг тоймлон та бүхэндээ хүргэлээ.

Ерөнхий боловсролын сургууль, цэцэрлэгүүд хүүхэд бүрийг эх хэл, үндэсний соёл, ёс уламжлалаа эрхэмлэдэг, сурах арга барилтай, авьяас чадвараа нээн хөгжүүлдэг, өөртөө итгэлтэй, бүтээлч сэтгэлгээтэй, эрүүл аж төрөх зөв дадал хэвшилтэй, насан туршдаа суралцах, хамтран ажиллаж амьдрах чадвартай, иргэн болж төлөвшихөд чиглэсэн хичээл, сургуулиас гадуурх сонгон, секц, дугуйланг хичээллүүлж, хүүхдийн авьяас чадварыг нээн хөгжүүлэх олон талт сургалт, хүмүүжлийн үйл ажиллагаа зохион байгуулдаг. Энэ их үйлсэд хүчин зүтгэж байгаа ерөнхий боловсролын сургууль, цэцэрлэгийн удирдлага, ажилтан, албан хаагч, багш нартаа ажлын өндөр амжилт хүсье. Эрхэм баян-эрдэм ном дэлгэртүгэй” хэмээсэн юм.

Мөн энэ үеэр нийслэлийн Төрийн болон төрийн бус өмчийн сургууль, цэцэрлэгүүд оны шилдэгээ тодрууллаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.