“Өдрийн үлдэгсэд” болон бусад романаараа 2017 оны Утга зохиолын салбарын Нобелийн шагналыг япон гаралтай, Их Британийн зохиолч Казүро Ишигүро хүртэхээр болсныг Шведийн ШУА мэдэгдлээ.
Тэрбээр 1982 онд “Цайвартан харагдах толгод” нэртэй анхны романаа хэвлүүлж байжээ.
Энэ оны Утга зохиолын салбарын Нобелийн шагналыг түүнд авчрахад гол нөлөө үзүүлсэн “Өдрийн үлдэгсэд” романд хааны ордны үйлчилгээний албыг хариуцан ажилладаг хөгшин британи даамал өөрийн өнгөрснөөс өнөөг хүртэлх амьдралаа дурсан санаж байгаа болон дэлхийн II дайнаас өмнөх язгууртнуудын амьдралын тухай өгүүлдэг байна.
Тэрбээр зохиол бүтээлүүддээ юунаас ч үл хамааран үзэл бодлоо чөлөөтэй илэрхийлдэг бөгөөд гол төлөв хүний дотоод сэтгэлийн мөн чанар, өнгөрсний тухай, өнгөрсөнд ямар байсан хүмүүс өнөөдөр чухам хэн болоод байгаадаа гайхширч буй тухай, хүмүүс бид өөрөө өөрийгөө яаж хуурдаг тухай бичдэг ажээ.
Шведийн ШУА-аас өчигдөр гаргасан мэдэгдэлд “К.Ишигүро нь хүний сэтгэлийн хүч, сэтгэл хөдлөлийг гайхамшигтайгаар илэрхийлэн гаргадаг гарамгай зохиолч юм. Бид хорвоо ертөнцтэй харилцахдаа хэрхэн өөрийгөө хуурдагийг тэрбээр “илрүүлэн” бичиж чаддаг” гэжээ.
Шведийн зохион бүтээгч Альфред Нобелийн гэрээслэлээр фикик, хими, биологи-анагаах ухаан, утга зохиол, энх тайван ба эдийн засаг гэсэн зургаан салбарт ололт амжилт гаргасан хүмүүст Нобелийн шагналыг 1901 оноос буюу одоогоос 116 жилийн өмнөөс эхлэн жил тутам олгодог болсон байна.
2017 оны Физикийн салбарын Нобелийн шагналын эзнээр Альберт Эйнштэйний таамаглаж байсан татах хүчний долгион байдгийг туршилтаар баталж чадсан Америкийн гурван эрдэмтэн, Химийн салбарын Нобелийн шагналыг биомолекулыг хөдөлгөөн дунд нь хөлдөөж, урьд өмнө нь хэзээ ч харж байгаагүй молекулын үйл хөдөлгөөнийг харах боломжийг судлаачдад олгосон крио-электрон микроскоп зохион бүтээсэн Швейцарь, Америк, Их Британийн гурван эрдэмтэн хүртэхээр болсон бол Биологи-анагаах ухааны салбарын Нобелийн шагналыг хүний бие судлалын салбарын нээлтээрээ буюу “хоногийн хэмнэлийг хянах молекулын механизм”-ыг судалсан Америкийн гурван эрдэмтэн хүртэхээр болоод байгаа юм.
Нобелийн шагналыг гардуулах ёслол А.Нобелийн нас барсан өдөр буюу 12 дугаар сарын 10-нд болдог.
Энх тайвны салбарын Нобелийн шагналыг гардуулах ёслол Норвегийн нийслэл Осло хотод болдог бол бусад салбарын Нобелийн шагналыг гардуулах ёслол Шведийн нийслэл Стокгольм хотод болдог билээ.
Нобелийн шагналыг 9 сая швед крон буюу 1.1 сая ам. доллар дагалддаг юм.
ОХУ-ын генетикийн судалгааны “Genotek” төвийн эрдэмтэд сүүлийн жилүүдэд иргэдийнхээ дунд таргалалт эрчимжих болсныг судлан оросуудын 82% нь хоол идэх дуршил төрүүлж таргалуулдаг “FTO” ген тээж байгааг тогтоожээ. Хоол идэх дуршил төрүүлэн таргалуулдаг “FTO” генийг 2007 оны эцсээр английн эрдэмтэд анх нээсэн юм. Хожим нь энэ ген мутацад орж өөрчлөгддөг төдийгүй бусад генүүдтэй харилцан үйлчилж таргалалт үүсгэдэг болох нь батлагдсан билээ.Энэхүү ген тээсэн хүн таргална гэдгээ мэдэж байсан ч хоол идээд байдагт л хамаг гай нь оршдог.Иймээс эрдэмтэд “FTO” гентэй буюу байнга идэх гээд байдаг хүмүүст аль болох илчлэг багатай хоол идэж байхыг зөвлөсөн байна.
Нийслэл, дүүргийн эдийн засаг, нийгмийг хөгжүүлэх үндсэн чиглэлийн хүрээнд өнөөдөр Баянгол дүүргийн эрүүл мэндийн төвд Мэс засал, гэмтлийн тасаг шинээр нээгдлээ. Дүүргийн иргэдэд мэс засал, гэмтлийн тусламж, үйлчилгээг тодорхой үе шаттайгаар хүргэх тус тасгийн нээлтийн арга хэмжээнд Нийгмийн асуудал хариуцсан төслүүдийн удирдагч-Нийслэлийн Засаг даргын орлогч Ш.Анхмаа, Нийслэлийн эрүүл мэндийн газрын дарга Л.Төмөрбаатар, Баянгол дүүргийн засаг дарга С.Одонтуяа болон албаны бусад хүмүүс оролцлоо.
АНУ-ын Өвчлөлтийн хяналт, эмчилгээний төв(CDC)-ийн эрдэмтэд таргалалт хорт хавдар үүсгэж байгааг зарлалаа. Бидний судалгаагаар зарим зүйлийн хорт хавдар таргалалттай холбоотой үүсдэг болох нь тогтоогдлоо. Харин энэ тухай ихэнх америкчууд мэдэхгүй байгаа нь харамсалтай хэмээн тус төвийн орлогч захирал, доктор Энн Шухат мэдэгдлээ. Мөн тус төвийн доктор Лиза Ричардсон турах нь хорт хавдраас хамгаалах сайн арга гэж хэлжээ. Учир нь эдгээр эрдэмтдийн судалгааны явцад таргалалт 13 зүйл хорт хавдар үүсгэдэг болох нь тогтоогдож өнөөдөр энэ өвчинд 630 мянган илүүдэл жинтэй америк иргэн нэрвэгдээд байгаа юм байна. АНУ таргалалтаар дэлхийд тэргүүлдэг бөгөөд гурван хүн тутмын нэг нь илүүдэл жинтэй байдаг юм.
Олон Улсын Ахмадын баяр, Нийслэлийн өдрийг угтан Баянзүрх дүүргийн Засаг даргын Тамгын газраас ахмадууддаа зориулсан олон арга хэмжээ зохион байгуулдаг уламжлалтай. Үүний нэг арга хэмжээг дүүргийн Тамгын газрын Нийгмийн хөгжлийн хэлтсээс санаачлан амжилттай зохион байгууллаа.
Монгол Улсын нийслэл Улаанбаатар хот, ОХУ-ын нийслэл Москва хотын хооронд ах дүүгийн харилцаа тогтоосны 60 жилийн ой энэ жил тохиож байна. Нийслэлийн Засаг дарга бөгөөд Улаанбаатар хотын Захирагч С.Батболд түүхт 60 жилийн ойн баярыг тохиолдуулан Москва хотноо айлчлал хийх гэж байгаа юм. Айлчлалтай холбоотойгоор хотын дарга С.Батболд болон ажлын хэсгийнхэн ОХУ-аас Монгол Улсад суугаа Онц бөгөөд Бүрэн Эрхт Элчин сайд Искандер Кубарович Азизовтой уулзлаа.
Улсын Дээд шүүхийн Эрүүгийн хэргийн танхимын тэргүүн Т.Уранцэцэг Европын аюулгүй байдал хамтын ажиллагааны байгууллагын Хүн худалдаалах гэмт хэрэгтэй тэмцэх асуудал хариуцсан тусгай төлөөлөгч, Элчин сайд Мадина Ярбуссинова тэргүүтэй төлөөлөгчдийг өчигдөр хүлээн авч уулзав.
Эрдэнэ багт шинээр баригдсан 640 хүүхдийн багтаамжтай 20 дугаар сургууль нээлтээ хийлээ. Энэ нь улсын хэмжээнд буй олон улсын стандартад нийцсэн жишиг гурван сургуулийн нэг юм.
ОХУ-ын Агаар,сансрын зэвсэгт хүчин өнгөрсөн долоо хоногт Сирид 500 байлдааны нислэг хийж террористуудын 1.4 мянган байршилд цохилт өгчээ. ОХУ-ын Агаар, сансрын зэвсэгт хүчний дэмжлэгээр сүүлийн хоёр жилд Сирийн зэвсэгт хүчин газар нутгийнхаа 90 хувийг зэвсэгт дайчдаас чөлөөлөөд байна. Ингэснээр террористуудын мэдэлд Сирийн газар нутгийн 10 хувь л үлдлээ хэмээн ОХУ-ын БХЯ-ны албан ёсны төлөөлөгч, хошууч генерал Игорь Конашенков мэдэгдэв.