Month: October 2017

Гэр бүл, хүүхэд, залуучуудын хөгжлийн газраас “Эерэг хандлага-Эрүүл оюутан” аяныг хоёр дахь жилдээ зохион байгуулах гэж байна. Тус аян нь оюутан, залуучуудыг эерэг хандлагад уриалж, хорт зуршлаас урьдчилан сэргийлэх арга замын талаар сурталчлан таниулах, эрүүл мэндийн даатгалын ач холбогдлыг ойлгуулж, даатгалд сайн дураараа хамрагдах сэдлийг бий болгох болон эрүүл мэндийн зан үйлтэй холбоотой бусад мэдээ мэдээллийг хүргэх, үзлэг шинжилгээнд сайн дураараа хамрагдах сэдлийг бий болгох зорилготой аж.

Өнгөрсөн жил энэхүү аяныг өрнүүлснээр шинээр 5435 оюутан эрүүл мэндийн даатгалд хамрагдаж, залуучуудын эрүүл мэндийн боловсролыг нэмэгдүүлэх зэрэг олон эерэг өөрчлөлт гарчээ.

Өнгөрсөн жил энэхүү аяныг өрнүүлснээр шинээр 5435 оюутан эрүүл мэндийн даатгалд хамрагдаж, залуучуудын эрүүл мэндийн боловсролыг нэмэгдүүлэх зэрэг олон эерэг өөрчлөлт гарчээ. “Эерэг хандлага-Эрүүл оюутан” аян энэ сарын 9-нд эхлэх бөгөөд уг аяныг Хөдөлмөр нийгмийн хамгааллын яам дэмжиж, Нийслэлийн Залуучуудын хөгжлийн газар, аймгийн Гэр бүл, хүүхэд, залуучуудын хөгжлийн газар болон Залуучуудын хөгжлийн төвүүд зэрэг байгууллагууд хамтран ажиллах юм байна.

Тус аянд Нийслэл хот болон орон нутаг дахь томоохон их, дээд сургууль, коллеж, мэргэжлийн сургалт, үйлдвэрлэлийн төвийн оюутан залуус хамрагдах аж.

Энэ амралтын өдрүүд буюу аравдугаар сарын 7, 8-нд ихэнх нутгаар хур тунадас, зарим газраар ахиухан хэмжээний нойтон цас орж, цасан болон шороон шуурга шуурч хүйтрэхийг Цаг уур, орчны шинжилгээний газраас онцгойлон анхааруулж байна.

Харин өнөөдөр ихэнх нутгаар үүлэрхэг. Баруун, төв, зүүн аймгуудын нутгийн хойд хэсгээр бага зэргийн хур тунадас орно. Бусад хур тунадас орохгүй. Салхи баруун хойноос секундэд 7-12 метр, Алтайн салбар уулс болон Арцбогдын өвөр хоолойгоор секундэд 15-17 метр хүрч ширүүснэ. Алтай, Хангай, Хөвсгөл, Хэнтийн уулархаг нутгаар 3-8 градус, Алтайн өвөр говиор 19-24 гоадус, говь, талын нутгаар 15-20 градус, бусад нутгаар 8-13 градус дулаан байна.

Улаанбаатар хотод үүлшинэ. Хур тунадас орохгүй. Салхи баруун хойноос секундэд 7-12 метр. Сэрүүсч 9-11 градус дулаан байна.

75 жилийн түүхт ойгоо тэмдэглэж буй МУИС-д Eрөнхийлөгчийн зарлигаар Төрийн дээд Сүхбаатарын одон гардууллаа..

Нийслэлийн Байгаль орчны газар, бурхны шашны Тарвалин хийд хамтран нийслэлийн ногоон бүсийн ойн сан бүхий газарт ургаа модонд уясан хадаг, шашны эд хэрэглэлүүдийг цэвэрлэж, устгах ажлыг энэ сарын 07-08-нд зохион байгуулах болжээ.

Сүүлийн жилүүдэд хадгийг нефьтийн шаараар хийдэг болсноор байгальд элэгдэж, шингэхээ больсон байна. Үүнээс үүдэн модонд хадаг уянаар тухайн модын ургалтыг зогсоодог аж. Тухайлбал, шилмүүс 120-140 жилийн настай байдаг ч хадаг боосны улмаас 15 жил болоод үржил шимээ алдаж, унах тохиолдол байгаа юм. Тиймээс дээрх хоёр байгууллага хамтран модонд уясан хадаг, шашны эд хэрэглэлүүдийг цэвэрлэж, устгах болжээ.

Нийслэлийн ойн сан бүхий газарт бөө мөргөлчид болон бусад шашны байгууллагууд ёслол үйлдэж, зарим эд зүйлсээ үлдээгээд явдаг байна. Тиймээс усгалын ажилаас өмнө шаардлагатай эд зүйлсээ авахыг анхааруулав.

Монгол Улсын Ерөнхийлөгч Х.Баттулга Монгол Улсын Их Сургуулийн түүхт 75 жилийн ойд зориулан өнөөдөр Төрийн ордонд болж буй “Эрдэмд түүчээлсэн 75 жил” ёслол, хүндэтгэлийн хуралд оролцогчдод илгээлт хүргүүллээ.

Илгээлтийг Монгол Улсын Ерөнхийлөгчийн Тамгын газрын дарга, МУИС-ийн төгсөгч Зандаахүүгийн Энхболд уншиж сонордуулсан юм.

Монгол Улсын Ерөнхийлөгч Х.Баттулга илгээлтдээ “Монгол Улсын дээд боловсролын ууган байгууллага – Монгол Улсын Их Сургууль байгуулагдсаны түүхт 75 жилийн ойн баярын мэндийг үе үеийн удирдлага, эрдэмтэн багш, оюутан залуус, төгсөгчид, ажилтан, албан хаагчид, эрхэм зочид Та бүхэнд өргөн дэвшүүлье.

Тэртээ 1942 онд Дэлхийн II дайны хүнд жилүүдэд Зөвлөлт Холбоот Улсын дэмжлэгтэйгээр үндэс сууриа тавьж, анагаах ухаан, зоотехник, багш нарын гэсэн 3 факультет; математик, физик, биологи, ерөнхий хими, органик хими, мал эмнэлэг, анатоми гэсэн 7 тэнхимтэй байгуулагдан, үндсэн ангид 93, бэлтгэл ангид 53 оюутан элсүүлж, анхны хичээлээ эхэлсэн Хорлоогийн Чойбалсангийн нэрэмжит Улсын Университет буюу өнөөгийн Монгол Улсын Их Сургууль (МУИС) нь бүрэлдэхүүн 5 сургууль, орон нутаг дахь харьяаллын 2 сургууль, үндэсний статустай 3 хүрээлэн, судалгааны бусад нэгжүүдтэй, бакалавр, магистр, докторын түвшний 23,000 гаруй оюутан суралцагч, 1,500 гаруй эрдэмтэн багш, ажилтантай эрдэм оюуны томоохон төв болжээ.

Монгол Улсын Их Сургууль бол улс орныхоо өнөөгийн хөгжил, ард түмнийхээ оюун сэтгэлгээний дэвшилд үлэмж хувь нэмэр оруулсан эрдэм номын гэгээн өргөө билээ. Энэ өргөөнд сурч боловсорсон сэхээтнүүд улс орныхоо хөгжлийн түүчээ, ард түмнийхээ оюуны хөтөч болсоор ирснийг түүх гэрчилнэ. Энэ сургуулиас аль ч үед нийгмийн өнгө төрх, дуу хоолой болсон манлайлагчид төрөн гарч, ардчиллын үйлсийг ч эндээс эхлүүлж байсныг монгол түмэн сайн мэднэ.

Монгол Улсын Их Сургуулийн түүхт 75 жилийн ойг тохиолдуулан, Монгол Улсын Ерөнхийлөгчийн зарлигаар тус сургуулийг Монгол Улсын төрийн дээд шагнал – Сүхбаатарын одонгоор шагнаж байгаадаа туйлын баяртай байна. Энэ шагнал нь манай улсын ууган их сургуулийн бүрэлдэхүүнээс салбарлан, бие даан гарсан МУБИС, ХААИС, ЭМШУИС, ШУТИС, Хүмүүнлэгийн ухааны их сургууль, Ховд их сургуулиудыг ч давхар шагнаж байгаа шагнал юм гэдгийг онцлон тэмдэглэе.

Их сургуульд эрдэм судлалын шударга өрсөлдөөн, бүтээлч үйл ажиллагааны бодит үр дүнд суурилсан хөгжлийн бодлого нэн чухал. Монгол Улсын төрөөс дээд боловсролын талаар баримтлах үзэл баримтлалд заасны дагуу МУИС нь Азийн шилдэг 100 их сургуульд багтана гэж стратеги төлөвлөгөөндөө тусгажээ. Энэ бол тус сургуулийн ойрын зорилт гэж харж байна. Улсаараа овоглосон үндэсний хэмжээний тэргүүлэх их сургууль маань дэлхийн чансаанд тун чамлалттай үзүүлэлттэй байгаа ч энэ байдалдаа бодитой дүгнэлт хийн, дэлхийн шилдэг 100 сургуульд багтах холын зорилгод хөтлөгдөн алсын хараа, хөгжлийн бодлого боловсруулан, хэрэгжүүлэх байх гэж найдаж, ирээдүйн хөгжлийн хүрэх оргилыг би өөдрөгөөр харж байна. Энэ өөдрөг бодлыг маань бодитой болгох нөөц боломж, эрдэм мэдлэгийн чадамж МУИС-ийн хамт олонд бий гэдэгт эргэлзэхгүй байна.

Өчигдөр миний бие тус сургуулийн орчин үеийн барилгын шилдэг шийдэл бүхий шинэ номын сангийн нээлтэд оролцлоо. Их сургуулиуд сургалтын дагнасан үйл ажиллагаанаас сургалт-эрдэм шинжилгээнд дэвшсэн бол одоо сургалт-эрдэм шинжилгээ-технологийн хэв маяг руу шилжиж, инноваци бүтээдэг, дамжуулдаг мэдлэгийн төв болон хувирч байгаа энэ цаг үед сургалт, судалгааны түшиц болон эрдэмтэн судлаачид, суралцагсдын өнөө үеийн мэдлэгийн хэрэгцээ шаардлагыг хангаж чадахуйц олон улсын жишигт хүрсэн тохилог номын сан нээгдсэн нь нь МУИС-ийн төдийгүй Монгол Улсын төрийн бодлогыг дэмжсэн том бүтээн байгуулалт болсон байна.

Дэлхийн залуус Монгол Улсын Их Сургуулийг зорин ирж, эрдэмтэн багш, оюутан суралцагчдын бүтээл дэлхийн хэмжээнд үнэлэгдэн, хувь нэмрээ оруулах цагийг түүчээлэх эрхэм үйлс тань өөдөө, зам тань дардан байхын ерөөл дэвшүүлж, МУИС-иар овоглосон хүн бүхэн, эрдмийн их өргөөний үе үеийн түүхийг бичилцэж яваа нийт хамт олон, төгсөгчдийн ажил үйлсэд нь өндөр амжилт, амьдрал бүтээлд нь хамгийн сайн сайхан бүхнийг хүсэн ерөөе.

Эрдмийн хэт цахиваас-Хөгжлийн гал бадармой.

Монгол Улсын Ерөнхийлөгч Х.Баттулга” гэжээ.

Баянзүрх дүүргийн Гэмт хэргээс урьдчилан сэргийлэх ажлыг зохицуулах салбар зөвлөлөөс иргэдэд хууль сурталчилах нээлттэй хаалганы өдөрлөгийг амжилттай зохион байгууллаа. Энэхүү өдөрлөгт дүүргийн Иргэдийн төлөөлөгчдийн хурал, Засаг даргын Тамгын газрын Хууль зүйн тасаг, Прокурорын газар, Цагдаагийн 1, 2, 3 дугаар хэлтэс, Замын цагдаагийн хэлтэс, Онцгой байдлын хэлтэс зэрэг мэргэжлийн байгууллагууд хамтран оролцсон юм.

Нээлттэй хаалганы өдөрлөгт 200 орчим иргэн хамрагдаж дээрх байгууллагуудын үйл ажиллагаагаатай танилцаж, өөрт тулгараад буй асуудлуудаа хууль журмын хүрээнд шийдүүлж, заавар зөвлөгөөг авсан байна. Түүнчлэн дүүргийн Тамгын газрын Хууль зүйн тасаг гэр бүлийн хүчирхийлэлтэй тэмцэх тухай хууль, Зөрчлийн хууль зэрэг зарим шинээр хэрэгжиж байгаа хуулиудын талаарх мэдээллийг өгчээ. Мөн уг өдөрлөгийн үеэр Цагдаагийн хэлтсүүд хамтран жолоочийн эрх сэргээх шалгалтыг авч, жолооч нарт зориулсан тусгай хэрэгслийн үзүүлэнг гаргасан юм.

Харин Онцгой байдлыг хэлтэс гамшгаас хамгаалах болон галын аюулгүй байдлын талаар өргөдөл гомдол, хүсэлт хүлээн авч цаг тухайд нь арга хэмжээ авч, шийдвэрлэн ажиллалаа хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

Нийслэлийн удирдах ажилтны өнөөдрийн шуурхай хуралдаанд “Нийслэлийн орон сууцны мэдээллийн сан”-ийн тухай Нийслэлийн орон сууцны корпорацийн дэд захирал А.Энхманлай танилцууллаа. Мэдээллийн сан байгуулснаар орон сууцны эрэлт, нийлүүлэлтийн бодит мэдээллийг бүрдүүлэхийн зэрэгцээ иргэдийн орлогод нийцсэн орон сууц, түрээсийн орон сууцанд хамруулах ажлыг ил тод, шударга зохион байгуулахад ашиглагдах юм байна. Мөн бага дунд орлоготой иргэд болон төрийн албан хаагчдын орон сууцтай холбоотой хүсэлтийг цахим орчинд түргэн шуурхай бүртгэлжүүлэн төсөл хөтөлбөрт хамруулах, орон сууц борлуулах, түрээслэх аж ахуйн нэгж, иргэдийн мэдээллийг нэгтгэж холбох юм. Иргэд энэхүү мэдээллийн санд хандаж тусгай хэрэглэгч болсноор орон сууцны бодит судалгаанд суурилсан эрэлт, нийлүүлэлтийн статистик мэдээ, түрээсийн орон сууцны нэгдсэн мэдээлэл, газар, дэд бүтцийн байршлын мэдээлэл зэрэг статистик мэдээлэл гаргагч эх үүсвэрүүдээс авах боломжит мэдээллүүдийг нэгдсэн байдлаар авах боломжтой аж.

Иргэдийн хувьд нийслэлийн орон сууцны мэдээллийн сангийн www.nosk.ub.gov.mnхаягаар хандан бүртгүүлж хэрэглэгч болох юм. Ингэснээр иргэд хаана ямар төсөл хөтөлбөр хэрэгжиж, ямар орон сууц ашиглалтад орсон зэрэг нийлүүлэлтийн мэдээллийг дүүрэг, хороо зэргээр нарийвчлан харах боломжтой юм. Мөн орон сууцтай болохыг хүссэн иргэдийн цахим судалгаанд хамрагдсанаар орлогод нийцсэн, хямд, чанартай орон сууцанд хамрагдах боломжтой болно гэдгийг НОСК-ийн удирдлагууд тодотгож байлаа гэж НЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

ЦЕГ-аас Европын аюулгүй байдал хамтын ажиллагааны байгууллага /ЕАБХАБ/-ын Үндэстэн дамнасан аюул заналхийлэлтэй тэмцэх алба /Transnational Threats Department/-тай хамтран 2017 оны 10 дугаар сарын 02-ноос 06-ны өдрүүдэд Эрүүгийн цагдаагийн албаны төв байранд цагдаагийн байгууллагын алба хаагчдад зориулж “Хүн худалдаалах гэмт хэрэгтэй тэмцэх” чиглэлийн сургалтыг зохион байгуулж байна.

Энэ удаагийн сургалтыг ЕАБХАБ-аас хүн худалдаалах гэмт хэрэгтэй тэмцэх чиглэл хариуцсан дөрвөн сургагч багшийн бүрэлдэхүүнтэй баг ирж удирдан явуулж байгаа юм. Сургалт таван өдөр үргэлжлэх бөгөөд үндсэн хоёр хэсгээс бүрдэж байна. Сургалтын эхний хоёр өдөрт буюу 10 дугаар сарын 2-3-ны өдрүүдэд хүн худалдаалах гэмт хэргийг илрүүлэх, мөрдөн шалгах чиглэл хариуцан ажилладаг 10 алба хаагчдад зориулсан сургагч багш бэлтгэх сургалт амжилттай зохион байгуулагдаж өнгөрлөө. Мөн энэ үеэр Монгол Улсад албан ёсны ажлын айлчлал хийж буй ЕАБХАБ-ын Хүн худалдаалах гэмт хэрэгтэй тэмцэх асуудал хариуцсан Тусгай төлөөлөгч, Элчин сайд хатагтай Мадина Ярбуссинова сургагч багш бэлтгэх сургалтын ажиллагаатай биечлэн танилцаж, сургалтад амжилттай хамрагдсан цагдаагийн алба хаагчдад сургагч багшийн сертификатыг нь гардуулж өгөв.

Харин 10 дугаар сарын 4-6 ны өдрүүдэд сургалтын дараагийн шат буюу аймаг, дүүргүүдийн цагдаагийн газар хэлтсийн 20 алба хаагчид хүн худалдаалах гэмт хэрэгтэй тэмцэх чиглэлийн мэдлэг олгох анхан шатны сургалтыг сургагч багшийн сургалтад амжилттай хамрагдсан манай алба хаагчид ЕАБХАБ-ын сургагч багш нартай хамтран зохион байгуулж байна.

Нийслэлийн Газрын албанаас ГАЗАР ЭЗЭМШИХ, АШИГЛАХ ЭРХИЙН НЭЭЛТТЭЙ ДУУДЛАГА ХУДАЛДАА-г зохион байгууллаа. Дуудлага худалдаа Нийслэлийн Төр захиргааны Хангарди ордны 14 давхрын хурлын зааланд 2017 оны 10 дугаар сарын 06-ны өдрийн 10 цагт боллоо.

Энэ удаагийн дуудлага худалдаагаар Баянзүрх, Хан-Уул, Сонгинохайрхан, Налайх, Багахангай, Багануур зэрэг 6 дүүрэгт үйлдвэрлэл үйлчилгээ, амины орон сууц, аялал жуулчлал, аж ахуй, орон сууц, зочид буудлын зориулалтаар 30 байршлын 160.77 га газрыг худалдахаар зарлагдсан.

2017 он гарсаар хоёр дахь удаагийн дуудлага худалдааг зохион байгуулж байгаа бөгөөд өмнөх дуудлага худалдаа 2017 оны 7 дугаар сарын 23 өдөр болж, Хан-Уул, Баянгол дүүрэгт 2 байршлыг 765,6 сая төгрөгөөр худалдсан.

Дуудлага худалдаанд оролцогчдын тоо Барилга хот байгуулалтын сайдын 2015 оны 12 дугаар сарын 07 өдрийн 234 тоот тушаалаар гарч дуудлага худалдааны анх үнийг хэт өндөр тогтоосноос хойших сүүлийн 2 жилийн хугацаанд эрс буураад байна. Өөрөөр хэлбэл, ЗТБХБ-ын сайдын 2010 оны 206 тоот тушаалаар 1 м2 газрыг үнэлгээний бүсчлэлээс хамаарч 33,000 төгрөгөөр үнэлдэг байсныг Барилга хот байгуулалтын сайдын 2015 оны 12 дугаар сарын 07 өдрийн 234 тоот тушаалаар 1м2 газрыг бүсчлэлээсээ хамаарч 220,000 төгрөгөөр үнэлж эхэлснээс хойш дуудлага худалдаанд оролцогчдын тоо буурч зарим дуудлага худалдаанд оролцогч ирэхгүй болсон.

Жишээ нь: Нийслэлийн Газрын үнэлгээний 3 дугаар бүсэд үйлчилгээний зориулалтаар эзэмшүүлэхээр 1000 м2 газрын дуудлага худалдааны анхны үнийг тодорхойлъё.

ЗТБХБСайдын 2010 оны 206 тоот тушаалаар:

1000 м.кв =11.000.000 төгрөг

Харин БХБЯСайдын 2015.12.07 өдрийн 234 тоот тушаалаар:

1000 м.кв =88.000.000 төгрөг болж байна.

ДУУДЛАГА ХУДАЛДААНД ОРОЛЦОГЧДЫН ТОО ХЭРХЭН БУУРСНЫГ ХҮСНЭГТЭЭР ХАРУУЛБАЛ:

2015 оны 12 дугаар сарын 07 өдрийн 234 тоот тушаал гарахаас өмнө:

2015 оны 12 дугаар сарын 07 өдрийн 234 тоот тушаал гарахаас хойш:

Дуудлага худалдааны анхны үнийг ямар ч судалгаа, үндэслэлгүй хэт өндөр тогтоосон нь дуудлага худалдаанаас төсөвт төвлөрүүлэх ажил зогсонги байдалд орж, иргэд, аж ахуйн нэгж байгууллагуудын нээлттэй, ил тод байдлаар газар эзэмших, ашиглах эрх авч бизнесээ өргөжүүлэхэд санхүүгийн хувьд хүндрэл учруулж байна.

Дээрх нөхцөл байдлыг харгалзан үзэж саналаа нийслэлийн Засаг даргын удирдлагын зөвлөлийн хурлаар хэлэлцүүлэн дуудлага худалдааны анхны үнийг бууруулах шаардлагатай гэсэн дүгнэлтэд хүрч хүсэлтээ яаманд хүргүүлсэн боловч одоо болтол ямар нэгэн шийдвэр гараагүй хүлээгдэж байна.

Газар эзэмших, ашиглах эрхийн дуудлага худалдааг 2003 оноос өнөөдрийг хүртэл нийт 38 удаа зохион байгуулсан бөгөөд дуудлага худалдаа зохион байгуулах ажил хэвийн явагдаж байна.

Эдгээр асуудлаас үүдэж нийслэлийн төсөв бүрдүүлэх орлогын төлөвлөгөө тасрах магадлалтай байна. Энэ нь хэт өндөр үнэ тогтоосон буруу шийдвэрийн уршиг юм гэж Нийслэлийн Газрын албанаас мэдээллээ.

Ерөнхий боловсролын тусгай 29 дүгээр сургуулийн захирал Х.Батсайханыг 2017 оны дөрөвдүгээр сарын 26-ний өдөр ажлаас нь чөлөөлсөн билээ. Тэгвэл түүнийг энэ сарын 5-ны өдөр буюу өчигдөр ажилд нь буцаан томилжээ.

Б.Батсайхан нь 2009 оноос хойш тус сургуулийн захирлаар томилогдон ажиллаж эхэлсэн байдаг. Харин өнгөрсөн дөрөвдүгээр сард 29 дүгээр сургууль дээр үүсээд байсан нөхцөл, байдлаас болон түүнийг хөдөлмөрийн гэрээ зөрчсөн гэдэг дүгнэлтээр ажлаас нь чөлөөлсөн юм. Мөн сурагчдад бэлгийн дарамт үзүүлдэг байсан эсэхийг Сүхбаатар дүүргийн Цагдаагийн нэгдүгээр хэлтсээс шалгаж байсан юм.

Тэрбээр энэ хугацаанд Чингэлтэй дүүргийн иргэний хэргийн анхан шатны шүүх, Нийслэлийн давж заалдах шатны хоёр ч шүүхэд хандан ялалт байгуулснаар БСШУЯ-ны сайдын шийдвэрээр эргэн томилогджээ.