Month: October 2017

Categories
онцлох-нийтлэл туслах-ангилал

Шөнийн 00:30 цагаас эхэлсэн билэгт сайн өдрийн хуримын ёслол

Балжинням, Дашням давхацсан намрын дунд сарын шинийн 17-ны билэгт сайн өчигдөр тохиосон байна. Энэ өдрийг тухайн жилийн хамгийн сайн өдөр хэмээн Монголчууд ихэд билэгшээдэг билээ. Өнгөрсөн жилийн энэ өдөр Гэрлэх ёслолын ордонд 51 хос хуримын ёслолоо хийж байсан бол өнөө жил 64 хос захиалга өгчээ. Шинийн 17-ны билэгт сайн өдрийн хуримын ёслол шөнийн 00.30 цагаас эхэлсэн бөгөөд хамгийн сүүлийн хос оройны 21:30 цагт хуримын ордонд орох юм байна.

Өнөөдөр хуримаа хийж буй хосууд наймдугаар сарын нэгнээс эхлэн захиалгаа өгчээ. Харин аравдугаар сард нийт 500 хос хуримлахаар захиалга өгсөн гэж зохион байгуулагчид хэллээ.

Биднийг сурвалжлага бэлтгэхээр очиход Гэрлэх ёслолын ордонд Ц.Очирхуяг, Г.Дэлгэржаргал нарын хурим болж байлаа. Тэдний бяцхан хүү Билгүүн болон хосуудын аав ээж, ах дүү, найз нөхөд хайртай дотны хүмүүс нь хуримын ёслолд оролцож байлаа. Баяр, жаргалтай энэхүү ёслолын үеэр магтаалчид, ерөөл магтаалаа хайрлаж, шинэхэн бэрийн гал дөллөн асч буй торгон агшинд охиноо айлын бэр болгож буй аавынх нь сэтгэгдлийг сонслоо.

Г.Дэлгэржаргалын аав Ш.Галсанбаатар “Миний хамгийн бага охин хуримаа хийж байгаа юм. Хуримын ёслол их сайхан болж байна. Намрын дунд сарын шинийн 17 гэдэг бол хүмүүсийн ихэд хүндэтгэдэг, билэгшээлтэй өдөр. Энэ сайхан өдөр Монголын бүх ард түмэндээ аз жаргал сайн, сайхан бүхнийг хүсэн ерөөе. Миний хүүхдүүд шиг хуримаа хийж, гал голомтоо бадрааж буй айл бүхэн түвшин баяртай, дүүрэн жаргалтай яваасай гэж чин сэтгэлээсээ ерөөе” гэлээ.

Н.ГАНАА

Categories
гадаад мэдээ

Путины төрсөн өдөр Орос даяар жагсаал болж, 260 гаруй хүн баривчлагдав

Өчигдөр буюу аравдугаар сарын 7 бол ОХУ-ын ерөнхийлөгч Владимир Путины төрсөн өдөр байв. Тэрээр энэ өдөр 65 нас хүрч байгаа юм.

Ерөнхийлөгчийн төрсөн өдрөөр Орос даяар Алексей Навальныйг дэмжигчид эсэргүүцлийн жагсаал зохион байгуулжээ.

Орос орон даяар нийт 80 гаруй хотод жагсаал болж, иргэд “Путин бол луйварчин!”, “Хааныг огцруул!”, “Тэтгэвэрт гарга!” зэрэг уриа лоозон барьсан байв. 41 настай авлигын эсрэг тэмцэгч Алексей Навальныйг өнгөрсөн Даваа гарагт 20 хоног хорихоор баривчилсныг мөн жагсагчид эсэргүүцжээ.

Түүнийг хууль бус цуглаан зохион байгуулсанд буруутгасан юм. Навальный энэ он гарсаар гурав дахь удаагаа ийнхүү хоригдож байгаа юм.

Тэрээр 2018 онд ОХУ-ын ерөнхийлөгчийн сонгуульд Владимир Путинтай өрсөлдөхөө мэдэгдээд байгаа.

Тиймээс жагсагчид Кремлийг улс төрийн шударга өрсөлдөөн явуулах боломж гаргаж өгөхийг шаардсан байна. Нийслэл Москва хотод 1,000 орчим иргэн Пушкиний талбайд цугларч, Кремлийн зүг жагсах гэсэн боловч замыг нь цагдаа нар хаажээ.

Өчигдөр Орос даяар нийтдээ 260 гаруй жагсагчийг баривчилсан тухай хөдөлгөөнийг зохион байгуулагчид мэдээлсэн байна.

ОХУ-ыг 18 жил удирдаж байгаа Владимир Путин ирэх онд болох сонгуульд өрсөлдөж, дахин 6 жил ерөнхийлөгийн албыг хаших төлөвлөгөөтэй байгаа юм.

Өчигдөр Путинд дэлхийн улс орнуудын удирдагч нар утсаар төрсөн өдрийн мэндчилгээ хүргэсэн бөгөөд Оросын аюулгүй байдлын зөвлөлийн хуралдааныг даргалж, төрсөн өдрөө өнгөрүүлснийг Кремлиэс мэдээлжээ.

Categories
мэдээ нийгэм

Оффшор бүсийн жагсаалт

Оффшор бүсийн жагсаалт зурган илэрцүүдОффшор бүсэд данс нээлгэснээрээ эх орноосоо урвасан дайны ял зэм хүлээхэд хүрээд буй хүн цөөнгүй. Оффшорт данстай байсан гэдэг хардлагаар нэр хүндээ алдсан улстөрч цөөн биш. Монгол Улсын Ерөнхийлөгч оффшор бүсээс хөрөнгөө татах өршөөлийн хугацаа зарласан ч үр дүн сайнгүй. Одоогийн байдлаар нийтэд зарлагдсан оффшор бүсээс нэг л иргэн 4 сая 370 мянган ам.долларыг эх орондоо эргүүлэн оруулж иржээ. Нэр холбогдсон хүмүүсийн тоо хэдэн арваар тоологдож байгаа ч үр дүн ганцхан хүнээс хэтэрсэнгүй.

Харин Засгийн газраас оффшор бүсэд хамаарах улс орон, нутаг дэвсгэрийн жагсаалтыг гаргаж, Авлигатай тэмцэх газарт саяхан (2017.10.03) хүргүүллээ. Жагсаалтыг гаргахдаа олон улсын эдийн засаг, банк, санхүүгийн байгууллагаас гаргасан жагсаалт болон Монголбанк, санхүүгийн асуудал эрхэлсэн төрийн захиргааны төв байгууллагын саналыг үндэслэсэн байна. Оффшор бүсэд хамаарах нийт 49 нутаг дэвсгэрийн жагсаалтыг баталсан байна. Тухайлбал, Барбадос улс, Бахамын арлууд, Британийн Виржинийн арлууд, Кайманы арлууд зэрэг нийт 49 бүс нутаг багтжээ.

Дээрх газруудад данс нээлгэсэн, мөнгөн хөрөнгө байршуулсан, хөдлөх, үл хөдлөх хөрөнгө өмчилсөн, хувь нийлүүлэх замаар хуулийн этгээд үүсгэн байгуулсан тохиолдолд 3 сарын дотор нээлгэсэн банкны дансаа хаалгах, банкинд байршуулсан мөнгөн хөрөнгөө татах, хөдлөх, үл хөдлөх хөрөнгийн өмчлөх эрхийг худалдах, шилжүүлэх, татах, хувь нийлүүлэх замаар хуулийн этгээд үүсгэн байгуулсан бол үйл ажиллагаагаа зогсоох, эзэмших, ашиглах, захиран зарцуулах эрхээ худалдах, шилжүүлэх, дуусгавар болгох арга хэмжээг авч, хөрөнгө, орлогын мэдүүлэгт орсон нэмэлт, өөрчлөлтийн талаар 30 хоногийн дотор Авлигатай тэмцэх газарт мэдэгдэж, шинэчлэн бүртгүүлэх үүрэгтэйг хуульчилсан байдаг.

Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд энэ оны дөрөвдүгээр сарын 13-ны өдөр нэмэлт өөрчлөлт орсон. Тэрхүү өөрчлөлтөөр хувийн ашиг сонирхлын мэдүүлэг болон хөрөнгө орлогын мэдүүлэг гаргадаг албан тушаалтан тэдгээрийн хамаарал бүхий этгээд нь тухайн албан тушаалтны албан үүрэг гүйцэтгэх хугацаанд оффшор бүсэд өөрийн нэр дээр банкны данс нээлгэх, мөнгөн хөрөнгө байршуулах, хөдлөх, үл хөдлөх хөрөнгө өмчлөх, хувь нийлүүлэх замаар хуулийн этгээд үүсгэн байгуулах буюу оффшор данстай байх, гадаадад өмчтэй байхыг хориглосон эрх зүйн шинэ зохицуулалт үйлчилж эхлээд байна. Уг хуулийн 101 дүгээр зүйлийн 101.3 дахь хэсэгт заасны дагуу дээрх жагсаалтыг гаргаад байгаа юм.

Оффшор бүсэд багтсан улс орон, нутаг дэвсгэрт суралцах, эмнэлгийн тусламж, үйлчилгээ авах зорилгоор тухайн улсын банкинд данс нээлгэсэн, мөнгөн хөрөнгө байршуулсан, хөдлөх, үл хөдлөх хөрөнгө өмчилсөн бол Авлигатай тэмцэх газарт тухай бүрт бичгээр заавал мэдэгдэх учиртайг АТГ-аас онцгойлон анхаарууллаа.

Categories
гадаад мэдээ

Дональд Трамп Хойд Солонгост цэргийн ажиллагаа явуулахаар шийдэв бололтой

tramp

АНУ-ын Ерөнхийлөгч Дональд Трамп “Хойд Солонгостой яриа хэлэлцээ хийх гэж олон жил хүчин чармайлт гаргасан боловч тус болсонгүй. Одоо тус улстай холбоотой асуудлыг шийдвэрлэх “ганцхан л” арга байна” гэж өөрийн твиттер хуудаснаа жиргэжээ.
Түүний энэ үг АНУ-ын зүгээс Хойд Солонгосын эсрэг цэргийн ажиллагаа явуулахаас өөр аргагүй гэсэн үг байж магадгүй юм гэж ажиглагчид үзэж байна.

Хэрвээ АНУ-ын зүгээс цэргийн ажиллагаа явуулбал Хойд Солонгосын зүгээс ч мөн зүгээр байхгүй гэдгээ хэдийнэ мэдэгдээд байгаа. Энэ нь Солонгосын хойг төдийгүй, Зүүн хойд Ази, тухайн бүс нутгуудад аюултай хэмээн Япон болон Өмнө Солонгос, ОХУ-ын зүгээс үзэж буйгаа илэрхийлсэн. Гэсэн хэдий ч АНУ-ын ерөнхийлөгчийн дээрх үг улс орнуудыг дайны бэлэн байдалд байхыг анхааруулсан байж болзошгүй хэмээн хэвлэлүүд онцолжээ.

Categories
онцлох-нийтлэл туслах-ангилал

Дархан чиглэлийн замыг хааж, галт тэргийг нэмэхээр болов

Дархан-Уул аймгийн Засаг даргын захирамжаар тус аймгийн автозамыг бүх чиглэлд нь хаах шийдвэрийг гаргажээ. Тус аймагт их хэмжээний цас орж, цасан шуурга шуурснаас зам даваа хаагдсан байна. Тиймээс иргэд зорчигчдыш онцын шаардлагагүй бол Дархан чиглэлд замд гарахгүй байхыг Авто тээврийн үндэсний төвөөс анхаарууллаа.

Дархан-Уул аймаг руу авто замыг хаасантай холбоотойгоор галт тэрэг нэмж ажиллуулахаар болсон байна. Дархан-Уул аймагт цаг агаарын нөхцөл байдлын улмаас зам тээврийн осол гарч амь насаа алдах, гэмтэж бэртэх, тээврийн хэрэгсэл олноор замд саатах, шатахуун дуусах, эвдрэх, холбоогүй болж төөрөх зэрэг тохиолдол гарч болзошгүйг ОБЕГ-аас онцгойлон анхааруулав.

Categories
мэдээ нийгэм

Хүүхдүүд хог хаягдлаар бүтээл урлана

Мэргэжлийн хяналтын ерөнхий газраас зарласан “Иргэн бүр эрсдэлгүй орчин” сарын аяныг зарлаад байгаа. Аяны хүрээнд “Хог бүр баялаг” сэдэвт хог хаягдлаар хийсэн бүтээлийн уралдааныг нийслэлийн Ерөнхий боловсролын сургуулийн 10-14 насны сурагчдын дунд зохион байгуулахаар болсныг Нийслэлийн мэргэжлийн хяналтын газраас мэдээлж байна.

Хог хаягдал ашиглан бүтээсэн бүтээлийг аравдугаар сарын 23-ны өдрийг хүртэл хүлээн авах юм байна. Шалгарсан сурагчдын шагналыг аравдугаар сарын 25-ны өдөр гардуулах гэнэ.

Categories
гадаад мэдээ

Нью-Йорк хотод террорист халдлага үйлдэх гэж байсан этгээдийг баривчилжээ

Нью-Йорк хотод террорист халдлагууд зурган илэрцүүдНью-Йорк хотод террорист халдлагууд үйлдэхээр төлөвлөж байсан гурван этгээдийг баривчилжээ. “Нью-Йорк хотод халдлага үйлдэхээр төлөвлөж байсан Пакистанд амьдардаг Америкийн 19 настай иргэн, Канадын 19 настай иргэн болон Филиппиний 37 настай иргэнийг баривчилсан” байна. Тэд зун уг ажлаа хийхээр төлөвлөж байсныг тус хотын холбооны ажилтнууд нууцалсаар өнөөдөр хэвлэлүүдэд мэдээлжээ.

Сэжигтнүүд нь Нью-Йорк хотын Манхэттен дүүргийн төвд орших “Таймс-сквер” талбай болон метронд террорист халдлага үйлдэхээр төлөвлөж байсан гэнэ. Тэд халдлага үйлдэхийн тулд тэсрэх төхөөрөмж хийх материалууд худалдан авсан байжээ.

Categories
мэдээ нийгэм

Авто засварын газруудад хөрсний шинжилгээ хийжээ

Нийслэлийн Мэргэжлийн хяналтын газрын байгаль орчин, геологи, уул уурхайн хяналтын хэлтэс, Монголын байгаль орчин, аюулгүй байдлын төв төрийн бус байгууллагын мэргэжилтэн Д.Алтангэрэлтэй хамтарч нийслэлийн зургаан дүүрэгт авто засвар хийж буй газруудад шинжилгээ хийжээ. Авто засварын газруудын хөрс, орчин асар ихээр бохирдож, нар салхинд уушиж дэгдэн агаарыг ч багагүй хэмжээгээр бохирдуулдаг юм. Тиймээс автомашинуудад засвар хийж, үйлчилгээ үзүүлдэг 17 иргэн, аж ахуйн нэгжээс хөрсний шинжилгээ авсан байна. Шинжилгээний дүн хараахан гараагүй байна.

Түүнчлэн нийслэлийн суурьшлын бүсийн хөрснөөс хүний эрүүл мэндэд үзүүлэх цацрагийн сөрөг нөлөөллөөс урьдчилан сэргийлэх, тэдгээр нь цацрагийн аюулгүйн норм, холбогдох бусад стандартын шаардлагыг хангаж буй эсэхэд хяналт тавих зорилгоор Хан-Уул дүүргийн нутаг дэвсгэрийн тогтоосон 10 цэгээс хөрсний дээж авчээ. Шинжилгээг Хүнсний аюулгүй байдлын үндэсний лавлагаа лабораторийн Цацрагийн хяналтын лабораторид хийж юм. Хөрсний дээжид байгалийн цацраг идэвхт изотопын хувийн идэвх тодорхойлох юм байна. Хяналт шинжилгээ хойшид ч үргэлжлэх ажээ.

Categories
мэдээ нийгэм

ХЭЛЭХ ЭРХИЙН ИНДЭР: Багш нарын цалинг сая төгрөгөөр нэмэгдүүлэх боломж бий

СБД-ийн VIII хорооны иргэн Т.Доржпалам

Үнэхээр ийм боломж манай улсад бий. Багш нарын цалин сүүлийн 10 гаруй жил дорвитойхон нэмэгдээгүй. Жил бүр л Монголын үйлдвэрчний эвлэл, багш, ажилчид цалингаа нэмүүлэхийг төр засгаасаа шаарддаг. Энэхүү шаардлагын хариуд багш, ажилчдын цалинг 10, 20 хувиар нэмсэн болоод өнгөрдөг. Багш ажилчид ч гэлтгүй Монгол Улсын нийт төрийн албан хаагчийн болоод ажилчдын цалинг нэмэгдүүлэх хэрэгтэй. Өнөөдөр өргөн хэрэглээний барааны үнэ хэд дахин өсчихсөн. Нийгмийн шаардлага, хүний хэрэгцээ хэд дахин нэмэгдсэн. Ийм үед бид 10-аад жилийн өмнөх цалингаараа амьдраад байж болохгүй юм. Багш нар сард дунджаар 500 мянган төгрөг бэлэн гар дээрээ авч буй. Үүнээс өрхийнхөө сарын хүнсний хэрэглээг болгоно, үр хүүхдүүддээ автобус, хоолны мөнгө өгнө, зээлээ төлнө, мөн бусад зардал гээд бодохоор таван зуун мянга тал тал тийшээ ууршаад алга болчихож байгаа юм.

Энэ бол монголчуудын эгэл жирийн амьдралын бодит жишээ. Үүнээс хэцүү амьдралтай багш нар их ээ. Ийм байтал яаж монголын ядуурлын тоо буурах вэ. Хэсэг гэр бүл л нийт монголчуудын өмнөөс гэдсээ хагартал идэж, баяжиж байна. Олон жил багш нарын цалинг нэмэгдүүлээгүй болохоор л багш нар шаардаж байгаа хэрэг. Улстөрчид ч тэр, багш нар ч ялгаагүй бүгд л төрийн албан хаагчид. Төрийн албан хаагчид ард түмний татварын мөнгөөр л цалинждаг. Гэтэл тэр татварын мөнгө зарим эрх мэдэлтэй төрийн албан хаагчдын халаасанд “бонустай” ороод байх шиг. Эцэст нь хэлэхэд манай улс багш нарынхаа цалинг нэмэх боломж бүрэн бий. Эдийн засгаа өргөөд, хөгжлийн төлөө, хийж бүтээхийн төлөө зүтгэх боломж бүрэн бий. Хамгийн гол нь үүнийг удирдаад, чиглүүлээд, улс, эх орныхоо төлөө томоохон бодлого боловсруулж, шийдвэр гаргадаг хүн хэрэгтэй. Хэн нэгнийгээ түлхэх бус дэмжиж, тусалж, алдаа оноог нь хэлж, эвийн цавуу мэт зүтгэх шинэ удирдлагууд хэрэгтэй байна.

“Өдрийн сонин”-ы “Хэлэх эрхийн индэр“-т оролцон үзэл бодлоо илэрхийлэхийг хүсвэл 99650208 дугаарын утсаар холбоо барина уу.

Тэмдэглэл хөтөлсөн Э.МӨНХТҮВШИН

Б.ҮРЖИГ

Categories
мэдээ цаг-үе

Зээлийн хүүг бууруулах боломжтой юу?

Арилжааны банкуудын зээлийн хүү өндөр байгаа нь толгойн өвчин хэвээр байна. Дэлхийн жишигтэй харьцуулбал хэтэрхий өндөр байгаа зээлийн хүү эдийн засагт дарамт, чөдөр болж буйг бүгд л ярьдаг. Гэвч зээлийн хүүг багасгах шийдвэртэй алхам хийж чадахгүй, хүчээр бууруулж болохгүй гэж онолдсоор өдий хүрлээ. Одоогийн байдлаар банкуудын жилийн жигнэсэн дундаж хүү нь 20 орчим хувьтай байна.

Ер нь зээлийн хүү буурах боломж бий юу гэдэг дээр эдийн засагчид, улстөрчид янз янзын тайлбар, дүгнэлт хэлдэг. Саяхан “Голомт” банкнаас зээлийн хүүг бууруулах Үндэсний стратеги боловсруулж УИХ, Засгийн газар, Монголбанкинд хүргүүлсэн гэнэ лээ. Тэдний боловсруулсан бодлогоор одоо 20 хувьтай байгаа зээлийн хүү долоон жилийн дараа л 10 хувиар буурах бололцоотой. Энэ төсөөллөөр бол Монгол Улсад зээлийн хүү 2024 онд ойролцоогоор ес юм уу арван хувьд очих нь ээ гэсэн үг.

Долоон жил хүлээлгүйгээр банкны хүүг бууруулах нөхцөл байдал бүрдэчихээд байгааг ч хэлэх эдийн засагчид бий. Яагаад гэвэл өнөөдөр инфляци 4-5 хувьтай байгаа. Инфляци нэг оронтой тоонд багтаж байвал төгрөгийн өгөөжийг нэмсэн, дотоодын зах зээлээ дэмжсэн бодлогын шинэ алхмуудыг хэрэгжүүлэх нөхцөл үүсдэг. Ийм тохиолдолд Монголбанкны 12 хувьтай бодлогын хүүг нэг оронтой тоонд хүртэл буулгавал зээлийн хүү буурах боломжтой. Монголбанк бодлогын хүүгээ бууруулбал зээлийн хүү 1-3 хувиар багасч болно гэж зарим нь харж байна. Инфляци нэг оронтой тоонд багтчихаад, зээлийн хүү буурах боломж бүрдчихээд байхад Монголбанк яагаад бодлогын хүүгээ 12 хувь дээр барьсан хэвээр байна вэ.

Нэг их наяд төгрөгийн алдагдалтай батлагдсан энэ жилийн төсөв Монголбанкныханд үүнээс өөр арга зам үлдээгээгүй гэдэг таамаг байна. Учир нь төсөв алдагдалтай, хадгаламжийн хүү өндөр хэвээр байгаа тохиолдолд инфляци нэг оронтой тоон дээр ирлээ ч нэмэргүй. Тиймээс төсвийн алдагдлыг арилжааны банкуудын зээлийн өндөр хүүгээс төлж дуусгах хүртэл төв банк бодлогын хүүгээ бууруулахгүй байх магадлал өндөр гэнэ. Дээрээс нь тэтгэвэр, хөрөнгийн зах зээлээ гадаад валют, төсөв, мөнгөний бодлогодоо уялдуулан шинэчилж байж зээлийн хүүг бууруулах асуудал ярих учиртай гэх судлаачид байгаа юм. Нөгөө талд зээлийн хүүгээ бууруулахгүй, аж ахуй нэгжүүдийг хүүгийн дарамтад оруулсан хэвээр байвал бага хүүтэй зээл олгодог гадны банкуудыг оруулж ирэхээс өөр аргагүй гэдэг шахалтууд ч улстөрчдийн зүгээс ирдэг. Гэхдээ хүүгийн түвшинг дорвитой бууруулж чадсан орнуудын туршлага бол захиргаадалтын аргаар бус эдийн засаг, санхүүгийн таатай орчныг бүрдүүлэх маягаар явж ирснийг судлаачид сануулдаг.

Мөн зээлийн дээд хүүг төр нь тогтоодог жишиг ч олон улсад байдаг юм байна. Гэтэл манайд зээлийн хүүг банкууд өөрсдөө тогтоодог байхаар хуульчилсан нь тэднийг дураараа мөнгө хүүлэх боломжоор хангадаг аж. Дээрээс нь Монголоос бусад ихэнх улс Хүүлэлтийн эсрэг хуультай. Америк, Японы жишээ бэлээхэн бий гэнэ. Америкт гэхэд зээлийн дээд хүүг жилийн 8-10 хувиас хэтрүүлдэггүй юм байна. Тиймээс Монголд Хүүлэлтийн эсрэг хууль нэн шаардлагатай болсныг ч зарим эдийн засагчид онцолж байна.

Ямартай ч зээлийн хүү буурах боломжтой юу гэдэг асуултыг тойрч ийм асуудлуудыг хөндсөөр ирлээ. Тэгвэл Монголбанкны ерөнхийлөгч 2017 оны есдүгээр сарын 15-ны өдөр нэг тушаал гаргаж. Тэр нь “Зээлийн хүүг бууруулах стратегийн баримт бичгийн төсөл боловсруулах” ажлын хэсгийг байгуулах тухай юм байна. Ашгүй Монголбанк банкны зээлийн хүүг хөрөнгө оруулалт, бизнес эрхлэлтийг дэмжихүйц түвшинд хүргэж бууруулах шаардлагатай гэж үзсэн бололтой. Эдийн засагчид, судлаачдын таамгийн сэдэв, ард иргэд, аж ахуй нэгжүүдийн горьдлого болоод буй энэ асуудлыг тал талаас нь нарийн судалж, гарц хайхаар шийджээ.

Ажлын хэсгийн бүрэлдэхүүнд Монголбанк, арилжааны банкны төлөөллөөс гадна их дээд сургууль, эдийн засгийн судалгаа, шинжилгээний байгууллагын хөндлөнгийн, хараат бус төлөөллүүд багтжээ. Тэд зээлийн хүүг бууруулах баримт бичгийн төслийг 2018 оны хоёрдугаар сард багтааж бэлэн болгох юм байна. Ажлын хэсэг өнөөдөр хуралдах тов гаргасан сурагтай.

М.МӨНГӨЛДЭЙ