Month: October 2017

Өчигдрийн байдлаар улсын хэмжээнд 28.8 мянган га-г ангилан хадаж, нийт 241.1 мянган га-гаас 204.4 мянган тонн үр тариа хураан аваад байна хэмээн Хүнс, хөдөө аж ахуй хөнгөн үйлдвэрийн яамнаас мэдээллээ.

Тодруулбал 10.7 мянган га-гаас 100 мянган тонн төмс, 6.6 мянган га-гаас 71.6 мянган тонн хүнсний ногоо, 26.1 мянган га-гаас 31.1 мянган тонн тэжээлийн ургамал, 16.2 мянган га-гаас 8.2 мянган тонн тосны ургамал тус тус хураан авснаар үр тарианы хураалтын явц 88.3 хувь, төмс, хүнсний ногооны хураалт 94.5 хувьтай явж байгааг албаныхан хэллээ. Өнөөдрийн байдлаар улсын хэмжээнд үр тарианы 31.9 мянган га, төмс, хүнсний ногооны 1.2 мянган га, нийтдээ 33.1 мянган га талбайн ургац хураагдаагүй байгаа аж.

Энэ оны ургацын урьдчилсан балансаар 288.0 мянган га-гаас 271.8 мянган тонн үр тариа, үүнээс 259.2 мянган тонн буудай, 11.2 мянган га-гаас 102.3 мянган тонн төмс, 6.9 мянган га-гаас 75.7 мянган тонн хүнсний ногоо, 46.5 мянган га-гаас 23.6 мянган тонн тосны ургамал, 43.5 мянган га-гаас 47.3 мянган тонн малын тэжээлийн ургамал тус тус хураан авахаар тогтоосон билээ.

Наймдугаар сарын 10-наас хойш тариалангийн бүс нутгаар үргэлжлэн орсон их хэмжээний борооны улмаас таримлын болц нялхарч соёолон, хураалтын ажилд хүндрэл учруулж байгаа боловч цаг агаарын төлөв, ургацын болцтой уялдуулан хураах технологийг уян хатан сонгож ургац хураалтын ажлыг эрчимжүүлжээ. Харин 10 дугаар сарын 7-8-ны өдрүүдэд Дархан-Уул, Төв, Булган, Архангай, Өвөрхангай, Хэнтий аймгийн тариалангийн бүс нутгуудад нойтон цас орсны улмаас 3-10 см-ийн цасан бүрхүүл үүсч хураалтын ажил түр саатаад байгаа аж.

Үр тарианы таримлын хураалт Сүхбаатар аймагт 49.8 хувь, Дорнод аймагт 74 хувь, Өвөрхангай аймагт 75.7 хувь, Дархан-Уул аймагт 84.0 хувь, Хэнтий аймагт 94.5 хувь, Төв аймагт 91.1 хувь, Булган аймагт 96.2 хувь, Сэлэнгэ аймагт 86.6 хувьтай явагдаж, бусад аймгуудад хураалтын ажил дууссан дүнтэй байна.

Онцгой байдлын ерөнхий газар, Азийн хөгжлийн банктай хамтран Ядуурлыг бууруулах Япон сангийн санхүүжилтээр “Зуд болон ой, хээрийн түймэртэй тэмцэх олон нийтийн чадавхийг бэхжүүлэх” төслийг 2016-2019 онд Дорнод, Сүхбаатар, Говь-Алтай, Хөвсгөл аймгийн 12 суманд хэрэгжүүлж байгаа билээ.

Уг төслөөс, төсөлд хамрагдсан 12 сумын нутгийн захиргааны байгууллагын 36 алба хаагч болон сумын зохицуулагч нарт “Олон нийтийн оролцоотой гамшгийн эрсдэлийн удирдлага” сургалтыг 2017 оны 10 дугаар сарын 02-04-ний өдрүүдэд зохион байгууллаа.

Сургалтыг Япон улсад Жайка олон улсын байгууллагын сургалтад хамрагдсан алба хаагчид удирдан явуулсан бөгөөд гамшгаас хамгаалах хууль эрхзүйн орчин, гамшгаас хамгаалах үйл ажиллагаанд иргэдийн оролцоог хэрхэн нэмэгдүүлэх, болзошгүй гамшгийн аюулыг бууруулахад орон нутгийн төрийн захиргааны байгууллагын оролцоо, олон нийтийн оролцоотой гамшгийн эрсдэлийн удирдлага болон Япон улсын туршлага зэрэг сэдвүүдээр илтгэл танилцуулав.

Төсөл хэрэгжиж байгаа дээрх сумдын төрийн алба хаагчид уг сургалтанд хамрагдсанаар орон нутагт багийн хөршийн бүлэг байгуулах, олон нийтийн оролцоотой гамшгийн эрсдэлийг бууруулах, гамшгийн эрсдэлийг үнэлэх, болзошгүй гамшгийн аюул, хохирлыг бууруулах үйл ажиллагаанд иргэдийн оролцоог хангахад дэмжлэг үзүүлэх чиглэлээр мэдлэг олж авлаа гэж Онцгой байдлын ерөнхий газраас мэдээллээ.

Нийслэлийн хүн амын 34 хувийг залуучууд эзэлдэг бөгөөд Нийслэлийн Залуучуудын Хөгжлийн газраас Нийслэлийн иргэний дагаж мөрдөх зөв 10 дадлыг залуусын оролцоотой нэрлэсэн байна. Тэгвэл өнөөдөр Нийслэлийн иргэний дагаж мөрдөх зөв 10 дадлыг өөртөө хэвшүүлж, бусдад үлгэрлэн түгээх аянд Чингэлтэй дүүргийн залуус нэгдлээ.

Нийслэлийн Залуучуудын хөгжлийн газар “Эрдэнэ тав баг” төрийн бус байгууллагатай хамтран “Эерэг амьдарцгаая залуучуудаа” уриатай “Нийслэлийн иргэний дагаж мөрдөх зөв 10 дадал” аяныг өнөөдрөөс эхлүүлж буй юм. Чингэлтэй дүүргийн 17-р сургууль дээр зохион байгуулсан тус аяны нээлтэд 200 гаруй залуус оролцов.

Ядуурлыг бууруулах, хөдөлмөр эрхлэлтийн асуудал хариуцсан төслүүдийн удирдагч-Нийслэлийн Засаг даргын орлогч Д.Энхтөр, “Нийслэлийн Залуучуудын Хөгжлийн газар байгуулагдаад удаагүй ч залуучуудад хандсан олон шинэлэг ажил хийж байна. Үүний нэг нь залуучуудыг эерэг хандлагатай болгох, хотын соёлыг түгээх зорилготой өнөөдрийн арга хэмжээ юм. Орчин цагт бие, биеэсээ хамаарах харилцаа, хандлага нэмэгдэж байгаа учир өсвөр үеийнхэн маань эерэг сэтгэлгээтэй байх нь хамгийн чухал. Аз жаргалтай хотын иргэн байя гэвэл Та “Эерэг амьдарцгаая” урианд нэгдэж их хотын соёлт иргэн гэдгээ ухамсарлан, бусдадаа үлгэр дууриал болж яваарай. Хүн бүрт сайн тал бий. Сайн талыг нь олж харж урам хайрлаж, дэмжиж байгаарай” хэмээн онцлов.

Харин Нийслэлийн Залуучуудын Хөгжлийн газрын дарга С.Сүх-Очир: “Залуучууд маань эерэг байж нийгэм урагшилна. Тиймээс манай газраас залуучуудтайгаа хамтран зөв 10 дадлыг гаргалаа. Эл аяны хүрээнд зохион байгуулах цуврал сургалтад нийслэлийн бүх дүүргийн иргэд, оюутан залуусыг өргөнөөр хамруулна. Зөв 10 дадлын тухайд, Олон нийтийн газар биеэ зөв авч явдаг иргэн, Замын хөдөлгөөнд соёлтой оролцдог иргэн, Бусдыг хүндэлдэг, талархлаа илэрхийлдэг иргэн, Ёс заншлаа дээдэлдэг, зөвөөр хэрэгжүүлдэг иргэн, Нийгмийн хэм хэмжээ, соёлд суралцсан иргэн, Санаачилгатай, оролцоотой иргэн, Эрүүл мэнд, эрүүл амьдралын хэвшилд анхаардаг хэрэгжүүлдэг иргэн, Бусдын төлөө сэтгэл гаргадаг иргэн, Ногоон орчин бүтээдэг иргэн, Цаг баримталдаг иргэн байх зорилтыг залуучууд дэвшүүлсэн. Тухайлбал ёс заншлаа дээдэлдэг, зөвөөр хэрэгжүүлдэг иргэн байх гэдэг ойлголт өргөн утгатай. Цонхоороо дээж өргөөд зогсоол дээр тавьсан машиныг бохирдуулах нь бие, биеэсээ үргэлж хамааралтай оршин байх их хотын амьдрал, суурин иргэншлийн онцлогт тохирохгүй байх жишээтэй. Үүнийг өнгөц харахад жижиг асуудал мэт боловч хотын соёл ба уламжлал, ёс заншлаа хадгалж үлдэх гэх мэт томоохон асуудлууд цаана нь бий. Тэгэхээр бид асуудлыг илүү нухацтай авч үзэх хэрэгтэй болсон учраас үүнийг залуустаа таниулан сурталчилж буй юм” гэв.

Улсын Дээд шүүхийн хяналтын шатны эрүүгийн хэргийн шүүх хуралдаанаар Г.Дэнзэн, Я.Батсуурь, Г.Түмэнхүү, Т.Төгсбаяр, Д.Баярмаа нарт холбогдох хэргийг ирэх баасан гариг буюу аравдугаар сарын 13-нд хянан хэлэлцэхээр товложээ.

Ерөнхий сайд асан Н.Алтанхуягийн хүргэн гэгддэг Г.Дэнзэнг албан тушаалаа урвуулан ашиглаж, 17 тэрбум төгрөгийн тендерийг эхнэрийнхээ нэр дээр “Говь повер” компанид өгсөн гэх хэрэгт холбогдуулан шалгаж шүүхээс 3.6 жилийн ял оноосон юм. Мөн уг хэрэгт холбогдуулан “Эрдэнэс Тавантолгой” компанийн гүйцэтгэх захирал асан Я.Батсуурь хоёр жилийн хорих ял, Г.Түмэнхүү, Т.Төгсбаяр нарт хоёр жилийн тэнсэн харгалзах ял, Д.Баярмаад мөнгөн торгууль ногдуулах шүүхийн шийдвэр гарсан юм.