Month: October 2017

Сүхбаатар дүүргийн Хөдөлмөр, халамж үйлчилгээний хэлтэс (ХХҮХ)-ээс “Залуучуудын хөдөлмөр эрхлэлт, гарааны бизнесийг дэмжих” хөтөлбөрийн хүрээнд Мэргэжлийн сургалт, үйлдвэрлэлийн төв (МСҮТ)-үүдийн төгсөгч болон төгсөгчдийн залуусын бүлэгт эргэн төлөгдөх санхүүгийн дэмжлэг үзүүлэх болжээ.

Залуусын үйлдвэрлэл, үйлчилгээ эрхлэх төслийг тус дүүргийн ХХҮХ-т энэ сарын 20-ныг дуустал хүлээн авч, шаардлага хангасан тохиолдолд тоног төхөөрөмж, багаж хэрэгсэл худалдан авахад зориулж төгсөгчид гурван сая хүртэл, төгсөгчийн бүлэгт 10 сая төгрөгийг 24 сарын хугацаанд 100 хувь эргэн төлөх нөхцөлөөр олгох юм.

Санхүүгийн дэмжлэг авахыг хүссэн иргэд доорх материалыг бүрдүүлнэ. Үүнд:

-Төгсөгч болон бүлгийн гишүүдийн гараар бичсэн өргөдөл /хорооны Засаг даргын цохолттой/,
-Иргэний үнэмлэхийн хуулбар / төгсөгч нь Сүхбаатар дүүргийн харьяалалтай байна/
-Мэргэжлийн диплом /эх хувиараа/, гэрчилгээний нотариатаар батлуулсан хуулбар
-Үйлдвэрлэл, аж ахуй эрхлэх болон хэрэгжих үндэслэлтэй бизнес төсөл, үр ашиг, орлого нэмэгдүүлэх тооцоо судалгаа, үйл ажиллагааны төлөвлөгөөтэй байх
-Төслийг нөхөрлөл, хоршоо, бүлгийн зохион байгуулалттайгаар хэрэгжүүлэх бол гишүүд, оролцогчдын үүрэг хариуцлага, хэрэгжүүлэх үйл ажиллагааны чиглэлийг бичгээр тодорхойлсон байх
-Төслийн шаардлага хангасан байх /худалдан авах тоног төхөөрөмж, багаж хэрэгслийн зураг, үнийн харьцуулсан судалгаа гм/
-Оршин суугаа газрын тодорхойлолт /цахим машинаас авна/

Нийслэлийн Засаг даргын шийдвэрээр 2017 оныг “Иргэдийн оролцоотой эрх зүйн шинэтгэлийн жил” болгон зарласан. Энэ ажлын хүрээнд олон арга хэмжээ авч хэрэгжүүлж байгаа бөгөөд сар бүр иргэдэд хууль, эрх зүйн үнэ төлбөргүй зөвлөгөө өгөх өдөрлөгийг зохион байгуулах зарим төрлийн судалгаа хийсэн юм. Иргэд өөрт шаардлагатай эрх зүйн мэдлэг, мэдээллийг авах нөхцөл боломж хангалтгүйгээс гэмт хэрэг, зөрчилд холбогдох, нэр төр, эрүүл мэнд, эд хөрөнгөөрөө хохирч, зөрчигдсөн эрхээ сэргээлгэх явдал хангалтгүй байгааг судалгааны дүн харуулж байна.

Нийслэлийн Засаг дарга бөгөөд Улаанбаатар хотын Захирагчийн 2016-2020 оны үйл ажиллагааны хөтөлбөрт “Нийслэлийн иргэдийн хууль, эрх зүйн боловсролыг нэмэгдүүлэх” дэд хөтөлбөрийг боловсруулж хэрэгжүүлэхээр тусгасан. Энэ зорилтыг хэрэгжүүлэх ажлын хүрээнд дэд хөтөлбөрийн төслийг боловсрууллаа. Төсөлтэй танилцаж үнэтэй саналаа харамгүй илгээнэ үү.

Нийслэлийн Засаг даргын Тамгын газар

Хууль, эрх зүйн хэлтэс

Утас:321110

ТАРХИНЫ ХАРВАЛТТАЙ ДЭЛХИЙ НИЙТЭЭРЭЭ ТЭМЦЭХ ӨДӨР

Жил бүр дэлхий дахинд 17 сая хүн тархинд цус харваж, үүнээс 6,5 сая нь нас барж, 26 сая хүмүүс харвалтаас тахир дутуу үлдэн хоцорч байна. Харвах асуудал хэзээ ч хэнд ч хэдэн настайд ч тохиолдож болох учир та бидэнд бүгдэд хамаатай асуудал. Гагцхүү хэнд ямар эрсдэлт хүчин зүйл байгаагаас хамаарна. Тархины харвалт хэдий аюултай ч урьдчилан сэргийлэх боломжтой эрсдэл юм. Дэлхий дахинаа тархины харвалт бууруулахын тулд ДЭМБ -аас 2017 онд тархины харвалтыг олон улсын өвчний мэдрэлийн өвчний ангилалд багтаан, урьдчилан сэргийлэлт, суртачилгаа мэдлэг олгох ажлыг эрчимжүүлэх шаардлагатайг чиг удирдлага болгосон байна. Дэлхийн харвалтын байгуулгаас(WSO and WS Campaign, www.worldstrokecampaign.org ) 2017 онд “Тархины цус харвалтаас сэргийлэх ямар шалтгаан танд байна вэ? “ уриан дор тархины харвалтын эсрэг компанит ажлыг явуулахаар уриалж байна.

Монгол оронд жилээс жилд тархинд цус харвах тохиолдол, нас баралтын тоо улам бүр нэмэгдэж, үхэлд хүргэх байдлаар хоёрдугаар байрыг эзлэн, гэнэтийн үхлийн гол шалтгаан болж байгаа бөгөөд тархины харвалтын өвчлөл, тархалт, эрсдэлт хүчин зүйлээр өндөр орны тоонд багтдаг. Тархины харвалтын 90% нь 10 эрсдэлт эрсдэлт хүчин зүйлээс хамаарсан байдаг байна. Монгол хүмүүсийн дунд тархины харвалтанд хүргэдэг эдгээр хүчин зүйлүүд болох өөх тос, давс, архи тамхины хэрэглээ өндөр байгаагийн зэрэгцээ жил ирэх тутам амьдралын буруу хэв маяг, стресс ихсэж, хөдөлгөөн хомсдол, бодисын солилцооны эмгэг өвчнүүд нэмэгдэж байгаа нь харвалт нэмэгдэх хүчин зүйл болж байгаа юм.

Монгол улсад тархины харвалт судлалын нийгэмлэг 2009 онд байгуулагдан, 9 жил дараалан ДЭМБ, Дэлхийн харвалтын байгууллага, ЭМЯ, МНЭМҮХ, УНТЭ, УГТЭ, УХТЭ, Дархан, Булган,Сэлэнгэ, Увс, Дорнод, Архангай аймгийн нэгдсэн эмнэлгүүдтэй хамтран Тархины харвалттай тэмцэх дэлхийн өдрийг жил бүрийн 10 сарын 29-нд тэмдэглэж ирсэн. Энэ жилээс Эрүүл Мэндийн сайд, жил бүрийн 10 сарын сүүлийн 14 хоногт тархины харвалттай тэмцэх аянт ажил зохион байгуулах тушаал шийдвэр гаргасан. Энэ ажлын хүрээнд иргэдийг өөрсдөөр нь харвалтын эрсдэлийн үнэлгээ хийх, харвалтын анхны шинж тэмдэг, харвалтын хор холбогдол, урьдчилан сэргийлэх аргуудыг зааж өгөх, цусны даралтаа үзэх арга барилд сургах, аргачилал, гарын авлагаар хангах нь чухал байгаа юм.

Нийт эмнэлгүүд , эмч нар аянт ажлыг зохион байгуулахдаа, Дэлхийн харвалтын байгуулгаас (WSO and WS Campaign) энэ жилийн суртачилгааны ажилд зориулан гаргасан брошур, постерыг эх хэл дэр орчуулан тавьсаныг авч хэрэглэхийг хүсч байна. Мөн бидний боловсруулсан эрсдэлт хүчин зүйлсийн тухай гарын авлага, брошурын эх, шторк видеог авахыг хүсвэл www.msa.edu.mn сайт ба 99098584 руу ярьж холбоо барина уу. Нийтээрээ харвалтын эсрэг амжилттай тэмцэн, тархины харвалтыг бууруулъяа.

Монголын Харвалт Судлалын Нийгэмлэг

2017 оны 10 дугаар сарын 10-ны 23.10 цагийн орчим Чингис хаан олон улсын нисэх онгоцны буудлын хоёр давхарт гал гарсан бөгөөд хилчид шуурхай ажиллаж унтраажээ Тухайн үед хилийн шалганд албан үүргээ гүйцэтгэж байсан Хилийн 0218 дугаар ангийн албан хаагч, дэд ахлагч Т.Өсөхбаяр гал гарсан хэсгийг шуурхай илрүүлж, ангийнхаа 10 гаруй нөхдийн хамтаар 15 минутын дотор галын тархалтыг зогсоосон байна. Тэд нисэх буудал доторх галын хор, усны шаланкыг ашиглан унтраажээ. Галыг урьдчилсан байдлаар цахилгааны гэмтлээс болсон байж болзошгүй гэж үзэж байгаа бөгөөд холбогдох албаныхан шалгалт хийж байгаа аж.

ИНЕГ болон Чингис хаан нисэх буудлын удирдлага галын тархалтыг богино хугацаанд зогсоож чадсан Хилийн 0218 дугаар ангийн хилчдэд баяр хүргэж, цаашдын ажилд нь амжилт хүссэн байна.

Энэ жилийн хувьд сүүлийн 40 жилд тохиолдоогүй халалт болж, ихэнх нутгаар олон жилийн дунджаас бага тунадас орсон нь таримал болон бэлчээрийн ургамлын ургац буурах, улмаар бэлчээрийн нөөц, даац хүрэлцээгүй болох, мал тарга хүчээ дутуу авах, отор нүүдэл хийх боломжгүй болж улмаар 21 аймгийн 247 сум буюу нийт сумдын 75 орчим хувь нь гантай буюу гандуу байгаа үнэлгээний дүн гараад байна. Тиймээс 2017-2018 оны өвөлжилтөд гарч болзошгүй хүндрэлийг тодорхойлж, эрт сэрэмжлүүлэх, гарч болзошгүй хүндрэлийг бууруулж, бэлэн байдлаа хангахын тулд нэн шаардлагатай арга хэмжээ болон тусламжийг тодорхойлох, шуурхай зохион байгуулах, нөхцөл байдал хүндэрсэн үед үүрэг гүйцэтгэх бэлэн байдлыг хангуулах, өмнөх жилүүдийн зудын хор уршгийг арилгасан туршлага дээр суурилан хор уршгийг арилгах стратеги боловсруулах зорилгоор Монгол Улсын Засгийн газар, НҮБ-ын Монгол Улс дахь Суурин зохицуулагчийн газрын дэмжлэгтэйгээр Онцгой байдлын ерөнхий газраас “Эрт сэрэмжлүүлэг, эрт хариу арга хэмжээний төлөвлөлт” сэдэвт семинарыг 2017 оны 10 дугаар сарын 12-13-ны өдрүүдэд зохион байгуулах гэж байна.

Монгол Улсын дотоодын нийт бүтээгдэхүүний 12,2 хувийг хөдөө аж ахуйн бүтээгдэхүүн, үүний дотор хөдөө аж ахуйн бүтээгдэхүүний 80 гаруй хувийг мал аж ахуйн салбар эзэлж байна.

Энэ жил улсын хэмжээнд 1629 багийн 160,6 мянган малчин өрхөд 66 сая толгой мал өвөлжих, үүнээс 9,2 сая мал отроор өвөлжих урьдчилсан тооцоо гарчээ.

“Эрт сэрэмжлүүлэг, эрт хариу арга хэмжээний төлөвлөлт” семинарт ОБЕГ, НҮБ-ын Монгол Улс дахь Суурин зохицуулагчийн газар, ХХААХҮЯ, ЭМЯ, ХНХЯ, ЦУОШГ, аймгуудын Онцгой байдлын газар, Хүнс хөдөө аж ахуйн газруудаас 120 орчим төлөөлөгч оролцоно.

“Эрт сэрэмжлүүлэг, эрт хариу арга хэмжээний төлөвлөлт” семинар маргааш буюу 10 дугаар сарын 12-нд Төрийн ордны жанжин Сүхбаатарын танхимд болно гэж Онцгой байдлын ерөнхий газраас мэдээллээ.

Гэр бүл хүүхэд залуучуудын хөгжлийн газраас “Эерэг хандлага-Эрүүл оюутан” аяныг хоёр дахь жилдээ зохион байгуулахаар болжээ. Тус аяны нээлт өнөөдөр Отгонтэнгэр дээд сургуульд боллоо. Энэхүү арга хэмжээг нээж Гэр бүл, хүүхэд залуучуудын газрын дарга О.Алтансүх үг хэлэв. Тэрбээр хүрэлцэн ирсэн оюутан залуусаас эерэг, зөв хандлагатай байхыг хүссэн юм.

Энэхүү аяны зорилго нь Хорт зуршлаас урьдчилан сэргийлэх арга замын талаар сурталчлан таниулах, даатгалд сайн дураараа хамрагдах сэдлийг бий болгох болон эрүүл мэндийн зан үйлтэй холбоотой бусад мэдээ мэдээллийг хүргэх, үзлэг шинжилгээнд сайн дураараа хамрагдах сэдлийг бий болгох юм байна.

Манай улсын нийт залуучуудын гуравны нэг нь архи, тамхи, согтууруулах ундаа хэрэглэдэг, жингийн илүүдэлтэй ажээ. Мөн шийтгэгдсэн иргэдийн 75 хувь, ДОХ/ХДХВ-ын халдвар авсан иргэдийн 41,2 хувийг 18-30 хүртлэх насны залуус эзлээд байна. Тиймээс оюутан залуусыг эерэг хандлагад уриалж, хорт зуршлаас урьдчилан сэргийлэх арга замын талаар сурталчлан таниулах зорилготой уг аяныг жил бүр уламжлал болгон зохион байгуулахаар болжээ.

Энэхүү аяны талаар Гэр бүл хүүхэд залуучуудын хөгжлийн газрын ажилтан С.Гэрэлмаагаас тодрууллаа.

-Аян хэдий хугацаанд үргэлжлэх вэ?

-Энэхүү аян нь нээлтээ хийгээд жилийн турш үргэлжилнэ. Их дээд сургууль, МСҮТ, коллеж, дотуур байранд гээд залуучуудад хүрч болох бүх газруудад ажиллана.

-Залуус архидан согтуурч, тохиолдлын бэлгийн хавьталд орох нь их байдаг. Ийм эрсдэлд орсон залууст хандаж юу хэлэх вэ?

-Бэлгийн замын өвчин авсан нийт иргэдийн 41,2 хувийг залуучууд эзэлж байна. Энэ бол эрсдэлтэй тоо. Залуучууд тохиолдлын бэлгийн хавьтлаас яаж сэргийлэхээ мэддэггүй. Архи согтууруулах ундаа их хэмжээгээр хэрэглэснээр хэнтэй хавьталд орсноо ч мэддэггүй. Мөн бэлгийн замаар халдах халдвараас гадна хүсээгүй жирэмслэлт давхар яригддаг.

-Үр хөндүүлж буй эмэгтэйчүүдийн хэдэн хувийг охид эзэлж байгаа вэ?

-2016 оны байдлаар үр хөндүүлсэн эмэгтэйчүүдийг насны бүлгээр нь авч үзвэл 20-иос доош насны охид 5 хувийг эзэлж байна. Өмнөх жил нь 5,5 хувь байсан. Ийм учраас энэ талаарх үйл ажиллагаагаа эрчимжүүлэх шаардлагатай байна.

Б.АМАРТҮВШИН

Баянзүрх дүүргийн Засаг даргын Тамгын газраас Нийслэлийн өдрийг угтан олон арга хэмжээ зохион байгуулж байгаа билээ. Тухайлбал, ирэх баасан гарагт буюу энэ сарын 13-ны өдөр бүх нийтийн их цэвэрлэгээг бүх дүүргийн хэмжээнд зохион байгуулна. Бүх нийтийн их цэвэрлэгээнд дүүргийн хороод, 28 харьяа хэлтэс,алба, газар болон дүүргийн нутаг дэвсгэрт үйл ажиллагаа явуулж буй аж ахуй нэгж байгууллагууд хамтран оролцох юм.

Бүх нийтийн их цэвэрлэгээний үеэр аж ахуй, нэгж байгууллагууд ойр орчны 50 метр газрыг цэвэрлэх юм. Харин холбогдох байгууллагууд гэрлийн шон, барилга байгууламж дээр наасан зарлалын хуудсыг цэвэрлэх, гэрэлтүүлэг бүрэн асаж байгаа эсэхийг шалгах зэрэг ажлыг хийнэ.

Мөн 14-ний өдөр Монгол Улсын Ерөнхийлөгчийн зарлигийн дагуу “Мод тарих үндэсний өдөр”-ийг бүх дүүргийн нутаг дэвсгэрт зохион байгуулна. Иймд үндэсний мод тарих өдөрт болон бүх нийтийн их цэвэрлэгээнд иргэд, аж ахуйн нэгж байгууллагууд болон нийт ажилтан албан хаагчдыг идэвхтэй оролцохыг дүүргийн Тамгын газраас уриалж байна хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.