Month: October 2017

“Утааны эсрэг ээж, аавууд” төрийн бус байгууллагынхан утааны улирал эхэлж буйтай холбогдуулан тэмцлээ дахин эхлүүлсэн байна. Тэд ирэх сарын 10-нд Нийслэлийн засаг даргын тамгын газар, 17-нд Нийслэлийн агаарын бохирдлыг бууруулах газрын гадаа, 24-нд Хүний эрхийн үндэсний комиссын гадаа жагсахаар төлөвлөжээ.

Өнгөрсөн гуравдугаар сарын 18 буюу Цэргийн баярын өдөр “Утааны эсрэг ээж, аавууд” ТББ-ынхан Сүхбаатарын талбайд жагсаж, хэдий утаа багассан ч утааны эсрэг жагсаалыг сар бүр зохион байгуулахаа мэдэгдэж байв.

Тус холбооныхон хүүхдийн өвчлөл, нас баралтын шалтгааны мэдээллийг долоо хоног бүр статистик тоогоор гаргах, хүүхдийн эмнэлэг барих, Улаанбаатар хотын сургууль, цэцэрлэгүүдэд агаар цэвэршүүлэгч байрлуулах, Засгийн газрын яамд, хэрэгжүүлэгч агентлагын автомашиныг 15-40 хувь бууруулах, утааны голомтод байгаа жирэмсэн эх, 0-3 хүртэлх насны хүүхдүүдийг утааны улиралд хотоос гаргах зэрэг арга хэмжээ авахыг удаа дараа шаардсаар ирсэн билээ.

Монголын мэргэжлийн анчдын холбоо болон Хандгайтын байгаль хамгаалах газар хамтран бэртсэн ан амьтдыг асран хамгаалах түр байр байгуулж өнөөдөр нээлтээ хийлээ. Ан амьтдыг арчилж хамгаалаад эргүүлээд байгальд нь тавих зорилготой энэхүү газар нь ойролцоогоор 20 гаруй сая төгрөгийн төсвөөр сарын хугацаатай баригдаж дууссан. Энэхүү байгууламж нь зэрлэг ан амьтан байлгах гурван тасалгаатай бөгөөд нэг удаадаа дөрвөөс таван буга, хоёроос гурван чоно, арваас хорь орчим шувуу байлгах хүчин чадалтай аж. Нээлтийн үеэр “Амьтны эрх хамгаалах сан”-гаас тэдэнд араатан амьтан зөөвөрлөх тор болон 500 мянган төгрөг хандивласан юм. Мөн Монголын уран дархны “Түмэн эрдэнэс” нэгдсэн холбоо дархчуулынхаа хийсэн бүтээлийг дуудлага худалдаанд оруулж олсон орлогоо хандивлахаар боллоо.

Бэртсэн ан амьтдыг асран хамгаалах түр байрыг санаачлагч Монголын мэргэжлийн анчдын холбооны тэргүүн Д.Гэрэлээс энэ талаар тодруулав.

-Амьтдыг хамгаалах байрыг яагаад байгуулахаар шийдсэн бэ?

-2015 оны өвөл хоёр буганд дусал хийх үед дусал нь хөлдөөд явдаггүй. Маргааш нь очоод үзсэн өлбөн зөлбөн байж байсан. Өвч тэжээл тавьж өгсөн. Тэнд байсан хүмүүс зовлонг нь сайн мэднэ. Харин ийм газар дулаан байртай хонож өнжихөд боломжийн байна байх. Энэ бол хот суурин газар заавал байх ёстой газар. Яагаад гэвэл бид ан амьтадтайгаа хаяа зэргэлдээ амьдарч байгаа мөртлөө амьтдынхаа амьдрах орчныг өөрсдөө булаадаг. Зам талбай, хот суурин, төмөр зам тавьж, байгалийнхаа жамаар хоёр тийшээ сэлгээд явж байдаг амьтдын замыг нь хаачихдаг. Тэгээд амьтад торонд орж, нохойнд хөөгдөх тохиолдол бий. Ийм амьтдад бид туслах хэрэгтэй. Бидэнд үеийн үед хаяа зэргэлдээ амьдрах ан амьтдыг хамгаалах заншил байсан.

-Энд ямар хүмүүс ажиллах вэ?

-Голдуу мэргэжлийн хүмүүс ажиллах байх. Сайн дураараа оролцъё гэсэн манай холбооны гишүүн гөрөөчид бий. Сайн дурын баг бүрдүүлээд тэд шаардлагатай бүх юмаа хийдэг. Хэн нэгэн нь байхгүй бол орлоод хийчихдэг ийм л хүмүүстэй боломжоороо ажиллаад явна.

Б.АМАРТҮВШИН

МАХН-ын дэд дарга С.Ганбаатартай холбогдох 50 сая воны хахуулийн хэргийг өнөөдөр /2017.10.30/ Баянзүрх дүүргийн Эрүүгийн хэргийн анхан шатны шүүхээр хэлэлцэж шийдвэрлэлээ. Шүүх хурлыг шүүгч С.Өсөхбаяр даргалж, нээлттэй явууллаа. Шүүх бүрэлдэхүүн С.Ганбаатарыг Сонгуулийн тухай хуулийг зөрчин, БНСУ-ын иргэн Юү Ван Сү-гээс 50 сая вон авсныг тогтоосон ажээ. С.Ганбаатарыг нэг сарын хөдөлмөрийн хөлсний доод хэмжээг зургаа дахин нэмэгдүүлсэнтэй тэнцэх хэмжээний төгрөг буюу нэг сая 440 мянган төгрөгөөр торгох шийдвэр гарчээ. Мөн С.Ганбаатарыг Монгол Улсын Ерөнхийлөгчийн сонгуульд МАХН-аас нэр дэвшигчийг нэрийн жагсаалтаас хасахыг Монгол Улсын СЕХ-нд даалгаж, түүний хүлээн авсан 50 сая воны хандивыг улсын орлого болгох шийдвэрийг анхан шатны шүүхээс гаргалаа. Эрүүгийн хэрэг хянан шийдвэрлэх тухай хуулийн 38.2 дугаар зүйлийн нэг дэх хэсэгт зааснаар С.Ганбаатар нь анхан шатны шүүхийн шийтгэврийг гардан авснаас хойш 14 хоногийн дотор давж заалдах гомдол, эсэргүүцлээ Нийслэлийн Эрүүгийн хэргийн давж заалдах шатны шүүхэд гаргах эрхтэй юм.

Монголын худалдаачдын холбооны төлөөлөл хэвлэлийн хурал зарлаж, сэтгүүлчдэд мэдээлэл өглөө. Тэдний зүгээс “Худалдаачдын холбооны Анхдугаар их хурал” зохион байгуулж байгаа талаараа хурлын эхэнд хэлсэн юм.

Анхдугаар их хурлыг “Хүчирхэг, чинээлэг, айдас, дарамтгүй амьдралын төлөө” уриатайгаар ирэх сарын 26-нд МҮЭСТО-д зохион байгуулах аж. Хурлаар худалдаачдын нийгмийн асуудал, эдийн засгийн баталгаа, өр зээлийн дарамт, мөнгө хүүлэгчидтэй холбоотой асуудлаар төрөөс баримтлах байр суурийг тодорхойлохыг шаардах зэрэг асуудлыг хэлэлцэх аж.

Тус хурлаар худалдаа эрхлэгчдийн дунд тулгардаг нийтлэг асуудлуудыг хэлэлцэх бөгөөд хурлын үеэр худалдаа эрхлэгчдийн дийлэнх нь эмэгтэйчүүд, тэр дундаа өрх толгойлсон эмэгтэйчүүд байгааг хэлж байлаа. Тиймээс худалдаа эрхлэгчдийн нийгмийн оролцоог нэмэгдүүлэх асуудлыг хөндөх болно гэдгээ онцлов.

Монгол Улс ЮНЕСКО-д элссэний 55 жилийн ой тохиож байна. Тодруулбал Монгол Улс 1962 оны 11 дүгээр сарын 1-ний өдөр ЮНЕСКО-ийн дүрэмд гарын үсэг зурснаар тус байгууллагын 108 дахь гишүүн орон болж байсан юм.

55 жилийн хугацаанд мэдлэгт суурилсан нийгмийг цогцлоох, ЮНЕСКО-ийн олон талт үйл ажиллагааг хэрэгжүүлэх, үндэсний байгууллагууд, олон нийтийн оролцоог нэмэгдүүлэхэд талууд хамтын ажиллагаагаа өргөжүүлсэн байна.

Ойн хүрээнд “ЮНЕСКО ба Монгол Улс” номын нээлтийг маргааш Гадаад харилцааны яамны “Номин” танхимд зохион байгуулах бөгөөд энэ үеэр “Дэлхийд данслагдсан Монгол соёлын өв” гэрэл зургийн үзэсгэлэнг гарах юм.

“Дэлхийд данслагдсан Монгол соёлын өв” үзэсгэлэнд Монгол Улсаас ЮНЕСКО-д бүртгүүлсэн байгалийн болон соёлын өвүүдийн гэрэл зургуудыг дэлгэнэ. Өнөөдрийн байдлаар Монгол Улсаас ЮНЕСКО-д бүртгүүлсэн 30 орчим өв байдаг бөгөөд энэхүү үзэсгэлэн нь эдгээр өвүүдийг олон нийтэд сурталчлан таниулах юм. Дэлхийн уураг тархи, оюуны байгууллагатай хамтран түншлэх 55 жилийн түүхийг бичилцсэн манай улсын сор болсон ахмад дипломатч, төр нийгмийн зүтгэлтэн, эрдэмтэн судлаач, салбарын мэргэжилтнүүд арга хэмжээнд оролцоно хэмээн ЮНЕСКО-гийн Монголын үндэсний комиссын Ерөнхий нарийн бичгийн дарга С.Уянга хэллээ.

Отгонтэнгэр хайрханд гарсан осолтой холбогдуулан Шадар сайд Ө.Энхтүвшин Монголын уулын спортын төлөөллүүдийг Төрийн ордонд хүлээн авч уулзаж байна.

Шадар сайд уулзалтын эхэнд 10 дугаар сарын 21-нд Завхан аймгийн Отгон сумын Буянт багийн нутаг Отгонтэнгэр хайрханд авиралт хийж байгаад цасан нурангид өртсөн уулчдын осол болон авсан арга хэмжээний талаар товч мэдээлэл өгөв. Тэрбээр “Отгонтэнгэр хайрханд авиралт хийж байгаад амь насаа алдсан 17 хүний үр хүүхэд, ах дүү, төрөл саданд Монгол Улсын Засгийн газар, Улсын онцгой комиссын нэрийн өмнөөс гүн эмгэнэл илэрхийлж байна” гэв.

Энэхүү зөвлөлдөх уулзалтыг дээрх эмгэнэлт үйл явдалтай холбогдуулан зохион байгуулж буй бөгөөд цаашдаа хоорондын уялдаа холбоо, зохион байгуулалтыг хэрхэн явуулах, уулчдын холбооны нэгдмэл байдлыг хэрхэн хангах, мэргэжлийн болон сонирхогчдын ялгаа заагийг хэрхэн гаргах, гарах өндрийг хэрхэн тогтоох, эрүүл мэндийн байдал, хариуцлага зэрэг олон асуудлыг нэгтгэн ярилцах зорилгоор зохион байгуулж байгаа юм.

Уулзалт Төрийн ордны А танхимд үргэлжилж байна.

Монгол Үндэсний Ардчилсан Намын шинээр сонгогдсон даргыг бүртгүүлэх тухай тус намаас гаргасан хүсэлтийг Дээд шүүх 2017 оны 10 дугаар сарын 30-ны өдөр хэлэлцлээ.

Монгол Үндэсний Ардчилсан намын Бүгд хурлын 2017 оны 9 дүгээр сарын 6-ны өдрийн 02 дугаар тогтоолоор намын даргаар Б.Цогтгэрэлийг сонгосныг бүртгүүлэх хүсэлтээ тус намаас ирүүлсэн байна.

Улсын Дээд шүүх дээрх хүсэлтийг хэлэлцээд Үндсэн хууль, Улс төрийн намын тухай болон бусад хуульд нийцэж байна хэмээн үзэж, хүсэлтийг хангаж шийдвэрлэв.