Month: October 2017

“Өдрийн сонин”-ы пүрэв гаригийн дугаар 16 нүүрээр хэвлэгдэн, захиалагчдадаа хүрлээ. Энэ өдрийн дугаарт гарсан нийтлэл, сурвалжлага, ярилцлага, мэдээ мэдээллээс онцолж, тоймлон хүргэж байна.

Манай сонины тэргүүн нүүрэнд “Замын цагдаад танилтай хэн ч дуут дохио ашиглаж болно” хэмээх сурвалжлагыг сонирхон хараарай. Сүүлийн жилүүдэд замын цагдаагийн тусгай дуут дохиог хууль бусаар ашиглах, төрийн цагдааг доромжлох гэх мэт үйлдлүүд гарах болсон. Саяхан Ц.Баярцогт хэмээх этгээд цагдаа руу салаавч гаргаж доромжилсон. Энэ этгээдийн унаж явсан тээврийн хэрэгсэл нь тусгай дуут дохиотой байсан юм. Энэ талаарх сурвалжлагыг долдугаар нүүрнээс хүлээн авч уншаарай.

Улс төрийн хоёрдугаар нүүрнээс УИХ-ын гишүүн Ж.Батзандантай хийсэн ярилцлагыг хүлээн авч уншаарай. Тэрбээр “АН-ын бүлгээс тавьсан
шаардлагад У.Хүрэлсүх анхаарч
ажиллана гэсэн” хэмээн онцлон хэлжээ.

Мөн тавдугаар нүүрнээс “Аль фракцаас хэдэн сайд
томилогдох вэ?” хэмээх нийтлэлийг унших боломжтой.

Өдрийн сонин”-ы нийтлэлийн бодлогыг тодорхойлж байдаг, нийгмийн нэгэн залуур чиг болж байдаг Баримт, үзэл бодлын гуравдугаар нүүрт нэрт нийтлэлч Баабарын “Эрлийзүүд ба түүний
дайснууд” хэмээх нийтлэл хэвлэгдлээ.

Арванхоёрдугаар нүүрнээс “Маск” продакшны жүжигчин, соёлын тэргүүний ажилтан Магсаржаламын Баярмагнайтай хийсэн ярилцлагыг хүлээн авч уншаарай. Тэрбээр “Эр хүн шиг эр хүн байж чаддаг хоёр ахтайгаа
нэг хамтлагт байгаадаа баярладаг юм” хэмээн онцлон хэлжээ.

Эдгээр болон бусад мэдээллүүдийн дэлгэрэнгүйг уншихыг хүсвэл дараах линкээр бүртгүүлнэ үү. https://admin.dnn.mn/plugins/news/login/

Эдгээр болон бусад цаг үеийн мэдээ мэдээлэл, ярилцлагуудыг “Өдрийн сонин”-ы баасан гаригийн дугаараас уншаарай.

Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудан, “Улаанбаатар”, “Скай” шуудангийн салбаруудаас очиж авч болох ба сонин борлуулах бүхий л цэгүүд, Хэвлэлийн биржээс худалдан авах боломжтой юм. Мөн “Мөнгөн завъяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдах авч болохыг дуулгая. “Өдрийн сонин”-ы өөрийн байранд ирж худалдан авч бас болно.

“Өдрийн сонин”-той холбоотой бүхий л мэдээллийг Мэдээлэх эрхийн утас 19001987-гоос лавлаж болох ба захиалга өгөхийг хүсвэл 9911-2954, 8811-1375 дугаарт холбогдоно уу. Хэрэв цахим хэлбэрээр нь захиалахыг хүсвэл 88071920 дугаарт холбогдож дэлгэрэнгүй мэдээллийг лавлаарай.

“ӨДРИЙН СОНИН” ӨГЛӨӨ БҮХЭН ТАНТАЙ ХАМТ

Нийслэлийн Засаг дарга С.Батболд өнөөдөр Хан-Уул дүүргийн нэгдсэн эмнэлэг, Чингэлтэй, Баянгол дүүргийн Эрүүл мэндийн төвийн гэмтэл, мэс заслын тасгийн нээлтэд оролцлоо. Мөн Азийн хөгжлийн банкны санхүүжилтээр хэрэгжиж буй “Эрүүл мэндийн хөгжил хөтөлбөр-4” төслийн хүрээнд баригдаж буй Сонгинохайрхан дүүргийн жишиг нэгдсэн эмнэлгийн өргөтгөлийн барилга, “Баянзүрх эмнэлэг ХХК”-ний санхүүжилтээр баригдаж буй Баянзүрх дүүргийн нэгдсэн эмнэлгийн 100 ортой өргөтгөлийн барилгын ажилтай тус тус танилцлаа.

Хан Уул дүүргийн нэгдсэн эмнэлгийн гэмтэл, мэс заслын тасгийн нээлтийн үеээр Нийслэлийн Засаг дарга С.Батболд үг хэллээ.

Тэрээр “Нийслэлийн Засаг дарга буюу Улаанбаатар хотын захирагчийн 2016-2020 оны мөрийн хөтөлбөрт эрүүл мэндийн чиглэлээр олон арга хэмжээ, төслүүд тусгагдсан байгаа билээ. Тэр зорилтуудын нэг бол алслагдсан дүүргүүдэд үзүүлж буй эрүүл мэндийн тусламж үйлчилгээний нэр төрлийг нь олшруулах зорилт тусгагдсан байгаа юм. Манай дүүргийн нэгдсэн эмнэлгүүд сүүлийн жилүүдэд үзүүлж байгаа тусламж үйлчилгээний нэр төрөл цөөрч гуравдугаар шатлалын эмнэлэг рүү ихэнх үйлчлүүлэгч нар явдаг. Ингээд Улсын хэмжээнд үйлчилгээ үзүүлдэг гуравдугаар шатлалын нэгдсэн эмнэлгүүдийн ачаалал ихэссэн. Дүүргүүдийн эрүүл мэндийн байгууллагуудын боловсон хүчин болон тоног төхөөрөмжийн хангалт муудсан зэрэг нөхцөл үүсдэг байсан. Нэг сая гурван зуун мянган хүн амтай том хотын иргэд ялангуяа алслагдсан дүүрэг, хороодын иргэд эрүүл мэндийн тусламж үйлчилгээ чанартай үзүүлэх явдал нь чухал байна. Хотын иргэд хөдөө орон нутгийн иргэдтэй хамт гуравдугаар шатлалын эмнэлэгт оочирлож , ачаалал үүсгэх биш өөрсдийн нөөц боломжийг ашиглан энэ эмнэлэгтээ тусламж үйлчилгээ авдаг зорилтыг дэвшүүлсэн. Энэ жил нийслэлийн гурван дүүрэгийн эмнэлэгт мэс заслын тасгийг шинээр нээж байгаа. Түүний нэг нь Хан-Уул дүүргийн мэс заслын тасаг. Хан-Уул дүүрэг нийт 160 мянга гаруй хүн амд эрүүл мэндийн тусламж үйлчилгээ үзүүлдэг . Уг мэс заслын тасаг нээгдсэнээрээ мэс заслын тодорхой өвчинд үйлчлэхээс гадна гэмтлийн хагалгаануудыг хийх юм. Сүүлийн жилүүдэд хотжилтой холбоотойгоор осол гэмтлийн тоо нэмэгдсэн. Мөн Хан-Уул дүүргийн нэгдсэн эмнэлгийг төвлөрсөн дулаанд холбож өгсөн нь энэ жилийн томоохон хөрөнгө оруулалтуудын нэг болсон юм. Боловсон хүчний хувьд гуравдугаар шатлалын эмнэлэг дээр сургалт хийсэн. Хан-Уул дүүрэг бол Нэгдүгээр төв эмнэлэгтэй хамтарч боловсон хүчнээ сургах, шаардлагатай эмчийг дуудлагаар, гэрээгээр ажиллуулах ажлууд хийгдэж байна. Цаашдаа боловсон хүчнээ өөрсдөө хангах тал дээр ажиллаж байна” гэв.

Хан-Уул дүүргийн нэгдсэн эмнэлгийн мэс заслын тасгийн эрхлэгч Я.Энхтөрөөс шинээр нээгдэж буй мэс заслын тасгийн талаар тодруулаа.

-Мэс заслын тасаг нь ямар хагалгаанууд хийх боломжтой вэ?

-Хан-Уул дүүргийн нэгдсэн эмнэлэг 25 ортой гэмтэл мэс заслын тасаг шинээр нээж ажиллуулж байна. Уг тасаг нь 25 орныхоо хүрээнд Хан-Уул дүүргийн 4-8 дугаар хорооны иргэд үйлчлэх юм. Эхний ээлжид төлөвлөгөөт журмаар чулуутай цөсний хүүдийг тайрах хагалгаа, хэвлийн эвэрхийн хагалгаа, төлөвлөгөөт хагалгаанууд хийгдэнэ. Мөн яаралтай хагалгаануудыг ирэх оны дөрвөн сарын нэгнээс хийж эхэлнэ. Үүнд мухар олгойн болон цөсний хурц үрэвсэл, хэвлэлийн түгжрэлүүд гэх мэт хүрээгээ өргөсгөж эмчилгээгээ явуулах юм.

–Мэс заслын тасаг хэдэн төрлийн ямар багаж төхөөрөмжөөр хангагдсан вэ?

-Нийслэлийн хөрөнгө оруулалтаар 19 төрлийн 37 ширхэг багаж ирсэн байгаа.

-Жилд дунджаар хэдэн хагалгаа хийгддэг бол?

-Төлөвлөгөөт, яаралтай хагалгааг хамтад нь хийвэл мянган гаруй хагалгаа хийх боломжтой.

Б.ҮРЖИГ

Израиль Улсад дүрвэгчийн статусаар амьдарч буй Монгол Улсын хоёр иргэний дундаас төрсөн нярай хүүхдийн биеийн байдал маш муу, яаралтай хагалгаа хийлгэх шаардлагатай үед Монгол Улсаас Израиль Улсад суугаа Өргөмжит консул Ноён Ами Оркаби яаралтай тусламж үзүүллээ.

Монгол эмэгтэй Зүүн Иерусалим хотын дүрвэгсдийн эмнэлэгт хүүхдээ төрүүлсэн бөгөөд нярай төрөлхийн өвчтэй төрж, улмаар яаралтай хагалгаанд орох шаардлагатай болоход Өргөмжит консул Ами Оркаби тэднийг Иерусалим хотын Шари Цедек эмнэлэгт шилжүүлэн, шаардлагатай бүх эмчилгээний зардлыг өөрөөсөө гаргасан байна. Нярай хүүхэд Шари Цедек эмнэлэгт яаралтай хагалгаанд орсон бөгөөд хагалгаа амжилттай болов.

Өнөөдөр МҮЭСТО-нд Чингэлтэй дүүргийн багш нар баярын хуралд оролцож, шагнал урамшуулал хүртлээ. Тус дүүрэгт нийт 80-н ерөнхий боловсролын сургууль, цэцэрлэг ажилладаг. Эдгээрт 1500 багш болон 38000 гаруй хүүхэд багачууд хүмүүжиж байна. Чингэлтэй дүүргийн Засаг дарга Ж.Эрдэнэбат багш нарын баярын хуралд ирж, баяр хүргэлээ. Мөн амжилт бүтээлээр дүүрэн байсан багш нар бүтээлийн үзэсгэлэн гаргажээ.

Үзэсгэлэнд оролцсон Чингэлтэй дүүргийн тэргүүний 33-р цэцэрлэгийн эрхлэгч Д.Мөнх-Амгалантай ярилцлаа.

-Энэ өдөр та юугаар бахархаж байна вэ?

-Чингэлтэй дүүргийн цэцэрлэгүүдээс хамгийн том амжилтыг манай цэцэрлэг гаргасан. Нийт эцэг эхчүүд, мэргэжил нэгт багш сурган хүмүүжүүлэгч нартаа ямар зүйл хийгээд амжилтанд хүрсэн гэдгээ энд харуулахыг хүслээ. Бид энэ үзэсгэлэнд багш нар, хүүхдүүдийнхээ чадварыг харуулахыг хичээж, шагнал урамшууллыг нь дэлгэж тавьсан. Зүүн өмнөд Азийн шатрын тэмцээн, “Цодгор хүү” тэмцээнд амжилт гаргасан. Бид бас Сургуулийн өмнөх боловсролын үйлдвэрчний эвлэлийн холбооны тэргүүний үйл ажиллагаатай цэцэрлэгээр шалгарсан.

-Багш нарын ажил хаялтын талаар ямар бодолтой байна?

-Багш нар ажил хаяж байгааг буруу гэж хэлж чадахгүй ч зөв гэж хэлэхгүй. Нийгмийн асуудал хүнд, амьдралд хүрэлцэхгүй хэмжээний цалин авч байгааг үгүйсгэхгүй. Гэхдээ аливаа зүйл цаг үеэ олох хэрэгтэй, тооцоо судалгаатай хийвэл зүгээр байсан болов уу гэж бодож байна. Ялангуяа өвөл ирж байна, бяцхан үрс маань гурван сар амраад суралцах ирмүүн хүсэлтэй сургууль, цэцэрлэгтээ ирсэн энэ үед багш нарын маань хийсэн зүйл зөв үү, буруу юу гэсэн эргэлзээ төрүүлж байна. Багш нарын нийгмийн асуудлыг шийдэх чухал. Тиймээс төр засаг зүгээр суухгүй бидний тавьж байгаа хүсэлтийг биелүүлнэ гэдэгт итгэлтэй байна.

-Сурган хүмүүжүүлэгч хүний үүднээс эцэг эхчүүддээ хандаж юу гэж зөвлөх вэ?

-Эцэг эхийн оролцоо хүүхэд төлөвшихөд чухал нөлөөтэй. Ялангуяа залуу эцэг эхчүүд хоёр настай жаахан хүүхдээ бэлтгэж, цэцэрлэгт өгөх хэрэгтэй гэж зөвлөх байна. Гэхдээ манай ээж аавуудын ухамсар харьцангуй өндөр болсон. 0-6 насанд хүн байх 90 хувь нь төлөвшдөг. Үүнийг ээж аавууд минь ойлгоод бидний ажлыг дэмжиж, хүүхдүүддээ цаг гаргадаг болсонд баяртай байгаа. Ээж аавууд хайраар хүмүүжүүлж, хүүхдүүддээ үлгэр дуурайлал байгаасай гэв.

Б.АМАРТҮВШИН

Монгол улсад 2016 он байдлаар хүн амын өвчлөлийн тэргүүлэх 5 шалтгааны нэг нь гэмтэл, гадны шалтгаант бэртэл 10,000 хүн амд 469 байгаа нь харьцангуй өндөр байна. Энэ нь хот газарт хөдөө, орон нутагт гарч буй гэмтэл бэртэлтэй харьцуулахад харьцангуй өндөр, мөн эрэгтэй хүйсэнд өндөр буюу эмэгтэйчүүдтэй харьцуулахад 5 дахин их, тэр дундаа 20-44 насанд буюу хөдөлмөр эрхлэх насанд өндөр байна.

2016 онд Гэмтэл согог судлалын үндэсний төвд яаралтай тусламж үзүүлсний 6.5 хувь нь, хэвтэн эмчлүүлсний 7.5 хувь нь хүзүү, нуруу, нугасны гэмтэлтэй үйлчлүүлэгчид байлаа.

Нуруу, нугасны гэмтлийн үеийн үндсэн эмчилгээ нь сэргээн засах багийн тусламж, үйлчилгээ байдаг бөгөөд удаан хугацаагаар хөдөлгөөн хязгаарлагддаг эмгэг тул уг гэмтлийн улмаас асаргаа, сувилгаа, сэргээн засах тусламж, үйлчилгээг тасралтгүй, удаан хугацаанд хийх шаардлагатай болдог.

Иймд нуруу, нугасны гэмтлийн үед сэргээн засах мэргэжлийн багийн тусламж, үйлчилгээ үзүүлэгч мэргэжилтнүүдийг чадавхжуулж, сэргээн засах тусламж, үйлчилгээний чанар, хүртээмжийг нэмэгдүүлэх, олон улсын туршлагаас суралцах зорилгоор энэхүү сургалтыг ДЭМБ-ын дэмжлэгтэйгээр Сэргээн засах үндэсний төвтэй хамтран зохион байгуулж байна.

Тус сургалт мөн онцлог, давуу талтай. Сургалтад анхан шатлалын эрүүл мэндийн байгууллагын төлөөлөл болох өрхийн эрүүл мэндийн төвийн сувилагч нар /60 сувилагч/, хоёр дахь болон гуравдахь шатлалын эрүүл мэндийн байгууллагын төлөөлөл болох сэргээн засахын эмч, сувилагч, хөдөлгөөн засалч, уламжлалт эмчилгээний мэргэжилтнүүдийг /50 мэргэжилтэн/ хамруулж байна. Энд суралцсан эмч, эмнэлгийн мэргэжилтнүүд нуруу, нугасны гэмтлийн үеийн сэргээн засах тусламж, үйлчилгээг үндэсний хэмжээнд үзүүлэх, мэдлэг, туршлагаа бусад мэргэжилтнүүдэд түгээн дэлгэрүүлэх сургагч багшаар сургагдаж байна. Иймээс бид тодорхой шалгуурыг хангасан эмч, эмнэлгийн мэргэжилтнийг сургалтад хамруулах хүсэлтийг аймаг, нийслэлийн эрүүл мэндийн газар, холбогдох байгууллагад гаргасан бөгөөд ирсэн эмч, эмнэлгийн мэргэжилтнүүд сургалтаар сурч мэдсэн зүйлсээ баг, хамт олондоо зааж, сургах үүргийг давхар хүлээж байна.

Замын цагдаагийн шаардлагыг үл хэрэгсэн, доромжилсон иргэний талаарх мэдээллүүд олон нийтийн сүлжээгээр хүмүүсийн анхаарлыг татаад байгаа. Тухайн иргэнд хуулийн ямар хариуцлага оногдуулсныг Нийслэлийн прокурорын газрын Зөрчил шалган шийдвэрлэх ажиллагаанд хяналт тавих хэлтсийн дарга А.Цэрэнсодном мэдээллээ.

“Нийслэлийн Сүхбаатар дүүргийн нутаг дэвсгэр Төв шуудангийн уулзвар орчимд 2017 оны 9 дүгээр сарын 21-ний өдөр Land cruiser 200 маркийн 1793 УБҮ улсын дугаартай тээврийн хэрэгсэл урсгал сөрж, замын хөдөлгөөнд оролцсон учир Сүхбаатар дүүргийн Замын цагдаагийн хамгаалалтын хэлтсийн цагдаа, зохицуулагч, О автомашиныг зогсоож, жолоочийн баримт бичгийг шалгасан. Энэ үед тухайн автомашинд зорчиж явсан Б гэгч иргэн “Төрийн тусгай хамгаалалтын машин зогсоодог хэн бэ чи, ордон орох яаралтай ажилтай байна” хэмээн тавьсан шаардлагыг эсэргүүцэн, хэл амаар доромжилсон зөрчил гаргасан.
Сүхбаатар дүүргийн цагдаагийн хэлтсийн Хэрэг бүртгэх тасгаас тухайн зөрчлийг шалган энэ сарын 28-ны өдөр Зөрчлийн тухай хуулийн 15.2 дугаар зүйлийн 2.3 дах хэсэгт заасан “Төрийн албан хаагчийг хүч хэрэглэхгүйгээр эсэргүүцсэн, эсхүл доромжилсон” гэх заалтын дагуу 250 нэгжтэй тэнцэх хэмжээний төгрөг буюу 250.000 төгрөгөөр торгох шийтгэл оногдуулсан.

Сүхбаатар дүүргийн прокурорын газраас холбогдох баримт, материалыг хянаад иргэн Б-гийн үйлдэл нь Зөрчлийн тухай хуулийн 5.2 дугаар зүйлийн 1.1, 1.2 дах хэсэгт заасан “Олон нийтийн газар хэрүүл маргаан үүсгэж, бусдыг өдөөн хатгаж, танхайрсан үйлдэл” гэж үзэн 2017 оны 10 дугаар сарын 2-ны өдөр Цагдаагийн байгууллагаас оногдуулсан 250.000 төгрөгийн торгуулийн шийтгэлийг хүчингүй болгож, тодорхой хугацаагаар баривчлах шийтгэл оногдуулахаар Сүхбаатар дүүргийн шүүхэд дүгнэлт бичиж хүргүүлсэн.

Прокурорын дүгнэлтийг үндэслэн зөрчлийг хянан хэлэлцэх хүртэл хугацаанд иргэн Б-г 48 цаг хүртэл хугацаагаар саатуулаад байна гэлээ.