Month: August 2017

Нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүү болон бусад албаныхан Сүхбаатар дүүргийн 4 дүгээр хорооны иргэдийн төлөөлөлтэй өнөөдөр уулзлаа. Иргэд Сүхбаатар дүүргийн 4 дүгээр хороо Хичээнгүй сайд Б.Цэрэндоржийн гудамжинд хэрэгжүүлэх “Автомашингүй гудамж” төслийг эсэргүүцэж буйгаа илэрхийлэв. Энэ үеэр нийслэлийн Засаг даргын Дэд бутэц, гэр хорооллын хөгжлийн асуудал хариуцсан орлогч П.Баярхүү “”Автомашингүй гудамж” төслийг хэрэгжүүлэх явцад иргэдийн эсэргүүцэлтэй тулгарсан учраас ажлыг түр зогсоосон. Өнөөдөр төслийн талаар иргэдийн санал сэтгэгдлийг сонсоод цааш нь нийслэлийн Засаг даргын зөвлөлийн хурлаар оруулна. Ингээд Засаг даргын зөвлөлийн хурлаас гаргасан тогтоол, шийдвэрийг холбогдох албаныханд болон иргэдэд шуурхай хүргэх болно” хэмээв.

Монголын үндэсний барилгын ассоциацийн хуулийн мэргэжилтэн Д.Ууганбаяр “Нийслэлийн Засаг даргын 2016 оны зургаадугаар сарын 20-ны өдрийн захирамжаар Сүхбаатар дүүргийн 4 дүгээр хороо Б.Цэрэндоржийн гудамжинд газар доорх үйлчилгээ бий болгох эрх олгосон байдаг. Тус газрыг нийслэлийн ЗДТГ эзэмшдэг бөгөөд Монголын үндэсний ассоциацитай “Автомашингүй гудамж” төслийг хэрэгжүүлэх гэрээ байгуулсан. Монголын үндэсний ассоциаци нь 150 гаруй аж ахуйн нэгжийг энгнээндээ нэгтгэсэн төрийн бус байгууллага. Эдгээр аж ахуйн нэгжийн дунд сонгон шалгаруулалт явуулаад уг төслийг “Бүти” ХХК хэрэгжүүлхээр болсон юм. Ажлыг гүйцэтгэгч компани нь зардлаа цэвэр өөрөөсөө гаргаж байгаа. Төслийг хэрэгжүүлснээр нэг ёсондоо ажлын байрыг нэмэгдүүлэх, автозамын түгжрэлийг бууруулах зэрэг давуу тал ихтэй. Мөн газрын 0 тэнхлэгээс дээш ямар ч барилга байгууламж барихгүй. Иргэдийн яриад байгаа шиг хөшөө, усан оргилуурыг үгүй болгохгүй. Харин ч одоо байгаа ногоон байгууламжийг 10 дахин нэмэгдүүлж, усан оргилуурыг өшөө томсгож, хөшөөг эргүүлэн тавьж, тохижуулна. Энэ ажлыг Монголын үндэсний ассоциацид нэгдсэн аж ахуйн нэгжүүд монголын хөгжил цэцэглэлтэд оруулж буй хувь нэмэр гэж ойлгож байгаа” гэсэн юм гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Дэлхийн улс орнууд 1992 оноос эхлэн жил бүр 8 дугаар сарын эхний 7 хоногт “Эхийн сүүгээр хооллолтыг дэмжих дэлхийн 7 хоног”-ийг тэмдэглэн өнгөрүүлдэг уламжлалтай болсон. Монгол Улс дэлхийн бусад орны нэгэн адил 1992 оноос эхлэн “Эхийн сүүгээр хооллолтыг дэмжих дэлхийн 7 хоног”-ийг жил бүр тэмдэглэн өнгөрүүлж ирсэн. ЭМЯ, Нийгмийн Эрүүл Мэндийн Үндэсний Төвийн Хоол Судлалын Алба “Эхийн сүүгээр хооллолтыг дэмжих дэлхийн 7 хоног”-ийг 25 дахь жилдээ зохион байгуулж байна.

Сайд А.Цогцэцэг энэ үеэр хэлэхдээ “Хүүхдийг эхийн сүүгээр хооллохыг дэмжих дэлхийн долоо хоног” аяны уриа жил бүр өөр утга агуулгатай байдаг. Энэ жил “Эхийн сүүгээр хооллолтыг хамтдаа дэмжицгээе” уриан дор дэлхийн 170 гаруй улс орон тэмдэглэж байгаа бөгөөд аяны хүрээнд хүүхдийг эхийн сүүгээр хооллохыг дэмжиж ажиллах төр, хувийн хэвшлийн түншлэл, урт хугацааны хамтын ажиллагааны үндэс суурийг бий болгож, бэхжүүлэхэд чиглэсэн арга хэмжээнүүдийг зохион явуулж байна. Сүүлийн жилүүдэд манай улсад хүүхдийг эхийн сүүгээр хооллох үзүүлэлтүүд буурч байгаа нь сэтгэл зовоосон асуудал болж байна. 2000-аад оны эхэн үед 90 хүртэл хувьтай байсан эхийн сүүгээр дагнан хооллох үзүүлэлт 2010 онд 66.7 хувь хүрч, 2013 онд 47 хувь болж огцом буурсан байна. Эхийн сүүгээр хооллолтын үзүүлэлтүүд ингэж буурах болсон нь эхчүүдэд үзүүлэх гэр бүл болон ажлын байран дахь дэмжлэг туслалцаа муу, эхийн сүү орлуулж өгдөг бүтээгдэхүүний хууль бус импорт, иргэдийг төөрөгдүүлсэн мэдээлэл бүхий зар сурталчилгаа нэмэгдсэн, цаашлаад нийгэмд ядуурлын түвшин тууштай буурахгүй байгаан улмаас эхчүүд төрөөд удалгүй ажилдаа эргэн орохоос өөр аргагүй байдалд хүрэх зэрэг олон шалтгаантай байна. Эрүүл мэндийн яамнаас Нялх, балчир хүүхдийн хүнсний тухай хуулийг санаачлан боловсруулж, УИХ-ын эмэгтэй гишүүдийн идэвхтэй дэмжлэгтэйгээр 2017 оны 5 дугаар сарын 12-ны өдөр УИХ-ын нэгдсэн чуулганы хуралдаанаар хэлэлцэж баталсан юм. Нялх, балчир хүүхдийн хүнсний тухай хууль энэ 7 дугаар сарын 1-нээс хүчин төгөлдөр мөрдөгдөж байна. Хүүхдийг эхийн сүүгээр хооллохыг дэмжихтэй холбоотой олон чухал асуудлыг бид энэ хуулиараа зохицуулж, хэрэгжүүлэх юм. Хүүхдийг эхийн сүүгээр хооллохыг дэмжих асуудалд зөвхөн эхчүүд, эмч эмнэлгийн ажилтан үүрэг хүлээх биш, гэр бүл, хамт олон, ажил олгогч, хэвлэл мэдээлэл, сургалт эрдэм шинжилгээ, хүнсний импорт, үйлдвэрлэл, худалдаа үйлчилгээ зэрэг бүхий л салбарын оролцоо дэмжлэг чухал юм. “Хүүхдийг эхийн сүүгээр хооллохыг хамтдаа дэмжих сайн дурын амлалт” түншлэлийн уулзалтын зорилго нь хүүхдийг эхийн сүүгээр хооллохыг дэмжих эв санааны илэрхийлэл болгож “Хүүхдийг эхийн сүүгээр хооллохыг дэмжих тунхаг”-т гарын үсэг зурах, мөн төрийн болон хувийн хэвшлийн байгууллагуудын дунд эхийн сүүгээр хооллолтыг дэмжиж ажиллах түншлэл, урт хугацааны хамтын ажиллагааны үндэс суурийг бий болгох, бэхжүүлэхэд оршиж байгаа юм гэлээ.

Уулзалтад Хүнс, хөдөө аж ахуй, хөнгөн үйлдвэрийн яам, Хөдөлмөр, нийгмийн хамгааллын яам, Мэргэжлийн хяналтын ерөнхий газар, Гаалийн ерөнхий газар, Нийгмийн эрүүл мэндийн үндэсний төв, Нийслэлийн эрүүл мэндийн газар, Шударга өрсөлдөөн, хэрэглэгчийн төлөө газар, Дэлхийн эрүүл мэндийн байгууллга, НҮБ-ийн Хүүхдийн Сан, Монголын ажил олгогч эздийн нэгдсэн холбоо, Монголын үндэсний худалдаа аж үйлдвэрийн тэнхим, “Маркет гейт” ХХК, “Монгол эм импэкс” концерн, “Чирон” ХХК, “Абико” ХХК, “Нано интернэйшнл” ХХК, “Киндервелт монголиа” ХХК, “Талх чихэр” ХК, “Гоёо” ХК, Хэвлэл мэдээллийн байгууллагын төлөөлөлүүд оролцлоо.

Нийслэлийн Баянзүрх дүүргийн Засаг даргын Тамгын газраас санаачлан Туул, Улиастайн гол дагуух нийт 30 орчим километр газрын хог хаягдлыг цэвэрлэлээ. Цэвэрлэгээнд дүүргийн Тамгын газрын нийт алба хаагчид болон 5, 9, 10, 11, 20, 23 дугаар хороод, Нийтлэг үйлчилгээний газар-1, 2, 3, 4 ОНӨААТҮГ-ын Иргэдийн бүлэг, Батлан хамгаалах их сургуулийн 1000 оюутан цэрэг зэрэг нийт 1200 гаруй хүн оролцсон юм.

Энэ удаагийн цэвэрлэгээгээр нийт 20 тонн хог хаягдлыг ачиж цэвэрлэсэн байна. Ирэх есдүгээр сарыг дуустал цэвэрлэгээг үе шаттайгаар үргэлжлүүлэх юм. Гол дагуух хог хаягдлын дийлэнх нь архи, пивоны шил лааз эзэлж байсан. Мөн голын усанд гялгар уут болон ахуйн хогийг ихээр хаясан байжээ.

Иймд иргэд та бүхэн амралт зугаалгаар явахдаа хог хаягдлаа ил задгай газар хаяхгүй байж, байгаль дэлхийгээ хайрлан хамгаалахыг Баянзүрх дүүргийн Засаг даргын Тамгын газраас уриалж байна хэмээн Баянзүрх дүүргийн Хэвлэл мэдээллийн албанаас мэдээллээ.

МАСЗХ-г үүсгэн байгуулж байсан анхдагч гишүүд хэвлэлийн бага хурал зарлаж, “МАН-ын ээлжит бус онц их хурлын төлөө хөдөлгөөн” байгуулснаа зарлав. “МАН УИХ, орон нутгийн сонгуулиар үнэмлэхүй ялалт байгуулсан. Ерөнхийлөгчийн сонгуулиар ямар түвшинд хүрч буурав. МАН-ын дотоодод ямар үйл явдал болж байгаа талаар гишүүдийн дунд төдийгүй иргэдийн дунд яриа хөөрөө өрнөж байгаа. Дотооддоо үүссэн асуудлыг хэлэлцэхээр ээлжит бус хурал яаралтай зарлаж, хуралдуулахыг хүсч байна. МАН-ын дарга М.Энхболд “Бага хурлыг есдүгээр сард хуралдуулах” талаар мэдээлсэн. Энэ бол албан бус мэдээлэл. Нийт гишүүдээрээ хэлэлцүүлэх ёстой. МАСЗХ-г үүсгэж явсан залуус, эрх ашиг, албан тушаалын төлөө нэгдээгүй. Олон гишүүд дэмжигчид биднийг дэмжсэн. МАН дотоод хямралаа даван туулах нь ард түмний эрх ашигт нийцнэ. Засгийн газар мөрийн хөтөлбөрөө хэрэгжүүлэх ёстой, ухрахгүй байх учиртай хэмээн тус хөдөлгөөний зохицуулагч Балданцогт хэллээ.

Хуралд оролцогчид “Намын дотоод ардчиллыг бэхжүүлье”, “Жирийн гишүүдийн үгийг сонс”, “МАН олигархуудын гар хөлийн үзүүрт үйлчлэх ёсгүй” гэх мэт уриа лоозон барьсан байлаа.

МАН-ын Засгийн газар “Мөрийн хөтөлбөрөөс олон зүйлээр ухарсан, татвар нэмэх гэж бид мөрийн хөтөлбөр дэвшүүлээгүй, бид албан тушаалын наймаа хийж, 60 тэрбумаар төрийн албыг худалдах гэж сонгуульд ороогүй, хамт яваа нөхдөө тагнаж чагнасан мэдээллийг оргүй хоосон гүтгэлэг гэж хэлэхгүй. Энэ мэт олон асуудалд санаа зовж, их хурлаа хуралдуулахыг шаардаж байгаа юм. Ээлжит их хурлыг зохион байгуулах хугацаа дүрмийнхээ дагуу болсон. Үүнийг ес, арав, арваннэгдүгээр сар хүртэл хүлээж чадахгүй. Бидэнд цаг алдах эрх байхгүй. Шаардлагаа намын даргад хаяглан гардуулах гэж байна хэмээн Намын ээлжит бус онц их хурлын төлөө хөдөлгөөнөөс мэдэгдлээ.

Тэд мөн “М.Энхболд, Э.Эрдэнэбат нар алдсан байж болно. Алдаагаа хүлээн зөвшөөрч, уучлан гуйн, албан тушаалаа өг“ хэмээн тэд ярилаа.

Ази, номхон далайн бүсийн орнуудын Иргэний нисэхийн Ерөнхий захирлуудын 54 дүгээр хурал Улаанбаатарт нээгдлээ. Шангрилла зочид буудлын хурлын танхимд эхэлсэн тус хурал “The challenge of managing outcome focused and risk based regulations for Asia Pacific states” –/Эрсдэлд тулгуурласан, үр дүнд чиглэсэн зохицуулалт хийхийг Ази, номхон далайн бүсийн орнуудад уриалах нь/ сэдвийн дор болж байгаа юм.

Тав хоног үргэлжлэх тус хуралд Ази, Номхон далайн бүсийн 40-өөд орон, иргэний нисэхийн олон улсын 12 байгууллагын нийт 400-гаад төлөөлөгч оролцож байна.

Монгол Улс Нэгдсэн үндэсний байгууллага /НҮБ/-ын тусгай агентлаг болох Олон улсын иргэний нисэхийн байгууллага /ИКАО/-д 1989 онд гишүүнээр элссэн, 193 бүрэн эрхэт гишүүний нэг юм.

ОУИНБ нь гишүүн улс орнуудаа Америк, Африк, Европ, Ази, Номхон далай, Ойрхи дорнодын зэрэг долоон бүсэд хувааж, гурван жил тутам ерөнхий ассамблейгаараа сонгодог 36 орны төлөөлөлтэй Зөвлөл үйл ажиллагаагааг нь удирдан явуулдаг. Ази номхон далайн бүс хамгийн олон орон хамрагддаг бүс бөгөөд жил бүр Иргэний нисэхийн ерөнхий захирлуудын хурлыг аль нэг улсад 5-7 хоногийн хугацаагаар зохион байгуулж ирсэн.

Манай улс ОУИНБ-аас зохион байгуулж буй үйл ажиллагаанд идэвхитэй оролцож, олон улсын хэмжээний эрх зүйн акт, конвенци, баримт бичигт нэгдэн, иргэний агаарын тээврийн аюулгүй ажиллагаа, аюулгүй байдал, нисэх онгоцны буудлын үйл ажиллагаа, агаарын тээвэрлэгчдийн үйл ажиллагааг зохицуулах бодлого боловсруулах, хэрэгжилтийг зохион байгуулахад хамтарч ажилладаг юм.

Иргэний нисэхийн аюулгүй ажиллагаа, аюулгүй байдлын чиглэлээр олон улсын аудит хийлгэх, сургалт, судалгаанд хамрагдах, Агаарын тээвэрлэгчдийн холбооноос зохион байгуулдаг хамтын ажиллагааны хөтөлбөрт оролцох, дотоод болон гадаад орнуудын иргэний нисэхийн байгууллагууд, сургалтын байгууллагуудыг гэрчилгээжүүлэх зэрэг үйл ажиллагаанд хамрагдах, оролцох, зохион байгуулах чиглэлээр ажиллаж ирлээ.

Энэ хуралд бүс нутгийн төлөөлөл төдийгүй, иргэний нисэхийн олон улсын төрөл мэргэжлийн 10-12 байгууллага, агаарын тээвэр өндөр хөгжсөн Америк, Европын улс орнуудын төлөөлөгчид, агаарын хөлөг болон агаарын навигаци, аюулгүй ажиллагаа, аюулгүй байдлын чиглэлийн тоног төхөөрөмж, нисэхийн цахим хяналт удирлагын систем, үйлдвэр эрхлэгчид, олон улсын байгууллагууд байнга оролцдог уламжлалтай.

Дээрх хурлыг Ази, Номхон далайн бүсэд хамаарах зарим улс орон 2-3 удаа хүлээн авсан бөгөөд Монгол Улс 2003 онд 40 дүгээр хурлыг хүлээн авч, Улаанбаатар хотноо амжилттай зохион байгуулагдсанаар ОУИНБ-ын дээд удирдлага, гишүүн орнуудаас өндөр үнэлгээ авч байсан юм.

Дэлхийн соёлын биет бус өв монгол туульсад зориулсан “Хан Алтайн дуулал” цогцолборын нээлт энэ сарын 05-нд Ховдод боллоо.

Нээлтэнд Ховд аймгийн ИТХ-ын дарга Г.Пүрэвганди, Засаг дарга Д.Галсандондог оролцлоо.
Тус цогцолборын зураг төслийг “БАЛДАНС” ХХК, Барилгын гүйцэтгэлийг “Баруун Монгол Интернейшнл” ХХК гүйцэтгэжээ.

“Хан алтайн дуулал” цогцолбор нь олон ястны өлгий Ховд нутгийнхны сум сумдын төлөөлөл 40 гаруй хүний сэтгэлийн хандив, тэрбум орчим төгрөгийн өртөгтэйгөөр цогцолсон байна.

“Хан алтайн дуулал” цогцолборын найман метр гаруй өндөртэй сүрлэг хөшөөг бүтээн босгосон Монгол Улсын Төрийн соёрхолт уран барималч Л.Ганхуяг хэлэхдээ” Дархан цаазат амьтдаар төлөөлүүлэн сав шимийн ертөнц, огторгуйн тайлагдашгүй нууцад нэвтэрсэн мэт гүн сэтгэгдэл төрүүлэм дүрслэлийг үзүүлэхийг зорьсон” гэж тайлбарлалаа.

Тэрбээр мөн Ховд аймагт Ойрадын их хаан Галданбошигт хааны хөшөөг бас урлаж байжээ.

Нийслэлийн мэргэжлийн хяналтын газраас мод, модон материалын төрөлжсөн захуудад хяналт шалгалт хийж байна.

Шалгалтын явцад дунд эрсдэлтэй үнэлэгдсэн таван аж ахуйн нэгжид улсын байцаагчийн хугацаатай албан шаардлага хүргүүллээ хэмээн тус газраас мэдээллээ. Хяналт шалгалт үргэлжилж байна.