Month: August 2017

Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газрын дэргэд “Сургалт судалгаа мэдээллийн төв”, Хүүхэд хамгааллын хариу үйлчилгээ, түр хамгаалах байр” байгуулахаар болсон байна.

2016 онд Хүүхдийн эрхийн тухай хууль, Хүүхэд хамгааллын тухай хууль, Гэр бүлийн хүчирхийлэлтэй тэмцэх тухай хуулийг баталсан. Эдгээр хуулийн хэрэгжилтийг хангахад шаардлагатай бүтэц, орон тоог бий болгох, хүүхэд хамгааллын үйлчилгээг олон улсын чиг хандлагад нийцүүлэн хөгжүүлэх хэрэгцээ шаардлагад үндэслэн “Өнөр бүл хүүхдийн төв”-ийг өөрчлөн зохион байгуулж, ийм төвүүд байгуулан, бүтэц орон тоонд зохицуулалт хийхээр болжээ.

Хүүхдийн тусламжийн 108 утсанд ирсэн дуудлагад хариу үйлчилгээ үзүүлэх шаардлага зайлшгүй байгаа тул Хүүхэд хамгааллын хариу үйлчилгээ, түр хамгаалах байрыг энэ оны эхний сараас өнөөдрийг хүртэл туршилтаар ажиллуулж байгаа аж. Энэ хугацаанд 153 хүүхэд нэг хоногоос гурван сар хүртэл хугацаагаар байрлаж хамгааллын үйлчилгээ авсан байна.

Иймд “Өнөр бүл хүүхдийн төв”-ийн дэргэд Хүүхэд хамгааллын хариу үйлчилгээ үзүүлэх, түр хамгаалах байрыг ажиллуулах зайлшгүй хэрэгцээ байна гэж үзжээ. Эдгээр төвийг байгуулахад улсын төсөвт дарамт учрахгүй бөгөөд төсөв хооронд зохицуулалт хийх замаар шийдвэрлэгдэж буй аж.

Нярайн эрт үеийн нэн шаардлагатай тусламжийг эрчимжүүлэх чиглэлээр өндөр хэмжээний уулзалт Вьетнам улсын Да Нанг хотноо энэ сарын 16-17-ны өдрүүдэд болж, Эрүүл мэндийн дэд сайд Л.Бямбасүрэн тэргүүтэй төлөөлөгчид оролцлоо.

Энэхүү уулзалтыг ДЭМБ, НҮБ-ын Хүүхдийн сан зохион байгуулсан бөгөөд Вьетнам, Монгол, Филипин, Лаос, Соломоны арлын улс, Шинэ Гвине, Камбож, БНХАУ-ын Эрүүл мэндийн дэд сайд нар оролцож, нярайн эрт үеийн тусламж үйлчилгээг сайжруулах чиглэлээр авч хэрэгжүүлж буй арга хэмжээ, бодлого, үйл ажиллагааны хэрэгжилт, хүрсэн үр дүн, сургамж, хэрэгжилтэд нөлөөлж буй сөрөг хүчин зүйл саад бэрхшээл, түүнийг хэрхэн давж болох талаар туршлагаа хуваалцлаа.

Энэ үеэр Дэд сайд Л.Бямбасүрэн “Нярайн эрт үеийн нэн шаардлагатай тусламж” –ийг үндэсний хэмжээнд эрчимжүүлэх чиглэлээр батлагдсан стратеги төлөвлөгөөтэй хэрэгжилтийн талаар мэдээлэл хийсэн юм. Тэрээр хэлэхдээ “Эх, хүүхдийн эрүүл мэндийн асуудал Монгол улсын Засгийн газар, Эрүүл мэндийн яамны анхаарлын төвд байнга байдаг бөгөөд бид НҮЭМ-ийн 4 удаагийн хөтөлбөр, Эхийн эндэгдлий бууруулах 2 удаагийн стратеги, Эх, нярайн эрүүл мэнд стратеги, Нярайн эрт үеийн нэн шаардлагатай тусламж үйлчилгээ стратегийг хэрэгжүүлж, эх хүүхдийн эндэгдлийг 4 дахин бууруулж, Мянганы хөгжлийн 4, 5 дахь зорилтыг хангаж чадсан. Мөн Эрүүл мэндийн сайд, аймгийн Засаг дарга нартай байгуулах жил бүрийн гэрээндээ эх, хүүхдийн өвчлөл, эндэгдлийг бууруулах, эрүүл мэндийн салбарт орон нутгийн төсвөөс оруулах санхүүжилтийг нэмэгдүүлэх асуудал тусгаж хэрэгжүүлдэг нь санхүүгийн нөөцийг нэмэгдүүлэх ач холбогдолтой. Эрүүл мэндийн дэд сайд миний бие ахалсан төсөл хөтөлбөрүүдийн зохицуулах зөвлөл ажиллаж, улирал тутам хуралдаж, эх хүүхдийн эрүүл мэндийн чиглэлээр авч хэрэгжүүлж буй үйл ажиллагааны техникийн болон санхүүгийн дэмжлэгийн талаар хэлэлцэж, үйл ажиллагааны давхардал орхигдсон асуудлыг ярилцаж шийдвэрлэдэг нь нөөцийг зөв хуваарилж зарцуулахад ач холбогдолтой” байдаг гэлээ.

Энэхүү уулзалтад ДЭМБ-ын Ази Номхойн далайн бүсийн захирал Шин Юунг Соо оролцож, хэлсэн үгэндээ “Нярайн нэн шаардлагатай тусламж нь өртөг багатай үр дүн маш өндөртэй. Төрмөгц ээжийнхээ халуун энгэрт тэврүүлж байгаа нярай маш жаргалтай, эрүүл байдаг. Арьс арьсаар шүргэлцүүлж, ээжид нь тэврүүлэх, ангир уургийг амлуулах асуудал маш чухал. Дутуу болон өвчтэй нярай, кесар хагалгаагаар төрсөн нярай энэхүү тусламжийн авч чадахгүй байгаа сул тал байна. Нярайн “ИМЖ” (кенгуру) асаргаа дутуу төрсөн нярайд маш чухал. Дэлхий дээр 2 минут тутамд 1 нярай нас барж байна. Нярайн нэн шаардлагатай тусламж асаргааг хэрэгжүүлж, ээжийнх нь энгэрт тэврүүлж, арьс арьсаар байнга шүргэлцүүлж, малгай өмсгөж, ангир уургийг нь амлуулж, хөхөөр хооллосноор нярай нас барах эрсдлийг 22 хувиар бууруулах боломжтой байна. Хэрэгцээгүй, үр дүнгүй эм, эмчилгээнээс татгалзах хэрэгтэй. Нярайн нэн шаардлагатай тусламжийг хэрэгжүүлэх нь чухал. Энэ стратеги бодлогыг хэрэгжүүлэхэд эрүүл мэндийн салбарын тусламж үйлчилгээ үзүүлэгч, эмэгтэй түүний нөхөр гэр бүлийн гишүүдийн дадал, хандлага чухал. Нэг ч нярайг эхээс нь туст нь байлгахгүй байх нь чухал. Нэг ч нярайг нэн шаардлагатай тусламж асаргаанаас орхигдуулахгүй байх нь чухал” гэлээ.

Мөн нярайн нэн шаардлагатай тусламжид хийсэн хөндлөнгийн үнэлгээгээр эмнэлгийн мэргэжилтнүүд хийж гүйцэтгэх энгийн үйлдлүүдийг хэрэгжүүлэхгүй байгаа талаар ярилцлаа. Жишээ нь: БНХАУ-д нэг хүүхэд төрүүлэх бодлого баримталж, эцэг эхчүүд кесар хагалгаа нь эрүүл хүүхэд төрүүлдэг гэсэн буруу ойлголттойгоос мэс заслаар төрөх нь эрс нэмэгдэж арьс арьсаар шүргэлцүүлэхгүй байсан талаар ярилаа. Манай улсын хувьд мөн дутуу төрсөн нярай, кесар хагалгаагаар төрсөн нярайг арьс арьсаар шүргэлцүүлэхгүй байх, хэрэгцээгүй эм тариа хэрэглэж нярайг эрчимт эмчилгээний тасагт ээжээс нь тусад нь удаан байлгах, төрөх явцад партограмыг бүрэн хөтлөхгүй байгаа, гар угаалт тааруу байгаа зэрэг сул тал байгааг хөндлөнгийн үнэлээчид гаргаж тавьсан. Бид нярайн “ИМЖ” асаргаа, анхны тэврэлтийг зөвхөн ээжид тэврүүлнэ гэдэг буруу ойлголттой байдаг. Тэгвэл Соломоны арлын ээж үүд, хүүхдээ тэврэх боломжгүй биеийн байдал хүнд байгаа бол аавд нь эсвэл эмээ, асран хамгаалагч туслагч нарын энгэрт тэврүүлж нярайн дулаан алдалтаас бүрэн сэргийлж байгаа зэрэг туршлагаасаа хуваалцлаа.

Уг уулзалтаас нэг ч нярайг орхигдуулахгүйгээр нярайн эрт үеийн нэн шаардлагатай тусламжид бүрэн хамруулах талаар уриалга тунхаг гаргаж, оролцсон бүх хүмүүс Эрүүл мэндийн дэд сайдуудтай санал нэгтэйгээр баталлаа.

Мөн энэ үеэр улс орнуудын төлөөллүүд , хэвлэлийн бага хуралд оролцож, тус улсын хэвлэл мэдээллийн байгууллагуудад мэдээлэл өгч, нярайн эрт үеийн тусламж үйлчилгээг сайжруулж, нярайг дулаан алдуулахгүй байлгаж, ангир уураг амлуулах нь хүүхдийн дархлааг сайжруулж, халдвараас сэргийлж, эрүүл чийрэг өсөлтийг хангах зардал багатай үр дүнтэй арга гэдгийг онцоллоо.

“МИАТ” ХК-ийн ОМ502 маркийн онгоц Чингис хаан олон улсын нисэх онгоцны буудалд ослын буулт хийжээ. Уг онгоц өнөөдөр өглөөний 7:56 цагт Улаанбаатар-Токио чиглэлд нислэг үйлдсэн юм. Тус онгоцны дугуйны элэгдлийн хугацаа дууссан байсан учраас Токиогийн нисэх буудалд ослын буулт хийх хүсэлт гаргасан боловч хүсэлтийг хүлээж аваагүй учир эргэн Улаанбаатарт буухаар болсон гэнэ.

Уг онгоцонд 160 иргэн зорчиж явсан талаар албаныхан мэдээлэв.

Энэ онгоц Хятадын хил дөнгөж гараад Шилийн гол дээрээс буцсан байна. Одоогоор Чингис хаан олон улсын нисэх онгоцны буудлынхан ослын үед авах шаардлагатай арга хэмжээг шуурхай авч, өөрийн бүсэд ослын буултыг амжилттай үйлджээ.

Өнөөдөр Хангай, Хөвсгөл, Хэнтийн уулархаг нутгаар, 19-20-нд ихэнх нутгаар усархаг бороо орох тул гэнэтийн үер ус, мөндөр, аянга цахилгаан, нөөлөг салхины аюулаас сэрэмжтэй байхыг анхааруулж байна.

Улаанбаатар хотод өнөөдөр үүлэрхэг. Бороо орно. Дуу цахилгаантай. Салхи зүүн өмнөөс секундэд 6-11 метр, борооны өмнө түр зуур ширүүснэ. 23-25 градус дулаан байна.

Баруун болон төвийн аймгуудын нутгаар үүлэрхэг. Бусад нутгаар үүлшинэ. Баруун болон төвийн аймгуудын ихэнх нутаг, зүүн аймгуудын нутгийн хойд хэсгээр бороо орно. Дуу цахилгаантай. Бусад нутгаар бороо орохгүй.

Салхи нутгийн зүүн хэсгээр зүүн өмнөөс, бусад нутгаар баруун хойноос секундэд 6-11 метр, баруун болон төвийн аймгуудын нутгаар борооны өмнө түр зуур ширүүснэ.

Алтай, Хангай, Хөвсгөл, Хэнтэйн уулархаг нутгаар 16-21 градус, говийн бүс нутгийн өмнөд хэсэг, зүүн аймгуудын нутгаар 27-32 градус, бусад нутгаар 21-26 градус дулаан байна.

Сонгинохайрхан дүүргийн 22 дугаар хороо, Эмээлтийн шалган нэвтрүүлэх товчоогоор их хэмжээний тарваганы мах хууль бусаар нийслэл рүү оруулахыг завдсан этгээдийг саатуулжээ. Тодруулбал, Хөвсгөл аймгаас гарсан машинаас 30 ширхэг тарваганы түүхий мах авч явсныг илрүүлэн хураан авч Зооноз өвчин судлалын үндэсний төвд шилжүүлсэн байна.

Нийслэлийн Засаг даргын “Тарваган тахал өвчнөөс урьдчилан сэргийлэх талаар авах зарим арга хэмжээний тухай” захирамжийг хэрэгжүүлэх ажлын хүрээнд наймдугаар сарын 01-ний өдрөөс 10 дугаар сарын 17-ны өдрүүдэд Нийслэлийн Онцгой байдлын газар, Мэргэжлийн хяналтын газар, Цагдаагийн газар, Замын цагдаагийн албан хаагчид хамтран Сонгинохайрхан дүүргийн Эмээлт, Баруун турууны авто тээврийн Шалган нэвтрүүлэх товчоо, Налайх дүүргийн Тэрэлж, төмөр замын 4-р зөрлөгийн авто тээврийн шалган бүртгэх товчоо, Баянзүрх дүүргийн авто тээврийн шалган бүртгэх товчоо, Багануур дүүргийн Хэрлэнгийн гүүрний авто тээврийн шалган нэвтрүүлэх товчоо, Багахангай дүүргийн Замын цагдаагийн пост, Хал-Уул дүүргийн Яармаг, Нисэх, Био комбинатын шалган нэвтрүүлэх товчоодод байнгын үүрэг гүйцэтгэж ажиллаж байгаа билээ.

Мөн Чингис хаан олон улсын нисэх онгоцны буудал, Төмөр замын төв буудал, Дүүргүүдийн худалдааны төвүүд, БГД “Тоса” худалдааны төв, СБД 7 буудал, БЗД Гачуурт, ЧД Гүнт болон нийслэл дүүрэг рүү ордог баталгаат бус замуудад Мэргэжлийн хяналт, цагдаагийн байгууллагаас хөдөлгөөнт эргүүл гарч ажиллаж байгаа юм.

Олон Улсын Валютын Сангийн “Өргөтгөсөн Санхүүжилтийн Хөтөлбөр”-ийн хүрээнд Монголбанк арилжааны банкуудын активын чанарын үнэлгээг хийх Зөвлөх компанийг Монгол Улсын худалдан авах үйл ажиллагааны холбогдох хууль, журмын дагуу сонгон шалгарууллаа.

Сонгон шалгаруулалтын үр дүнд активын чанарын үнэлгээг Бүгд Найрамдах Чех Улсын PricewaterhouseCoopers Česká republika s.r.o. хийж гүйцэтгэхээр шалгарсан бөгөөд 2017 оны 11 дүгээр сарын 30-ны өдрийн дотор үнэлгээг хийж гүйцэтгэх болно.

Зөвлөх компанийн талаарх мэдээллийг дараах хаягаар авна уу. https://www.pwc.com/cz/en.html хэмээн Монгол банкнаас мэдээллээ.

Хичээлийн шинэ жил эхэлж байгаатай холбогдуулан замын хөдөлгөөний түгжрэл, ачааллыг бууруулах зорилгоор хөдөлгөөнийг дараахь байдлаар зохицуулалт хийхээр хотын даргын захирамж гарсан. Үүний дагуу Тэгш тоогоор буюу 0, 2, 4, 6, 8-р төгссөн автомашин наймдугаар сарын 19,26 -ны Бямба гарагуудад, Сондгой тоогоор буюу 1, 3, 5, 7, 9-р төгссөн автомашин 20,27-ны Ням гарагуудад 08:00-20:00 цагийн хооронд зуны хязгаарлалтын бүсэд замын хөдөлгөөнд оролцох юм.

Харин авто зам засвар, хот тохижилт, шугам сүлжээ, зөөврийн ус хангамж, дипломат байгууллагын автомашин болон зочид төлөөлөгчдийн цуваа, нийтийн зорчигч тээврийн хэрэгсэл, стандартын шаардлага хангасан такси, ажилчдын автобус, таних тэмдэг бүхий хэвлэл мэдээллийн байгууллагын тээврийн хэрэгсэл, тусгай, дуут болон гэрэл дохиогоор тоноглогдсон, хойшлуулшгүй ажил, үүрэг гүйцэтгэж яваа тээврийн хэрэгсэлд энэхүү хязгаарлалт хамаарахгүй юм байна.