Зам, тээврийн хөгжлийн яамнаас салбарын үйл ажиллагаатай холбоотой, чухал арга хэмжээ, хэрэгжүүлэх төсөл хөтөлбөрүүдэд санал авах, шаардлагатай тушаал шийдвэр гаргах үүднээс Зам, тээврийн хөгжлийн сайдын зөвлөл өнөөдөр хуралдаж хэд хэдэн асуудлыг хэлэлцлээ.
Тус хурлаар Олон Улсын Иргэний нисэхийн байгууллага /ICAO/-ын үзлэг шалгалтын бэлтгэл ажлын талаар болон ТВС-2МС агаарын хөлгийг “МИАТ” ТӨХК-ийн агаарын хөлгийн засвар үйлчилгээний газарт угсрах, үйлдвэрлэх зардлын талаар хэлэлцсэн байна. Энэ хүрээнд “МИАТ” ТӨХК-ийн Агаарын хөлгийн засвар үйлчилгээний газарт шинээр угсрагдаж байгаа ТВС-2МС агаарын хөлөгт тавих хөдөлгүүр, эд анги, шаардлагатай сэлбэг хэрэгслийг санхүүжүүлж, холбогдох арга хэмжээ авч ажиллахыг “МИАТ” ТӨХК /Т.Тамир/-д даалгажээ. Мөн ТВС-2МС агаарын хөлгийг үйлдвэрлэх технологи, норм стандартад заасны дагуу их засвар, угсралтын ажлыг гүйцэтгэж шалгалтын нислэгт бэлэн болгож, инженер, техникийн ажилтан, нисгэх бүрэлдэхүүн боловсон хүчнийг бэлтгэхийг тус тус үүрэг болголоо.
Тус агаарын хөлгийг хөдөө аж ахуй, онцгой байдал, эмнэлгийн хэрэгцээнд угсран, үйл ажиллагаанд нэвтрүүлэхээр ажиллаж байгаа нь сайшаалтай байгааг сайдын зөвлөл онцлоод, зөвхөн энэхүү агаарын хөлгөөр хязгаарлалгүй, жижиг оврын, хувийн хөлгүүдийг үйлчилгээнд нэвтрүүлж, засвар үйлчилгээний баазаа сайжруулахаас гадна аюулгүй байдлыг дээд зэргээр хангах ёстой гэдэгт санал нэгдэв. Мөн тус агаарын хөлгийг Монголдоо угсарч, үйл ажиллагаанд нэвтрүүлснээр нийгэм, эдийн засагт өгөх үр өгөөжийн талаар тооцоо судалгааг нарийн хийж, Засгийн газарт танилцуулах нь зүйтэй гэдгийг салбарын сайд Д.Ганбат онцоллоо.
Мөн хэлэлцэх асуудлын хүрээнд олон улсын иргэний нисэхийн байгууллага /ICAO/-аас хийгдэх үзлэг шалгалтын бэлтгэл ажлыг сайтар хангаж, төлөвлөгдсөн ажлыг бүрэн биелүүлж ажиллахыг ИНЕГ-ын удирдлагуудад үүрэг болгов.
Түүнчлэн Монгол Улсын Засгийн газрын үйл ажиллагааны хөтөлбөрийг хэрэгжүүлэх арга хэмжээний төлөвлөгөөний биелэлт, Эдийн засаг, нийгмийг хөгжүүлэх үндсэн чиглэлийг хэрэгжүүлэх арга хэмжээний төлөвлөгөөний биелэлт, Хууль тогтоомж, тогтоол шийдвэрийн хэрэгжилтийг эхний хагас жилийн байдлаар холдбогдох албан тушаалтнууд танилцууллаа. Иргэдээс ирүүлсэн өргөдөл, гомдлыг хууль тогтоомжийн хүрээнд судлан үзэж, хуулийн хугацаанд шуурхай шийдвэрлэж, хариу өгч ажиллахыг сайдын зөвлөлөөс даалгасан байна.
Мэдээллийн технологийн чиглэлээр нарийн мэргэжил эзэмшүүлэх үнэ төлбөргүй сургалтанд суусан залуус БНСУ-д сурсан мэргэжлээрээ ажиллахаар явж байгаа тухай Нийслэлийн Залуучуудын хөгжлийн газар, MKIT Educational Center мэдээллийн технологийн төвийнхөн хамтран мэдээлэл хийлээ.
Нийслэлийн Байгаль орчны газар, нийслэлийн Мэргэжлийн хяналтын газар хамтран 2017 оны дөрөвдүгээр сарын 12-28-ны өдөр нийслэлийн нутаг дэвсгэр, Туул голын ай сав газарт үйл ажиллагаагаа явуулж буй түгээмэл тархацтай ашигт малтмалын тусгай зөвшөөрөл эзэмшигч аж ахуйн нэгж, байгууллагуудад шалгалт хийжээ. Энэхүү шалгалтаар байгаль орчныг нөхөн сэргээх үүргээ биелүүлээгүй, тусгай зөвшөөрөл бүхий ашиглалтын талбай нь Улаанбаатар хотын ундны усны хамгаалалтын бүстэй давхардсан 63 аж ахуйн нэгж илэрснээс гадна түгээмэл тархацтай ашигт малтмалын ашиглалтын тусгай зөвшөөрөл олгосноос хойш гурван жилийн хугацаанд ашиглаж эхлээгүй 33 аж ахуйн нэгж тогтоогдсон байна. 
Хичээлийн шинэ жил эхлэх гэж байгаатай холбоотойгоор хөдөө, орон нутгаас Улаанбаатар хотыг чиглэх иргэд, тээврийн хэрэгслийн хөдөлгөөн эрс нэмэгдэж байгаа. Иймээс зам тээврийн ослын эсрэг жил бүрийн энэ үеэр Замын цагдаагийн алба, Автотээврийн үндэсний төв хамтран “Оюутан тээвэр” хамтарсан хяналт шалгалтыг орон нутгийн замд зохион явуулдаг ажээ.