Month: August 2017

Зам, тээврийн хөгжлийн сайд Д.Ганбат өнгөрсөн долоо хоногт Улаанбаатар-Хөшигийн хөндийн олон улсын шинэ нисэх онгоцны буудал чиглэлийн хурдны авто замын ажилтай танилцжээ. Тэрээр зам, барилгын ажлыг эрчимжүүлж, батлагдсан график төлөвлөгөө, стандартын дагуу үйл ажиллагаагаа эрчимжүүлэх үүрэг өгсөн байна.

Тус 32,2 км хурдны авто зам нь 32,5 метр зорчих хэсгийн өргөнтэй, хоёр урсгал зургаан эгнээтэйгээр баригдаж байгаа бөгөөд зорчих хэсэг нь зааглагдсан тус бүр нь гурван зорчих зурвастай байхаар төлөвлөж барилгын ажил батлагдсан графикийн дагуу нийт 44.1 хувийн гүйцэтгэлтэй үргэлжилж байна.

Барилгын ажлын талбайд 667 хүн ажиллаж байгаа бөгөөд 420 монгол, 204 хятад ажилчид байгаа талаар албаныхан мэдээллээ. Мөн нийт 249 ширхэг техник, тоног төхөөрөмжөөс гадна 500 тн/цаг хүчин чадалтай асфальт бетон завод, хоёр иж бүрдэл хээрийн лаборатори ажиллуулж, стандартын дагуу автозамын барилгын ажлыг гүйцэтгэж байгаа талаар төсөл хэрэгжүүлэх нэгжээс мэдээллээ.

Барилгын ажлын ерөнхий гүйцэтгэгчээр БНХАУ-ын Төмөр замын дөрөвдүгээр товчоо групп, туслан гүйцэтгэгчээр “Бадрах Ойл” ХХК, “Эрдэнэ зам” ХХК, “Арж Капитал” ХХК тус тус ажиллаж байгаа аж.

Сонгинохайрхан дүүрэгт байрлах Авто худалдааны цогцолбор маргаашнаас эхлэн тогтмол ажиллахаар болжээ. Энэ талаар Авто тээврийн үндэсний төвийн албан тушаалтанууд мэдээлэл хийлээ.

Одоогийн байдлаар авто худалдааны цогцолборын 6,375 зогсоолоос 1,200-г нь автомашины бизнес эрхлэгчид авсан байгаа аж. Мөн тус цогцолборт авто сэлбэгийн худалдаа хийдэг газрууд, машины дугаар үйлдвэрлэх үйлдвэр, банк гэх мэт үйлчилгээнүүдийг нэг цогцолбор болгохоор төлөвлөн ажиллаж байгаа юм байна.

Нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүү Европийн сэргээн босголт хөгжлийн банкны Суурин төлөөлөгч Ирина Кравченкотой өнөөдөр уулзлаа.

Уулзалтад НЗДТГ-ын Төсөл хамтын ажиллагааны тасгийн дарга И.Батхүү, нийслэлийн Тээврийн газрын дарга Д.Отгонбаатар нийслэлийн Хот төлөвлөлт, ерөнхий төлөвлөгөөний газрын хот төлөвлөлтийн хэлтсийн дарга С.Даланжаргал нөгөө талаас ЕСБХБ-ны Монгол дахь дэд бүтэц хариуцсан ахлах банкир Светлана Радченко, ЕСБХБ-ны Монгол дахь дэд бүтэц хариуцсан тэргүүлэх банкир Антон Дан-Чин-Ю болон бусад албаныхан байлцав. Тэд “Улаанбаатар хотын Хатуу хог хаягдлыг боловсруулах байгууламжийг шинэчлэх төсөл”-ийн талаар ярилсанаас гадна, хотын нийтийн тээврийг шинэчлэхэд нэн тэргүүнд хэрэгцээтэй төлөвлөгөөг тодорхойлох зорилгоор бэлдсэн төслийн урьдчилсан ТЭЗҮ-ийн үр дүнг хуваалцаж, ЕСБХБ хотын нэн тэргүүний хэрэгцээг санхүүжүүлэх боломжийн талаар хэлэлцлээ.

Уулзалтын төгсгөлд нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүү ЕСБХБ-тай хамтарч хэрэгжүүлэх төслийг яаравчлуулж, зарим төслийн судалгаатай дахин танилцахаа онцолж байв гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

УИХ-ын 39 дүгээр тогтоолын дагуу зохион байгуулж байгаа Монгол Улсын Үндсэн хуульд оруулах нэмэлт, өөрчлөлтийн төслийн хэлэлцүүлэг өнөөдөр /2017.08.23/ Багахангай дүүрэгт боллоо.

Хэлэлцүүлэгт Багахангай дүүргийн Засаг даргын орлогч Б.Болормаа, ИТХ-ын дарга Х.Цогцэцэг, ИТХ-ын тэргүүлэгчдийн нарийн бичгийн дарга, ажлын албаны дарга Ц.Дэнсмаа болон I,II хорооны 200 гаруй иргэн оролцож, санал бодлоо солилцлоо.

Хэлэлцүүлгийг УИХ-ын Тамгын газрын Эдийн засгийн байнгын хорооны ахлах зөвлөх Ж.Батсайхан хөтөлж, УИХ-ын тогтолцоонд орсон нэмэлт өөрчлөлтийн талаар Эдийн засгийн байнгын хорооны зөвлөх Д.Мягмарцэрэн, Засаг захиргаа, нутаг дэвсгэрийн тухай нэмэлт, өөрчлөлтийн талаар ахлах зөвлөх Н.Мөнхзэсэм, Засгийн газар, шүүх эрх мэдлийн хүрээнд орж буй нэмэлт өөрчлөлтийн талаар Эдийн засгийн байнгын хорооны зөвлөх Л.Батмөнх нар танилцуулж, мэдээлэл өглөө.

Танилцуулга мэдээллийн дараа, иргэд санал бодлоо хуваалцаж, сонирхсон асуултдаа хариулт авлаа.

Багахангай дүүргийн I хорооны иргэн С.Баатархүү “Үндсэн хууль нь тухайн улс орны “эцэг” хууль байдаг. Иргэний хувьд хоёр нэмэлт, өөрчлөлтийг дэмжиж байгаа. Миний ойлгож байгаагаар Ерөнхий сайд танхимаа бүрдүүлэх нь зөв. Учир нь, улс төрийн харьяалалгүй ажлаа шийдэх боломжтой. Хоёрдугаарт, төрийн албыг тодорхой зааж өгсөнд баярлаж байна. Төрийн албанд намын харьяаллыг тодорхой тусгасан. Төрийн албаны үүргийг гүйцэтгэхэд намын асуудал ихээхэн хүндрэл учруулдаг. Олон жил ажилласан мэргэжлийн хүмүүсийг намын харьяаллаар ажлаас нь хоморголон халдаг шүү дээ. Үүнийг цэгцлэх нь улс орны хувьд томоохон шинэчлэл болно гэж үзээд дээрх хоёр нэмэлт, өөрчлөлтийг дэмжиж байна” гэлээ.

ИТХ-ын тэргүүлэгчдийн нарийн бичгийн дарга, ажлын албаны дарга Ц.Дэнсмаа “Монгол Улсын Үндсэн хуульд нэмэлт, өөрчлөлт оруулах хуулийн төслийн ард нийтийн хэлэлцүүлэг манай дүүрэгт зохион байгуулагдаж байна. Дүүргийн Засаг даргын захирамжаар 11 хүний бүрэлдэхүүнтэй баг гарч хорооны иргэдэд хэсэгчилсэн байдлаар мэдээлэл хүргэж ажиллаж байна. Энэ хүрээнд иргэдийнхээ саналыг нэлээд түлхүү авч байна. Иргэдийн хүсэн хүлээж байгаа саналууд Үндсэн хуулийн нэмэлт, өөрчлөлтөд туссанд талархалтай байна. Багахангай дүүргийн иргэдээс ирж байгаа саналыг харахад хот болох хүсэлтийг их тавьж байна. Иймд УИХ-ын Тамгын газраасҮндсэн хуулийн нэмэлт, өөрчлөлтийн хуулийн төслийн хэлэлцүүлгийг зохион байгуулж байгаа хүмүүс иргэдийн саналыг хуулийн төсөлд тусгуулахад ач холбогдол өгч ажиллана гэдэгт итгэлтэй байна” гэлээ.

Багахангай нь нийслэлээс алслагдсан гурван дүүргийн нэг. Улаанбаатар хотын хэт төвлөрлийг сааруулахын тулд Багахангайг дүүргийн статустай байгуулаад 27 дахь жилдээ ажиллаж байна. Дүүргийн онцлог нь дэд бүтэц сайн хөгжсөн, газар нутгийн хувьд үйлдвэр үйлчилгээ явуулахад тохиромжтой. Учир нь, төмөр зам, автозамд холбогдсон нь цаашид Улаанбатарындагуул хот болон хөгжих боломжтойг иргэд нь онцолж байлаа. Хэлэлцүүлэг Багануур дүүрэгт үргэлжилнэ гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Хөвсгөл аймгийн Рашаант сумын нутагт энэ сарын 16-ны шөнө хүчтэй аадар орж үер болжээ.

Энэ үеэр тус сумын тавдугаар багийн иргэн 43 настай Б үерийн усанд осолдож нас барсан байна.

Эмэгтэйн цогцос үер орсон жалганаас маргааш өглөө нь олджээ. Одоогоор хууль хяналтын байгууллага шалгаж байгаа бөгөөд шүүхийн шинжилгээний дүн эцсийн байдлаар хараахан гараагүй байгаа ажээ.