Month: August 2017

Нийслэлийн удирдах ажилтнуудын ээлжит шуурхай зөвлөгөөн өнөөдөр боллоо. Хуралдаанаар Улаанбаатар хотын өнгөрсөн 14 хоногийн нөхцөл байдлыг танилцуулав.

Нийслэлийн цагдаагийн газраас өгсөн мэдээллээр 14 хоногийн хугацаанд гэмт хэрэг, зөрчил, зам тээврийн ослын шинжтэй 3769 дуудлага, мэдээлэл хүлээн авсан нь өмнөх 14 хоногтой харьцуулахад 470 нэгж буюу 12.4 хувиар буурч, гэмт хэргийн шинжтэй 1845 үйлдэл бүртгэгдсэн нь 80 нэгж буюу 4.2 хувиар буурсан үзүүлэлттэй байна. Гэмт хэрэг үйлдэгдсэн нутаг дэвсгэрээр нь авч үзвэл Баянзүрх дүүрэгт хамгийн их буюу 551 гэмт хэрэг бүртгэгдэж, Багахангай дүүрэгт хамгийн бага буюу 2 гэмт хэрэг бүртгэгджээ. Хүний эрүүл мэнд, амьд явах эрхийн эсрэг болон залилангийн хэрэг өссөн бол дээрэм, хүчин, хулгайн гэмт хэрэг буурсан байна.

Дээрх хугацаанд Согтууруулах ундаа хэтрүүлэн хэрэглэсэн, биеэ авч явах чадваргүй 1567 хүн саатуулагдсан байна. Мөн Зөрчлийн тухай хуулийн дагуу 1269 иргэнд 440 сая 750 мянган төгрөгийн торгуулийн арга хэмжээ ноогдуулж, Гудамж, талбайд үйлдэгдсэн 47 гэмт хэргийг үйлдэл дээр нь илрүүлж, таслан зогсоожээ.

Нийслэлийн Онцгой байдлын газрын дэд дарга, хурандаа Д.Эрдэнэбаатарын танилцуулснаар өнгөрсөн 14 хоногийн хугацаанд аюулт үзэгдэл, техникийн холбогдолтой ослын 66 удаагийн дуудлагыг хүлээн авч, Гал унтраах, аврах ангиуд объектын гал түймрийн 51, осол, аврах ажиллагааны 15 удаагийн дуудлагаар гарч үүрэг гүйцэтгэсэн байна. Эдгээр дуудлагыг өнгөрсөн оны мөн үетэй харьцуулахад объектын гал түймэр 15.0 хувиар, техникийн холбогдолтой осол, аврах ажиллагааны дуудлага 46.4 хувиар тус тус буурч, нийт аюулт үзэгдэл техникийн холбогдолтой ослын тоо 25.0 хувиар буурсан үзүүлэлттэй байна.

Үүнээс гадна Сонгинохайрхан дүүргийн 1, 22 дугаар хороонд малын гоц халдварт шүлхий өвчний голомт илэрч, хорио цээрийн дэглэм тогтоосноос хойш 34 хоногийн хугацаанд ариутгалын цэгээр нэвтрэн өнгөрсөн 6554 автомашиныг ариутгаж, 30 өрхийн 168 үхрийг зориудаар устгаж, зам, гарц болон устгалын цэгийн ойролцоох 1.131.560 м2 талбайд ариутгал халдваргүйжүүлэлтийг хийж гүйцэтгэжээ. 1, 2 дугаар голомтын бүсэд давтан вакцинжуулалтыг хийж бүрэн дууссан бөгөөд эрүүл бүсийн вакцинжуулалтын явц 92.9 хувь буюу 1276 өрхийн 81 мянга 610 толгой малыг хамруулсан байна. Голомтын бүсүүдэд өдөр бүр мэргэжлийн албадын нийт 116 ажилтан, албан хаагч, 43 нэгж, техник хэрэгсэлтэйгээр хорио цээрийн дэглэм тогтоож, ариутгал халдваргүйжүүлэлтийг хийж байгаа юм.

Нийслэлийн мэргэжлийн хяналтын газраас 14 хоногийн хугацаанд төлөвлөгөөт 45, төлөвлөгөөт бус 197, гүйцэтгэлийн 77, нийт 319 хяналт шалгалтыг хийсэн байна. Шалгалтаар илэрсэн зөрчилд нийт 13.5 сая төгрөгийн торгууль ноогдуулж, 52 хувийг нь барагдуулжээ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Нийслэлийн удирдах ажилтнуудын шуурхай зөвлөгөөнөөр Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр нийслэлийн хэмжээнд өвөлжилтийн бэлтгэл ажлын явцыг танилцууллаа. Өнөөдрийн байдлаар өвөлжилтийн бэлтгэл 72 хувьтай байна. Дүүргүүдээр авч үзвэл өвөлжилтийн бэлтгэл ажлын явцаараа Хан-Уул дүүрэг тэргүүлж байгаа бол Багахангай дүүрэгт 52 хувь буюу хамгийн бага үзүүлэлттэй байгааг танилцууллаа. Нийслэлийн Засаг дарга бөгөөд Улаанбаатар хотын Захирагч С.Батболд дүүргийн дарга нарыг ажлаа хурдасгаж, 9 дүгээр сарын 15 гэхэд нийслэлийн хэмжээнд өвөлжилтийн бэлтгэл ажлыг 100 хувь хангаж дуусгах үүрэг өглөө.

Дулаан, цахилгаан хангамжийн өвөлжилтийн бэлтгэл 78.2 хувь, инженерийн хангамжийн байгууллагуудын бэлтгэл ажил 76.5 хувь, Нийслэлийн Засаг даргын хэрэгжүүлэгч агентлаг, харьяа газруудын бэлтгэл ажил 72 хувьтай байна.

Сургууль цэцэрлэг, эрүүл мэндийн байгууллагын хувьд нийслэлд энэ онд 13 цэцэрлэг, 10 сургууль шинээр ашиглалтад хүлээн авахаас 13 цэцэрлэг нь 80-100 хувийн гүйцэтгэлтэй, 10 сургуулийн хувьд 60-80 хувийн гүйцэтгэлтэй байна. 2017-2018 онд төвлөрсөн дулаан хангамжид холбогдох боломжтой болсон 4 сургууль, 1 цэцэрлэг, 2 эмнэлгийн байрны гадна шугам сүлжээ, дулаан дамжуулах төв, холигч насосны узель хийхэд шаардагдах 515 сая 860 мянган төгрөгийг НЗД-ын А/615 дугаар захирамжаар шийдвэрлэжээ. Мөн 2017-2018 оны өвөлжилтийн бэлтгэл ажлын хүрээнд 1000 тн бодис, 1500 тн давс нэмж нөөцлөхөөр 555 сая төгрөгийн худалдан авах ажиллагаа зохион байгуулж байна.

Хичээлийн шинэ жилийн бэлтгэл хангагдаж байна

Нийслэлийн хэмжээнд хичээлийн шинэ жилийн бэлтгэл хуваарийн дагуу хангагдаж байна. Нийслэлийн Засаг даргын өгсөн үүрэг даалгаврын дагуу хүүхдүүдийг зам тээврийн осолд өртөхөөс урьдчилан сэргийлэх, аюулгүй байдлыг нь хангах зорилгоор нийт 16 сургуулийн гадна талд хурд сааруулагч, замын тэмдэг, тэмдэглэгээний ажил хийсэн байна. Мөн нийслэлийн хэмжээнд Сонгинохайрхан дүүргийн 65 дугаар сургууль, Сүхбаатар дүүргийн 16 дугаар сургууль, Баянзүрх дүүргийн “Шавь” цогцолбор сургууль гэсэн ерөнхий боловсролын 3 сургуульд хөгжлийн бэрхшээлтэй хүүхэд суралцах орчныг бий болгон, тохижилтын ажил хийсэн юм. Улс, нийслэлийн төсвийн 2.6 тэрбум төгрөгийн хөрөнгө оруулалтаар ерөнхий боловсролын 51 сургуульд засварын ажил хийгдэж байна. Засварын ажил энэ долоо хоногт багтан бүрэн дуусна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Түгжрэл сааруулах зорилгоор Нийслэлийн Засаг даргаас ирүүлсэн хүсэлтийн дагуу их, дээд сургууль, коллежийн хичээлийн шинэ жилийн нээлтийг 09.04-нд зохион байгуулахаар боллоо хэмээн БСШУСЯ-наас мэдэгдлээ.

Архивын ерөнхий газраас “Газар-Улсын үндэс” сэдэвт газрын зураг, газрын нэршилийн баримтын үзэсгэлэн дэлгэгдлээ.

Ирэх сарын 20 хүртэл үргэлжлэх тус үзмэрт:

1. Манжийн эрхшээлийн үеийн Монголын газрын зураг, газар усны нэршил (XVIII зуунаас- XX зууны эхэн)
2. Шашин төрийг хослон барьсан Хаант Монгол улсын үеийн газрын зураг, газар усны нэршил (1911-1921 он)
3. Монгол Улсын үеийн газрын зураг, газар усны нэршил (1921-2017 он) гэсэн 3 үндсэн хэсгээс бүрдэнэ.

Үзэсгэлэнд Архивын ерөнхий газрын Үндэсний төв архивын Түүхийн баримтын архив, Улс төрийн нам, олон нийтийн байгууллагуудын баримтын архив, Кино, гэрэл зураг, дуу авианы баримтын архив, Зураг төслийн баримтын архивын сан хөмрөг дэх газрын зураг, баримт бичиг, гэрэл зураг зэрэг ойролцоогооо 100 орчим ховор үзмэр тавигдана.

Эрүүл мэндийн яам, Хавдар судлалын үндэсний төв, Монголын Элэг цөс нойр булчирхайн эмч нарын нийгэмлэг, Япон улсын Накаяма Хавдар судлалын институт хамтран “Хоол боловсруулах замын хорт хавдрын эмчилгээ, оношилгоо” сэдэвт олон улсын хурлыг 9 дэх жилдээ зохион байгууллаа.

Хурлыг нээж Монгол улсын Засгийн газрын гишүүн, Эрүүл мэндийн сайд А.Цогцэцэг үг хэлэхдээ “Энэхүү олон улсын хурлыг анх зохион байгуулсан 2009 оноос хойш хоол боловсруулах замын хавдрын үед хийгдэх олон мэс заслын аргыг нэвтрүүлэн, хавдар судлалын салбарт нутагшуулсан. Манай улсад оношилж эмчилж чадахгүй байгаагаас гадаа улс оронд эмчлүүлэхээр зорчих иргэдийн тоог бууруулах, гадагшаа урсан санхүүгийн урсгалыг багасгах, иргэдээ өвчний улмаас санхүүгийн бэрхшээлд оруулахгүй байх чиглэлээр Эрүүл мэндийн яам онцгой анхааран ажиллаж, тоног төхөөрөмжийн шинэчлэл хийж, шинэ арга технологийг нэвтрүүлэх, эмч эмнэлгийн мэргэжилтэн, техникчдийг багаар нь өндөр хөгжилтэй улс оронд сургах ажлыг зохион байгуулж байна. Үүний нэг жишээ нь өнөөдрийн олон улсын хурал юм. Энэхүү хурал нь манай эмч мэргэжилтнүүдэд бусад орны туршлагаас суралцах, туршлагаа солилцож, одоогоор хийж чадаж байгаа мэс заслынхаа арга технологийг улам боловсронгуй болгоход чухал өгөөжтэй болно” гэдгийг онцлон тэмдэглээд, хуралд оролцож байгаа эмч мэргэжилтнүүд, гадаад улс орноос уригдан оролцож байгаа эрдэмтэн, эмч нарт баяр хүргэж, ажлын амжилт хүслээ.

“Монголын Нууц Товчоо”-оос сэдэвлэн бүтээсэн “Чингис Хаан” бүрэн хэмжээний анимэйшн хүүхэлдэйн киног “Ocean Pictures” компанийн хамт олон бүтээж байна. Түүнчлэн “Ocean Pictures” компанийн хамт олон энэхүү бүтээлээ гадны улс орнуудын анимэйшний мэргэжилтнүүдээс зөвлөгөө авч бүтээж байгаа төдийгүй, “Walt Disney” компанийн форматаар хийж байгаа аж.

Монголын мэдрэлийн эмч нарын нийгэмлэгээс “Нойргүйдэл ба эпилепси” сэдэвт эрдэм шинжилгээний хурал зохион байгууллаа. Энэ хурлаар нойрны өвчнийг эпилепсийн уналт таталтаас хэрхэн ялган оношлох, нойрны үеийн амьсгал түгжигдэх хамшинжийн оношилгооны ач холбогдол, уналт таталтын орчин үеийн менежмент зэрэг сэдвүүдээр Монгол, ХБНГУ, БНСУ, Япон улсын эрдэмтэд илтгэл тавьж хэлэлцүүллээ.

Хурлыг нээж Монгол улсын Засгийн газрын гишүүн, Эрүүл мэндийн сайд А.Цогцэцэг үг хэллээ. Тэрээр Монгол улсын мэдрэл судлалын салбарынхан өнөөдөр анагаахын салбарт тулгамдаж байгаа уналт таталт, нойргүйдлийн оношилгоо эмчилгээний чиглэлээр хамтран ярилцаж, шинэ шатанд хүргэхийг хичээж байгаад талархаж байгаагаа илэрхийлээд, “Өнөөгийн нийгэмд мэдрэлийн өвчин эмгэг, ялангуяа нойргүйдэл, уналт таталт өвчин ихсэх хандлагатай байгаа тул мэдрэл судлалын чиглэлээр ажиллаж байгаа эмч, мэргэжилтнүүд салбарт анагаахын бусад салбарын эмч мэргэжилтэн, эрдэмтэдтэйгээ нэгдэж багаар ажиллаж хэрэгтэй. Тиймээс энд хүрэлцэн ирсэн та бүхэн мэдрэл судлалын чиглэлээр мэдлэг, туршлагаа хуримтлуулж, судалгаа шинжилгээний олон ажлуудаасаа үндэслэсэн бодлого, шийдвэрүүдийг Эрүүл мэндийн яаманд хүргүүлэх зорилго тавин ажиллана гэдэгт итгэлтэй байна. Мэргэжлийн салбар зөвлөл, мэргэжлийн нийгэмлэгүүд мэдрэлийн мэс заслын чиглэлээр оношилгоо, эмчилгээ, зөвлөгөө өгөх, хяналт тавих заавар, стандарт боловсруулах хэрэгтэй” гэж хэллээ.

Сүхбаатар дүүргийн 5 дугаар хороонд байрлах “Өгөөж чихэр боов“ ХХК-ийн баруун урд уулзвар, 10 дугаар хороонд байрлах “Авто плаза”-ийн уулзварын нээлт өнөөдөр боллоо. Нээлтийн арга хэмжээнд нийслэлийн Засаг дарга бөгөөд Улаанбаатар хотын Захирагч С.Батболд, нийслэлийн Авто замын хөгжлийн газрын дарга Ж.Тогтохбаяр болон бусад албаныхан оролцов. Улаанбаатар хотыг 2020 он хүртэл хөгжүүлэх Ерөнхий төлөвлөгөөний тодотгол, “2030 оны хөгжлийн чиг хандлага” баримт бичигт замын хөдөлгөөний нэвтрүүлэх чадварыг дээшлүүлж, түгжрэлийг бууруулах зорилгоор гол гудамж, замын уулзварын өргөтгөл шинэчлэлтийг барьж байгуулан нийслэлийн авто замын сүлжээг хөгжүүлэхээр тусгасан. Үүний дагуу нийслэлийн Авто замын сангийн хөрөнгөөр энэ онд Сүхбаатар дүүргийн 5 дугаар хороонд байрлах “Өгөөж чихэр боов “ХХК-ийн баруун урд уулзвар, 10 дугаар хороо, “Авто плаза”-ийн уулзвар, Хан-Уул дүүргийн 15 дугаар хороо, Богд Жавзандамбын уулзвар, 11 дүгээр хороо, ХААИС-ийн уулзварын өргөтгөл шинэчлэлийн ажлыг хийж гүйцэтгээд байгаа билээ.

Нийслэлийн Засаг дарга бөгөөд Улаанбаатар хотын Захирагч С.Батболд “Улаанбаатар хотын авто замын хөдөлгөөний нэвтрүүлэх чадварыг нэмэгдүүлэхэд бас нэг чухал алхам бол уулзваруудыг өргөтгөх явдал юм. Хотын төв замуудын уулзвар нь ашиглалтад орсноос хойш өргөтгөл шинэчлэлийн ажил хийж байгаагүй. Тиймээс энэ жил 4 томоохон уулзварыг шинэчилж байгаа. Жишээлбэл, өнөөдөр бидний нээлтийг нь хийж буй “Өгөөж чихэр боов” ХХК-ийн уулзварыг Сөүлийн гудамж талдаа 2 эгнээ байсныг 5 эгнээ болгон, Үндсэн хуулийн гудамж урдаасаа хойш 6 эгнээ байсныг 9, хойноосоо урагш 5 эгнээтэй байсныг 8 эгнээ болгон өргөтгөн шинэчиллээ. Ингэснээр уулзварын нэвтрүүлэх чадвар 25 орчим хувиар нэмэгдэж байгаа юм. Түүнчлэн энэ жил Сүхбаатар дүүргийн 10 дугаар хороо, “Авто плаза”-ийн уулзвар, Хан-Уул дүүргийн 15 дугаар хороо, Богд Жавзандамбын уулзвар зэргийг өргөтгөн шинэчилсэн байгаа” хэмээн онцлов.

“Өгөөж чихэр боов “ХХК-ийн баруун урд уулзварын өргөтгөл шинэчлэлт хийснээр тус замын зорчих хэсгийн өргөн 17-24.5 метр, эгнээний тоо 5-9, явган хүний зам 1.5 м – 3 метрийн өргөнтэй болж, уулзварын нэвтрүүлэх чадвар 20-30 хувь нэмэгдэж, замын хөдөлгөөний ачаалал буурч, иргэдийн аюулгүй байдал сайжирч, зорчигч, тээвэрлэгчдийн цаг хугацаа, шатахуун хэмнэх, ая тухтай байдлыг бүрэн хангах боломжтой болоод байна.

Харин “Авто плаза”-ийн уулзварыг өргөтгөн шинэчилэх ажлын хүрээнд Их тойруугийн өргөн чөлөө 2 талдаа 6 эгнээтэй байсныг баруун тийш эргэх 1 эгнээ нэмж, 7 эгнээ, урдаасаа хойш 2 эгнээ байсныг 5 эгнээ, хойноосоо урагш 2 эгнээ байсныг 3 эгнээ болгон өргөтгөлөө. Өргөтгөл шинэчлэлт хийснээр Их тойруу дахь 100 айл, Өлзий төвүүдийн ачаалал 20-30 хувь буурна гэж албаныхан үзэж байгаа юм.

Нийслэлийн Авто замын хөгжлийн газрын дарга Ж.Тогтохбаяр “Байнгын ачаалалтай байдаг Сүхбаатар дүүргийн 10 дугаар хороонд байрлах “Авто плаза”-ийн уулзвар нь 1990, 2010 онд өргөтгөл шинэчлэлт хийж байсан юм. Хотын авто замын хэт түгжрэл, иргэдээс ирсэн саналыг үндэслэн энэхүү уулзварыг нийслэлийн Авто замын сангийн хөрөнгөөр энэ онд засварлахаар шийдвэрлэсэн билээ. Тус ажлын гүйцэтгэгчээр “Велтэд лайн Монголия” ХХК ажиллаж, гэрээт хугацаандаа ажлаа дуусгасан байна” хэмээв гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.