Month: July 2017

Монгол Улсын тав дахь Ерөнхийлөгчөөр сонгогдсон Х.Баттулгын тангараг өргөх ёслолын ажиллагаа Төрийн ордны Их танхимд болж өндөрлөлөө. Монгол Улсын Ерөнхийлөгчөөр сонгогдсон. Х.Баттулга Ерөнхийлөгчийн тангараг өргөх ёслолын ажиллагаанд Ерөнхий сайд, УИХ, Засгийн газрын гишүүд, Дээд шүүхийн төлөөлөл, дотоод гадаадын төлөөлөгчид хүрэлцэн ирснийг УИХ-ын дарга танилцуулсан юм. УИХ-ын дарга М.Энхболд “Үндсэн хуулийн 32 дугаар зүйлд зааснаар Монгол Улсын Ерөнхийлөгчөөр сонгогдсон Халтмаагийн Баттулга Монгол Улсын Их хуралд тангараг өргөнө үү” гэсэн юм.

Халтмаагийн Баттулга “Монгол Улсын тусгаар тогтнол, бүрэн эрхт байдал, эрх, үндэсний эв нэгдлийг эрхэмлэн хамгаалж, Үндэсний хуулийг дээдлэн сахиж, Ерөнхийлөгчийн үүргийг шударгаар биелүүлэхээ батлан тангараглая” хэмээлээ.

Тэрээр төрийн далбаандаа мөргөж, улмаар Монгол Улсын дөрөв дэх Ерөнхийлөгч Цахиагийн Элбэгдоржоос төрийн хасбуу тамгыг хүлээн авлаа. Түүнд Төрийн ордны Их танхимд хуран цугласан зочид, төлөөлөгчид баяр хүргэлээ.

Яг одоо Төрийн ордны их танхимд Монгол Улсын тав дахь ерөнхийлөгчийн тангараг өргөх ёслолын арга хэмжээ болж байна. Энэ үеэр АН-аас нэр дэвшсэн Халтмаагийн Баттулга УИХ, Ерөнхий сайд, Ерөнхийлөгч, ард түмэндээ хандан үг хэллээ. Тэрбээр “Монголчууд аа, элэг нэгт ахан дүүс ээ, УИХ-ын Эрхэм гишүүд ээ, Хүндэт зочид, хатагтай ноёд оо, Миний бие иргэдийнхээ итгэлийг хүлээж, Монгол Улсын Ерөнхийлөгчийн тангараг өргөлөө. Энэ бол иргэд, сонгогчдоос надад хүлээлгэж буй их итгэл найдвар, өндөр хариуцлага бөгөөд би Ерөнхийлөгчийн албыг өвөг дээдсээс уламжлан ирсэн төрт ёсны нандин хэлхээ, ард түмнийхээ төлөө сэтгэл оюунаа дайчлан чин шударгаар зүтгэх дуудлага хэмээн хүлээн авч байна. Итгэл өгч, найдан дэмжиж, Монгол Улсаа хөгжүүлэн дэвжээх мөрийн хөтөлбөрийг минь дэмжсэн нийт иргэддээ халуун талархал илэрхийлье.

Мөн хамтран өрсөлдөж, Монгол Улс дахь ардчилсан сонголтыг хүлээн зөвшөөрсөн өрсөлдөгчдөдөө Монголын төлөөх цаашдынх нь үйл хэрэгт амжилт хүсье.

Мөн энэ мөчид Монгол Улсын Ерөнхийлөгчөөр хоёронтоо сонгогдож ажилласан Цахиагийн Элбэгдорж Ерөнхийлөгчийн цаашдынх нь ажил үйлсэд амжилт хүсье.

Өнөөдөр Монголын ард түмэнд олон төрлийн хүлээлт байна. Шийдлээ хүлээсэн олон сорилтууд ар араасаа бодлого нэхэж, хамтын ажиллагаа, хөдөлмөр зүтгэл, эх оронч сэтгэл шаардаж байна. Олон түмний хүлээлт бол хийх ажлын минь замын зураг болж, түүнийг хэлбэрэлтгүй хэрэгжүүлэх нь надад оногдсон үүрэг гэж ойлгож байна.

Миний бие, Монгол Улсын Ерөнхийлөгч, Зэвсэгт хүчний Ерөнхий командлагчаар Та бүхнийхээ итгэл дэмжлэгээр сонгогдож, дөнгөж сая Монгол Улсын Үндсэн хуулийн дагуу тангаргаа өргөлөө. Та бүхнийхээ өндөр итгэлийг би, шаргуу зүтгэлээр хариулан ажиллахаа энд дахин тангараглаж байна.

Их хурлын Эрхэм гишүүдээ,

Та биднийг хойшлуулшгүй шийдэх ёстой ажлууд шилээ даран хүлээж байна. Би нэн тэргүүнд иргэдээ ядуурлаас гаргах, ажилгүйдлийг арилгахын төлөө та бүхэнтэй хамтран ажиллахыг эрмэлзэж байна. Өнөөдөр ядуурал, ажилгүйдэл нь ноцтой хэмжээнд ирж, Үндэсний “аюултай” байдалд хүрчихээд байгаад би онцгой анхаарч бүх боломж, бололцоог үүнд чиглүүлэн, төвлөрч ажиллах болно.

Энэ зорилгын төлөө Засгийн газар, УИХ-тай хамтарч, нэгэн хүчээр үр дүнд хүрэхийг зорих болно гэдгээ та бүхэнд дуулгая. Хамтын хүч ямагт амжилт авчирдаг. Та бүхний зөв шийдвэр, зөв бодлого бүрийг би дэмжин ажиллах болно. Ард түмний эрх ашгийг огоорсон, дутуу дулимаг боловсруулсан бодлого, шийдвэр, хууль тогтоомж гаргаваас засах, залруулахын төлөө шаардаж, шүүмжлэх болно.

Монголчууд аа, Ахан дүүс ээ,

Би иргэдээ сонсдог, иргэдтэйгээ хамтран ихийг бүтээдэг Ерөнхийлөгч байна.

Монгол Улс богино хугацаанд эдийн засгийн бодит өсөлтийг бий болгосон, дэлхийд нэртэй, дотоодын үйлдвэрлэл хөгжсөн, иргэдийн маань бүтээмж нэмэгдсэн улс орныг иргэдийнхээ оролцоотой цогцлоож чадна гэдэгт итгэл төгс байна.

Миний бие ажлын зарчимдаа дараах зүйлийг дэмжихгүй гэдгээ энд бас онцлон хэлье.

Хууль ёсыг уландаа гишгэсэн, хуйвалдаанч түшмэдийн бодлогыг дэмжихгүй. Тэдний бусармаг үйлдлийг хуулийн дагуу таслан зогсооно. Төрийн албыг наймаалдаг, аливаа төрлийн гэмт үйлдэлтэй шийдвэртэй тэмцэнэ.

Иргэдээ ядууруулж, цөөн хүний халаас зузаардаг бурангуй ёсыг таягдан хаяна. Хүний эрхийг хөсөрдүүлдэг, иргэдээ ялгаварладаг харгис жишгийг халах болно.

-Би эв нэгдлийг эрхэмлэж, үндэсний эрх ашгаа дээдэлсэн Ерөнхийлөгч байна.

-Би эрх чөлөө, шударга ёсыг сахин хамгаалж, иргэнээ дээдэлсэн Ерөнхийлөгч байна.

-Би эдийн засгаа сэргээж, аж үйлдвэрийг хөгжүүлсэн Ерөнхийлөгч байна.

-Би экологийн тэнцвэрийг хангаж, газар нутгаа хамгаалсан Ерөнхийлөгч байна.

Би экспортын шинэ эринийг эхлүүлсэн, эрх тэгш гадаад харилцааг эрхэмлэгч Ерөнхийлөгч байна.

Энэ цагаас эхлэн Монгол Улсаа бүтээгч орон, үйлдвэрлэгч улс, хамтрагч үндэстэн байлгахын төлөө, ажилдаа шуурхайлан орно оо. Мөнхийн хоёр хөрш ОХУ, БНХАУ-тай найрамдалт сайн хөршийн харилцаагаа бүх талбарт тэлж, гуравдагч хөршийн бодлого дээр онцгой анхаарал хандуулна.

Монголын маргаашийг, эх орныхоо хөгжлийн замыг алс харж чаддаг, түүний төлөө сайн үйлсийг дэлгэрүүлдэг, хамтарч чаддаг Ерөнхийлөгч байна.

Мөнх тэнгэр биднийг ивээг, сайн бүхэн дэвжин дэлгэрэх болтугай.

Дээдсийн хийморь сүлд биднийг уриалан дуудаг, Монгол Улс хөгжин бадартугай ! ” хэмээв.

Ээлжит бус чуулганы хуралдаан Ерөнхийлөгчийн тангараг өргөх тов тогтоох УИХ-ын тогтоолын төслийг хэлэлцсэнээр үргэлжилэв. Чуулганы хуралдаанд оролцсон гишүүдийн 96.5 хувь нь дэмжсэн юм. Чуулганы хуралдаанд суусан гишүүдийн зүгээс Ерөнхийлөгчөөр дэмжигдсэн Х.Баттулгад дараах зүйлсийг захиж байв.

Тухайлбал, УИХ-ын гишүүн Ц.Даваасүрэн “Ерөнхийлөгчөөр сонгогдож буй хүн эрх мэдэл булаацалддаггүй байх ёстой. Харин амлалтаа биелүүлдэг байгаарай. Гарч буй мэдээллээс харахад өөрийн эрхгүй эмзэглэж байна. Монголын төрийг хямрал руу явуулчих вий дээ. Энэ удаагийн Ерөнхийлөгч ард түмнийхээ талаас нь сонгогдсон шүү гэдгээ санаж яваарай. Цаашид хууль зөрчсөн, Үндсэн хууль зөрчсөн үйлдэл гаргавал УИХ бүрэн эрхээ хэрэгжүүлээрэй. Том хариуцлага болохоос том баяр биш шүү. Хэдхэн сарын өмнө Ардчилсан намынхан ард түмнийхээ итгэлийг алдсан. Тэгэхгүйгээр хүчний байгууллагаа булаацалдвал өөрөөс хамаарах бүх зүйлээ хийнэ шүү. Зөв зүйл оруулж ирвэл бид гацаахгүй явуулна шүү дээ.

УИХ-ын гишүүн Д.Тэрбишдагва “УИХ-аар 97 хувиар батлагдлаа. Ерөнхийлөгч болж байгаа хүн тангарагийн үгээ бүрэн цээжлээрэй. Хариуцлагаас эхлээд олон зүйлийг тангарагийн үгт гүн гүнзгий суулгасан. Өргөсөн тангарагтаа үнэнч бай. 1.9 сая согогчдоос 32.8 хувийн саналаар Ерөнхийлөгч болсноо санаарай. Бусад нь өөрийнх нь дайсан гэж битгий бодоорой. Монгол талцаж байхдаа сөнөсөн, бутарсан. Ард түмний 32.7 хувь, УИХ-ын 97 хувийн дэмжлэг хүлээснээ байнга санаж яваарай. Намууд хамгийн шилдэг гэсэн хүмүүсээ нэр дэвшүүлсэн шүү. Гэтэл сурталчилгааны үеэр юу болов. Хамгийн шилдэг хүмүүсээ хамгийн муухайгаар яаж булав. Монголчууд 50 мянган төгрөгөөр саналаа худалдахаа больсон байна шүү. Ард түмний оюун санааг бузартуулж болохгүй шүү. Ерөнхийлөгч маань эв нэгдлийн илэрхийлэгч байх ёстой. Түүнээс биш цус, үндэс угсаа ярьж доролмжлохгүй шүү. Тангарагчийн үг бүрээ хэрэгжүүлээрэй

Монгол Улсын Ерөнхийлөгчийн сонгуулийн үр дүнг дэлхийн гол гол хэвлэлүүд дамжуулсаар байна. Тэдний дотор BBC, Reuters, Aljazeera, Bloomberg, Nikkei, ABCnews, Yahoo News, New York Times, Japan News зэрэг томоохон мэдээллийн хэрэгслүүд багтаж байгаа юм.

Тэдгээр сувгууд Монгол улсын ерөнхийлөгчийн сонгуульд ялсан Халтмаагийн Баттулгыг тодорхойлохдоо “Former martial arts star” (Тулааны урлагийн од асан), “Wrestling champ” (Бөхийн аварга), “Former judoka” (Жүдогийн тамирчин асан), “Real estate tycoon” (Үл хөдлөх хөрөнгийн бизнесмэн), “Populist” (популист) гэсэн үгсийг хамгийн их ашигласан байна. Тулааны урлагийн од гэсэн нэрийг зүүхэд түүний хуучин Зөвлөлтийн үеийн бие хамгаалах Самбо барилдааны төрлөөр дэлхийн аварга болж байсан түүх нөлөөлсөн бололтой. Мөн зарим нэг хэвлэл түүнийг “Монголын Трамп” гэж тодорхойлсон нь ч бий.

Их Британий BBC суваг Х.Баттулгын эрхэлдэг бизнес нь зочид буудал, хүнсний үйлдвэрлэл, Чингис хааны хөшөөтэй цэцэрлэгт хүрээлэнг хамардаг гэж тодорхойлжээ.

Мөн Х.Баттулгын хувьд өрсөлдөгч намынх нь давамгайлсан парламент том сорилт байх болно гээд ОУВС-ын хөтөлбөрт хамрагдсан, Хятадын эдийн засгаас гүн хамааралтай Монгол улсын эдийн засгийг хямраад байгаа цаг үед ерөнхийлөгч болж байгааг онцолжээ.

УИХ-ын ээлжит бус чуулганы хуралдаанаар Монгол Улсын Ерөнхийлөгчөөр сонгогдсон гэж үзэн, бүрэн эрхийг нь хүлээн зөвшөөрөх тухай УИХ-ын тогтоолын төслийг хэлэлцэн гишүүдийн 96.5 хувийн саналаар дэмжин батлав. Хэлэлцүүлгийн эхэнд СЕХ-ны дарга Ч.Содномцэрэн СЕХ-ны хурлын дүгнэлтийг танилцууллаа. Хэлэлцүүлгийн шатанд УИХ-ын гишүүд СЕХ-ны дарга Ч.Содномцэрэнгээс асуулт асууж хариулт авлаа.

УИХ-ын гишүүн А.Сүхбат: -СЕХ-ны дарга сонгуулийн хуулийн хүрээнд явагдлаа гэж байна. Хууль бүс зүйлс байсан шүү дээ. Үүнийгээ яагаад ярихгүй байгаа юм бэ. Энэ сонгуулиас харахад улс төрийн намууд цаашид шинэчлэл хийхгүй бол ямар сонгууль болсныг бүгд харлаа. Энэнд танай, манай нам огт хамаагүй. Монгол төр, ард түмнээ хүндэтгэх хэрэгтэй шүү. Ямар их хар бараан мэдээлэл цацагдав. Монголын ард түмэн мөнгөөр санал өгөхөө больсон байна шүү.

СЕХ-ны дарга Ч.Содномцэрэн: -СЕХ хуралдаад сонгууль хүчин төгөлдөр болсон гэж үзсэн. Үндсэн хуулийн заалтын дагуу бид нэрийг өргөн мэдүүлж байна. СЕХ сонгуулийг хуулийн хүрээнд зохион байгуулсан. Сонгуульд ажилласан 25 мянган төрийн албан хаагч хуулийн дагуу ажилласан.

УИХ-ын гишүүн Ж.Мөнхбат: -Энэ сонгууль олон зүйлийн анхдагч боллоо. Хоёр шаттай, хар бараан зүйлтэй, анх удаа эрүүгийн гэмт хэрэгт холбогдсон хүн Төрийн тэргүүн боллоо. Монгол Улс парламентын засаглалтай Ерөнхийлөгч нь өөрийн эрх мэдлийг нэмэгдүүлэх гэж зүтгэдэг. Үе үеийн Ерөнхийлөгч нар ингэж ирсэн. Үндсэн хууль, Сонгуулийн тухай хуульдаа өөрчлөлт оруулах хэрэгтэй. Сонгуулийн үеэр гарсан маргааныг шүүх хэлэлцэж амжаагүй байхад дахин санал хураалт болсон. Үүнийг шийддэг байх хэрэгтэй. Монголын төр ачааны хүндийг үүрдэг болохоос шоу хийдэг газар биш. Сонгогчдын төрд итгэх итгэл буурч байна. Үндсэндээ иргэдийн ¼ санал авсан хүн Ерөнхийлөгч болж байна.

УИХ-ын гишүүн О.Баасанхүү: -Сонгуулийн хуулийн нэг давуу тал нь богино хугацаанд сонгууль болж өнгөрлөө. Хэрвээ хуучны хуулиар сонгуулийн сурталчилгаа 45 хоног үргэлжилсэн бол хоёр намын нэг нь төрөө, нөгөө нь эдийн засгаа дуусгаад өнгөрөх байлаа. Ардчилсан нам тэр дундаа өрийг чөлөөлөх амлалт өгсөн нь иргэдийн сэтгэлийг ихэд хөдөлгөлөө. Одоо Монгол төр урагшаа харж ярих ёстой. Хагарал бутралаа хойш тавиад хөгжлийнхөө талаар явах ёстой. Үндсэн Хуулиа өөрчлөх ёстой гэж УИХ-ын гишүүдийн ярьж байгаатай санал нэг байна. Ерөнхийлөгчийг 60-аас дээш настай, УИХ-ын гишүүн нь 45-аас дээш настай сонгогдож байх шалгуур тавимаар байна. Нөгөө талаар сонгуулиар мөнгө тараасан, хандив авсан хууль бус үйлдэл нэлээн гарлаа. Манай намаас 50 сая вон, МАН-аас бас нэлээн, Ардчилсан намаас 1 тэрбум төгрөг хураагдах нь. Үүнийг тусгай сан байгуулаад хүүхдийн цэцэрлэг барихад зарцуулъя.Төрөөр тоглодог залуучуудыг болимоор байна. Монгол төрд хүндэтгэлтэй хандмаар байна. Ний нуугүй хэлэхэд олон жил УИХ-ын гишүүнээр сонгогдсон хүмүүсээсээ суралцмаар байна. Ажлаа уралддаг болохын тулд Сонгуулийн хуулийг өөрчилмөөр байна. Мөрийн хөтөлбөрөө танилцуулдаг болмоор байна. Эхнэр ярихгүй, хүүхэд ярихгүй болмоор байна.

УИХ-ын гишүүн С.Жавхлан: -Эх оронч хүн Ерөнхийлөгч боллоо. Олон жил эх орныхоо төлөө дуугарсан хүн. Асар их хариуцлага байгаа гэдгийг анхааруулж хэлмээр байна. Ерөнхийлөгч тамгаа хүлээж авсны дараа нам бус болно. Нам руугаа гүйдэг бус түмэн олон руугаа гүйдэг Ерөнхийлөгч байгаасай.

УИХ-ын гишүүн С.Эрдэнэ: -Нийт сонгогчиддоо баяр хүргэе. Хуулийн гажуудал зөрчилтэй асуудал нь өнөөдөр үүссэн асуудал биш. Хэн сонгогдсон аль нам сонгуульд ялсан гэдгээр нь асуудлыг авч үзье. Ингэснээр Монгол Улсын Ерөнхийлөгчийн сонгуульд Ардчилсан намаас нэр дэвшин өрсөлдөж олонхийн санал авсан Х.Баттулгыг Монгол Улсын Ерөнхийлөгчөөр сонгогдсонд тооцон, бүрэн эрхийг нь зөвшөөрлөө.