Month: July 2017

Их Монгол Улс байгуулагдсаны 811, Үндэсний их баяр наадам, Ардын хувьсгалын 96 жилийн ойг тохиолдуулан ирэх амралтын өдрүүдэд буюу энэ сарын 10-16-нд хооронд нийслэлийн Шүд, эрүү нүүрний төв, дүүргийн Эрүүл мэндийн төвийн дотор, мэс засал, гэмтлийн кабинет болон Өрхийн эрүүл мэндийн төвүүд 10.00-15.00 цагийн хооронд иргэдэд эмнэлгийн тусламж, үйлчилгээг үзүүлэхээр боллоо.

Долоодугаар сарын 10-17-ны өдрийг хүртэл хариуцлагатай жижүүр ажиллуулах талаар “Эмнэлгийн тусламж, үйлчилгээг зохицуулах тухай” нийслэлийн Эрүүл мэндийн газрын даргын А/93 тоот тушаал гарсан байна. Мөн энэ өдрүүдэд “Өргөө”, “Хүрээ”, “Амгалан” амаржих газарт ажиллах хариуцлагатай жижүүрүүдийг томиллоо.

Түүнчлэн “Баяр наадмын үеэр эмнэлгийн тусламж, үйлчилгээг зохицуулах тухай” нийслэлийн Эрүүл мэндийн газрын даргын А/90 тоот тушаалаар Төв цэнгэлдэх хүрээлэн, Сурын талбай, Хүй долоон худагт Хан-Уул, Сүхбаатар, Чингэлтэй дүүргийн Эрүүл мэндийн төв, нийслэлийн Түргэн тусламжийн төвийн эмч нар иргэдэд эрүүл мэндийн тусламж, үйлчилгээг үзүүлнэ гэж нийслэлийн Эрүүл мэндийн газраас мэдээллээ.

Дэнж хотойлгосон монгол наадам эхэллээ. Наадмын энэ өдрүүдэд цаг агаар ямар байгааг уншигчиддаа хүргэе. Маргааш өглөө Улаанбаатар хотод 19 хэмийн дулаан, үүлэрхэг байна. Харин өдөр 13 цагаас хойш 18 цаг хүртэл 23-25 хэмийн дулаан байх нь ээ. Оройдоо 17 хэмийн дулаан байх бол шөнөдөө 14 хэмийн дулаан байна. Наадмын эхний өдөр буюу маргааш хур бороо орохгүй ч зарим газраараа түр зуурын тундастай. Харин нөгөөдөр буюу 12-нд нийслэл хотод маань хур бороо орж, нар, хур тэгширсэн, дэлгэр сайхан наадам болно. Маргааш цаг агаарын хувьд хэт халахгүй ч наршихаас сэргийлж, шүхэр, нүдний шил, нарны тос биедээ авч явж, шингэн зүйл сайн уухыг сануулъя. Мөн наадмын өдрүүдэд Хүй долоон худаг, Төв цэнгэлдэх орчим хүн, автомашин, морьдын хөдөлгөөн их тул сонор сэрэмжтэй, болгоомжтой явахыг анхааруулъя.

Э.МӨНХ

Шүдлэн насны морьдын уралдаан Хүй долоон худагт болсон. Нийт 254 шүдлэн бүртгүүлсэн ч гараанаас ердөө 59 шүдлэн гарсан юм. Эрлийз морьдыг тусад нь уралдуулна гэсэн шийдвэр гарсан тул ийнхүү олон тооны морьдыг хассан билээ. Энэхүү шийдвэрт холоос зорьж ирсэн уяачид бухимдан, цаг, мөнгөө гарздаж нийслэлд ирээд, морио уралдуулж чадалгүй буцах нь хэмээж байгаа юм.

Харин энэ тухай Хурдан морины комиссын салбар хорооны нарийн бичгийн дарга С.Галбадрах “Шүдлэн насны моридын уралдаанд 254 шүдлэнгээс 59 нь уралдлаа. Нийт хасагдсан шүдлэнгийн 47 нь үүлдэрлэг байдал, сэрвээний өндөрөөр 109, үлдсэн нь тавиач буюу уралдааны үймүүлдэг хүүхдүүдтэй морьдыг хассан” гэлээ.

О.АРИУН

Монголын Улсын Ерөнхийлөгчийн албыг найман жил хашсан Цахиагийн Элбэгдорж сүүлийн зарлигаа өнөөдөр өглөө гаргасан байна. Хөвсгөл нуурыг хамгаалах тухай; Хадны зураг, бичээсийг хамгаалах, судлах ажлыг дэмжих тухай зарлигаа өнөө өглөө гаргасан байна.

Гэрэл зургуудыг С.ГЭРЭЛТ-ОД

Нийслэлийн гэр бүл, хүүхэд, залуучуудын хөгжлийн газраас Хүй долоон худагт эцэг эхээсээ төөрсөн хүүхдүүдийг харах тусгай гэрийг энэ жилээс ажиллуулж байна.

Төөрсөн хүүхдүүдийг асран хамгаалагчид нь иртэл цагдаагийн хамгаалалтад байлгадаг байсан бол ийн тусдаа гэрт байлгахаар болжээ. Гэрт тоглоомын хэсэг, хүүхэлдэйн кино үзүүлэх телевиз байрлуулсан байна.

Мөн “Өнөр бүл” хүүхэд асрах төвийн хоолзүйч нар эрүүл хоол, цайгаар үйлчилж байна. Өнгөрсөн баяр наадмаар Хүй долоон худагт зуу, Төв цэнгэлдэх хүрээлэнд 200 орчим хүүхэд эцэг эх асран хамгаалагчдаасаа төөрсөн юм.

А.Отгонжаргал “Бид гэр бүлээрээ “Дээлтэй монгол” наадамдаа оролцож байна. Жил бүрийн наадмаа хоног тоолон хүлээж, үндэснийхээ дээл хувцасаар гоён оролцдог юм. Гэр бүлийнхэндээ ийм сайхан дээл урлаж өгсөн ханьдаа баярлалаа. Та бүхэн минь сайхан наадаарай” гэсэн юм.

Д.Хүрэлбаатар “Манай Нийслэлийн гэрлэх ёслолын ордон маань “Дээлтэй монгол” наадамд хоёр дахь удаагаа оролцож байна. Энэ удаа бид “XIII-XYIII зууны үеийн эртний монголчуудын ёслол хүндэтгэлийн хувцас” гэсэн сэдвийн дор оролцлоо. Ямартай ч энэхүү “Дээлтэй Монгол” наадам нь Монголынхоо үндэсний хувцасыг дэлхий нийтэд харуулж байгаа маш ач холбогдолтой наадам юм. Энэ сайхан арга хэмжээнд оролцсондоо сэтгэл маш өндөр байна” гэлээ.

О.Оюунаа “Би Налайх дүүргээс хүрэлцэн ирж “Дээлтэй монгол” наадамд оролцож байна. Миний уг гарал бол Увс аймгийн Хөхмөрөн сум л даа. Миний өмссөн хувцас бол дүрвэд хувцас юм. Өөрийнхөө урласан хувцасаар “Дээлтэй монгол” наадамдаа оролцож байна. Монголчууд маань үндэснийхээ хувцасыг үргэлж өмсөж байгаасай гэж хүсэх байна. Монгол хүнд хамгийн тохиромжтой хувцас нь үндэсний дээл юм шүү дээ. Миний хувьд хүүхдүүддээ аль болох үндэснийх нь хувцасыг өмсүүлэхийг хичээдэг юм. Түүнээс гадна бие биелгээ хийдэг. Хүүхдүүд маань ч гэсэн бие биелгээ хийх дуртай. Ингэж л үндэснийхээ ёс уламжлалын үр хүүхдүүддээ зааж, сургаж, хэвшүүлж байна даа” гэв.