Month: July 2017

Монгол Улс байгуулагдсаны 811, Үндэсний их баяр наадам, Ардын хувьсгалын 96 жилийн ойг тохиолдуулан ирэх амралтын өдрүүдэд буюу энэ сарын 16-ныг хүртэл нийслэлийн Шүд, эрүү нүүрний төв, дүүргийн Эрүүл мэндийн төвийн дотор, мэс засал, гэмтлийн кабинет болон Өрхийн эрүүл мэндийн төвүүд 10.00-15.00 цагийн хооронд иргэдэд эмнэлгийн тусламж, үйлчилгээг үзүүлнэ.

2017 оны долоодугаар сарын 10-17-ны өдрийг хүртэл хариуцлагатай жижүүр ажиллуулах талаар “Эмнэлгийн тусламж, үйлчилгээг зохицуулах тухай” нийслэлийн Эрүүл мэндийн газрын даргын А/93 тоот тушаал гарсан байна. Мөн энэ өдрүүдэд “Өргөө”, “Хүрээ”, “Амгалан” амаржих газарт хариуцлагатай жижүүрүүд ажиллаж байна.

Түүнчлэн “Баяр наадмын үеэр эмнэлгийн тусламж, үйлчилгээг зохицуулах тухай” нийслэлийн Эрүүл мэндийн газрын даргын А/90 тоот тушаалаар Төв цэнгэлдэх хүрээлэн, Сурын талбай, Хүй долоон худагт Хан-Уул, Сүхбаатар, Чингэлтэй дүүргийн Эрүүл мэндийн төв, нийслэлийн Түргэн тусламжийн төвийн эмч нар иргэдэд эрүүл мэндийн тусламж, үйлчилгээг үзүүлнэ.

МУИС-ийн уулзвар дээр хоёр суудлын автомашин мөргөлджээ
Тулгар төрийн 2226, Их Монгол Улс байгуулагдсаны 811, Ардын хувьсгалын 96 жилийн ой, Үндэсний их баяр наадмын өдрүүдэд зам тээврийн осол чамгүй тохиож байна. Тухайлбал, дөнгөж сая МУИС-ийн нэгдүгээр байрны урд талын замын уулзвар дээр приус-10, соната-6 хоёр машин мөргөлджээ. Зам түгжрэлгүй, сийрэг байгаа тул жолооч нар хурд хэтрүүлж, явахаас гадна хальтиргаа гулгааг тооцолгүй явснаас ийм осол гарсан байна. Иймээс наадамчин олон та бүхэн замын хөдөлгөөнд анхаарал болгоомжтой оролцоно уу.

Манай сурвалжлах баг хотын төв орчмоор явахад түгжрэлгүй, хөдөлгөөн хэвийн үргэлжилж байгааг мэдээллэв. Харин Амгалангаас түгжирч эхэлжээ. Мөн Баянзүрхийн товчооны орчимд түгжрэл их байгаа. Замын хажуугаар хуушуур, бууз болон янз бүрийн худалдаа наймаа үргэлжилсээр байгаа гэнэ. Тухайлбал, гол ус руу явж буй хүмүүст зориулж бөмбөг хийлдэг завь, хүүхдийн тоглоомууд, жимсний худалдаа их байгаа гэв.

Хүй долоон худагт хурдан морины уралдаан үргэлжилж байна. Өчигдөр буюу энэ сарын 10-ны өдөр хязаалан, шүдлэн насны морьд уралдсан билээ. Өнөөдөр өглөө азарга уралдсан. Хоёр өдрийн турш гурван насны морьдын уралдаанд оролцсон унаач хүүхдүүдийн 10 нь мориноосоо унаж хөнгөн бэртжээ. Гэр бүл, хүүхэд, залуучуудын хөгжлийн газрын Хүүхдийн хамгаалал, хөгжлийн газрын дарга Ц.Алтанзаяагийн мэдээлснээр мориноос унасан хүүхдүүдийг яаралтай түргэн тусламжийн эмч нарт үзүүлж, гэр бүлд нь хүлээлгэж өгчээ. Одоогоор хүнд бэртэл авсан хүүхэд гараагүй байна.

Гэр бүл, хүүхэд, залуучуудын хөгжлийн газраас хүүхдийг болзошгүй эрсдлээс урьдчилан сэргийлэх зорилгоор Төв цэнгэлдэх хүрээлэн, Хүй долоон худагт эцэг эх, асран хамгаалагчаасаа төөрсөн, наршсан, морь малд дайруулах эрсдэлтэй хүүхдэд урьдчилан сэргийлэх үйлчилгээ үзүүлэх “Хүүхэд хамгаалал-108” гэрийг барьж энэ сарын 10-13-ны өдрүүдэд ажиллуулж байгаа юм.

Улсын их баяр наадмаар Төв цэнгэлдэх хүрээлэнд 1500 орчим, Хүй долоон худагт 1200 орчим цагдаагийн албан хаагч үүрэг гүйцэтгэж байна. Наадамчин олны аюулгүй байдлыг хамгаалах үүднээс Төв цэнгэлдэх хүрээлэнг тойроод нийт 19 цэгт 48 камерыг байршуулсан бол 29 оюутан цагдаа ажиллаж, иргэдэд тусалж байгаа гэдгийг албаныхан мэдээллээ. Төв цэнгэлдэх хүрээлэнд одоогийн байдлаар гурван хүүхэд төөрсөн бөгөөд эцэг, эхэд нь хүлээлгэн өгсөн аж.

Нийслэлийн цагдаагийн газраас гурав дахь жилдээ бага насны хүүхэд эцэг, эхээсээ төөрөх асуудлаас урьдчилан сэргийлэх үүднээс гарт нь бугуйвчыг зүүлгэж байгаа. Тус гарын бугуйвчийг гадны жуулчид болон төөрөх эрсдэлтэй ахмад настануудад зүүж өгч байгаа гэнэ.

Төв цэнгэлдэхэд өнөөдөр Нийслэлийн мэргэжлийн хяналтын газрын 386 улсын байцаагч 10 гаруй чиглэлээр хяналт тавьж, ажиллажээ. Энэ жил хоол үйлдвэрлэл, худалдааны тусгай зөвшөөрлийг Нийслэлийн мэргэжлийн хяналтын газраас олгосон байна.

Төв цэнгэлдэх хүрээлэнгийн наадмын хуушуурны махны дээжээс өчигдөр, өнөөдөр шинжилгээ авсан гэв. Тус шинжилгээний дүнгээр хуушуурны мах муудсан зөрчил илрээгүй аж. Төв цэнгэлдэхэд үйлчилгээ эрхэлж буй аж ахуй нэгжийн тоо өнгөрсөн жил 1200 байсан бол энэ жил 800 болж буурчээ.

Б.УРАН