Month: July 2017

Гол, мөрөн, нуур, тогтоол усны түвшин их, багаас үл шалтгаалан бага насны хүүхэд болон иргэд усанд осолдох тохиолдол гарсаар байгаа гэнэ. Дулааны улиралд Онцгой байдлын албанд иргэдээс ирдэг дуудлагын ихэнх хувийг гол, усны ослын дуудлага зонхилдог. Энэ нь иргэдийн санамсар болгоомжгүй байдал, бага насны хүүхдийг хараа хяналтгүй орхисноос, согтууруулах ундаа хэрэглэсэн үедээ гол усанд орох зэрэг шалтгаанаас үүдэлтэй. Иймээс амралт, аялал зугаалгын улирал эхэлсэнтэй холбогдуулан Онцгой байдлын ерөнхий газраас иргэддээ амралт, чөлөөт цагаа өнгөрүүлэхдээ гол, усны ойролцоо амарч зугаалахгүй байх, бага насны хүүхдэд тавих хараа, хяналтаа сайжруулах, голын эрэг дагуу хүүхдийг явуулахгүй, тоглуулахгүй байх, тээврийн хэрэгслийн жолооч нар баталгаатай зам, гүүрээр зорчиж гол усанд унах, осолдох эрсдлээс урьдчилан сэргийлэхийг анхаарууллаа.

Б.УРАН

Үндэсний их баяр наадмын амралт энэ сарын 10-нд эхэлсэн билээ. Тодруулбал, 10-ны даваа гарагийн ажлын өдрийг 2017 оны 07 дугаар сарын 16-ны ням гарагийн амралтын өдөрт шилжүүлсэн. Өөрөөр хэлбэл 2017 оны 07 дугаар сарын 16-ны ням гарагт нэгдэх өдрийн ажлыг нөхөж хийх тул албан ёсны ажлын өдөр байгаа. Энэ өдөр төрийн болон бусад бүх албан байгууллагууд ажиллана. Засгийн газар энэхүү шийдвэрийн дагуу энэ сарын 16-нд буюу ирэх бүтэнсайн өдөр ажил орно.

Үндэсний их баяр наадам гурав дахь өдрөө үргэлжилж байна. Ингээд бид “Хүй долоо” худагт очсон юм. Энд Уяачдын баяр наадам эхэлсэн байлаа. Тухайлбал, эрлийз насны морины уралдаан, жороо морины тойргийн уралдаан зэрэг болж байв.

Энэ үеэр хүй долоон худагт хуушуур хийж зарж буй иргэн Х.Батсайханаас зарим зүйлийг тодруулсан юм. Тэрбээр “Хуушуур зарах гурван газрын эрх авсан. Эрх олж авах хэцүү. Тухайлбал, байрлал ямар байх уу, асар майхан барьж болох уу гээд л асуудал их байдаг. Би энд долоо, найман жилийн турш, наадмаар хуушуурын наймаа эрхэлж байна. Нэг гэрт зургаан тогооч, хоёр үйлчлүүлэгтэй. Хуушуураас гадна цай зарж байна. Бор цай үнэгүй. Карт уншина. АТМ-ны доголдол жаахан байдаг. Энэ жил нар хур тэгширсэн сайхан наадам болж байна. Ойролцоогоор гурван өдөрт дөрвөн сая төгрөг олсон байна даа. Өнөөдөр бол хүмүүс ер нь бага болчихдог шүү. Соёолонгийн тоос хийморьтой гэж. Соёолон насны морины уралдааны үеэр хүн ёстой ид бужигнадаг. Мөн энэ сарын 10, 11-нд хүн их байсан. Өчигдөр хоёр сая таван зуун мянган төгрөгийн орлого орсон доо. Ер нь орлого гайгүй байдаг. Цэнгэлдэхэд асар майхныг дор нь шийдвэрлэж өгдөг. Манай энд салхи ихтэй, бороо орвол жаахан зутрах маягтай байдаг. Иймээс асар майхан бол хийсчих гээд л байдаг. Ингээд бид гурван гэр авчирч барьсан юм. Шөнийн 3-4 цагийн үед бид нар хуушуур хийх бэлтгэл ажлаа хийдэг. Хуушууранд өдөрт хамгийн дээд талдаа 50 кг мах орно. Ийм байвал орлого сайн байсан байх нь гэж үзнэ. Би наадмаас бусад өдрүүдэд сургуулийн цайны газар ажиллуулдаг юм” гэж ярилаа.

Үндэсний их баяр наадмын бөхийн барилдаанд ес даван түрүүлж Улсын арслан цол хүртээд байгаа Ц.Содномдоржид “Toyota” компаниас Land cruiser машин бэлэглэлээ. Өнөөдөр Сүхбаатарын талбайд Шадар сайд У. Хүрэлсүх, Нийслэлийн Засаг дарга С.Батболд, Toyota компанийн захирлууд энэхүү бэлгийг гардуулсан юм. Шинэ арслан машинаа Сүхбаатарын талбайгаас унаж явав.

Тулгар төрийн 2226, Их Монгол улсын 811, Ардын хувьсгалын 96 жилийн ой, Үндэсний их баяр наадам болсон. Иргэд баяр наадмын амралтын өдрүүдэд хөдөө орон нутаг руу их явсан гэдгийг эх сурвалж мэдээллэв. Иймээс Улаанбаатар хотын замын хөдөлгөөн сэлүүхэн байна. Харин замын цагдаагийн алба хаагч хэлэхдээ “Хотоос зүүн тийш гарах хөдөлгөөн их байна. Тухайлбал, Баянзүрхийн товчооноос эхлээд хотоос гарах хөдөлгөөн их болж байна. Харин орж ирж буй хөдөлгөөн сэлүүхэн байна” гэв. Мөн тэрээр замын хөдөлгөөний дүрмээ сайтар биелүүлж, иргэд бие биедээ хүлээцтэй хандаж, соёлтой байхыг санууллаа.

Б.УРНАА

Хүй долоон худагт “Уяачдын баяр” наадам эхэллээ. Энэ үеэр хурдан жороо морины уралдаантай. Өнгөрсөн жилийн жороо морины уралдаанд эмэгтэйчүүд оролцсон нь наадамчин олныг ихэд баясгаж байлаа. Мөн энэ үеэр урлагийн тоглолт, эрлийз насны морьдын уралдаан болно. Худалдаа үйлчилгээний төвүүд ажиллаж байгаа юм.

Б.УРАН

Ойрын өдрүүдэд ихэнх нутгаар өдөртөө бүгчим халуун байх тул наршихаас болгоомжлохыг Цаг уур, орчны шинжилгээний газраас анхаарууллаа.

2017 ОНЫ ДОЛООДУГААР САРЫН 14-НӨӨС ДОЛООДУГААР САРЫН 18-НЫГ ХҮРТЭЛХ ЦАГ АГААРЫН УРЬДЧИЛСАН ТӨЛӨВ

14-15-нд баруун болон төвийн аймгуудын нутгийн зарим газраар, 16-17-нд нутгийн зарим газраар түр зуурын бороо орно.Дуу цахилгаантай. Салхи борооны өмнө түр зуур секундэд 16-18 метр хүрч ширүүснэ.

Ихэнх хугацаанд өдөртөө халж Алтай, Хангай, Хөвсгөлийн уулархаг нутгаар шөнөдөө 7-12 градус, өдөртөө 22-27 градус, говийн бүс нутгаар шөнөдөө 21-26 градус, өдөртөө 34-39 градус, бусад нутгаар шөнөдөө 15-20 градус, өдөртөө 28-33 градус дулаан байна. Хугацааны сүүлчээр нутгийн хойд хэсгээр бага зэрэг сэрүүснэ.

Зуны халуун улиралд гадаа нар салхинд их явах, аялал зугаалгаар явахад хамгийн түгээмэл тохиолддог асуудал бол наранд цохиулах, нарших юм. Нарших нь олон сөрөг талтай тул дараах арга хэмжээг авах хэрэгтэй.

Нарших буюу наранд цохиулах гэдэг нь энгийнээр тайлбарлавал хэт халуун хурц нартай өдөр гадаа удаан байх, нарны шууд гэрлэнд толгой болон их биеэрээ байснаас нарны хэт ягаан туяаны хор биенд нөлөөлөх ба хүний биеийн энгийн температур нь нарны хэт халуун температурт харилцан цохилцож биеийн температур энгийн үеэсээ огцом дээшилснээр доорх сөрөг дагавар гарна.

Энэ үед ам цангаж хэл ам хуурайших, хөлрөх, арьс хуурайших, толгой өвдөх, дотор муухайрах, ухаан алдах, гэдэс гүйлгэх, шингэх алдах цаашлаад зүрх судасны эмгэгтэй хүмүүст хүндээр нөлөөлөх, даралт ихсэх гэх зэрэг сөрөг муу нөлөөтэй тул наршихаас сэргийлэх болон наршсан тохиолдолд хурдан арга хэмжээ авах хэрэгтэй. Наршилт нь хүний нас, биеийн онцлог хамаарахгүй бөгөөд балчир хүүхдүүдээс эхлээд өндөр настангуудад хүртэл нөлөөлөх тул ойр дотны бүх хүмүүсээ зуны халуун нарнаас хамгаалаарай.

Наршихаас сэргийлэх арга хэмжээ:

– Байнга ус уух

– Хүйтэн бүлээн шүршүүрт орж биеийн температурыг хадгалах

– Халуун, хурц нартай өдөр урт хугацаагаар болон тур хугацаагаар гадуур гарах, аялал зугаалгаар явах гэж байгаа бол нарны малгай, шүхэр заавал авч өмсөж, хэрэглэж явах

– Шууд нарны тусгалаас хол сүүдэртэй газар амарч тухлах

– Биедээ ус заавал авч явах, нарны малгай болон толгой, хүзүү, нуруугаа үе үе усаар норгож чийглэх

– Нарны халхавч, малгай байхгүй тохиолдолд алчуур норгож хэрэглэх, хатсан тохиолдолд дахин норгож хэрэглэх

– Хурц нартай өдөр час халуун цай, хоол идэхгүй байх, хөргөж идэх

– Архи, согтууруулах ундаа хэрэглэхгүй байх, тохируулан хэрэглэх

– Нарны тусгалтай газарт унтаж болохгүй

– Нарны тос, түрхлэг, нарны шилийг байнга хэрэглэх ингэснээр наранд цохиулахаас гадна наранд түлэгдэх, хэт ягаан тучанд хордохоос сэргийлнэ.

Хүүхэд, хөгшид, идэр залуус гэлтгүй бүх хүн дээрх арга хэмжээг байнга авах хэрэгтэй.

Наршсан тохиолдолд авах арга хэмжээ:

– Наршиж бие нь эвгүйрч, муужирсан хүнийг сүүдэртэй газар оруулан дээшээ харуулан хэвтүүлэх

– Сэнсийг хүйтнээр үлээлгэх, хэт хүйтнээр ширүүн үлээлгэж болохгүй бага багаар дасгаж үлээлгэх

– 2 хөлний доор юм эвж өндөрлөж хэвтүүлэх

– Ус уух – бага хэмжээгээр ойр ойрхон ус уух

– Эмчид үзүүлэх, даралт% зүрх судасны хэвийн үйл ажиллагааг хянуулах

– Нарны шууд тусгалаас холдох

– Наршиснаа мэдэхгүй дур мэдэн эмчийн зааваргүй эм тан ууж болохгүй

Гэрийн нөхцөлд авах үр дүнтэй арга хэмжээ:

– Марла юм уу сальфиткыг сайтар норгоод гэдсэн дээрээ дэлгэж тавина. Ингээд гурилаар жанхуу зуураад норгосон марлан дээр жигд түрхэж нялаад хэсэг хугацаанд хэвтэнэ. Энэ арга нь ардын уламжлалт арга бөгөөд нарны хорыг тэр дор нь тайлдаг юм байна. Халуурч бүлээрсэн үед ч халууныг авч эмчилдэг байна.

– Наршсан хүнийг сэрүүн газарт оруулж хувцсыг тайлж хүйтэн бүлээн шүршүүр, усанд оруулах. Энэ нь биеийн температурыг хэвийн түвшинд нь буулгах арга хэмжээ юм.

– Шүршүүрт оруулах боломжгүй бол хүйтэн ус бага багаар шүршиж цацаж сэрүүцүүлэх

– Шилэн хүзүү, дух, суга, цавьны хэсэгт хүйтэн алчуур норгож жин тавих зэрэг үр дүнтэй арга хэмжээ авч тайвшруулан амраана.

– Энергийн ундаа өгөх

– Биеийн халууныг шалгах, 36С хэмд хүрэх ёстой. Үүнээс дээш халуунтай байвал арга хэмжээг үргэлжлүүлэн авна.

– Дээрх аргууд үр дүнгээ өгөхгүй бол яаралтай эмч, эмнэлгийн байгууллагад хандах хэрэгтэй.