Month: July 2017

Шүүхийн шинэтгэлийн хүрээнд 2017 оныг шүүхийн үйлчилгээний соёлыг төлөвшүүлэх жил болгосонтой холбогдуулан Нийслэл дэх Захиргааны хэргийн анхан шатны шүүх “Шүүхийн үйлчилгээний төв”-ийнхөө нээлтийг энэ сарын 28-нд хийсэн юм. Энэхүү шинэ стандарт нь нийслэлийн бусад дүүргийн шүүхүүд болон хөдөө орон нутгийн шүүхүүдэд ч хэрэгжих аж. Энэ үеэр Нийслэл дэх Захиргааны хэргийн анхан шатны шүүхийн Тамгын газрын дарга Д.Ганбаатар хэлэхдээ “Шүүхийн ерөнхий зөвлөлөөс энэ оныг “Шүүхийн үйлчилгээний жил” болгосон билээ. Манай хамт олон энэ ажлын хүрээнд олон ажил хийхээр төлөвлөсөн. Үүний нэг нь та бүхний харж байгаа “Шүүхийн үйлчилгээний төв” юм. Тус төв нь нээлтээ хийснээр иргэд олон нийтэд тав тухтай, ил тод нээлттэй, түргэн шуурхай үйлчилж шүүхийн үйлчилгээг шинэ түвшинд хүргэх ач холбогдолтой” гэж байлаа.

Мөн шүүхийн үйлчилгээний шинэ стандартын дагуу “Нээлттэй танхим”-даа Тамгын газрын үйлчилгээг ил тод, нээлттэй, хүртээмжтэй, ойлгомжтой хүргэх үүднээс “Иргэн өөртөө үйлчлэх хэсэг”-ийг нээжээ. Энэ хэсэгт Шүүхийн үйл ажиллагааны хөтөч, Шүүхийн тамгын газрын үйл ажиллагааны хөтөч мэдээллийн самбар, өргөдөл, гомдол, хүсэлт, нэхэмжлэлийн загвар, улсын тэмдэгтийн хураамжийг хэрхэн хаана төлөх зэрэг тайлбар мэдээллүүдийг байршуулсан байна. Ингэснээр шүүхээр үйлчлүүлэгчдэд шаардагддаг мэдээ, мэдээллийг иргэн бие даан олж авах боломжийг бүрдүүлсэн гэнэ.

Хээрийн түймэр манан хонож байсан хүмүүсийг эргэхээр явсан иргэд осолдож, таван иргэн гэмтжээ. Тодруулбал, Булган аймгийн Гурванбулаг сумын Хөгнө багийн “Устын-Ам” буюу сумын төвөөс урд зүгт 40 км-т энэ сарын 15-нд гарсан хээрийн түймрийг орон нутгийн 17 иргэн манаж байжээ.

Тэднийг эргэх зорилгоор энэ сарын 28-нд явж байсан “Пермер” загварын БУА 09-87 улсын дугаартай хагас суудлын ачааны автомашин онхолдож, 45 настай, эрэгтэй Э, 26 настай, эрэгтэй Б, 50 настай, эрэгтэй С, 45 настай, эрэгтэй М, 34 настай, эрэгтэй Ш нар гэмтсэн байсныг Рашаант сумын эмнэлэгт хүргэсэн гэв. Ослын талаарх дуудлагыг энэ сарын 28-ны 17:47 цагт хүлээн авч, тус Сумын Засаг даргаар ахлуулсан таван хүн, нэг техник хэрэгсэлтэйгээр ажиллажээ.

Б.УРАН

Өчигдөр Булган аймгийн Хангал сумын Сөрт багийн “Дуганы горхи” буюу сумын төвөөс хойд зүгт 25 км-т гарсан ойн түймрийг бүрэн унтрааж, багийн Засаг даргад хүлээлгэн өгсөн байна.

Түймэр гарсан тухай дуудлагыг энэ сарын 26-ны өдрийн 19:00 цагт хүлээн авч тус аймгийн Онцгой байдлын газрын арван алба хаагч, орон нутгийн 16 иргэн, нийт 26 хүн, хоёр техник хэрэгсэлтэйгээр ажиллаж маргааш өдрийн 21:10 цагт цурманд оруулжээ.

Одоогийн байдлаар Сэлэнгэ аймгийн Мандал сумын Түнхэл багийн “Эрээн дэв” буюу сумын төвөөс зүүн урд зүгт 51 км-т аянганаас үүссэн түймрийг онцгойгийнхон цурманд оруулж бүрэн унтраахаар ажиллаж байгаа аж. Мөн Сэлэнгэ аймгийн Мандал сумын Түнхэл тосгоны “Тайлч” буюу сумын төвөөс зүүн хойд зүгт 111 км-т гарсан түймрийг цурманд оруулсан байна.

Энэ сарын сүүлээр ихэнх нутгаар дуу цахилгаантай, усархаг бороо орох тул гэнэтийн үер ус, хүчтэй мөндөр, аянга цахилгаан, нөөлөг салхины аюулаас урьдчилан сэргийлэхийг УЦУОШГ-аас малчид, иргэдэд онцгойлон анхааруулж байна.

Энэ сарын 30-нд баруун аймгуудын нутгаар, 31-нд баруун, төв, говийн аймгуудын нутгаар, 8 дугаар сарын 1,2-нд ихэнх нутгаар дуу цахилгаантай бороо орно. Борооны өмнө салхи түр зуур секундэд 18-20 метр ширүүснэ.

Мөн энэ сарын 30-нд ихэнх нутгаар өдөртөө халах боловч 31-нд нутгийн баруун хагаст, цаашдаа ихэнх нутгаар сэрүүсч Хангай, Хөвсгөл, Хэнтэйн уулархаг нутгаар шөнөдөө 3-8 градус, өдөртөө 15-20 градус, говийн бүс нутгийн өмнөд хэсгээр шөнөдөө 15-20 градус, өдөртөө 26-31 градус , бусад нутгаар шөнөдөө 9-14 градус, өдөртөө 20-25 градус дулаан байна.

Тиймээс байгалийн гэнэтийн үзэгдлийн аюулаас сэрэмжтэй байхыг малчид, иргэдэд УЦУОШГ-аас анхааруулж байна.

Дундговь аймгийн Өлзийт сумын Дэрх багийн “Зүүн булаг” гэдэг газар малчин Ч-гийн 60 хонинд мал, амьтны гоц халдварт хонины цэцэг өвчний шинж тэмдэгтэй өвчилсөн байна. Дээж авч шинжлүүлэхэд хонины цэцэг өвчин болохыг тогтоожээ.

Дорнод аймгийн Цагаан-Овоо сумын Гүнцэнгэлэг багийн “Хүүхдийн-Овоо” гэдэг газар шүлхий өвчин гарчээ.

Уг газар нь сумын төвөөс зүүн урд зүгт 80 км-т байх бөгөөд малчин Б-гийн нэг үхэрт мал, амьтны гоц халдварт дээрх өвчний шинж тэмдэг илэрч, өвчилсөн малаас дээж авч Улсын мал эмнэлэг, ариун цэврийн төв лабораторид шинжлүүлэхэд шүлхий өвчин болохыг тогтоосон байна.

Мөн Төв аймгийн Сэргэлэн сумын Эрдэнэ-Уул багийн “Бөхөгийн гол” гэдэг газар малчин О-гийн 43 үхэрт эл өвчний шинж тэмдэг илэрч, өвчилсөн малаас дээж авч УМЭАЦТЛ-д шинжлүүлэхэд шүлхий өвчин болохыг тогтоожээ.