Өнөөдрийн байдлаар улсын хэмжээнд 22 түймэр гарчээ.Сэлэнгэ аймаг Ерөө суманд 3 түймэр, Мандал суманд 4 түймэр, Хүдэр суманд 2 түймэр,Төв аймгийн Батсүмбэрийн нутаг дэвсгэрт 5 түймэр, Булган аймгийн Гурванбулаг, Сэлэнгэ сумдад 2 түймэр асаад байна. Одоогийн байдлаар 700 гаруй гал сөнөөгч, 50 гаруй автомашин, орон нутгийн 350 иргэн түймэр унтраалцаж байгаа аж. Мөн Ерөнхий Сайд Ж.Эрдэнэбат Сэлэнгэ аймгийн Мандал сумын Түнхэл тосгон болон Ерөө суманд гарч буй түймрийн голомтод биечлэн ажиллаж байна.
Ц.МИШЭЭЛ
Энэ зун хур бороо бага нийт нутгаар хуурайшилт ихтэй гандуу байна. Онцгой байдлын ерөнхий газраас өгч байгаа мэдээллээр хуурайшилт дээд цэгтээ хүрээд байгаа гэнэ. 2017 он гарснаас хойш нийт нутгийн хэмжээнд 101 удаагийн ой хээрийн түймэр гарчээ. Харин өнөөдрийн байдлаар 3 аймгийн 4 суманд ой хээрийн түймэр асч байна. Хэнтий аймгийн Өмнөдэлгэр , Төв аймгийн Эрдэнэ , Мөнгөнморьт , Булган аймгийн Тэшиг суманд ой хээрийн түймэр асч байгаа төдийгүй онцгой байдлын 920 албан хаагч түймрийг унтраахаар ажиллаж байна. Иргэн та хээр гадаа, ой модонд зугаалахдаа ой хээрийн түймрээс урьдчилан сэргийлж анхаарал болгоомжтой байхыг сануулж байна. Мөн ууж идсэн бүтээгдэхүүний шил , лаазыг цэвэрлэж хогийн цэгт хаяхыг анхааруулж байна. Учир нь иргэдийн хаясан архины шилэнд нарны тусгал тусч хуурай өвс, мод шатаж улмаар ой хээрийн түймэр болж байгааг мэргэжлийн хүмүүс онцолж байлаа.
Сэлэнгэ, Булган болон Төв аймгийн нутгуудаар маш их хэмжээний түймэр гарч, албаныхан унтрааж дийлэхгүй байдалд хүрсэн байгаа билээ. Тэгвэл одоогийн байдлаар Сэлэнгэ аймгийн Түнхэл тосгоно руу түймрийн гал бараг ороод иржээ. Түймрийн гал ирж байгаа хэсэгт 30,40 өрх айл байгаа бөгөөд түймрийн утаанд иргэд угаартсан байдалтай байна. Тус сумын Засаг даргын тамгын газрын албаны хүмүүс иргэдийг байраа суллаад, бичиг баримтаа аваад гэрээсээ гарцгаа гэдэг үүрэг өгчээ. Сумын төвийн захаар түймрийн гал орж ирсэн бөгөөд зарим айлууд угаартахад хүрчээ. Унаа очих боломжтой газар унаа машины дутагдалтай, засаг захиргааныхан дорвитой арга хэмжээ авахгүй байна. Энэ гал нь Мандал сумаас Түнхэлд орж ирж байгаа юм байна. Энэ хоёрын хооронд 50-60 км.
Намрын хуурайшилттай холбогдуулан одоогийн байдлаар Монголд арван түймрийн голомт асч байна. Үүнтэй холбогдуулан сошиалаар маш олон санал санаачилгууд, сэтгэгдлүүд тэр ч бүү хэл улс төржсөн өдөөн хатгалгууд ч явагдаж байгаа юм. Нэг хэсэг нь Ерөнхийлөгчийн сонгуульд ялсан багийг “Түймэрт явж ажиллахгүй байна” гэж шүүмжилж байна. Харин нөгөө хэсэг нь бэлэн мөнгө буюу биет эд зүйлээр туслах санал гаргалаа. Тухайлбал, Exculive компани 20 ширхэг цэвэр ноосон комбинзан бэлэглэхээр бэлэн болгожээ. Хамгийн идэвхтэй тусламж үзүүлэх баг бол фэйсбүүкт групп нээсэн залуус. Энэ нь Гал сөнөөгчдөд туслах групп юм. Тус групп нь өнөөдөр 13:30 цагийн байдлаар дансаар 5.6 сая, бэлнээр 660 мянган төгрөг цуглуулжээ. Залуус эдгээр мөнгөө хэрхэн зарцуулах талаар Онцгой байдлын газраас тэтгэвэрт гарсан Б.Батбаатараас зөвлөгөө авсан аж. Түймрийн голомтод буй гал сөнөөгчдөд мөнгө төгрөг хэрэг болдоггүй бөгөөд түүний оронд өдөр тутмын хэрэглээний зүйлс авч өгөх нь илүү үр дүнтэй гэнэ. Тэд өнөөдөр Сүхбаатарын талбай дээр Гал сөнөөгчдөд туслах ажиллагаа зохион байгуулна. 
Ерөнхий сайд Ж.Эрдэнэбат дөнгөж сая шуурхай хуралдаан хийж, түймрийн тархалтын мэдээлэл сонсон холбогдох албаныханд үүрэг өглөө. Тэрээр “Засгийн газар наадмын болон амралтын өдрүүдэд ч түймэр унтраах ажлыг шуурхайн зохион байгуулж, байнгын удирдлагаар хангаж ажиллаж байгаа. Харин өнөөдөр яг холбогдох албаны удирдлагууд Та бүхэнд нэгдсэн байдлаар үүрэг өгөх гэж дуудуулсан юм“ гэв. 
16:20 минутын байдлаар 150 эрэгтэй, 30 эмэгтэй хувийн бэлтгэлээ бүрэн хангаж, Сүхбаатарын талбай дээрээс шууд Төв аймгийн Батсүмбэр сум руу явахад бэлэн болсон байв. Тэдний дотор цөөнгүй Ардчилсан холбооны гишүүд байгаа бөгөөд түймэр унтраахад гар бие оролцохоос гадна хандив өргөж, тодорхой хэмжээний багажаар тусалсан юм.
Цаг уур, орчны шинжилгээний хүрээлэнгээс 2017.07.15-ний өдөр ирүүлсэн сансарын хиймэл дагуулын мэдээллээр шинээр ойн түймрийн 3 голомт илэрсэн тул гарсан түймрийг унтраах зорилгоор Онцгой байдлын ерөнхий газрын тэргүүн дэд дарга, бригадын генерал Г.Ариунбуянгийн шийдвэрээр нэмэлт хүч татахаар болсон.
Цаг уурын байгууллагаас ирүүлсэн мэдээгээр ойрын өдрүүдэд ихэнх нутгаар аагим халуун болох төлөвтэй байна. Тэрчлэн баяр наадмын амралтын өдрүүд үргэлжилж байгаатай холбогдуулан иргэд гол ус бараадан амарч зугаалахдаа анхаарал болгоомж алдан усанд осолдох эрсдэл дагуулж байна.