Month: July 2017

Амралт зугаалгын улиралд гадаад, дотоодын ихэнх жуулчид Хөвсгөл нуурийг үзэхээр аймгийг зорьдог билээ. Албаныхны хэлж буйгаар өдөрт 500 машин тус аймгийг зорин зорчиж, байгаа аж.

Харин ингэж зорчихдоо тээврийн хэрэгслийн аюулгүй байдлыг хангаагүй, зорчигчийн тоо болон хурд хэтрүүлэх зөрчлүүд их гарах болжээ.

Иймд авто машиныхаа техникийн бүрэн бүтэн байдлыг хангах, мөн зорчигчийн тоо болон хурд хэтрүүлэхгүй зорчихыг Авто тээврийн үндсэний төвөөс анхааруулж байна. Түүнчлэн нийслэлээс орон нутгийг зорьж байгаа иргэдийг хулгайн тээврээр зорчихгүй байхыг давхар анхааруулж байна.

БОАЖ-ын сайд Д.Оюунхорол түймрийн голомт болох Төв аймгийн Батсүмбэр суманд ажиллаж байгаа аж. Тэрээр өөрийн цахим хуудаснаа “Сайхан мэдээ: Батсүмбэр сумын нутаг Сөгнөгөрийн Баянгол амралтын дээд талд 3 пуужин харваж 1 цаг бороо орлоо. Мөн Зүүнхараагийн өмнөдөд пуужин харваж түймрийн голомтод 2 цаг орчим бороо орлоо. Түймрийн эрчим буурч байна” хэмээжээ.

НӨАТ-ын урамшууллын сугалааны ээлжит тохирол өнөөдөр явагдана. Сугалааг “Боловсрол суваг” телевизээр 19:30 цагт орон даяар шууд дамжуулан үзүүлнэ.

Энэ удаагийн тохиролд зургадугаар сарын 1-нээс 30-ны хооронд худалдан авалт хийж, бүртгүүлсэн баримтууд хамрагдах бөгөөд супер сугалааны шагналын сан 350 сая төгрөг юм.

Иргэд өнгөрсөн сард худалдан авалт хийсэн баримтаа өнөөдөр 23.59 цагаас өмнө www.ebarimt.mn цахим хуудсанд бүртгүүлснээр сугалаанд хамрагдах боломжтой юм.

Баяр наадмын буюу 2017 оны долоодугаар сарын 10-ны өдрөөс 2017 оны долоодугаар сарын 15-ны өдрүүдэд Замын цагдаагийн албаны ЖШУХ нийт 1236 дуудлага, мэдээ мэдээлэл хүлээн авснаас, зам тээврийн ослын 790 дуудлага бүртгэгдсэн бөгөөд осол, хэргийн улмаас 2 хүний амь нас хохирч, 70 хүн гэмтсэн байна. Үүнээс 18 нь бага насны хүүхэд байсан аж.

Гудамж замд хийсэн хяналт шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон нийт 238 жолоочийг илрүүлэн саатуулж ажиллаа. Баярын өдрүүдэд согтуугаар тээврийн хэрэгсэл жолоодон зам тээврийн осол гаргасан 13 жолооч бүртгэгджээ..

Бүртгэгдсэн осол, хэргийг хэлбэрээр нь авч үзвэл явган зорчигч мөргөсөн 27 осол, мөргөлдсөн 36 осол, үл хөдлөх зүйл мөргөсөн 4 осол, онхолдсон 2 осол тус тус бүртгэгдсэнийг Замын цагдаагийн алба шалгаж байгаа аж. Орон нутгийн замд зам тээврийн ослын улмаас 8 хүний амь нас хохирч, 1 гэмтсэн бөгөөд онхолдох хэлбэрээр 4, мөргөлдөх хэлбэрээр 4 осол бүртгэгдсэнийг харъяа аймаг дахь Цагдаагийн газарт шалгаж байгаа юм.

Тухайлбал:

БЗД-ийн нутаг Хонхорын шинэ замд А жолоочтой амины Мустанг маркийн мотоцикль онхолдож, зорчигч 32 настай Б-н амь нас хохирсон.

БГД-ийн нутаг Телевизийн эцэс рүү нийлдэг даланд амины T.Prius маркийн автомашины жолооч Ч нь далан руу унаж жолооч, зорчигч нарын 2 хүн гэмтсэн.

Орон нутагт:

Сэлэнгэ аймгийн Баянгол сумын нутаг “Хоёр даваа” гэх газар асфальтан замд N.Sunny маркийн Ө жолоочтой автомашин H.Accent маркийн Д жолоочтой автомашинтай мөргөлдөж зорчигч 31 настай Э-н амь нас хохирсон ноцтой зам тээврийн осол гарсныг шалгаж байна.

Баяр наадмаар нийт 1500 гаруй морь бүртгүүлснээс морьдын шүдэлгээ, сэрвээний өндөр, галбирыг нь харгалзан морьдыг хассан. Мөн стандартын хувцас хэрэглэл өмсөөгүй хүүхдээр унуулсан гэх шалтгаанаар ч нэлээд морьдыг уралдуулаагүй. Ингээд 700 орчим уралдаанч хүүхэд хурдан хүлгээ унаж, эсэн мэнд сайхан наадлаа. Тэдгээрээс азарга, их нас, соёолон, хязаалан, шүдлэн, даага мөн эрлийз дээд, дунд, бага насны хурдан морины уралдаанд унасан хүлгээ түрүү магнай, аман хүзүүнд хурдлуулж, айрагдуулсан уралдаанч хүүхдүүдэд Засгийн газрын хэрэгжүүлэгч агентлаг Гэр бүл хүүхэд залуучуудын хөгжлийн газар гарын бэлэг гардуулж, амжилт хүсэн баяр хүргэжээ.

Тулгар төрийн 2226, Их Монгол Улсын 811, Ардын хувьсгалын 96 жилийн ой, Үндэсний их баярнаадмын хүчит бөхийн барилдаанд ес даван түрүүлсэн Хөвсгөл аймгийн Тосон цэнгэл сумын харъяат улсын арслан Ц.Содномдорж ОБЕГ-т хандив өргөхөө мэдэгдлээ.

Хандив өргөх арга хэмжээ 17.00 цагт ОБЕГ-т болох аж.

Төв аймгийн Эрдэнэ сумын нутагт гарсан ойн түймрийг унтраахаар ОБЕГ-ын харъяа Аврах тусгай ангийн 24 алба хаагчийг тус ангийн захирагч, хурандаа Д.Намсрай, ОБЕГ-ын ГТТГ-ын хэлтсийн дарга, дэд хурандаа Ц.Нямбаяр нар ахлан МТ 1001 дугаарын МИ171Е загварын нисдэг тэргээр түймрийн голомтод хүргэхээр дөнгөж сая нислээ. Одоогийн байдлаар Төв аймгийн Эрдэнэ сумын нутаг Асралт хайрхан уул, Арцат уул, Ар матах уул зэрэг автомашинаар болон явганаар очих боломжгүй газарт гарсан ойн түймрийн голомтод эдгээр алба хаагчдийг хүргэх юм. Мөн Өвөрхангай, Архангай, Өмнөговь аймгийн Онцгой байдлын газруудаас нэмэлт хүч татаж Төв аймгийн Батсүмбэр сум, Сэлэнгэ аймаг руу хөдөлгөөд байна гэж Онцгой байдлын ерөнхий газраас мэдээллээ.