Month: July 2017

Ой хээрийн түймрийн нөхцөл байдал хүндэрсэнтэй холбогдуулан Нийслэлийн ногоон бүсэд амарч зугаалахыг хориглосон захирамж гарсан байгаа билээ. Энэ талаар Нийслэлийн Онцгой байдлын газрын дарга, Онцгой комиссын орлогч дарга хурандаа Н.Уламбаяртай ярилцлаа.

-Нийслэлийн ногоон бүсэд амарч зугаалж байгаа иргэдэд хэрхэн хяналт шалгалт тавих вэ?

-Монгол Улсын хэмжээнд хуурайшилт ихтэй, хур бороо багатай, зуншлага тааруу байна. Энэ нь нэлээдгүй хугацаагаар үргэлжилж ган гачиг болох эрсдэлтэй байна. Улаанбаатарын ногоон бүсэд хуурайшилт нэн аюултай зэрэгт хүрсэн учир нийслэлийн удирдах ажилтаны зөвлөлийн хурлаар хэлэлцээд 2017 оны долдугаар сарын 17-ны өдөр А537-р зүйлээр Нийслэлийн Засаг дарга захирамж гаргасан. Гол үндсэн заалтанд нийслэлийн ногон бүсэд явган хүн болон тээврийн хэрэгслийг хуурайшилттай энэ үед зорчихыг түр хориглъё гэж шийдсэн. Хяналт шаардлагын хувьд байгаль хамгаалагч, нийслэлийн онцгой байдлын албан хаагчид, нийслэлийн цагдаагийн газар мөн нийслэлийн аялал жуулчлалын газар, нийслэлийн мэргэжлийн хяналтын газар гэх мэт мэргэжлийн байгууллагууд энэхүү захирамжийг хангаж хяналт тавьж ажиллана. Ногоон бүс рүү зорчих авто болон явган замаар, ямар нэг байдлаар хууль бус газраар зам гарган зорчих энэ хэсгийн хөдөлгөөнүүдийг хаана. Хэрэв хориглосон бүсээр зорчивол захиргааны хариуцлагын дагуу торгууль шийдвэр ногдуулна. Байгаль хамгаалагчдад хариуцуулж өгсөн ам газруудад өндөржүүлсэн бэлэн байдалд ажиллана.

-Ямар хугацаагаар хориглосон бэ?

-Яг нарийн хугацаа зааж өгөөгүй ч долдугаар сарын 17-ны өдрөөс эхлэн түр хугацаанд хориглосон байгаа. Ер нь ой хээрийн түймэр гарсан шалтгааныг тогтооход 70-80 хувь нь иргэдийн хариуцлага болгоомжгүй байдлаас гардаг гэсэн дүгнэлт гарсан байна. Амралт зугаалгаар явсан иргэд маань ой хээр явахдаа галын аюулгүй байдлыг хангаагүйгээс болж байна.

–Яг ямар бүс газруудад хориг тавьсан байгаа вэ?

-Нийслэлийн орчим ногоон бүс гэхээр дүүргээр авч үзвэл Налайх Багануур мөн хойд талын зуслангийн чиглэлийн ногоон бүс, Богд Уул , Хан Уул дүүргүүд орно. Нийслэлд гарсан 18 түймрээс авч үзэхэд Сонгинохайрхан дүүрэг Толгойтын баруун, зүүн салаа зуслангийн бүсээр, Сүхбаатар дүүрэг Чингэлтэй дүүрэг болох хойшоо зуслангийн чиглэлээр иргэд олноор зорчих хөдөлгөөн хийдэг. Эдгээр газруудаар хориг тавьсан. Иргэд маань Онцгой байдлын газраас тавьж байгаа шаардлага зөвлөмжийг биелүүлэх нь бидний ажилд дэмжлэг үзүүлж буй явдал юм. Нөгөө талаар өөрсдийнхөө болоод нийслэлийн аюулгүй байдлыг хангаж байгаа хэрэг.

-Нийслэлд энэ хавраас хойш түймэр хаана хэдэн удаа түймэр гарсан байна вэ?

-2017 он гарснаас хойш нийслэлийн ногоон бүсэд 18 удаагийн ой хээрийн түймэр гарчээ. Хан Уул дүүргийн Нүхтийн ам, Баянзүрх дүүргийн Залаатын ам, Сонгино хайрхан дүүргийн баруун салаа, зүүн салааны амуудад гарсан байна. Хамгийн сүүлд долдугаар сарын 12-ны өдөр Сүхбаатар дүүргийн Хандгайтын амд 3 га орчим газар түймэр өртсөн.

-Гал гарч байгаа гол шалтгаан юунаас болж байна вэ. Архины шил халуунд хэт халснаас болж гал гарч байгаа гэх юм?

-Өнөөдрийн байдлаар улсын хэмжээнд 22 түймэр гарсан. Түймэр гарсан шалтгаан өхцлийг цагдаагийн байгууллагаас шалгаж тогтоодог. Ерөнхий судалгааг харвал гарсан түймрийн 70-80 хувь нь иргэдийг санамсар болгоомжгүй үйлдлээс болдог. Асаасан тамхи шүдэнзээ бүрэн унтраалгүй хаях, үнс нурмаа ил задгай асгадаг, асаасан түүдэг галаа бүрэн унтраахгүй орхиод явдаг. Нөгөө талаараа унаж яваа тээврийн хэрэгслийн яндангийн цогшилтоос үүсч гал гарч байна. Үлдсэн 20-30 хувь нь аянга буух, өвс хэт хуурайшсанаас болж мод бутууд шүргэлцэх үед гардаг. Архи, ундааны шил савнаас гал гарах боломжтой. Энэ нь линз хэлбэрийн технологоор хийгдсэн байдаг учир хуурай өвсөн дээр хурц нар тусахад гал гарах тохиолдол цөөн гарч байна.

Ц.МИШЭЭЛ

Сүхбаатар аймгийн Сүхбаатар суманд харангадаж үхсэн 1200 гаруй цагаан зээрийн сэг зэмийг устгах, ариутгал халдваргүйжүүлэлтийн ажлыг зохион байгуулжээ.

Цаана нь даруй устгах шаардлагатай 1000 гаруй үхсэн зээр байгаа юм байна. Өнөөдрийн байдлаар үхсэн зээрийн сэг зэмийг бүрэн устгах техник хэрэгсэл дутмаг байгаа аж.

Сүхбаатар аймгийн Засаг даргын орлогч Т.Амарбаатараар ахлуулсан ажлын хэсэг тус сумын нэг болон гуравдугаар багийн газар нутгаар явж нөхцөл байдалтай танилцсан байна. Нэгдүгээр багийн нутагт 1200 гаруй цагаан зээр үхсэн байсныг нүхэнд бөөгнүүлж, ойр хавийн газраар ариутгал халдваргүйжүүлэлт хийжээ. Мөн гуравдугаар багийн нутагт үхсэн 1000 гаруй зээрийг устгалд оруулах шаардлагатайг тус аймгийн Байгаль орчны газраас мэдэгдсэн байна.

Өчигдөр 40 тоннын чингэлэг суудлын авто машин дээр унасан тухай мэдээллийг бид та бүхэндээ хүргэж байсан. Харин чингэлэгт дарагдсан

“Приус-11” маркийн машинд 36 настай эрэгтэй, 16 настай эрэгтэй болон долоон сартай эрэгтэй хүүхэд байжээ. Тэд бүсэлхийнээс доош хэсгээрээ чингэлэгт дарагджээ. Яаралтай тусламжийн эмч нар гэмтсэн хүмүүсийг ГССҮТ-д хүргэсэн бөгөөд долоон сартай хүүгийн биеийн байдал маш хүнд, сэхээнд эмчлүүлж байгаа юм байна.
Одоогоор замын цагдаагийн албанд чингэлэг ачиж явсан ачааны машины жолоочид эрүүгийн хэрэг үүсгэн, мөрдөн байцаалтын ажиллагааг эхлүүлээд байгаа юм.

Нийслэлийн удирдах ажилтны ээлжит шуурхай зөвлөгөөн өнөөдөр боллоо. Хуралдааны эхэнд өнгөрсөн зөвлөгөөнөөр нийслэлийн Засаг даргын өгсөн үүрэг даалгавар болон түүний биелэлтийн талаар НЗДТГ-ын Хяналт шинжилгээ, үнэлгээний хэлтсийн дарга Х.Гантулга танилцууллаа.

Нийслэлийн цагдаагийн газрындарга, цагдаагийн хурандаа Ж.Эрдэнэболд “Өнгөрсөн 14 хоногийн хугацаанд гэмт хэрэг, зөрчил, зам тээврийн ослын шинжтэй 26580 дуудлага, мэдээлэл хүлээн авсан нь өмнөх 14 хоногтой харьцуулахад 3300 нэгж буюу 14.2 хувиар, гэмт хэргийн шинжтэй 669үйлдэл бүртгэгдсэн нь 87 нэгж буюу 14.9 хувиар тус тус өссөн үзүүлэлттэй байна. Монгол Улсын Ерөнхийлөгчийн сонгуулийн 2 дахь санал хураалт, Үндэсний их баяр наадмын үед иргэд, олон нийтийн амгалан тайван байдлыг хангах, гэмт хэрэг, зөрчлөөс урьдчилан сэргийлэх зорилгоор Нийслэлийн цагдаагийн газрын бие бүрэлдэхүүн долоодугаар сарын 6-ны өдрийн 09:00 цагаас 14-ны өдрийн 09:00 цаг хүртэлх хугацаанд Өндөржүүлсэн бэлэн байдлын нэгдүгээр зэрэглэлд албаны бэлэн байдлыг ханган ажилласан” гэж танилцуулав.

“Замын цагдаагийн албаны Мэдээлэл шуурхай удирдлагын хэлтэст 3341дуудлага мэдээлэл ирснээс хүн гэмтсэн хэргийн шинжтэй 131, зөрчлийн шинжтэй 832 дуудлаганд очиж хойшлуулшгүй ажиллагаа явуулан, 963 ослыг материалжуулан шалгаж байна. Улсын их баяр наадмын өдрүүдэд Төв цэнгэлдэх хүрээлэн орчимд 299 алба хаагч, Хүй 7 худаг орчимд 212 алба хаагч буюу нийт 511 алба хаагч замын хөдөлгөөний аюулгүй байдлыг хангах хамгаалалт, зохицуулалтыг хийж зөрчил дутагдалгүй ажиллалаа” гэж Нийслэлийн цагдаагийн газрын Замын хөдөлгөөний хяналтын газрын дарга, дэд хурандаа Б.Эрдэнэбат хэллээ.

НОБГ-ын дарга, хурандаа Н.Уламбаяр “Өнгөрсөн өдрүүдэд Улаанбаатар хот орчмоор өдөртөө 37 хэм хүртэл халж хуурайшилтын эрсдлийн “нэн аюултай” зэрэгт хүрсэн. Ойрын өдрүүдэд Улаанбаатар хот орчмоор халалт бага зэрэг буурч өдөртөө 30-31 хэм байх боловч, түймэр гарах эрсдлийг нэмэгдүүлж болзошгүй байна. Цаг агаарын урьдчилсан мэдээгээр энэ сарын 17-18-ны өдрүүдэд Улаанбаатар хот орчмоор түр зуурын бороо орох төлөвтэй байна. Баяр наадмын амралтын өдрүүдэд иргэдийг гол усанд осолдохоос урьдчилан сэргийлж нийт 156 албан хаагч, 58 нэгж техник хэрэгсэл, хөдөлгүүрт завьтайгаар Туул, Тэрэлж, Хэрлэн гол дагуу Гачуурт тосгоноос-Зайсангийн гүүр-Яармагийн гүүр-Нисэх гэсэн маршрутаар завьт эргүүл хийсэн” гэлээ.

“Улсын баяр наадмын өдрүүдэд манай зүгээс хяналт шалгалт сайн тавьж ажиллан, 2 зөөврийн лаборатори ажиллуулсан. Хоол үйлчилгээний цэгүүдээс бүтээгдэхүүний дээж авч, хяналт тавьж ажиллалаа. 210 ширхэг өндөг, 243 кг муудсан мах зэргийг хураан авч устгасан. Баяр наадмаар ажиллах хуваарийн дагуу шуурхай албанд болзошгүй хордлого, хордлогот халдварын үед шуурхай мэдээллийн дагуу дуудагдаж ажиллах 68 улсын /ахлах/ байцаагч, 18 албан хаагч 24 цагаар хариуцлагатай жижүүрээр ажиллаж, цаг үеийн байдлын мэдээг НОБГ, Цагдаагийн төв штаб, МХЕГ, НЗАА-ын шуурхай удирдлагын төвд мэдээллээ” гэж Нийслэлийн Мэргэжлийн хяналтын газрын дарга Л.Эрдэнэчулуун ярилаа.

Зөвлөгөөний төгсгөлд Нийслэлийн Засаг дарга бөгөөд Улаанбаатар хотын захирагч С.Батболд “Хэт халуун үргэлжилж цаг агаарын нөхцөл байдал хүнд байгаа энэ үед нийслэлийн ногоон бүсэд амарч, зугаалахыг түр хугацаагаар хориглосон шийдвэр гарсан. Үүний хэрэгжилтэд онцгой анхаарал хандуулж ажиллах хэрэгтэй байна” гээд “Ой хээрийн түймрээс урьдчилан сэргийлэх талаар авах зарим арга хэмжээний тухай” А/537 тоот захирамжийн хэрэгжилтийг хангаж ажиллах, улс нийслэлийн төсвийн хөрөнгөөр хийгдэж буй тохижилт, бүтээн байгуулалтын ажлыг хугацаанд нь чанартай хийж гүйцэтгэх, сургууль, цэцэрлэг, эмнэлгийн барилгын ажлын засвар, өргөтгөлийн ажлуудыг наймдугаар сарын 15-ны дотор дуусгах зэрэг үүрэг даалгаврыг дүүргийн Засаг дарга нар болон холбогдох албан тушаалтнуудад үүрэг болгов.

Долдугаар сард агаарын температур ихэнх нутгаар уур амьсгалын дунджаас дулаан байна. Хур тунадас Ховдын хойд, Увсын нутаг, Завхан, Говь-Алтай, Хөвсгөлийн баруун, Төв, Сэлэнгэ, Дундговийн зүүн, Дорноговийн хойд, Хэнтийн ихэнх нутаг, Сүхбаатар, Дорнодын баруун хэсгээр бага, Баянхонгорын хойд, Өвөрхангайн өмнөд хэсгээр ахиу, бусад нутгаар дундаж хэмжээний орчим орох төлөвтэй байгаа юм. Харин сарын эхэн болон сүүл үед төв, зүүн аймгуудын нутгаар түр зуурын бороо орно. Ерөнхийдөө долоо, наймдугаар сард дулаан байх тул үе үе хэд хоногоор огцом халах, түр зуурын ширүүн бороо аадар орох, хуурайшилт нэмэгдэх зэрэг үр тариа, таримал ургамлын ургалт, болцод сөргөөр нөлөөлөх цаг агаарын тааламжгүй үе тохиолдох магадлал өндөр байна.