Олон улсын валютын сан /ОУВС/-гийн шинжээчид долдугаар сарын 19-нд Монгол Улсад хүрэлцэн иржээ.
Эдийн засгийн хямралыг даван туулах зорилгоор Монгол Улсын Засгийн газар ОУВС-д хандсанаар өнгөрсөн тавдугаар сарын сүүлээс санхүүгийн өргөтгөсөн хөтөлбөрт хамрагдах болсон. Иймээс тус сангийн шинжээчид хөтөлбөрийн хэрэгжилттэй холбоотойгоор яамдад ажиллаж байна гэж ойлгож болох аж. Нийт зургаан шинжээч иржээ.
Засгийн газар ОУВС-гийн хөтөлбөрт хамрагдахын өмнө долоон төрлийн татвар нэмэгдүүлэх, Хүүхдийн мөнгийг нийт хүүхдийнхээ 60 хувьд олгох зэрэг хэд, хэдэн үүрэг хүлээж, энэ төрлийн хуулийг УИХ-аар батлуулсан.
Татвартай холбоотой хуулиуд өнгөрсөн тавдугаар сараас хэрэгжиж эхэлсэн. Үүнээс авто машинд ногдуулах гаалийн онцгой албан татварын хэрэгжилтийн хугацааг хойшлуулж, 2017 оны долдугаар сарын 1-н болгон өөрчилсөн.
Мөн бүх хүүхдэд 20 мянган төгрөг олгох шийдвэр гаргасан билээ. Дээрх шийдвэртэй холбоотойгоор 2017 оны нэгдүгээр сарын 1-ээс хойш хүүхдийн 20 мянган төгрөг аваагүй иргэдийн дансанд нийт долоон сарын 140 мянган төгрөг орсон.
Нийт 403 мянган хүүхдэд шаардагдах 48.4 тэрбум төгрөгийг Ерөнхийлөгчийн сонгуулийн өмнөхөн дансанд нь шилжүүлсэн юм.
Засгийн газрын хэрэг эрхлэх газрын дарга Ж.Мөнхбат бүх хүүхдэд 20 мянган төгрөг олгох болсон үндэслэлээ “Төсвийн орлого 500 гаруй тэрбум төгрөгөөр давж биелсэн учраас Засгийн газар бүх хүүхдэд 20 мянган төгрөг олгоход 100 тэрбумыг зарцуулж байна” хэмээн мэдэгдсэн юм.
Орлого давж биелсэн тул нийгмийн шинж чанартай хөтөлбөрийг дэмжих нь ОУВС-гийн хөтөлбөрийг зөрчсөн ноцтой шалтгаан болохгүй гэдэг тайлбарыг ч давхар хийж байв.
Гэвч эл асуудал нь ОУВС-гийн шинжээчдээс сануулга авч магадгүй тухай яриа чих дэлсэж байна.
Монгол Улс ОУВС-гийн хөтөлбөрт хамрагдсанаар гурван жилийн хугацаанд 5.5 тэрбум ам.долларын зээл авах бололцоо бүрдсэн. Зээлийн жилийн хүү нь 2 хувиас хэтрэхгүй. Энэ нь төсөвт ирэх дарамтыг бууруулах ач холбогдолтой. Нөгөө талаас хямд эх үүсвэрээр хэрэгцээтэй төслүүдээ дэмжиж, хөрөнгө оруулж чадвал Монголын эдийн засаг сэргэхэд илүү ач холбогдолтой тусна гэж эдийн засагчид дүгнэж байгаа.
Учир нь Монгол Улсын төсвийн алдагдал 2 их наядаар хэмжигдэх болсон. Үүнийг өндөр өртөгтэй Засгийн газрын бондоор санхүүжүүлэх нь эргээд эдийн засгийг боомилдог. Төгрөг үнэгүйдэх шалтгаан болдог. Тиймээс Засгийн газар ОУВС-гийн хөтөлбөрт хамрагдсан нь цагаа олсон бодит арга хэмжээ болсон.
Эхний ээлжинд 38.6 сая ам.доллар орж ирсэн. Үр дүнд нь валютын ханшийн өсөлт зогсож, төгрөг чангарах боломж бүрдэж, төв банк бодлогын хүүгээ 1.5 пунктээр бууруулаад байгаа.
Хоёр хоногийн өмнө Японы Парламентын төлөөлөгчдийн танхимын дарга Т.Оошима Монгол Улсад айлчилсан. Энэ үеэрээ 850 сая ам.долларын дэмжлэг үзүүлэхэд бэлэн байгаагаа мэдэгдсэн. ОУВС-гийн хөтөлбөрт хамрагдсантай холбогдож, Япон улсын зүгээс Монголд хөнгөлөлттэй нөхцөлөөр олгох үүрэг хүлээсэн юм.
Харин хүүхдийн 20 мянгыг бүх хүүхдэд олгох шийдвэр гаргасан Засгийн газарт ОУВС-гийн шинжээчид ямар дүн тавих вэ гэдэг хамгийн их анхаарал татаж байна.
Ази номхон далайн бүсийн Скаутуудын 31-р Жембори буюу скаутуудын майхант чуулга уулзалт энэ сарын 27-ны өдрөөс долоо хоногийн турш Олон улсын хүүхдийн “Найрамдал” цогцолборт зохион байгуулахаар болоод байна. Энэхүү арга хэмжээнд Ази-номхон далайн бүсийн орнууд, Европ, Америк тивийн нийт 40 гаруй орны 7000 хүүхэд оролцож байгаа аж.
Улаанбаатар хотод улс, нийслэл, гадаадын хөтөлбөр, концессийн хөрөнгө оруулалтаар шинээр баригдаж буй сургууль, цэцэрлэгийн барилгын ажлын явц байдалтай танилцаж, тулгамдаж байгаа асуудлыг шийдвэрлэх, үйл ажиллагааг эрчимжүүлэх зорилго бүхий ажлын хэсэг байгуулагдан ажиллаж байгаа юм. Нийслэлийн Засаг даргын орлогч Ш.Анхмаагаар ахлуулсан ажлын хэсэгт нийслэлийн Хот төлөвлөлт, ерөнхий төлөвлөгөөний газар, нийслэлийн Хөрөнгө оруулалтын газар, нийслэлийн Газрын алба, нийслэлийн Боловсролын газар болон гүйцэтгэгч компанийн төлөөллүүд багтаж байгаа аж. Ажлын хэсэг энэ сарын 20, 21-ний өдрүүдэд Хан-Уул, Сонгинохайрхан, Баянгол, Баянзүрх, Налайх, Багануур дүүрэгт нийт 53 байршилд ажлын явцтай очиж танилцлаа.
Нийслэлийн Цагдаагийн Газраас 2017 оны эхний хагас жилийн байдлаар нийслэлийн хэмжээнд үйлдэгдсэн онц ноцтой гэмт хэрэг, зөрчлийн талаар болон цаг үеийн асуудлаар өнөөдөр мэдээлэл хийлээ. 
Монгол, БНХАУ, ОХУ-ын 2014 оны Ерөнхийлөгч нарын хэлэлцээгээр Монголын “Талын зам”, ОХУ-ын “Евразийн эдийн засгийн холбоо”, Хятадын “Торгоны замын эдийн засгийн бүс” санаачлагыг нэгтгээд “Эдийн засгийн коридор” олон улсын томоохон төслийг хэрэгжүүлэхээр болсон. Уг хэлэлцээрт тусгагдсан гурван улсын хамтран хэрэгжүүлэх 32 төслийн жагсаалтад “Цайны замын аялал жуулчлал”-ыг хөгжүүлэх төсөл орсон нь Цайны замын аялал жуулчлалын брэндийг бий болгож, хамтарсан маркетингийн үйл ажиллагааг явуулах, Цайны зам дагуух улс орнуудыг аялал жуулчлалын нэгэн бүс хэмээн сурталчилж, гадаад улс орнуудаас илүү олон жуулчид татах нөхцөл боломж бүрдсэн юм. БОАЖЯ нь хөрш орнуудын аялал жуулчлалын хамтын ажиллагааг өргөжүүлэх, Цайны замын брэндийг сурталчлах хүрээнд энэсарын 22-23-нд Улаанбаатар хотноо “Монгол-Хятадын аялал жуулчлалын өдөрлөг” арга хэмжээг зохион байгуулах бөгөөд Хятадын талаас аялал жуулчлалын төрийн байгууллага, хэвлэл мэдээллийн хэрэгсэл, аялал жуулчлалын байгууллага, хүүхэд багачуудын төлөөлөл бүхий нийт 460 орчим хүн оролцохоо илэрхийлээд байна.
17 настай Ж.Номондалай АНУ-ын Иллиной мужийн Niles West ахлах сургуульд сурдаг. Тэрээр ахлах сургуулийн гимнастикийн аварга шалгаруулах тэмцээний хошой аварга. Мөн тавдугаар сард болсон Иллиной мужийн аварга шалгаруулах гимнастикийн олон төрлийн тэмцээнд түрүүлжээ. Ж.Номондалай Niles West ахлах сургуулийн багт анхных нь алтан медалийг /багийн төрөлд/ авчирсан байна. Тэр багийнхаа лидер нь байж, бусдыгаа манлайлсан чадсан гэж “Chicago Tribune” сонин спортын буландаа онцолжээ. 2007 онд Ж.Номондалайгийн гэр бүл амьдрал ахуйгаа сайжруулах, хүүхдүүддээ сайн боловсрол эзэмшүүлэхээр 2007 онд АНУ-ыг зорьжээ. Түүний дараагийн зорилго нь Чикаго дахь Иллиной мужийн их сургуульд элсэн суралцаж “Flames” нэртэй гимнастикийн багийн гишүүн болох гэнэ.
