Тайландын нийслэл Бангкокт болж буй өсвөр үеийн Азийн АШТ-ий хоёр дахь өдөр Монголын өсвөрийн бөхчүүд бүгд медалийн төлөө барилдсан хэдий ч гурван мөнгө, хоёр хүрэл медаль хүртлээ.
Монголын охид Азийн АШТ-д есүүлээ барилдаж нэг алт, гурван мөнгө, гурван хүрэл, нийт долоон медальтай 73 оноотой багийн дүнгээр гуравдугаар байрт орсон амжилттай нутагтаа ирэхээр болж байна. Охидын багийн дүнг Япон 94 оноотой тэргүүлж, Энэтхэг улс 78 оноотой удаалав.
Монгол Улсын Ерөнхийлөгчийн Тамгын газрын дарга З.Энхболд гал түймрийн нөхцөл байдалтай холбогдуулан цаг үеийн асуудлаар холбогдох албан тушаалтнуудтай уулзаж, ярилцлаа.
Уулзалтад Батлан хамгаалахын сайд Б.Бат-Эрдэнэ, ЗХЖШ-ын дарга дэслэгч генерал Д.Даваа, ОБЕГ-ын дарга хошууч генерал Т.Бадрал болон бусад албаны хүмүүс оролцсон юм.
Уулзалтад оролцогчид түймрийн нөхцөл байдлын талаар газрын зураг дээр дэлгэрэнгүй ярилцаж, гал түймэр унтраах ажиллагаанд оролцогчдын хоол хүнс хангалтын ажлыг шуурхай зохион байгуулах тухайд анхаарал хандуулахаар боллоо.
Мөн иргэдээс ирсэн хандив тусламжийг бодит хөрөнгө оруулалт болгож, түймэр унтраахад зориулагдах техник хэрэгсэл худалдан авахад зарцуулах нь зүйтэй талаар уулзалтад оролцогчид хэлж байв.
“Авьаяслаг америкчууд” шоунд Монгол залуу оролцож, эр, бяраа гайхуулжээ. Түүнийг Баттогтохын БАТТУЛГА гэдэг бөгөөд АНУ-ын Чикаго хотод ажиллаж, амьдардаг аж. Тэрээр тус шоунд циркийн урлагийн хүчний үзүүлбэр үзүүлж, эхний шатандаа түвэггүй тэнцсэн байна. Харин түүний хувьд хоёрдугаарт шатанд үзүүлбэрээ илүү хүндрүүлж, сонирхолтой байдлаар хийжээ. Шүүгч Хайди Клум, Ховард Мандел нарыг тайзнаа урьж, үзүүлбэртээ оруулсан товч бичлэг “Авьяаслаг америкчууд” шоуны албан ёсны “YouTube” хуудсанд тавигдсан байна.
Монгол Улсын Засгийн газар өнгөрсөн оны наймдугаар сараас ОУВС-тай хэлэлцээ хийж, энэ оны тавдугаар сарын сүүлээр “Өргөтгөсөн санхүүжилтийн хөтөлбөр”-ийг албан ёсоор хэрэгжиж эхлүүлсэн. ОУВС-гийн “Өргөтгөсөн санхүүжилтийн хөтөлбөр” хэрэгжиж эхэлсэн даруйд 38.6 сая ам.доллар манай улсад орж ирсэн билээ. Улирал тутам орж ирж уг санхүүжилтээс өмнө ОУВС-гаас хөтөлбөрийнхөө хэрэгжилтийг нягтлаж, урьдач нөхцлүүдийн хэрэгжилтэд хяналт тавьдаг аж. Иймд ОУВС-гийн шинжээчид энэ сарын 19-ний өдрөөс эхлэн манай улсад ажиллаж байгаа юм. ОУВС-гийн “Өргөтгөсөн санхүүжилтийн хөтөлбөр”-т хамрагдахын тулд манай Засгийн газар долоон төрлийн татвар нэмэн, тэтгэврийн насыг 2018 оноос жил бүр зургаан сараар нэмэгдүүлэх зохицуулалт хийсний зэрэгцээ “Хүүхдийн мөнгө”-ийг 60 хувьд нь олгохоор болж, УИХ-аар батлуулсан билээ.
Гэвч ОУВС-гийн шинжээчдийн зүгээс Монгол Улсын Засгийн газрыг хэд хэдэн урьдач нөхцлүүдээ зөрчиж, хөтөлбөрийн хэрэгжилтийг сааруулсан гэж үзэж буйгаа илэрхийлжээ. Тухайлбал, бүх хүүхдэд хүүхдийн мөнгө олгохгүй байх шаардлагыг шууд байдлаар тавьсан байна. Одоогоор Засгийн газраас уг мэдээллийг ихэд нууцлаж, дотооддоо ард түмэнд хэрхэн зөв ойлгуулах талаар зөвшилцөж байгаа аж.
Өмнөговь аймгийн Манлай сум, Өехий багийн “Энгэр цагаан” гэдэг газар долдугаар сарын 21-ний өдрийн 09:16 цагт 3.8 магнитудын хүчтэй газар хөдлөлт болжээ. Харин тус аймгийн Онцгой байдлын газраар дамжуулан тус сумын ЗДТГ-ын дарга Б.Бат-Энх, малчин Б.Оюунбилэг нараас тодруулахад “Иргэдэд чичирхийлэл мэдрэгдээгүй. Онцын хохирол учраагүй” гэв.
Унгарын Будапешт хотод усан спортын 2017 оны дэлхийн аварга шалгаруулах тэмцээн энэ сарын 30 хүртэл зохион байгуулагдах билээ. Энэ удаагийн ДАШТ-д АНУ, ОХУ, БНХАУ, Герман, Австрали, Япон, БНСУ, Итали, Франц тэргүүтэй 90 орчим улсын баг тамирчид өрсөлдөж буй юм. Харин манай орны Б.Энххүслэн, Б.Есүй, Б.Буянтогтох, М.Дэлгэрхүү нарын тамирчид өрсөлдөхөөр Унгар улсад очоод байна.
Ази, Номхон далайн бүсийн 31 дүгээр Жемборийг 2017 оны 07 дугаар сарын 27-ноос 08 дугаар сарын 02-ны өдрүүдэд Улаанбаатар хотод зохион байгуулагдах бөгөөд уг арга хэмжээнд 400 гаруй орны 6000 орчим хүүхдүүд майханд байрлан уг арга хэмжээнд оролцоно.
Жемборид оролцогчдод эмнэлгийн яаралтай тусламжийн бэлэн байдлыг хангах ажлын хэсэг хуралдаж, дараах асуудлуудыг шийдвэрлэв. Үүнд:
Хачигт халдвар, хоолны хордлого, гэмтэл бэртэл, могойд хатгуулах, наршилтаас сэргийлэх талаар гарын авлага, мэдээлэл боловсруулж оролцогчдод мэдээлэл, сурталчилгаа зохион байгуулах чиглэлээр Эх, хүүхдийн эрүүл мэндийн үндэсний төв, Гэмтэл согог судлалын үндэсний төв, Улсын нэгдүгээр төв эмнэлэг, Халдварт өвчин судлалын үндэсний төв болон бусад эмнэлгийн байгууллагуудад үүрэг өгөв.
Завхан аймгийн Түдэвтэй сумын 90 жилийн ойн баяр наадмын хурдан морины уралдаанд 13 настай унаач хүү Л.Баасандорж мориноос унаж,тархины суурь ясны хугарал, няцрал оноштойгоор Түдэвтэй сумын эмнэлэгт хэвтэн эмчлүүлж байсан. Мөн Завхан аймгийн Нэгдсэн эмнэлгийн гэмтлийн эмч, сэхээний эмч нарын баг Түдэвтэй суманд очиж үзлэг, оношилгоог хийж, Гэмтэл согог судлалын үндэсний төвийн эмч нартай цахимаар холбогдож зөвлөгөө авч эмчилгээг үргэлжлүүлж байсан юм.
Харин одоогоор түүнийг Гэмтэл согог судлалын үндэсний төвийн эмч нарын баг “Блю Скай” компанийн онгоцоор тээвэрлэн авчирч, ГССҮТ-ийн эрчимт эмчилгээний тасагт хэвтүүлэн эмчилгээг үргэлжлүүлж байна.
Үндсэн хуульд нэмэлт өөрчлөлт оруулах хэлэлцүүлгийг олон нийтийн дунд зохион байгуулж байгаа. Үүнтэй холбогдуулан Монгол Улсын Үндсэн хуульд оруулах нэмэлт, өөрчлөлтийн төслийг олон нийтээр хэлэлцүүлэх ажлын хэсгийн хуралдаан даваа гаригт 11.00 цагт Төрийн ордны В танхимд болох юм.
Үндсэн хуульд нэмэлт өөрчлөлт оруулах олон нийтийн хэлэлцүүлэг есдүгээр сар хүртэл үргэлжилнэ.
.jpg)
Гал түймрийг унтраахад зориулж иргэдээс Онцгой байдлын ерөнхий газрын хандивын дансанд 692 төрийн болон төрийн бус байгууллага, аж ахуйн нэгж, иргэдийн нийт 683.470.089 төгрөгийн мөнгөн хандив ирүүлээд байна.
Өнөөдөр Монголын залуучуудын холбооны Сөүл хот дахь залуучуудын холбоо, Том Гуанжау хотын Монголын залуучуудын нийгэмлэг хамтран 1,000,000 төгрөг, мөн 1,750,000 төгрөгийн хорт утааг шүүгч маскын хамт илгээлээ. Түүнчлэн АНУ-ын Лос Анжелес хотод ажиллаж, амьдарч байгаа Монголчуудын холбооны 100 орчим аж ахуй нэгж, хувь хүн хамтран хандивын аян өрнүүлж 12,600,000 төгрөг цуглуулснаа илгээжээ. Илгээмжийг ОБЕГ-ын удирдлагад УИХ-ын гишүүн асан Ж.Сүхбаатар гардуулан өгсөн юм.