Month: July 2017

Мэргэжлийн сүмогийн 69 дэх их аварга, Монгол Улсын Хөдөлмөрийн баатар, Гавьяат тамирчин Хакүхо М.Даваажаргал эх орондоо ирээд байгаа билээ. Тэрээр өнөөдөр аав Хөдөлмөрийн баатар, Олимпийн мөнгөн медальт, Үндэсний бөхийн Дархан аварга, Гавьяат тамирчин Ж.Мөнхбат, ээж Тамирын хамтаар Ерөнхийлөгч Х.Баттулгад бараалхлаа.

Дээд зиндааны 39 дэх түрүүгээ авч, өөрийн амжилтыг улам ахиулсан түүнд Ерөнхийлөгч Х.Баттулга баяр хүргэсэн юм.

Цэцэрлэгт шинээр элсэж байгаа хүүхдийн цахим бүртгэлийн ажил өнөөдөр эхэллээ. Энэхүү цахим бүртгэлийн талаар Нийслэлийн Боловсролын газрын дарга Ж.Гантулгаас тодрууллаа.

-Цахим бүртгэлд хүүхдээ бүртгүүлэх боломжгүй иргэд яах вэ?

-Ирэх сарын 10-наас бүх цэцэрлэгт цахим бүртгэлд туслах ажилтнууд томилогдож ажиллана. Цахимаар бүртгүүлэх боломжгүй иргэд 8 дугаар сарын 10-наас хойш цэцэрлэгт биеэр очиж, цэцэрлэгийн туслах ажилтнуудад бүртгүүлнэ.

-Энэ жил хичнээн цэцэрлэг ашиглалтанд орох вэ? Нийт хэдэн цэцэрлэг үйл ажиллагаа явуулж байна вэ?

-2016-2017 оны хичээлийн жилд төрийн өмчийн 216, төрийн бус өмчийн 407 цэцэрлэг үйл ажиллагаа явуулж байсан. Харин 9 дүгээр сарын 01-ний байдлаар долоон цэцэрлэг үйл ажиллагаагаа эхэлнэ. Дараа нь 10-12 дугаар улсын болон нийслэлийн төсвийн хөрөнгө оруулалтаар нийт 6 цэцэрлэг ашиглалтад орно мөн улсын төсвийн концессийн гэрээгээр 15 бага сургууль ашиглалтад орно. Ирэх есдүгээр сарын 01-н гэхэд үйл ажиллагаагаа эхлэх төрийн өмчийн 223 цэцэрлэг байна. Харин төрийн бус өмчийн 36 цэцэрлэг үйл ажиллагаа явуулахаар тусгай зөвшөөрөл авсан.

-Цахим бүртгэлд хүүхдээ бүртгүүлсэн юм чинь цэцэрлэгт орсон гэж ойлгож болох уу?

-Цахим бүртгэлд бүртгүүлснээр шууд цэцэрлэгт элсэнэ гэсэн үг биш. Харин ирэх сарын 25-наас “Цэцэрлэгийн цахим элсэлт”-ийн үйл ажиллагаа эхэлнэ. Цахимаар бүртгүүлсэн хүүхдүүдийг санамсаргүй түүврийн аргаар сонгон шалгаруулалт хийж элсэлтийг зохион байгуулна. Цахим элсэлт явагдсаны дараа эцэг эхчүүдийн гар утсанд хүүхдийн хувийн дугаар, мэдээлэл ирнэ. Үүний дараа эцэг эхчүүд манай хүүхэд цэцэрлэгт элслээ гэж ойлгож болно.

“Цэцэрлэгийн онлайн бүртгэл”-ийн талаар нийслэлийн Мэдээллийн технологийн газар болон Нийслэлийн Боловсролын газраас өнөөдөр мэдээлэл хийлээ.

Долдугаар сарын 25-ны өдрийн 00:00 цагаас хойш цэцэрлэгийн цахим бүртгэлд 5374 хүүхэд амжилттай бүртгэгдсэн байна. Нийслэлийн хэмжээнд энэ жил цэцэрлэгт шинээр элсэх 35 000 гаруй хүүхэд байгаагаас 12 000 хүүхдийг цэцэрлэгт хамруулах боломжтой байгаа гэнэ.

Нийслэлийн Боловсролын газрын дарга Ж.Гантулга “Иргэд цахим бүртгэл, цахим элсэлт гэсэн хоёр тусдаа зүйл байгааг анхаарах хэрэгтэй” хэмээн мэдэгдсэн бөгөөд цэцэрлэгт шинээр элсэх буюу энэ жил 2 нас хүрч байгаа хүүхэд багачуудыг цахим элсэлтэнд хамруулах бол бүртгэгдэж, хүмүүжиж байсан цэцэрлэгтээ намраас анги дэвшин суралцах хүүхдүүд цахим бүртгэлд хамрагдах юм байна.

2017-2018 оны хичээлийн жилд төрийн өмчийн цэцэрлэгт шинээр элсэж байгаа хүүхдийн бүртгэл цахим хэлбэрээр 2017 оны долдугаар сарын 25-аас наймдугаар сарын 24-ний хооронд зохион байгуулагдана. Өмнөх хичээлийн жилд цэцэрлэгт хамрагдсан болон тухайн цэцэрлэг 3-5 насны хүүхдийг шинээр элсүүлэн авах бол бүртгэлийг 2017 оны наймдугаар сарын 21-24-ний өдрүүдэд уламжлалт аргаар зохион байгуулах юм.

Цахим бүртгэлд хамрагдах боломжгүй хүүхдүүдийг наймдугаар сарын 10-наас эхлэн бүртгэл хийх багш, аргазүйч нар цэцэрлэгүүд дээр ажиллаж бүртгэж авах ажээ. Цэцэрлэгийн хүүхдүүдийн дунд явуулах сугалааны талаар Нийслэлийн Мэдээллийн технологийн газрын дарга О.Чинзориг “Хэрвээ тухайн цэцэрлэг даац хэтэрсэн тохиолдолд сугалаа явагдана. Сугалааг санамсаргүй аргаар зохион байгуулна. Сугалааны үнэн зөв, ил тод явагдах эсэхийг Кибер аюулгүй байдлын газар, ТЕГ-аас тухайн үед нь шалгана” хэмээн мэдэгдсэн юм.

Улаанбаатар хотын хэмжээнд энэ сарын 24-ны өдрийн 05:00 цагаас 25ны өдрийн 05:00 цагийн хооронд иргэд, байгууллагаас Нийт 1559 мэдээлэл шалгагдсанаас, гэмт хэргийн 68, зөрчлийн 1247, согтуугийн 398, зам тээврийн ослын 244, мэдээллээс гэмт хэргийн шинжтэй 39-н үйлдэл бүртгэгдсэнийг холбогдох нэгжүүд шалгаж эхэлжээ.

Тодруулбал, Сонгинохайрхан дүүргийн 22-р хороо “Тахилтын … тоотод хулгай орсон байна” гэсэн мэдээллийг энэ сарын 24-нд авч шалгахад тус дүүргийн 22-р хороонд суух эрэтэй 59 настай Б -ын гэрийн цоожийг эмэгтэй 16 настай Д, эрэгтэй 15 настай Б нар эвдэж “Жи мобил”-ын гар утас, монголын нууц товчоо ном зэргийг хулгайлсныг илрүүлэн Сонгинохайрхан дүүргийн цагдаагийн нэгдүгээр хэлтэст шалгаж байна.

Мөн Сонгинохайрхан дүүргийн 20-р дугаар хороо “Монос” дээд сургуулийн баруун талд овор ихтэй зүйл авч явсан хүнийг энэ сарын 24-ний 23 цагийн эргүүлийн үүрэг гүйцэтгэж байсан цагдаагийн алба хаагчид шалгахад: … тоот хашаанд байсан Баянзүрх дүүргийн 25-р хороонд суух эрэгтэй 39 настай Н -ийн эзэмшлийн “Nord Benz” автомашины 150 ам/ц аккумуляторыг Сонгинохайрхан дүүргийн 20-р хороонд суух эрэгтэй 37 настай Б нь хулгайлсныг илрүүлэн шалгаж байна.

Чингэлтэй дүүргийн 9-р хорооны нутаг дэвсгэр “Усны гуравдугаар гудамжинд айлын нохой хүн хазсан байна” гэсэн мэдээллийг энэ сарын 24-нд авч шалгахад Чингэлтэй дүүргийн наймдугаар хороонд суух эмэгтэй 49 настай Г-ын зүүн хөлний булчингаас Чингэлтэй дүүргийн 9-р хороонд суух эрэгтэй 39 настай Н -ийн нохой хазаж гэмтээсэн хэргийг Чингэлтэй дүүргийн цагдаагийн нэгдүгээр хэлтэст шалгаж байна.