Month: July 2017

Төрийн ордны баруун хойд булангаас Туушин зочид буудлын дээгүүр өнөөдөр 12:10 цагт Боинг онгоц доогуур ниссэн гэсэн мэдээлэл бидэнд ирсэн юм. Энэ талаар албаны хүнээс тодруулахад “Олон улс хоорондын том Боинг онгоцны дамжин өнгөрөх нислэг өдөр бүр үйлдэгддэг. Онгоц хот дээгүүр нисэх бол заавал ИНЕГ-аас зөвшөөрөл авсан байх шаардлагатай. Өнөөдөр 12 цагийн үед ниссэн онгоц Korean Air-ын онгоц байх магадлалтай. Одоогоор том Боинг онгоц хот дээгүүр зөвшөөрөлгүй нислэг үйлдсэн зөрчил гараагүй байна. Манай улсын нутаг дэвсгэрээр өдөрт 300-400 нислэг үйлдэгддэг. Хот дээгүүр 1,000 метрээс доогуур нислэг үйлдэхийг хориглодог. Өнөөдрийн байдлаар 3,000 метрээс доогуур нислэг үйлдсэн онгоцны зөрчил илрээгүй байна. Хамгийн доогуур нислэг үйлдсэн онгоц нь 3,700 метрийн өндөртэй нисчээ. Том онгоц ниссэн болохоор доогуур нисэж байгаа мэт харагдсан байх” гэлээ.

Агаарын зайг нисэхэд ашиглах тухай хуулийн 8.1.1-д нислэгийн хөдөлгөөнийг удирдах эрх бүхий байгууллагын зөвшөөрөлгүй нислэг үйлдэхийг агаарын зайн зөрчилд тооцно гэж заажээ.

Улсын нийслэл болон 15 аймаг 209 сум, суурин газруудыг цахилгаан эрчим хүчээр хангаж байдаг “Цахилгаан дамжуулах үндэсний сүлжээ” ТӨХК-ийн 50 жилийн ой өнөөдөр тохиож байна. Ойн ёслолын үйл ажиллагаа “The Corporate” зочид буудлын ёслолын танхимд боллоо. Уг үйл ажиллагаанд Эрчим хүчний яам, тус яамны харъяа төрийн өмчийн аж ахуйн газар, “Цахилгаан дамжуулах үндэсний сүлжээ” ТӨХК-ийн хамтран ажилладаг байгууллагуудын төлөөллүүд хүрэлцэн ирсэн байв.

Ойн үйл ажиллагааны үеэр “Цахилгаан дамжуулах үндэсний сүлжээ” ТӨХК Монгол Улсын Ерөнхийлөгчийн зарлигаар олгодог Хөдөлмөрийн гавьяаны Улаан тугийн одонгоор шагнуулсан нь онцлох үйл явдал байв. Тус шагналыг Монгол Улсын Ерөнхийлөгчийн тамгийн газрын дарга Ц.Баярсайхан компанийн хамт олонд гардуулан “Цахилгаан дамжуулах үндэсний сүлжээ” ТӨХК-ийн хүндэтгэлийн туганд зүүж өглөө.

Мөн Монгол Улсын засгийн газрын гишүүн ЭХЯ-ны сайд П.Ганхүү ёслолын үйл ажиллагаанд хүрэлцэн ирж “Цахилгаан дамжуулах үндэсний сүлжээ” ТӨХК-ийн үе үеийн ажилчдад 50 жилийн ойн баярын мэндийг хүргэж сайн сайхан бүхнийг хүсэж байна. Хөдөлмөрийн гавьяаны улаан тугийн одонгоор шагнасан нь үндэсний хэмжээний компанид төрөөс үзүүлж буй гүн хүндэтгэл хэмээн үзэж байна. “Цахилгаан дамжуулах үндэсний сүлжээ” ТӨХК үүсч хөгжсөний 50 жилийн ой, эрчим хүчний салбар үүсч хөгжсөний 95 жилийн ойтой давхцаж байгаагаар онцлог байна. Тус компанийн хамт олон түүхт ойгоо олон бүтээлч ажлыг өрнүүлэн идэвх санаачлагатай ажиллаж, арвин амжилтаар угтаж байгаад яамны зүгээс талархлаа илэрхийлж байна” хэмээн компанийн хамт олонд хүндэтгэлийн үг хэллээ.

Ц.АНАР

Үндэсний их баяр наадмын тасалбарыг энэ сарын 8, 9-ний өдрүүдэд Нийслэлийн үйлчилгээний нэгдсэн төвийн Дүнжингарав, Драгон, Мишээл, Оргил салбаруудаар худалдаалах гэж байна.

Өнгөрсөн жилүүдэд Соёлын төв өргөө, Бөхийн өргөөний тасалбарын цэгээр худалдаалдаг байсан ч иргэдээс маш их гомдол ирдэг байсан юм. Иймээс энэ жил иргэдэд бухимдал чирэгдэл, урт дараалал үүсгэхгүйн тулд ийм шийдвэр гаргажээ.

Нийслэлийн Засаг даргын Тамгын газрын Санхүү, төрийн сангийн хэлтсийн дарга Э.Ганхүү“Өмнө нь 2 цэгт тасалбар борлуулахад иргэд хонож дугаарлан, бухимдал маш их үүсдэг байсан. Энэ жил Нийслэлийн үйлчилгээний нэгдсэн төвийн 4 салбараар худалдаалснаар иргэд өөрийн амьдарч байгаа дүүргийнхээ нутаг дэвсгэрт ойролцоо цэгээс авах боломж бүрдэнэ.

Иргэдэд илүү хүртээмжтэй байна гэж бид үзэж байна. Мөн тасалбарыг дамалж худалдаалах байдал намжина гэж тооцоолсон. Цэнгэлдэх хүрээлэнгийн суудлын тоо бага. Нийслэлийн иргэд олон учраас бид иргэдэд аль болох хүртээмжтэй байхыг нь бодож өмнөх жилүүдийн адил 1 хүнд 2 тасалбар худалдаална” гэлээ.

Төв цэнгэлдэх хүрээлэн нийт 12 мянга 300 орчим суудалтай. Нийт борлуулах тасалбараас 3,000 гаруй нь жуулчдад зориулсан бол үлдсэн 9,000 гаруй тасалбарыг иргэдэд борлуулах юм байна.

Баяр наадмын тасалбарын үнийн хувьд 7 дугаар сарын 11, 12-ны өдрийн багц тасалбар 16-24 мянган төгрөгийн үнэтэй байх юм гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

“Монголын уул уурхайн бирж” болон “Эрдэнэс Монгол” ХХК хамтран уул уурхайн ханган нийлүүлэлтийн “Miner & Supplier 2017” форумын долоо дахь удаагийн үйл ажиллагааг зохион байгуулж байна.

Энэ удаагийн форум “Хөгжлийн шинэ шатанд шилжье” уриан дор явагдаж байгаа бөгөөд орон нутгийн ханган нийлүүлэгчдийн өрсөлдөх чадварыг дээшлүүлэх, жижиг дунд үйлдвэрийг дэмжих, уул уурхайн компаниуд дэвшилтэт технологи, менежменттэй танилцах, туршлага солилцох зэрэг уул уурхайн компаниудын хамтын ажллагааг дэмжих зорилготой явагдаж байгаа юм байна. Үзэсгэлэнгийн үйл ажиллагаа олон нийтэд нээлттэй явагдаж байгаа бөгөөд “Оюутолгой”, “Эрдэнэс Тавантолгой”, “Эрдэнэт үйлдвэр” зэрэг уул уурхайн томоохон компаниуд оролцож байгаа аж. Уг үйл ажиллагаанд нийт 350 гаруй компаниуд оролцож байгаагаас ханган нийлүүлэлтийн 100 гаруй, уул уурхайн 200 гаруй компаниуд хуралдаж санал бодлоо солилцлоо.

Энэ талаар үйл ажиллагааг зохион байгуулагч “Монголын уул уурхайн бирж” компанийн гүйцэтгэх захирал З.Наранбатаас тодруулахад “Манай энэ удаагийн “Miner & Supplier” буюу уул уурхайн ханган нийлүүлэгчдийн хурал долоо дахь жилдээ зохион байгуулагдаж байгаа бөгөөд энэ удаагийн чуулганыг бид “Эрдэнэс Монгол” компанитай хамтран хоёр дахь удаагаа зохион байгуулж байна. Энэ жилийн хурал орон нутгийн ханган нийлүүлэлтийг дэмжих, үндэсний үйлдвэрлэгчдийн өрсөлдөх чадварыг нэмэгдүүлэх, чадавхижуулах зорилготой явагдаж байгаагаараа онцлог юм. Чуулганаар томоохон Мега төслүүдэд хэрхэн ханган нийлүүлэлтийг хийх болоод эдгээр компаниудтай уулзалт хийн санал бодлоо солилцох зэрэг олон талын мэдээллүүдийг олгодгоороо ханган нийлүүлэгч нарт ихээхэн ач холбогдолтой. Мөн Мега төсөл хэрэгжүүлэгч компаниуд шинэ ханган нийлүүлэгч компаниудтай холбогдож, ханган нийлүүлэгч компаниудад тавигдах стандарт, тусгаж хэрэгжүүлэх санал, зөвлөмжийг өгснөөр харилцан ойлголцож, шийдэх арга замыг тодорхойлох боломжийг энэ үйл ажиллагаагаар дамжуулан хүргэж байгаараа давуу талтай юм” гэсэн мэдээллийг өглөө.

Б.ОДГЭРЭЛ

Засгийн газар өчигдөр хүүхэд бүрт хүүхдийн мөнгө өгнө гэсэн шийдвэр гаргасан. Засгийн газрын хэвлэл мэдээллийн албанаас бүх хүүхдэд мөнгө олгох шийдвэр өнөөдрөөс эхлэн хэрэгжиж эхэлнэ гэж онцолсон юм. Хүүхдийн мөнгө хэзээнээс олгогдох талаар зарим газраас тодрууллаа. Нийгмийн хамгаалал хөдөлмөрийн яаманд Засгийн газрын тогтоол албажиж ирээгүй байгаа аж. Энэ долоо хоногтоо багтаж албажиж ирнэ гэх мэдээллийг эх сурвалж өглөө. Хаан банк болон Хас банкнаас хүүхдийн мөнгөний санхүүжилт орсон эсэхийг тодруулахад ямар ч мэдээлэл ирээгүй гэсэн хариу өгсөн юм. Сүхбаатар дүүргийн наймдугаар хорооны халамжийн мэргэжилтэн Д.Уугансувдаас хүүхдийн мөнгө нөхөж олгох шийдвэрийн талаар лавлахад “Гурван жил тутамд амжиргааны түвшин тогтоох судалгаа явагддаг. Хамгийн сүүлд энэ оны гуравдугаар сарын 31-нээс дөрөвдүгээр сарын 19 хүртэл улс орон даяар явуулсан. Одоогийн байдлаар судалгааны хариу гараагүй байгаа тул хэзээнээс эхэлж мөнгө тараагдах нь тодорхоогүй” гэлээ.

Ц.МИШЭЭЛ

Баяр наадмын өдрүүдэд өглөө 08:00 цагаас орой 22:30 хүртэл нийтийн тээврийн үйлчилгээ үзүүлнэ.

АВТОБУС “ХҮЙ 7 ХУДАГ” РУУ 1,000 ТӨГРӨГӨӨР ИРГЭДЭД ҮЙЛЧИЛНЭ

1. Баяр наадмын өдрүүдэд нийтийн тээврийн үйлчилгээнд үндсэн 87 чиглэлд их багтаамжийн 676, туслах 5 чиглэлд бага багтаамжийн 21, зуслангийн 3 чиглэлд 5 нийт 711 автобус үйлчилгээнд гарна.

2. Долоодугаар сарын 11,12-ны өдрүүдэд Төв цэнгэлдэх хүрээлэн орох наадамчдад зориулж “Мишээл экспо төв” рүү нийт 10 чиглэлийн 62 автобус, “Дүнжингарав худалдааны төв” рүү 24 чиглэлийн 158 автобус үйлчилнэ.

3. “Мишээл экспо төв” болон “Дүнжингарав худалдааны төв”-өөс “Төв цэнгэлдэх хүрээлэн” рүү 20 автобус 4 минут тутамд, Рейлбусын зогсоол буюу “Урбанек”-ын урд талын “Дунд гол”-ын зогсоолоос Төв цэнгэлдэх хүрээлэн” рүү 3 автобус 4 минут тутамд, Хүй 7 худгийн Рейлбусны зогсоол буюу “Давааны зөрлөг”-өөс Морь барианы газар руу 5 автобус 4 минут тутамд тус тус богино эргэлтээр наадамчдад үнэ төлбөргүй үйлчилнэ.

4. Долоодугаар сарын 11, 12-ны өдрүүдэд Гандийн гудамжны автобусны зогсоолоос, долоодугаар сарын 13-ны өдөр хотын төв буюу “МУБИС”-ийн баруун тал буюу “Улаанбаатар зочид буудал”-ын автобусны зогсоолоос 08:00 цагаас 20 их багтаамжийн автобус, 20 минут тутамд, “3, 4-р хороолол”, “7 буудал”, “5 шар”, “ХМК”, “Офицерүүдийн ордон”-ны зогсоолуудаас тус бүр 4 бага багтаамжийн автобус /нийт-20/ “Хүй 7 худаг” руу 1,000 төгрөгийн тарифаар иргэдэд үйлчилнэ

“Дээлтэй Монгол наадам” арга хэмжээ энэ сарын 10-нд болно. Уг арга хэмжээг Нийслэлийн Засаг даргын Тамгын газар, Нийслэлийн Аялал жуулчлалын газар хамтран 11 дэх жилдээ жанжин Д.Сүхбаатарын талбайд зохион байгуулж байгаа юм.

Энэ жилийн наадмаар хамгийн том Хүннү дээлийг дэлгэж үзүүлэх юм. Мөн “Киви” хамтлагийн дуучин Д.Уламбаяр ерөнхий дүр төрх болж, ая дуугаар өргөхөөр болжээ.

Арга хэмжээний үеэр “Монгол костюмс”, “Шилмэл загвар” зэрэг үндэсний хувцасны тэргүүлэх агентлагууд, чөлөөт уран бүтээлчид, үндэсний хувцас урладаг байгууллагууд, ӨМӨЗО-ны Алша аймгийн загвар зохион бүтээгч Шүрнээ нар үндэсний хувцасны коллекцууд танилцуулж уран бүтээлчид ардын урлагийн тоглолт, ёохор хатирах, Хүннүгийн дэвсэх бүжгийг толилуулах аж.

Мөн энэ үеэр нийслэлийн дүүргүүдийн шилдэг үндэсний хувцастай парад алхаж, оролцогчдын дунд сонгон шалгаруулалт явуулж шилдэг зохион байгуулалттай оролцсон дүүрэг, хамгийн сайхан дээлтэй хос, шилдэг үндэсний хувцастай гадаад оролцогч, шилдэг эрэгтэй, эмэгтэй үндэсний хувцастай оролцогч, шилдэг хүүхдүүд, шилдэг байгууллагуудыг шагнаж, үндэсний хувцастай ирсэн хүүхдүүдэд ивээн тэтгэгчийн шагнал гардуулах гэнэ.