Month: July 2017

Хурдан морины салбар хорооноос Үндэсний их баяр наадмын бэлтгэл ажлыг хэрхэн ханган ажиллаж байгаа талаар өнөөдөр мэдээлэл хийлээ. Хэвлэлийн бага хуралд Хурдан морины салбар хорооны орлогч дарга Ж.Болдбаатар, Хурдан морины салбар хорооны нарийн бичгийн дарга Ц.Галбадрах, ХХААХҮЯ-ны Мал аж ахуйн бодлогын хэрэгжилтийг зохицуулах газрын дарга Л.Чой-Иш, Гэр бүл, Хүүхэд залуучуудын хөгжлийн газрын дарга Г.Алтансүх нар оролцов.

Хурдан морины салбар хорооны орлогч дарга Ж.Болдбаатар “Долоодугаар сарын 10-нд хязаалан, шүдлэн насны морьд уралдана. Долоодугаар сарын 11-нд азарга, их нас, долоодугаар сарын 12-нд соёолон, дааганы уралдаан болж зургаан насаа стадионд цоллуулах ажил зохион байгуулагдана. Уяачдын наадам Хүй долоон худагт долоодугаар сарын 13-нд зохион байгуулагдана. Уяачдын наадмаар эрлийз, дээд, дунд, бага насны морьд уралдах төлөвлөгөөтэй ажиллаж байна. Уяачдын бүртгэлийг долоодугаар сарын 9-ний өдөр 08.00 цагаас Хүй долоон худагт хийж эхэлнэ. Зай хугацааны хувьд хуучин зайгаараа уралдах нь зүйтэй юм байна гэж шийдвэрлэсэн байгаа. Үндэсний их баяр наадмын тухай хуульд бөхөөс сэргээшийн шинжилгээ авна гэж заасан байдаг. Уралдсан морьдоос шинжилгээ авна гэж заагаагүй учраас бид хуулийнхаа дагуу ажиллана. Энд дашрамд дуулгахад Үндэсний соёл амралтын хүрээлэн Монголын морин спорт, уяачдын холбоотой хамтран унаач хүүхдүүдийг паркт 5 хүртэлх тоглоом тоглуулах эрхийн бичгээр урамшуулж байгааг хэлье” хэмээлээ.

ХХААХҮЯ-ны мал аж ахуйн бодлогын хэрэгжилтийг зохицуулах газрын дарга Л.Чой-Иш “Эрлийз морьдыг ялгах асуудал яригдаж байгаа. Яг энэ дагуу чиг үүрэг өгөгдөн, ажиллаж байна. Эрлийз морьдыг ялгахдаа биеийн ерөнхий галбир, сэрвээний өндрийг үндсэн үзүүлэлт болгоно. Сэрвээний өндрийг нас насаар нь тодорхой зааж өгсөн байгаа” гэв.

Хурууны хээн цахим бүртгэлээр уралдаанч хүүхдийг бүртгэх учраас заавал уяач, уралдаанч хүүхдийн хамт ирж бүртгүүлэх шаардлагатай

Гэр бүл, Хүүхэд залуучуудын хөгжлийн газрын дарга Г.Алтансүх “Үндэсний их баяр наадмын үед хүүхдийн эрүүл мэнд, аюулгүй байдалд хяналт тавьж, болзошгүй эрсдэлээс урьдчилан сэргийлэх ажлыг зохион байгуулж байна. Жил бүрийн Үндэсний их баяр наадмын арга хэмжээ зохион байгуулах хорооны ажлын хэсэгт орж хүүхдийн эрүүл мэнд, аюулгүй байдалд хяналт тавьж ажиллах чиг үүргийг хэрэгжүүлдэг.

Хүүхдийг болзошгүй эрсдэлээс урьдчилан сэргийлэх зорилгоор Төв цэнгэлдэх хүрээлэн, Хүй долоон худагт эцэг эх, асран хамгаалагчаасаа төөрсөн, наршсан, морь малд дайруулах эрсдэлтэй хүүхдэд урьдчилан сэргийлэх үйлчилгээ үзүүлэх “Хүүхэд хамгаалал-108” гэрийг барьж, долоодугаар сарын 10-13-ны хооронд ажиллана. Уралдаанч хүүхдийг бүртгэл 2017 оны долоодугаар сарын 9-ний өдрөөс эхлэн Хүй долоон худагт явагдана. Энэ жилээс уралдаанч хүүхдийг хурууны хээн цахим бүртгэлээр бүртгэж, эрсдэлийн түвшин тогтоох программд мэдээллийн бааз үүсгэх ажлыг шинээр хийнэ. Хурууны хээн цахим бүртгэлийг нэвтрүүлснээр уралдаанч хүүхэд бүрт дугаар олгогдож, хэдэн наснаас эхлэн хэдэн жил морь унаж байгаа, оролцсон уралдааны мэдээлэл, уяачийн мэдээлэл, гаргасан амжилт, учирсан эрсдлийн мэдээлэл, сургуульд хамрагдалт, үзүүлсэн үйлчилгээ зэрэг бүх мэдээллийг хянах боломжтой болж байгаа юм.

Хурууны хээн цахим бүртгэлээр уралдаанч хүүхдийг бүртгэх учраас заавал уяач, уралдаанч хүүхдийн хамт ирж бүртгэл хийлгэх шаардлагатай. Бүртгүүлэхээр ирэхдээ төрсний гэрчилгээ, эрүүл мэндийн даатгалын дэвтрийн хуулбар, эцэг эх, асран хамгаалагчийн зөвшөөрөл, гэнэтийн ослын даатгалд хамрагдсан баримтыг авч ирэх хэрэгтэй” хэмээн онцлов гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Энэ сарын 7-ны өдөр буюу маргааш Ерөнхийлөгчийн сонгуулийн дахин санал хураалт болно. Тиймээс сонгуулийн үеэр нийтийн тээвэр өглөө 06:30 цагаас явж эхэлнэ. Харин орой 23:00 цаг хүртэл үйлчилгээнд явна. Нийтийн тээврийн үйлчилгээний туслах таван чиглэлд өглөөний 6:30-аас оройн 23:00 цагийн хооронд 21 тээврийн хэрэгслийн хуваарийг ажлын өдрийн даалгавраар тогтоож, дунд багтаамжийн, бага багтаамжийн 12 тээврийн хэрэгсэл явуулна. Нийтийн тээврийн үйлчилгээний зуслангийн гурван чиглэлд өглөөний 6:30-аас оройн 23:00 цагийн хооронд таван тээврийн хэрэгслийн хуваарийг ажлын өдрийн даалгавраар тогтоож, Үүнд: Их багтаамжийн таван автобус. Шөнийн нийтийн тээврийн үйлчилгээний гурван чиглэлд оройн 22:30-аас шөнийн 01:30 цагийн хооронд арван тээврийн хэрэгслийн хуваарийг ажлын өдрийн даалгавраар тогтоож, үүнд: Их багтаамжийн зургаан автобус, дөрвөн троллейбус ажиллуулахаар төлөвлөөд байна.

Нийслэл хотын такси үйлчилгээнд нийт 11 аж ахуйн нэгж, байгууллагын 555 тээврийн хэрэгсэл ажиллахаар төлөвлөгджээ.

Өнөөдөр өдөртөө 25 хэмийн дулаан үүлэрхэг байх бол маргааш буюу долдугаар сарын 7-д цаг агаар өнөөдрийнх шиг байх нь. Сонгуулийн өдөр Улаанбаатар хотод үүлэрхэг бороо орохгүй байх магадлалтай ч баруун болон төвийн аймгуудын зарим нутгаар бороо орно. Харин нөгөөдөр буюу энэ сарын 8-нд ихэнх нутгаар бороо орж салхи түр зуур ширүүснэ. Энэ сарын 10,11-нд өдөртөө 26-27 хэмийн дулаан үүлэрхэг байх ажээ. Харин наадмын сүүлийн өдөр буюу энэ сарын 12-нд ихэнх нутгаар бороо орох магадлалтай. Наадмын үеэр цаг агаар шөнөдөө 12-14 хэмийн дулаан байна.

Г.НАР

Монгол Улсын Ерөнхийлөгчийн сонгууль зургадугаар сарын 26-нд болсон ч хэн нэг нэр дэвшигч нь 50+1 санал аваагүй тул дахин сонгууль болохоор тов гарсан. Ерөнхийлөгчийн сонгуульд Ардчилсан намаас Х.Баттулга, МАН-аас М.Энхболд, МахН-аас С.Ганбаатар нар нэр дэвшсэн. Гэвч хамгийн бага санал авсан С.Ганбаатар сонгуулиас хасагдсан байгаа. Дахин санал хураалт маргааш өглөөний 07.00 цагт эхэлнэ. Саналын ирц хүрэхгүй бол ирц хүрээгүй хэсгүүдэд нөхөн сонгууль явуулна. Тиймээс иргэд саналаа идэвхтэй өгөөрэй.

Эрүүл мэндийн сайд А.Цогцэцэг бүх аймаг, нийслэлийн Эрүүл мэндийн газар, БОЭТ, Төв эмнэлгүүд, тусгай мэргэжлийн төвийн дарга, захирал нарт Улсын баяр наадмын үеэр эмнэлгийн тусламж, үйлчилгээний чанар, аюулгүй болон бэлэн байдлыг хангаж ажиллахыг үүрэг болгож, дараах зөвлөмжийг хүргүүллээ. Үүнд:

Нэг: Зохион байгуулалтын талаар

1.1 Эмнэлгийн яаралтай тусламж, сэхээн амьдруулах, эрчимт эмчилгээний тасаг, нэгжийн ор, хүний нөөц, багаж тоног төхөөрөмж, зайлшгүй шаардлагатай эм тариа, ороох боох материал, цус, цусан бүтээгдэхүүнийн нөөц, унаа, шатахууны бэлэн байдлыг хангах, нөхөн хангалтыг шуурхай хийх;

1.2 Болзошгүй гамшиг, осол, хордлого, үер усны аюул, онцгой байдлын үед ажиллах төлөвлөгөө, ор дэлгэх тооцоо, судалгаа гаргаж, төлөвлөгөөг тодотгох;

1.3 Амралт, баярын өдрүүдэд туршлагатай эмч нарыг нэмэлтээр жижүүрт томилох;

1.4 Баярын өдрүүдэд эмч, эмнэлгийн мэргэжилтэн, үйлчилгээний ажилтан ажпын байрыг орхиж явах, ажлын байранд согтууруулах ундаа хэрэглэх зэрэг зөрчлийг гаргахгүй ажиллах;

1.5 Хариуцлагатай жижүүр хийх, алсын дуудлаганд явах эмч, сувилагч, бусад мэргэжилтэн, туслах ажилтнуудын хуваарийг батлан, хуваарийн дагуу ажиллуулах;

1.6 Эрүүл мэндийн байгууллагууд өдөрт 2 удаа (08.00-16.00 цагийн мэдээг 17.00 цагт, 16.00-08.00 цагийн мэдээг 09.00 цагт) хавсралтад заасан хүснэгтийн дагуу ЭМЯ-ны хариуцлагатай жижүүрт мэдээлж байх;

1.7 Нийтийг хамарсан хордлого, осол гэмтэл, халдварт өвчний дэгдэлт болон эмнэлгийн тусламж, үйлчилгээний ноцтой алдаа, зөрчил гарсан үед хугацаа харгалзахгүй Эрүүл мэндийн яамны хариуцлагатай жижүүрт шууд мэдээлнэ. (Утас- 323002)

Хоёр: Эмнэлгийн тусламж, үйлчилгээний найдвартай тасралтгүй байдлыг хангах талаар

2.1 Эмнэлэг бүр өөрийн үйл ажиллагааны онцлогт тохируулан баярын өдрүүдэд орны ачааллыг зохицуулж, амралтын хугацаанд тухайн эмчлэгч эмч ирж эсвэл тасагт жижүүр хийж байгаа эмч жижүүрийн ахлах эмч зөвшилцөж хөнгөн өвчтнийг эмнэлгээс гаргах;

2.2 Хүндэрсэн өвчтөн, эх, хүүхдэд эмнэлгийн тусламжийг шуурхай үзүүлж, эмч нарын хамтарсан үзлэг, зөвлөгөөнийг хугацаа алдалгүй хийж, эмнэлэг хооронд шилжүүлэх тохиолдолд шилжүүлэх эмнэлэгт урьдчилан мэдэгдэх;

2.3 Эмнэлгийн хүлээн авахаас үйлчлүүлэгчийг буцаах тохиолдолд зөвлөгөө өгч баталгаажуулах;

2.4 Алсын болон ойрын түргэн тусламжийн дуудлаганд явах унааны бүрэн бүтэн байдлыг хангаж, шатахууныг хангалттай хэмжээгээр нөөцлөх;

2.5 Төрөлжсөн мэргэшлийн эмнэлэг, тусгай мэргэжлийн төвөөс зөвлөгөө авах тохиолдолд эхлээд цахимаар зөвлөгөөг авч, шаардлагатай тохиолдолд зөвлөх эмч нарыг орон нутагт ажиллуулах ажлыг шуурхай зохион байгуулах;

2.6 Жирэмсэн, төрөлт, төрсний дараах үеийн хүндрэл, аливаа халдварт өвчний сэжигтэй (хордлого, суулгалт, халууралт…гэх мэт) тохиолдлыг эмнэлэг хооронд шилжүүлэхдээ эмнэлгийн унаагаар хүргэж өгөх эсвэл шилжүүлэх эмнэлгийн унааг (утас 100) дуудаж хүлээлгэж өгч, хүлээн авч хүлээлгэн өгсөн тухайгаа баталгаажуулах;

2.7 Хяналтын хугацаандаа ирж үзүүлээгүй жирэмсэн эмэгтэйчүүдийг баярын өмнө заавал үзэж, зөвлөгөө өгөх;

2.8 Төрөх хугацаа дөхсөн жирэмсэн эмэгтэйг эхийн амрах байранд урьдчилан амраах;

2.9 Жирэмсэн эмэгтэй, бага насны хүүхэд, өндөр настан, хүнд өвчтэй болон хөгжлийн бэрхшээлтэй иргэнийг асран хамгаалах хүнгүйгээр гэртээ орхихгүй байх, шаардлагагүй тохиолдолд олон нийтийн газраар, эмнэлгийн тусламж, үйлчилгээ алслагдсан газарт зорчуулахгүй байх талаар зөвлөгөө өгөх;

2.10 Хоолны хордлого, осол гэмтэл (зам тээврийн осол, хурдан мориноос унах… гэх мэт), наршилт, түлэгдэлт, үер усны аюулаас сэргийлэх мэдээлэл сурталчилгааны ажпыг орон нутгийн хэвлэл мэдээллийн хэрэгслээр тогтмол түгээж, албан байгууллага, аж ахуй нэгжүүдэд өөрсдийн ажилтнуудаа эрсдлээс сэргийлсэн сэрэмжлүүлэг, зөвлөмжийг өгч ажиллана.

Энэ жилийн үндэсний бөхийн барилдааны түрүү бөхийн шагналийн талаар Нийслэлийн Засаг даргын тамгын газар болон Тоёота Моторс /Мөнххада ХХК/ компани хамтран мэдээллээ.

“Үндэсний их баяр наадам-2017”-ын албан ёсны түнш “Тоёота мотор корпораци” сүүлийн дөрвөн жилийн турш түрүү бөхийг шинэ загварын автомашинаар урамшуулж байна. Энэ жил хамгийн өндөр зэрэглэлд тооцогддог “VXR” ангиллын “Ланд круйзуер-200” автомашиныг түрүүлсэн бөхөд бай шагнал болгон гардуулахаар болжээ.

“Тоёота Мотор” Корпорацийн Төлөөлөгчийн газрын захирал Цүёши Аваи “Юуны өмнө үндэсний их баяр наадмаа тэмдэглэх гэж буй та бүхэнд баяр хүргэе. Тоёота мотор корпораци нь улсын баяр наадмыг дэмжиж, түнш болж дөрөв дэх жилээ угтаж байна. Биднийг дэмжин ажилладаг та бүхэнд баярлалаа” хэмээн хэлсэн юм.

Түрүү бөхийн шагналыг долдугаар сарын 13-ны өдрийн 11:30 цагаас төв талбайд Нийслэлийн засаг дарга С.Батболд, “Тоёота моторс” корпорацийн Ерөнхий менежер Күрокава Сэйжи нар хамтран гардуулан өгөх юм.

Цаг уурын байгууллагаас ирүүлсэн мэдээгээр 07 дугаар сарын 06, 07-ны өдөр төв, говийн аймгуудын зарим газар, зүүн аймгуудын нутгаар дуу цахилгаантай усархаг аадар бороо орохоор байна.

Түүнчлэн хэт халуун өдрүүд үргэлжилж байгаа тул ард иргэд амралт чөлөөт цагаараа гол устай газар бараадаж, анхаарал болгоомж алдан усанд осолдох эрсдэлийг дагуулж байна. Тиймээс өнөөдөр Онцгой байдлын ерөнхий газраас хэвлэлийн бага хурал зарлаж, цаг үеийн асуудлаар мэдээлэл хийлээ.

Хэвлэлийн бага хуралд ОБЕГ-ын Гамшгаас урьдчилан сэргийлэх газрын дарга, онцгой байдлын хурандаа Б.Ууганбаяр, Гамшгийн шуурхай удирдлагын газрын дарга, онцгой байдлын хурандаа Б.Мандахгэрэл, Гал түймэртэй тэмцэх газрын мэргэжилтэн, ахмад С.Галтзул нар оролцсон юм.

Өнөөдрийн байдлаар гол, мөрөн, нуур, цэвэр, бохир усны шугам, тогтоол ус, худгийн ус зэрэгт 13 аймгийн 31 сум, нийслэлийн 4 дүүрэгт 58 хүн амь насаа алдсаны 12 нь бага насны хүүхэд байна.

Бага насны хүүхдийг гол, усны орчим орхиод эцэг эхчүүд архидан согтуурдаг, хүүхэд, залуучууд сэрүүцэх болон тоглох зорилгоор ус руу ордог, гол, усанд орох үедээ согтууруулах ундаа хэрэглэж өөрийгөө болон бусдыг хянах чадвараа алддаг зэрэг олон шалтгааны улмаас усанд осолдох, амь насаа алдах тохиолдол сүүлийн өдрүүдэд нэмэгдэх хандлагатай байна.

Усны ослоор амь насаа алдсан иргэдийн тоог өнгөрсөн оны мөн үетэй харьцуулахад 31-ээр буюу хоёр дахин өссөн үзүүлэлттэй байгаа юм.

Түүнчлэн Үндэсний их баяр наадмаар олон хоног амралтын өдрүүд тохиох тул иргэд, аж ахуйн нэгж байгууллага, хамт олон амралт, чөлөөт цагаа өнгөрүүлэхдээ гол, усны ойролцоо амарч зугаалахгүй байх, бага насны хүүхдэд тавих хараа, хяналтаа сайжруулах, голын эрэг дагуу хүүхдийг явуулахгүй, тоглуулахгүй байх, тээврийн хэрэгслийн жолооч нар баталгаатай зам, гүүрээр зорчиж гол усанд унах, осолдох эрсдэлээс урьдчилан сэргийлэхийг онцгойлон анхааруулж байна.

ОЙ, ХЭЭРИЙН ГАЛ ТҮЙМРИЙН НӨХЦӨЛ БАЙДЛЫН ТАЛААР

Улсын хэмжээнд 2017 оны 07 дугаар сарын 06-ны өдрийн байдлаар нийслэл Улаанбаатар хотод 16 удаа, Архангай, Баян-Өлгий, Булган, Дорнод, Завхан, Сүхбаатар, Сэлэнгэ, Төв, Ховд, Хөвсгөл, Хэнтий аймгийн 51 суманд119 удаа, нийт 135 удаагийн ой, хээрийн гал түймэр гарч /урьдчилсан байдлаар/ 38821.3 га ой, 27687 га хээр, нийт 66508,3 га талбай түймэрт өртсөн байна. Үүнийг өнгөрсөн оны мөн үетэй харьцуулахад гарсан түймрийн тоо 33-аар буюу 30 хувиар өссөн, шатлагад өртсөн ойн талбай 17478 га буюу 81 хувиар өссөн, хээрийн талбай 507349 га буюу 1 дахин буурсан үзүүлэлттэй байна.

135 удаагийн эдгээр гал түймрийг унтраахад /давхардсан тоогоор/ Онцгой байдлын байгууллагаас 2225 албан хаагч, 240 автомашин, Хилийн цэргийн анги, байгууллагаас 203 албан хаагч, 13 автомашин, Зэвсэгт хүчний анги, байгууллагаас 388 албан хаагч, 22 автомашин, Цагдаагийн байгууллагаас 36 албан хаагч, 2 автомашин, орон нутгаас 3406 иргэн, 360 автомашин, 55 мотоцикль тус тус дайчлагдан нийт 6258 хүн, 637 автомашин, 55 мотоцикль, техник хэрэгсэл, 161 морьтойгоор ажилласан.

Өнөөдрийн байдлаар:

Цурманд оруулсан: Сэлэнгэ аймаг Ерөө суманд 1 түймэр, Дорнод аймгийн Баян-Уул суманд 1, нийт 2 түймрийг цурманд оруулсан.

Асаж байгаа: Сэлэнгэ аймгийн Ерөө суманд 2 түймэр асаж байгаа байдалтай байна.

Дээрх түймрүүд дээр онцгой байдлын байгууллагаас 40 алба хаагч, 4 автомашин, орон нутгаас 56 иргэн, 8 автомашин нийт 96 хүн, 1 нисдэг тэрэг, 12 автомашин ажиллаж байна гэж Онцгой байдлын ерөнхий газраас мэдээллээ.

Монгол Улсын Ерөнхийлөгчийн зарлигаар өнөөдөр ОХУ-ын иргэн Нина Санджариковна Уланова, Цырендаши Эрдынеевич Доржиев, Ооржак Ошку-Саар Аракчаевна, Комбу Алдын-Кыс Чамзырыновна, БНХАУ-ын иргэн Чи Булаг, Дашдонровын Баярбаатар нарыг Алтангадас одонгоор шагнажээ.

Мөн бидний сайн мэдэх БНХАУ-ын иргэн, дуучин Тэнгэр хүндэтгэх шалтгаанаар ирж амжаагүй байна. ОХУ-ын Батлан хамгаалахын сайд Сергей Шойгуг шагнахаар болсон гэнэ. Тус улсын хувьд төр, засгийн өндөр албан тушаалтан гадаадын төр, засгаас шагнал хүртэхдээ дээд байгууллагаасаа зөвшөөрөл авдаг ёс байдаг юм байна. Энэ зөвшөөрөл ирэхэд шагнана гэдгээ илэрхийлсэн ажээ.