Month: June 2017

Улсын нийслэл Улаанбаатар хотын төв талбайд хүүхэд багачуудын дуу хуур, инээд хөөр цалгиж байна.

1951 онд Олон улсын ардчилсан эмэгтэйчүүдийн холбооноос хүүхдийн эрхийг хамгаалах өдрийг улс орон бүр тодорхой өдөр тэмдэглэж, хүүхэд багачуудаа баярлуулж байхаар шийдвэрлэсэн байдаг. Монгол Улс 1952 оноос эхлэн 6 дугаар сарын 1-ний өдрийг “Хүүхдийн баяр”-ын өдөр болгон тэмдэглэж ирсэн түүхтэй. Энэ жил манай улс Олон улсын хүүхдийн эрхийг хамгаалах өдрийг 65 дахь жилдээ тэмдэглэн өнгөрүүлж байна.

Өнөөдөр Нийслэлийн Засаг даргын Тамгын газраас Олон улсын хүүхдийн эрхийг хамгаалах өдрийн “Монгол хүүхдүүд” арга хэмжээг Д.Сүхбаатарын нэрэмжит төв талбайд зохион байгуулж байна. Баярын арга хэмжээнд Монгол Улсын Шадар сайд У.Хүрэлсүх, УИХ-ын гишүүн Б.Саранчимэг, НИТХ-ын дарга Ц.Сандуй, Нийслэлийн Засаг дарга бөгөөд Улаанбаатар хотын захирагч С.Батболд, Нийслэлийн Засаг даргын орлогч Д.Энхтөр, Ш.Анхмаа, НЗДТГ-ын дарга М.Отгонбаяр нар оролцлоо.

Нийслэлийн хүүхэд багачууд, үлгэрийн баатруудын сүрт жагсаал төв талбайд жагсан орж ирснээр баярын арга хэмжээ эхэллээ. Мөн хүндэтгэлийн тоглолт, нийслэлийн дүүргүүдийн соёлын ордон, ерөнхий боловсролын сургуулийн дугуйлангийн сурагчдын тоглолт, Засгийн газрын хэрэгжүүлэгч агентлаг Гэр бүл, хүүхэд залуучуудын хөгжлийн газар, Нийслэлийн Хүүхэд, гэр бүл хөгжлийн газрын танилцуулга тоглолт зэрэг болж байна. Энэ жил Монгол Улсын Засгийн газар “Хүүхдийн эрхийг хамгаалах хууль”-ийн баталж, хүүхдийн амьдрах, сурч хүмүүжих эрх зүйн орчныг бүрдүүлж чадсаныг Шадар сайд У.Хүрэлсүх онцоллоо. Түүнчлэн “Залуучуудын тухай хууль”-ийг мөн баталж, хүүхэд залуусын хөгжлийн төлөө цогц бодлогыг бий бодлогыг бий болгосныг УИХ-ын гишүүн Б.Саранчимэг хэлсэн юм.

НИТХ-ын дарга Ц.Сандуй хэлэхдээ “Өнөөдөр хүүхэд багачууд юу хүсч, юу бодож байгааг хамтдаа сонсож, түүнийг бид хүүхдийн төлөө хийх бодлогодоо тусгах шаардлага байна. “Аз жаргалтай хот” мөрийн хөтөлбөрийн хамгийн том байр суурийг хүүхдүүд эзэлж байгаа. “Аз жаргалтай үрс” хөтөлбөрийг бид дэвгүүлсэн. Хүүхдүүд сурч боловсрох эрхээр хангагдах ёстой. Сургууль завсардах, цэцэрлэг хүрэлцээгүй гээд олон асуудал бий. Ирэх 4 жилд бид Улаанбаатар хотын бүх хороонд сургууль, цэцэрлэгийн асуудлыг бүрэн шийдэхээр төлөвлөж байна.” хэмээгээд хүүхэд багачууддаа баярын мэнд хүргэлээ.

Нийслэлийн Засаг дарга бөгөөд Улаанбаатар хотын Захирагч, нийслэлийн Хүүхдийн төлөө зөвлөлийн тэргүүн С.Батболд монголын бүх хүүхэд багачууддаа баярын мэнд хүргэж, хамгийн сайн сайхан бүхнийг хүслээ. “Миний хувьд ч хүүхдийн баяр бол хамгийн сайхан дурсгалтай баяр байсаар ирсэн. Нийслэлийн төр, захиргааны байгууллагын зүгээс хотоо “Аз жаргалтай Улаанбаатар” болгох зорилт тавьж, хүүхдэд ээлтэй орчин бүрдүүлэхийн төлөө ажиллаж байна. Хотын даргын тухайд Нийслэлийн хүүхдийн төлөө зөвлөлийн даргын албыг хашдаг. Тийм ч учраас хүүхдүлүд сурч боловсрох, эцэг эх, сурган хүмүүжүүлэгчтэйгээ нягт хамтран ажилладаг орчныг бүрдүүлэхийн төлөө чармайн ажиллаж байна. Засаг даргын мөрийн хөтөлбөртөө цэцэрлэг, сургуулийн хүртээмжийг нэмэгдүүлэхийн зэрэгцээ аюулгүй, хүүхдэд ээлтэй орчныг бүрдүүлэх ажлуудыг тусган хэрэгжүүлж эхэлсэн.” хэмээлээ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Олон улсын хүүхдийн эрхийг хамгаалах өдрийн баярын нэгдсэн арга хэмжээ Чингис хааны нэрэмжит талбайд болж байна. Эцэг, эхчүүд хүүхдүүдээ хоолны хордлого зэрэг гэнэтийн осол эндэгдэлд өртөхөөс урьдчилан сэргийлэх үүднээс дараах зөвлөмжийг хүргэж байна.

Хоол хүнсийг худалдаж авахдаа сонголтыг зөв хийх:

Хүнсний бүтээгдэхүүний хадгалалт, тээвэрлэлтийн горим баримталдаг дэлгүүр, үйлчилгээний газраас хүнсний бүтээгдэхүүнийг худалдан авах.

Хүнсний бүтээгдэхүүний үйлдвэрлэсэн он, сар, өдөр, хэрэглэх хугацаа, хадгалалтын нөхцөл зэргийг харж, мэддэг байх.

Лаазалсан хүнс хонхойж цөмөрсөн, ан цав үүссэн бол худалдаж авахгүй байх.

Өндөг, өндгөн бүтээгдэхүүн, майонез, мөхөөлдөс, кремтэй бялуу, жигнэмэгийг хөргөгч, хөргүүртэй газраас худалдан авах.

Хувь хүний гар дээрээс ил задгай газар, чанаргүй, баталгаагүй, хариуцлага хүлээх чадваргүй, эргэн холбогдох боломжгүй нөхцөлд үйлдвэрлэгдэж, худалдаалагдаж буй хүнсний бүтээгдэхүүн худалдан авахгүй байх

Хоолны хордлогот халдвараас сэргийлэх:

Хүнсний бүтээгдэхүүний хадгалалтанд анхаарах

Хоол хүнсийг бэлтгэх, хэрэглэх зөв дадал эзэмших

Осол гэмтлээс сэргийлэх

Голын усанд унаж живэхээс сэргийлэх

Наршилтаас сэргийлж малгай нимгэн хувцас өмсгөх, ус сайн өгөх

Унадаг дугуй, дугуйт тэшүүр, дугуйт самбар зэрэг аюултай тоглоомоор насны онцлог харгалзан аюулгүй байдлыг ханган тоглуулах

Бага насны хүүхдийг гэртээ болон гудамж талбайд хараа хяналтгүйгээр ганцааранг нь орхихгүй байх,

Өнөөдөр Олон Улсын хүүхдийн эрхийг хамгаалах өдөр тохиож байгаа билээ.

Уг өдөр Монголын Үндэсний музей жил бүр сонирхолтой арга хэмжээ болон үйл ажиллагааг музей үзэхээр ирсэн бяцхан үзэгчиддээ зориулан зохион байгуулдаг билээ.

Энэ жилийн Хүүхдийн эрхийг хамгаалах өдрөөр Монголын Үндэсний музей цагийн хуваарийн дагуу ажиллах бөгөөд “Баатрууд”, “Алтан титэм” музейн боловсролын хөтөлбөрүүдэд үзэгч хүүхдүүддээ үнэ төлбөргүй хамруулахаар бэлджээ.

Зам, тээврийн хөгжлийн сайд Д.Ганбат ХБНГУ-ын Лайпциг хотод зохион байгуулагдаж буй “Олон улсын тээврийн форум”-д оролцож байна. Энэхүү форумын үеэр БНХАУ-ын Тээврийн сайд Ли Шао мин тэргүүтэй төлөөлөгчидтэй уулзаж, санал солилцлоо. Уулзалтаар хоёр улсын хамтын ажиллагаа, Монгол Улсын зам, тээврийн салбарт хэрэгжүүлэх томоохон төсөл хөтөлбөрүүд болон Бээжин хотод өнгөрсөн сард зохион байгуулсан “Бүс ба зам” чуулганаар хэлэлцсэн асуудлууд зэрэг хамтран шийдвэрлэх олон чухал асуудлаар санал солилцов.

Сайд Д.Ганбат уулзалтын эхэнд БНХАУ-ын санаачлан зохион байгуулсан “Бүс ба зам” олон улсын хамтын ажиллагааны дээд түвшний чуулга уулзалтыг Хятадын тал амжилттай зохион байгуулсанд баяр хүргэж, бүс нутгийн хамтын ажиллагааны шинэ үеийг эхлүүлж, олон талт хамтын ажиллагаанд онцгой хувь нэмэр оруулсныг цохон тэмдэглэв. Тэрээр “Бүс ба зам” санаачилга болон Оросын Евразийн эдийн засгийн холбоог Монголын талын дэвшүүлсэн “Хөгжлийн зам” хөтөлбөртэй уялдуулах мөн Монгол-Хятад-Оросын эдийн засгийн коридор байгуулах хөтөлбөрт тусгагдсан гурван улсыг холбох тээврийн сүлжээ, худалдааг хөгжүүлэх төслүүдийг яаралтай эхлүүлж идэвхтэй хамтран ажиллах саналтай байгаагаа илэрхийллээ.
Зам, тээврийн хөгжлийн яам нь энэхүү хөтөлбөрийн жагсаалтад орсон Зүүн коридорын эхний хэсэг болох Хөөт-Бичигт чиглэлийн төмөр замын болон Азийн авто замын сүлжээний АН-3 чиглэлийн авто замыг хэсэгчлэн шинэчлэх хүрээнд эхний ээлжинд Улаанбаатар-Дархан чиглэлийн авто замын төслүүдийн бүтээн байгуулалтын ажлыг удахгүй эхлүүлэх талаараа сайд Д.Ганбат дуулгалаа.
Мөн БНХАУ-ын дарга Си Жинь пин 2014 онд Монгол Улсад айлчлах үеэр хоёр улсын хооронд иж бүрэн стратегийн түншлэлийн харилцааг хөгжүүлэхээр тохиролцсон нь харилцаа хамтын ажиллагаа шинэ түвшинд гарч, хоёр улсын тээврийн салбар тэр дундаа төмөр замын салбарт чухал баримт бичгүүдийг байгуулах боломж бүрдсэнийг тэрээр онцлов.

Зам, тээврийн хөгжлийн яам хилийн боомтуудын холболтын цэгийн асуудлаар Хятадын талтай үе шаттайгаар олон уулзалт зохион байгуулсны үндсэн дээр хоёр тал тохиролцоонд хүрч чадсан. Иймд 2004 оны Монгол, Хятадын хилийн боомтын хэлэлцээрт нэмэлт өөрчлөлт оруулах ингэснээр Монгол-Хятадын хилийн төмөр замын хэлэлцээрийг шинэчлэн байгуулснаар төмөр замын бүтээн байгуулалтууд, автотээврийн харилцаа улам өргөжих, хууль эрхзүйн хувьд баталгаажих боломжтой гэдгийг хэллээ.
БНХАУ-ын агаарын тээврийн дотоодын нислэгийг Монгол Улсын агаарын орон зайгаар дамжин өнгөрөх асуудал шийдэгдэж, хоёр талын хамтын ажиллагааны хүрээнд шинэ дэвшил болсон. Цаашид хоёр улсын агаарын орон зайн ашиглалтыг улам сайжруулах хүрээнд дамжин өнгөрөх нислэгийн тоо, хоёр улсын хоорондын агаарын хаалганы тоог нэмэгдүүлэх чиглэлээр идэвхтэй ажиллах тал дээр сайд нар санал нэгдсэн юм.
Уулзалтын үеэр БНХАУ-ын Тээврийн сайд Ли Шао мин хэлэхдээ Монгол Улсын Засгийн газар болон Зам, тээврийн хөгжлийн яамнаас хоёр улсын зам, тээврийн салбарын хамтын ажиллагааг өргөжүүлэн хөгжүүлэхэд идэвх санаачлагатай ажиллаж байгаад талархаж байгаагаа илэрхийлээд энэ нь Монгол, Хятад хоёр улсын найрсаг хамтын ажиллагаанд ихээхэн чухал ач холбогдолтойг онцоллоо.

Олон улсын хүүхдийн эрхийг хамгаалах өдөр нийслэлийн иргэдийн аюулгүй байдлыг хангах, халаасны хулгай болон бусад төрлийн гэмт хэрэгтэй тэмцэх, бага насны хүүхэд эцэг эх, асран хамгаалагчаасаа төөрөхөөс урьдчилан сэргийлэх зорилгоор Нийслэлийн цагдаагийн газар, харьяа дүүрэг дэх цагдаагийн хэлтсийн 930 гаруй алба хаагчид ажиллаж байна.Тэд иргэд олноор цуглардаг Сүхбаатарын талбай, Үндэсний соёл амралтын хүрээлэн, Цэцэрлэгт хүрээлэн, Цэрэндоржийн гудамж, Туул голын эрэг, зуслангийн чиглэлд автомашин, явган болон морьт эргүүлийн үүрэг гүйцэтгэж байгаа юм.Мөн Нийслэлийн мэргэжлийн хяналтын газар, дүүргийн Хүнс, худалдаа үйлчилгээний хэлтэстэй хамтран гар дээрээс зөвшөөрөлгүй худалдаа үйлчилгээ үзүүлж буй иргэдийн үйл ажиллагаанд хяналт тавин ажиллаж байна.

Гэрэл зургийг С.ГЭРЭЛТ-ОД