Month: June 2017

“Буянт-УхааII” хороолол дахь 240 хүүхдийн цэцэрлэгийн барилгыг улсын комисс хүлээж авсан ч “Улс худалдан аваагүй” гэсэн шалтгаанаар нэг жил гаруй хугацааг үдсэн билээ. Тус хорооллыг бага, дунд орлоготой иргэдийг орон сууцаар хангах Засгийн газрын зорилтот хөтөлбөрийн хүрээнд Төрийн орон сууцны корпорацийн захиалгаар Монгол Улсын Хөгжлийн банкны санхүүжилтээр Хан-Уул дүүргийн X хорооны нутаг дэвсгэрт барьж байгуулсан юм. Харин өнөөдөр 240 хүүхэд хүлээн авах хүчин чадалтай цэцэрлэгийн нээлтийн ёслол болов. Ёслолд УИХ-ын гишүүн Б.Энх-Амгалан, Хан-Уул дүүргийн Засаг дарга Ж.Алдаржавхлан, ИТХ-ын дарга Б.Цэрэн, X хорооны Засаг дарга Ц.Чинзориг, ТОСК-ийн ерөнхий захирал Ж.Хичээнгүй нар хүрэлцэн ирж, тууз хайчиллаа. Одоогоор Буянт-Ухаа II хорооллын эхний ээлж болох 1620 айлын орон сууцанд оршин суугчид аж төрж байна.

Хан-Уул дүүргийн иргэдийг УИХ-д төлөөлж буй УИХ-ын гишүүн Б.Энх-Амгалан “Хан-Уул дүүргийн сургууль, цэцэрлэг, эмнэлэгийн тусламж үйлчилгээнд анхаарал хандуулж байгаа” гэдгээ онцолсон. Цаашдаа сургууль, цэцэрлэгийн цогцолбор баригдах төлөвлөгөө бий гэнэ.

Оршин суугчид цэцэрлэгийн барилгыг ашиглалтад оруулахаар маш их хөөцөлдөж, олон хүнд хандсан гэдгийг Засаг дарга Ж.Алдаржавхлан ярьж байна лээ. Тус хороололд өнөөдрийн байдлаар цэцэрлэгийн насны 800 гаруй хүүхэд байгааг ёслолд оролцсон албаны хүмүүс онцолсон. Цэцэрлэгийн нээлтэд хүүхдээ хөтлөөд ирсэн ээж, аав нар “Хэзээ хүүхдээ бүртгэж авах вэ” гэж хамгийн их асууж лавлацгааж байлаа.

Төрийн орон сууцны корпорацийн ерөнхий захирал Ж.Хичээнгүйгээс зарим асуултад хариу авлаа.

-Буян-УхааII хорооллын цэцэрлэг ашиглалтад орж чадахгүй жил гаруй хугацаа өнгөрсөн. Одоо санхүүжилтийн асуудал шийдэгдсэн үү?

-ТОСК цэцэрлэгийг барьж байгуулах санхүүгийн асуудлыг шийдвэрлэсэн. Нэг жил гаруй хугацаанд үйл ажиллагаагаа эхлүүлж чадалгүй зогссон. Хөгжлийн банкны эх үүсвэр хэрхэн эргэн төлөгдөх вэ гэдэгт асуудал байсан юм. Хөгжлийн банк, Сангийн яам, Төрийн өмчийн бодлого зохицуулалтын хороотой хамтраад санхүүгийн асуудлыг шийдсэн.

-Оршин суугчдын хувьд нэмж цэцэрлэг барих эсэх, сургуулийн барилга хэзээ босох бол гэсэн хүлээлттэй байгаа. Энэ талаар ямар төлөвлөгөөтэй байгаа вэ?

-Буянт-УхааII хорооллын эхний хэсэг ашиглалтанд орсон байгаа. Ирэх онд бид Буянт-УхааII хорооллын хоёр төсөл эхлүүлэхээр гэрээ, төслийн хэмжээнд яригдаад явж байна. Ирэх онд нэмээд хоёр цэцэрлэг, 500 хүүхдийн сургууль баригдах болно. Маш олон оршин суугчидтай хороолол учраас нийгмийн дэд бүтцийг шийдэх хэрэгтэй байна.

-Орон нутагт ТОСК мянган айлын орон сууц барих ажлын явц ямар байгаа вэ?

– Аймаг бүрд 1000 айлын орон сууц төлөвлөсөн. Эхний ээлжийн 120-200 айлын орон сууц ерөнхийдөө баригдаад эхэлсэн. Бид цаашдаа энэ тоог нэмэхээр судалж байна. Аймгуудад эрэлт байна. Худалдан авах чадварыг нийлүүлэлттэй уялдуулан ажиллах юм. Мөн Яармагийн дэнжид “Эко Яармаг” хорооллыг барьж байгуулахаар барилга угсралтын ажил эхлүүлэх хөрөнгө оруулалтын асуудал яригдаж байна.

-Хараахан дуусгаагүй байгаа 18 барилгын ажил бий. Бага, дунд орлоготой иргэдийн хувьд энэ орон сууцнуудыг ашиглалтад орохыг хүлээж байгаа. Энэ орон сууцнууд хэзээ баригдаж дуусах вэ?

-Бид хөрөнгийн асуудлыг шийдвэрлэхээр шамдан ажиллаж байна. Хөрөнгийн асуудал шийдэгдвэл энэ жилдээ ашиглалтад ороод, бага дунд орлоготой иргэдэд ипотекийн зээл, түрээсийн орон сууц, худалдан борлуулах нээлттэй схемүүдийг хэрэглэж хүрэх боломжтой гэв.

Шинэхэн цэцэрлэг есдүгээр сарын 1-нээс хүүхдүүдээ авч эхлэх юм байна.

Монгол улсын нийслэл Улаанбаатар хотыг “Зүүн хойд Азийн бизнес, аялал жуулчлал, соёл, санхүүгийн төв” болгох зорилтын хүрээнд жуулчдад зориулсан таатай, аюулгүй орчин нөхцөл бий болгох зорилгоор Сүхбаатар дүүргийн 3, 4 дүгээр хорооны нутаг дэвсгэр, Сөүлийн гудамжинд хэрэгжиж буй “Шөнийн гудамж” төслийн хүрээнд асраар үйлчилгээ эрхлэх-4, зориулалтын бусад түр байгууламжаар хоол үйлдвэрлэл үйлчилгээ эрхлэх-4 аж ахуйн нэгжийг сонгон шалгаруулна.

Тавигдах шаардлага:

1. Согтууруулах ундаагаар үйлчлэх тусгай зөвшөөрөлтэй байх;
2. Стандартын шаардлага хангасан үйлчилгээний зориулалтын ажлын байртай байх;
3. Дүүргийн Засаг даргын Тамгын газартай “Худалдаа, үйлчилгээ эрхлэх гэрээ” байгуулсан байх;
4. Мэргэжлийн хяналтын байгууллагын мэдээллийн санд бүртгүүлж, “Хоолны газрын ангилал, зэрэглэл, үндсэн шаардлага MNS4946:2005” стандартын шаардлагыг 90-ээс дээш хувь хангасан байх;
5. Мэргэжлийн тогооч, ажиллагсадтай байх;
6. Хүнсний түүхий эд, бүтээгдэхүүний чанар, аюулгүй байдлыг мэргэжлийн хяналтын лабораториор тогтмол баталгаажуулдаг байх;
7. Үйлчилгээ эрхлэх асар болон бусад түр байгууламжийн дизайны болон тохижилтын шийдлийг төсөвлөсөн байх /гудамжны өнгө төрхөд нийцсэн загварын шийдэлтэй, гэрлэн чимэглэлтэй байх/; асрын хэмжээ 3*3 байх;
8. Хоолны үйлчилгээнд шаардагдах Монгол улсын MNS 5083:2001 стандартын шаардлага хангасан шингэрүүлсэн нефтийн хийг ашиглахдаа аюулгүй ажиллагааг ханган зориулалтын зөөлөн холбоосоор холбох
9. Шаардлага хангасан галын хор, гал унтраагуурыг бэлтгэсэн байх.

Бүрдүүлэх баримт бичиг:

1. Хүсэлт /албан бичиг/;
2. Үйлчилгээний байрны үл хөдлөх хөрөнгийн гэрчилгээ /хуулбар/;
3. Согтууруулах ундаагаар үйлчлэх тусгай зөвшөөрөл /хуулбар/;
4. Дүүргийн Засаг даргын Тамгын газартай байгуулсан “Худалдаа, үйлчилгээ эрхлэх гэрээ” /хуулбар/;
5. Мэргэжлийн хяналтын байгууллагын мэдээллийн санд бүртгүүлсэн тодорхойлолт;
6. Мэргэжлийн тогоочийн үнэмлэх /хуулбар/;
7. Үйлчилгээнд гаргах хоолны цэс, технологийн карт, хоол, зууш, ундааны танилцуулга, өнгөт зураг;

Эдгээр шаардлагыг хангасан аж ахуйн нэгж холбогдох баримт бичгийг бүрдүүлж 2017 оны 06 дугаар сарын 28-ны дотор Улаанбаатар хотын Захирагчийн ажлын албанд ирүүлнэ үү гэж Улаанбаатар хотын захирагчийн ажлын албанаас мэдээллээ.

Асраар болон явуулын цэгээр хоол үйлдвэрлэл үйлчилгээ эрхлэх загвар:

Дулаанхааны дөрвөн замын уулзвар-Ерөө-Хүдэр чиглэлийн эхний ээлжийн 65 км хатуу хучилттай авто замыг өнөөдөр барьж ашиглалтад орууллаа.

Дархан-Сэлэнгийн бүсэд орших төрийн эзэмшлийн төмрийн хүдрийн орд газруудыг ашиглан, эдийн засгийн эргэлтэд оруулах, “Дарханы Төмөрлөгийн Үйлдвэр” ТӨХК-ийн үйл ажиллагааг өргөтгөн техник, технологийн шинэчлэл хийж, үйлдвэрийн хүчин чадлыг нэмэгдүүлэх зорилгоор “Уул уурхай, металлургийн цогцолбор байгуулах төсөл”-ийг концессын гэрээгээр хэрэгжүүлж байгаа юм байна.

Уг концессын гэрээний хүрээнд зам, тээврийн салбарын хоёр төслийг хэрэгжүүлэхээр тусгасан. Энэхүү хоёр төслийн нэг болох Сэлэнгэ аймгийн Хүдэр суманд орших Төмөртэй ордоос Ерөө суманд байрлаж буй “Болд Төмөр Ерөө Гол” ХХК-ийн төмөр замын Хандгайт өртөө хүртэлх 33.4 км төмөр замыг ачиж буулгах терминалын хамт барьж, өнгөрсөн оны 12 сард ашиглалтад оруулсан.

Төмөртэйн төмрийн хүдрийн ордыг Дархан-Сэлэнгэ чиглэлийн улсын чанартай авто замтай холбох “Дулаанхааны дөрвөн замын уулзвар–Ерөө сум–Хүдэр сум чиглэлийн 95 км хатуу хучилттай авто замын төсөл”-ийг амжилттай хэрэгжүүлж буйг Зам, тээврийн сайд Д.Ганбат онцолсон юм.

Гүйцэтгэгчээр “Пик девелопмент” ХХК ажиллаж байгаа бөгөөд үлдэж буй 30 км хатуу хучилттай авто замын далан, суурь, хиймэл байгууламжийн ажил бүрэн дуусаж, хучилтын ажил хийгдэж байгаа ба гэрээний дагуу энэ оны 11 дүгээр сард ашиглалтад оруулах гэнэ.

Тус чиглэлийн хатуу хучилттай авто зам ашиглалтад орсноор уул уурхай, металлургийн төсөлд дэмжлэг үзүүлэхээс гадна Сэлэнгэ аймаг түүний дотор Ерөө, Хүдэр сумын ард иргэд аюулгүй, түргэн шуурхай зорчих боломж бүрдэнэ.

Түүнчлэн энэ бүс нутгийг зорих гадаад, дотоодын жуулчдын тоо нэмэгдэж, ард иргэдийн амьдрал ахуй, цаашлаад орон нутаг болон бүс нутгийн нийгэм, эдийн засгийн хөгжилд чухал ач холбогдолтой юм.

Эх сурвалж: ЗТХЯ

Бүгд найрамдах Итали улсад суугаа Элчин сайд Ц.Жамбалдорж тус улсын Наполи хотын Дорно дахины их сургуулийн Ректорын урилгаар зургаадугаар сарын 21-ний өдөр тус их сургуульд зочилжээ.

Элчин сайд их сургуулийн проректор профессор Жоржиo Банти, Ази судлалын тэнхимийн эрхлэгч профессор Микеле Бернардини, тэнхимийн профессор Донателла Гуида нартай уулзаж ярилцсан байна. Профессор Ж.Банти өөрийн их сургуулийн түүхийг Элчин сайдад танилцуулж, дэлхийн 100 орчим орны их сургуультай хамтын ажиллагааны гэрээтэй ажилладаг тус их сургууль нь өнгөрсөн онд МУИС-тай Хамтын ажиллагааны Санамж бичиг байгуулж, оюутан, багш, профессорын солилцооны талаар тохирсон тухай сонирхуулжээ.

Тус их сургууль нь дэлхийн 80 гаруй гадаад хэл заадаг, Европт төдийгүй дэлхийд томоохонд тооцогддог гадаад хэл, олон улс судлалын төв бөгөөд 1980-аад онд Монгол, Түвд судлалын чиглэлээр ажиллаж байгаад түр зогсоосон талаар проректор Ж.Банти дурдсан юм. 2018 оноос Монголын түүхийн хичээл зааж эхлэх, улмаар 2020 оноос Монгол судлалын анги нээхээр төлөвлөж байгаа талаар проф. М.Бернардини мэдээлж байв.

Монгол судлалын уламжлалтай, гадаад хэл, орон судлалын Италийн томоохон их сургуульд Монгол судлалын анги нээхээр төлөвлөж байгаад Элчин сайд талархал илэрхийлж, Монголын төр, засгийн зүгээс гадаад улс орнуудад Монгол судлалыг хөгжүүлэхэд бололцооны хэрээр дэмжлэг үзүүлж байгаа талаар мэдэгджээ.

Монгол Улс, Итали улсын хооронд дипломат харилцаа тогтоосны 50 жилийн ой тохиох 2020 онд Монголын түүх, соёлыг илтгэсэн томоохон хэмжээний үзэсгэлэнг Итали Улсад зохион байгуулахаар төлөвлөж байгаа талаар Элчин сайд Ц.Жамбалдорж мэдээлээд, тус их сургуулийн проф. М.Бернардини уг асуудлаар идэвх санаачилгатай ажиллаж байгааг нь өндрөөр үнэлж буйгаа мэдэгдсэн юм.

Монгол Улсын Ерөнхий сайд Ж.Эрдэнэбат өнөөдөр гавьяат жүжигчин Г.Ариунбаатар, бүжигчин О.Анужин нарыг хүлээн авч уулзаж баяр хүргэлээ.

Г.Ариунбаатар Их Британи, Умард Ирландын Нэгдсэн Вант Улсын Уэлсийн нийслэл Кардиф хотноо хоёр жилд нэг удаа зохион байгуулдаг “BBC Cardiff singer of the world 2017” уралдаанд тэргүүн байр эзлээд эх орондоо ирээд байгаа юм.

Төрийн шагналт Б.Шаравын хөгжим, урлагийн гавьяат зүтгэлтэн З.Түмэнжаргалын шүлэг “Монголын тал нутаг” дуугаар энэ том уралдаанаас тэргүүн байрын шагнал авсан нь монгол уран бүтээл дэлхийн энтэй зэрэгцсэнийг бататган харуулж байна гэж Ерөнхий сайд хэллээ.

Улсын дуурь, бүжгийн эрдмийн театрын гоцлол бүжигчин, соёлын тэргүүний ажилтан О.Анужинд Шанхайн олон улсын балетын наадмын хүрэл медалийн эзэн болсонд мөн баяр хүргэж амжилт хүслээ. О.Анужингийн амжилт одоогоос 35 жилийн өмнө ардын жүжигчин, зууны манлай бүжигчин Э.Оюуны Японд болсон олон улсын тэмцээний хүрэл медаль авчирсан амжилттай дүйж байгааг салбарынхан уулзалтын үеэр танилцуулж байлаа.

Монгол орноо дэлхийд таниулах бодлогыг соёл урлаг, спортоор дамжуулан хийх нь илүү үр дүнтэй. Иймд Засгийн газар урлаг, спортод амжилт гаргасан залуучуудаа дэмжиж хамтарч ажиллана. “Монголын тал нутаг дуу” маань дэлхийн том тайзнаа дуулагдсан нь монгол хүн монгол бүтээлээрээ дэлхийд өрсөлдсөн анхны тохиолдол боллоо. Монгол урлаг, соёлоор дамжиж монгол бүтээгдэхүүн, монгол брэнд дэлхийд гарах учиртай гэж Ерөнхий сайд хэлээд Засгийн газраас эдгээр уран бүтээлчдэд олгосон мөнгөн шагналыг гардууллаа.

“Монгол Улсын гавьяат жүжигчин, дуучин Г.Ариунбаатар танд баяр хүргэж, Монголын үндэсний соёл, Монгол Улсын нэр хүндийг олон улсад таниулахад үнэтэй хувь нэмэр оруулсныг тань өндрөөр үнэлж, 80 сая төгрөгийн мөнгөн шагнал олгов” хэмээсэн батламжийг Ерөнхий сайд Ж.Эрдэнэбат түүнд гардууллаа.