“Барселона-1992”, “Бээжин-2008” олимпийн наадмын хүрэл медальт, дэлхийн хошой аварга, Гавьяат тамирчин Д.Мөнхбаяр өдгөө Энэтхэгийн буудлага спортын залуучуудын шигшээ багийн албанд хүчин зүтгэж байгаа ажээ. Түүний нэгэн шавь Энэтхэгийн Шинэ Дели хотод болсон мастеруудын уулзалт тэмцээнээс хоёр алтан медаль хүртжээ.
Д.Мөнхбаяр өнгөрсөн оны босгон дээр зодог тайлсан нь дэлхийн буудлага спортынхны ертөнцөд гэнэтийн мэдэгдэл байсан. Түүнийг “Токио-2020” олимпийн наадмаас медаль хүртэх тамирчны нэгээр нэрлэж байсан юм. Хэдийгээр тамирчны карьераа өндөрлөж, зодог тайлсан ч нэрт тамирчны хувьд зүгээр суусангүй Энэтхэгийн багт хүчин зүтгэж байна.
УИХ-ын дэд дарга Ц.Нямдорж Ерөнхийлөгчийн сонгуульд нэр дэвшихээр нам дотроо М.Энхболдтой өрсөлдсөн боловч Бага хуралд оролцсон 259 гишүүнээс 37 саналыг л авчээ. Тиймээс тэрээр УИХ-ын дарга М.Энхболдод амжилт хүсч духан дээр нь үнсэн “Ахын сэтгэлээр үнслээ” гэв.
Жил бүрийн тавдугаар сарын 3-ныг Дэлхийн хэвлэлийн эрх чөлөөний өдөр болгон тэмдэглэдэг уламжлалтай билээ. Нийслэлийн удирдлагууд энэхүү өдрийг тохиолдуулан сэтгүүлчдийн гурван үеийн төлөөллийг хүлээн авч хүндэтгэл үзүүллээ. Дэлхийн хэвлэлийн эрх чөлөөний өдрийг тохиолдуулан Монголын сэтгүүлчдийн нэгдсэн эвлэлийн хүндэт ерөнхийлөгч, ахмад сэтгүүлч Ц.Дашдондовыг нийслэлийн дээд шагнал “Хангарьд” одонгоор шагналаа. Ахмад сэтгүүлч Ц.Дашдондов нийслэлийн дээд одонгоор шагнагдсан хамгийн анхны сэтгүүлч болж байгаа юм.
Ерөнхийлөгч Ц.Элбэгдорж Орхон аймагт хоёр өдөр ажиллаж орон нутгийн иргэдэд өнгөрсөн найман жилийн хугацаанд хийсэн ажлаа тайлагнахын сацуу Төвийн бүсийн аймгийн сэтгүүлчидтэй уулзлаа. Уулзалтын үеэр сэтгүүлчид “Эрдэнэт үйлдвэр” ХХК-ийн 49:51 хувь, төрийн албан хаагчдын ёс зүй, авилга, хээл хахууль, шударга ёс, эдийн засгийн нөхцөл байдлын талаар асууж байлаа. Тухайлбал, “Эрдэнэт үйлдвэр” ХХК-ийн 49 хувийн талаар хэлэхдээ, “Эрдэнэт үйлдвэр” ХХК-ний Оросын талд байсан 49 хувийг Монголд авах хүсэлт гаргасан компанийг би сайн байна гэж дүгнэж байгаа. 49 хувийг манай талд авчирсан эр зоригийг нь дэмжих ёстой. Учир нь Эрдэнэт үйлдвэрт хэзээ ч ашиглагдахгүй усан онгоцны сэлбэг хүртэл “шахсан” байна. Энэ бүх шахааны бизнесийг таслан зогсоох хэрэгтэй. Иймд “Эрдэнэт үйлдвэр”-ийн ажлын явцыг бид дотооддоо хянах боломж бүрдэж байгаа юм” гэлээ. 
Монголын Үндэсний музейд “Хадан гэрийн соёл” үзэсгэлэн өнөөдөр нээлтээ хийлээ. Тус үзэсгэлэнд энэ удаад Монгол Алтайн нурууны бүс нутаг буюу Ховд аймгийн Мянгад сумын нутаг “Урд улаан үнээт” уулаас 2015 онд Монголын Үндэсний музейн судлаачид, 2016 онд Мөнххайрхан сумын нутаг Үзүүр гялан хэмээх газраас Ховд их сургуулийн судлаачид тус тус илрүүлэн судалж буй хоёр хадны оршуулгаас гарсан хосгүй үнэт түүхэн олдворыг дэлгэжээ.
Румын улсын Яси хотноо сурагчдын шатрын дэлхийн аварга шалгаруулах тэмцээн болж өнгөрлөө. Уг тэмцээнд 42 орны 500 гаруй өсвөрийн шатарчид, 12 насны ангилалд 36 медалийн төлөө өрсөлдөхөд Монголын баг тамирчид гурван алт, гурван мөнгө, нэг хүрэл медаль хүртэж багаараа түрүүлсэн байна. Түүнчлэн дэлхийн аваргад эх орноо төлөөлөн оролцсон манай шатарчдаас 11 нас хүртэлх ангилалд Д.Мөнхзул амжилтаа бататгаж, дэлхийн хос алтан медальтан болжээ. Харин удаах байранд Узбекстан, Турк, Румын, Молдавын багууд орсон байна
Монголын Татварын алба жил бүрийн тавдугаар сарын хоёр дахь долоо хоногийг “Татвар төлөгчдийн өдрүүд” болгон тэмдэглэдэг. Энэ жил “Татвар төлөгчдийн өдрүүд”-ийг 18 дахь удаа зохион байгуулж байгаа бөгөөд “ЭХ ОРНЫХОО ХӨГЖЛИЙГ БҮТЭЭГЧ ЭРХЭМ ТАТВАР ТӨЛӨГЧ ТАНД БАЯРЛАЛАА” уриатайгаар тэмдэглэх аж. “Татвар төлөгчдийн өдрүүд”-ийн гол ач холбогдол нь аж ахуйн нэгж байгууллага, иргэдийг урамшуулан дэмжиж, улс эх орныхоо хөгжил дэвшилд оруулсан үнэтэй хувь хувь нэмэр, нийгмийн өмнө хүлээсэн үүргээ хангалттай биелүүлсэн шилдэг татвар төлөгчдөө олон нийтэд сурталчлан алдаршуулдаг юм. 
Эко автомашин импортлогчдын холбооноос мэдээлэл хийлээ. Хэвлэлийн хуралд тус холбооны тэргүүн Ц.Лхагважав, удирдах зөвлөлийн гишүүд, хуулийн зөвлөх нар оролцов. 
Өмнөговь аймгийн нутаг дэвсгэрийг хамарсан байгалийн аюултай үзэгдэл болж, бүх сумдын нутгаар салхины хурд ширүүсэн зарим үед 16-24 м/с хүрч, үзэгдэх орчин хязгаарлагдаад байна. 