Month: May 2017

Олон нийтэд экологийн боловсрол олгох, тэр дундаа тусгай хамгаалалттай газар нутаг, түүнтэй холбоотой асуудлууд, түүнийг шийдвэрлэх, олон нийтэд сурталчлан таниулах зорилгоор оюутан сурагчдын дунд зохион байгуулсан Тусгай Хамгаалалттай Газар Нутгийн Эсээ, Илтгэлийн уралдаан 05-р сарын 24-ний өдөр Цэнгэг усны нөөц, байгаль хамгаалах газарт болж өнгөрлөө.

Тус уралдааныг Байгаль Очин, аялал жуулчлалын яамны Тусгай Хамгаалалттай нутгийн удирдлагын газар, Дэ Нэйче Консерванси Монгол дахь хөтөлбөрийн газар, НҮБ-ийн Хөгжлийн Хөтөлбөрийн “Монгол орны баруун бүсэд газрын доройтол, хөгжлийн сөрөг нөлөөллийг бууруулах, дүйцүүлэн хамгааллыг нэвтрүүлэх нь” төсөл, мөн МУИС-ийн Экологи клубын залуус хамтран зохион байгууллаа. Энэхүү уралдаан нь Байгаль Орчны яам байгуулагдсаны 30 жилийн ой, “Байгаль хамгаалах сарын аян”, Олон улсын биологийн төрөл зүйлийн өдрийг угтан зохион байгуулагдсанаараа онцлогтой юм. Уралдаан нь ЕБС-ийн сурагчдын хувьд 1 шат буюу эсээ бичлэг, харин их, дээд сургуулийн оюутнуудын хувьд 2 шат буюу эсээ болон илтгэл гэсэн хэсгүүдээс бүрдсэн.

Арга хэмжээг нээн ТХГНУГ-ийн ахлах мэргэжилтэн Г.Энхмөнх “Өөрийн цаг завыг зөв боловсон өнгөрөөж, мэдлэг чадвараа дээшлүүлэн өөрсдийгөө сорихоор энд цугларсан оюутан залуус, сурагчдаараа маш их бахархаж байна. Та хэд маань энэхүү уралдаанд оролцохын тулд Тусгай Хамгаалалттай Газар Нутгийн талаар, мөн түүнд тулгамдаад буй асуудлууд, тэдгээрийг шийдвэрлэхэд бидний мөн төрийн оролцоо ямар байж болох вэ, зэргээр их эргэцүүлэн бодож илтгэл бэлдэцгээсэн байсан” хэмээв. Харин уралдааны шүүгчээр Хустайн БЦГ-ийн дарга асан Н.Банди, БОАЖЯ-ны ТХГН-ийн ахлах мэргэжилтэн Г.Энхмөнх болон НҮБ-ийн Хөгжлийн хөтөлбөрийн Э.Эрдэнэбаясгалан нар ажиллалаа.

Илтгэлүүд нь тусгай хамгаалалттай газар нутгийг хамгаалахад бидний оролцоо, улсын тусгай хамгаалалтад авах ач холбогдол, олон улсын тусгай хамгаалалттай газрын сайн туршлага, мөн тусгай хамгаалалттай газар нутаг дахь аялал жуулчлал гэсэн сэдвүүдийн хүрээнд зохион байгуулагдсан юм. Уралдааны хүрээнд оюутан залуусаас нийт 20 илтгэл, ЕБС-ийн сурагчдаас 32 эсээг хүлээн авсан бөгөөд үүнээс 8 илтгэл 2-р шатанд сонгогдон хэлэлцүүллээ. Уралдаанд байгаль орчноос гадна, мэдээлэл технологи, хууль эрх зүй, мөн олон улсын харилцаа зэрэг өөр өөр мэргэжлийн оюутнууд илтгэлээ явуулснаас гадна орон нутгаас сурагчид идэвхтэй оролцсоныг энд онцолъё.

Тэгвэл оюутнуудын дунд зарласан илтгэлийн уралдааны 1-р байранд МУИС-ийн Олон Улсын Харилцаа, Нийтийн Удирдлагын Сургуулийн 3-р түвшний оюутан М.Тэргэл, 2-р байранд МУИС-ийн Газарзүй Мэдээллийн Системийн 4-р түвшний оюутан Б.Мөнхтөр, 3-р байранд МУИС-ийн Мэдээллийн Системийн 3-р түвшний оюутан Я.Элбэгзаяа шалгарсан. Харин сурагчдын дундах эсээний тэмцээний 1-р байранд Орхон аймгийн 14-р сургуулийн 12б ангийн сурагч С.Энхжин, 2-р байранд СХД-ийн 12-р сургуулийн 12в ангийн сурагч Г.Баттуул, гутгаар байранд Төв аймгийн Баянцогт сумын 11а ангийн сурагч Э.Цолмон тус тус шалгарчээ.

Энэ үеэр НҮБ-ийн Хөгжлийн Хөтөлбөрийн төслийн Э.Эрдэнэбаясгалан “Энэхүү тэмцээнийг зөвхөн энэ жил зохион байгуулагдаад дуусахгүй, дараа дараагийн жилүүдэд үргэлжлэн зохион байгуулагдахаар болж байгаа юм байна, манай төслөөс эдгээрт дэмжлэг үзүүлэн хамтарч ажиллахад төлөвлөгөөтэй байна” хэмээсэн юм.

Тэгвэл өнөөдөр уралдаанд идэвхитэй оролцож байр эзэлсэн дээр дурдсан нэр бүхий оюутан, сурагчдыг БОАЖЯ-ны Тусгай хамгаалалттай нутгийн удирдлагын газрын дарга Ч.Батсансар хүлээн авч уулзан, шагналыг нь гардуулж талархал илэрхийллээ.

Монголын шилдэг тамирчдын нэг, хүндийг өргөгч М.Анхцэцэгийн дүү түлэгдсэний улмаас яаралтай хагалгаанд орох шаардлагатай болчихоод байгаа билээ. Тиймээс тэрээр Үндэсний цэцэрлэгт хүрээлэнд сууж өөрийн нэртэй бал, цэвэр даавуун подволк, аяга зэргийг борлуулан хандивын аян өрнүүлж эхэлсэн. Мөн 3000 төгрөгийн хандивын данс хүртэл нээчихээд байгаа билээ.

Өнөөдрийг хүртэл түүний дүүд туслахаар олон хүн хандив өргөж, сэтгэлийн дэм болж байгаа юм. Тэгвэл “Яг түүн шиг” шоуны шилдэг оролцогчдын нэг, “Х Түц” хамтлагийн жүжигчин Т.Бархүү гэр бүлийн хамтаар Үндэсний цэцэрлэгт хүрээлэнд очиж, М.Анхцэцэгт сая төгрөгийн хандив өгчээ. Мөн УДЭТ-ын жүжигчид болон урлаг соёлынхон хандив өргөсөн байна.

Дашрамд дурдахад, хандивын аян зургадугаар сарын 10-ны өдрийг дуустал Үндэсний цэцэрлэгт хүрээлэнд орой 20:00-23:00 цагийн хооронд зохион байгуулагдах юм. Тиймээс иргэд, аж ахуй нэгж, бизнесмэнүүд хандив өргөхийг хүсвэл Үндэсний цэцэрлэгт хүрээлэнд очиж биечлэн уулзах боломжтой юм.

Цагдаагийн алба хаагчид гурван хүүхдийн амь насыг галын аюулд өртөх эрсдэлээс аварлаа.

Чингэлтэй дүүрэг дэх цагдаагийн хоёрдугаар хэлтсийн эргүүлийн офицер, цагдаагийн дэслэгч Б.Баттулга, эргүүлийн цагдаа жолооч, цагдаагийн ахлах ахлагч Б.Мөнхбаяр нар өчигдөр /2017.05.29/ өдөр дүүргийнхээ 16 дугаар хорооны нутаг дэвсгэрт эргүүл шалгалт хийж явжээ.
Тэд эргүүл шалгалт хийж явах үед Согоотын … тоотод айлын хашаа шатаж байсныг шуурхай очиж шалгахад иргэн Ц-ийн хашаанд гал гарч, түймэр байшин, хажуу айлын хашаа руу орох эрсдэл тулгараад байжээ.

Алба хаагчид хажуу айлын хүнээс нь “Онцгой байдлын газарт дуудлага өгөхийг хүсээд”, нэн түрүүнд гэртээ харгалзах хүнгүй байсан 4-12 насны гурван хүүхдийг аюулгүй газарт гаргаж, гарын доорх материал ашиглан түймрийг цурамд оруулаад байхад онцгой байдлынхан ирж, бүрэн унтраасан байна.

Мөн хашаанд гурван автомашин байсан бөгөөд гал тархсан бол илүү их эрсдэл дагуулах байжээ. Иймд иргэд та бүхнийг бага насны хүүхдийг харгалзах хүнгүйгээр гэрт нь үлдээхгүй байх, болзошгүй эрсдэл, аюул, ослоос урьдчилан сэргийлэхийг цагдаагийн байгууллагаас сэрэмжлүүлж байна.

Цагдаагийн алба хаагчийн болон иргэний үүргээ нэр, төртэй биелүүлж бяцхан үрсийн амь нас, бусдын эд хөрөнгийг үрэгдэх аюулаас аварсан алба хаагч нартаа баяр хүргэж, амжилт хүсье.

НИТХ-ын Нийгмийн хөгжлийн хөгжлийн хороо, Нийслэлийн боловсролын газар хамтран Монгол хүн хүмүүжлийн аяны хүрээнд Монголд анх удаа “1000 аавын чуулган”-ыг СТӨ-нд өчигдөр амжилттай зохион байгууллаа.

Боловсролын харилцаанд оролцогчдын чухал хэсэг нь гэр бүл бөгөөд гэр бүл нь үндэсний тусгаар тогтнол, аюулгүй байдлын үндэс, улс орны хөгжил дэвшлийн баталгаа төдийгүй төр улс дотор оршин буй гэр улс нь үндэсний ёс заншил, соёл уламжлал, үнэт зүйл өвлөгдөн хадгалагддаг хүний хөгжил төлөвшлийн суурь орчин юм. Хүүхдийн хүмүүжилд хамгийн их нөлөө үзүүлж байгаа хүмүүс бол Аавууд. Ирээдүйн Монгол иргэдийн чанартай боловсрол, зөв хүмүүжил төлөвшлийн хамгийн том хүч болсон аавуудын манлайлал, үлгэр дуурайл, боловсролын харилцаанд оролцох оролцоог нэмэгдүүлэхэд “1000 аавын” чуулганы зорилго оршиж байна. Чуулганд нийслэлийн ерөнхий боловсролын сургууль, цэцэрлэгийн төлөөлөл болсон аавууд, төрийн болон төрийн бус байгууллагын төлөөлөл, сургууль, цэцэрлэгийн удирдлагууд -нийт 1350 хүн оролцсон юм.

Монгол хүн хүн аян нь Сургуулийн өмнөх боловсрол, Ерөнхий боловсролын сургуулиас эхлэн хүүхдийн хүмүүжил нэгт тавигдаж, ирээдүйн монгол хүүхдийг төлөвшүүлэх зорилготой хөтөлбөр юм.

Даяаршлыг дагаад хүүхдийн мэдээлэл олж авах эх үүсвэрүүд нэмэгдэж байна. Богино хугацаанд мэдээлэл олж авах боломж нээгдсэн ч бараан сөрөг мэдээллүүдийн дунд төөрөх нь мөн хурдан болжээ. “Монгол хүн” аян нь Багш, эцэг эхчүүд, төрийн байгууллагууд хамтран хүүхдийн хүмүүжлийг зөв чиглүүлэх, ирээдүйн аз жаргалтай хотын зөв иргэн болгох зорилготой юмаа. Нийгмийн тогтвортой хөгжлийг хангах чиглэлээр орчин үеийн Монгол иргэний язгуур суурь чанаруудыг төлөвшүүлэх, хүүхдийн хүмүүжлийн талаар төр засгийн оновчтой бодлого, үйл ажиллагааг хэрэгжүүлэх шаардлагатай байна.

“Монгол хүн” хүмүүжлийн аяныг санаачлагч НИТХ-ын Нийгмийн хөгжлийн хорооны дарга Д.Мөнхжаргал хэлэхдээ “Хүн болгон математикч болохгүй ч эцэг эх болдог. Тийм учраас багаас нь зөв хүмүүжүүлж, төлөвшүүлэх асуудал Нийгмийн бөгөөд эцэг эхчүүд бидний тулгамдсан асуудал болоод байна. Эцэг эхчүүд сургууль, багш нар даатгаад орхидог тогтолцоог халж хамтран ажиллаж, ААВууд хүүхэддээ цаг гаргахыг уриалж байгаа юм. Амжилт гаргаж буй хүүхдүүдийн ард хүүхдээ дэмждэг, цаг гаргадаг, зөв хүмүүжүүлдэг эцэг эх байдаг. Тиймээс өнөөдрийн ААВУУДЫН чуулганаар нийгэмд Монгол хүнээ бэлтгэхэд ямар асуудлууд тулгараад байгаа хүүхдийн хүмүүжилд ААВын үүрэг роль ямар чухал болохыг, хүүхдийн хүмүүжилд ямар орчин, хүчин зүйл нөлөөлж байгаа, төр засгийн ямар бодлого үгүйлэгдэж байгааг зөвлөлдсөн маш ач холбогдолтой чуулган анх удаа боллоо. Манай ААВУУД боловсролын салбарынхан маш идэвхтэй оролцлоо”.

“Монгол хүн” Хүмүүжлийн аянд төрийн болон хувийн өмчийн цэцэрлэг 623, 225 сургууль, 8 боловсролын төв хамрагдах бөгөөд аянг 2020 он хүртэл жил бүр 4 үе шаттайгаар хэрэгжүүлнэ. Энэхүү аяны хүрээнд Монгол хүүхдэд тохирсон хүмүүжлийн цогц хөтөлбөр боловсруулах, хүүхдийн зөв хүмүүжлийн тэргүүн туршлагыг нэвтрүүлэх, солилцох, Багш-суралцагч-эцэг эхийн харилцаа, хамтын ажиллагааг сайжруулах, хүүхдийн хүмүүжилд эцэг эхийн үүрэг оролцоог дээшлүүлэх, хүмүүжлийн сөрөг үзүүлэлтийг бууруулах олон талт арга хэмжээ авч хэрэгжүүлнэ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.