Month: May 2017

Нийслэлийн хэмжээнд 253 шүдний эмнэлэг үйл ажиллагаа явуулдаг байна. Үүнээс 138 шүдний эмнэлэг нь рентген аппарат ашигладаг аж.

Нийслэлийн Мэргэжлийн хяналтын газраас явуулсан хяналт шалгалтаар 65 шүдний эмнэлэг хамрагдсанаас 15 шүдний эмнэлгийн 16 рентген аппаратын ашиглалтын үйл ажиллагааг түр зогсоожээ. Ингэснээр сард ойролцоогоор 1500-1600 хүнийг цацрагийн үндэслэлгүй шарлагад өртүүлэхээс урьдчилан сэргийлэв хэмээн Нийслэлийн Мэргэжлийн хяналтын газрын дарга Л.Эрдэнэчулуун ярилаа.

Мөн дээрх шалгалтаар шүдний эмнэлгүүд эрх бүхий байгууллагын зөвшөөрөлгүй, эзэмшил газрынхаа хэмжээнээс хэтрүүлсэн нийтлэг зөрчил илэрсэн байна.

Илэрсэн зөрчлийг арилгуулахаар 102 мэдэгдэл, 52 албан шаардлага, 34 сая төгрөгийн торгуулийн арга хэмжээ авч ажиллажээ. Одоогоор 12 иргэн, аж ахуйн нэгж байгууллагын хашааг татуулаад байгаа аж.

“Монголын инновацийн 7 хоног-2017” арга хэмжээний албан ёсны нээлт БСШУСЯ-нд болж, зохион байгуулагчид мэдээлэл өглөө. Энэхүү арга хэмжээ нь Монгол Улсын нийгэм, эдийн засгийн бүхий л хүрээнд инновацийн талаарх ойлголт, мэдлэгийг түгээх, инновацийн соёл, бүтээлч сэтгэлгээг төлөвшүүлэх гол зорилготой юм. Түүнчлэн төр хувийн хэвшил, их, дээд сургууль, эрдэм шинжилгээний байгууллага, олон нийт, төрийн бус байгууллагын инновацийн түншлэлийг өргөжүүлэхээр зорьж байна.

Энэхүү үйл ажиллагаа нь тавдугаар сарын 08-14-ний өдрүүдэд болно. Хөтөлбөрийн хүрээнд Монголын инновацийн долоо хоногийн хүрээнд энэ сарын 09-нд “Иргэний танхим”-д “Шинжлэх ухаан-боловсрол-төр-бизнесийн түншлэл” семинарыг зохион байгуулна. Энэ үеэр төр, хувийн хэвшил, их, дээд сургууль, эрдэм шинжилгээний байгууллага, инновацийн хамтын ажиллагаа, түншлэлийн боломжуудын талаар хэлэлцэж, зөвлөмж гаргана.

Харин тавдугаар сарын 10-ны өдөр Сүхбаатарын талбайд “Инновацийн нээлттэй үзэсгэлэн” болох юм. Үзэсгэлэнд төр, засгийн байгууллагууд бодлого, үйл ажиллагаагаа таниулах бол их, дээд сургууль, эрдэм шинжилгээний байгууллагын инновацийн үйл ажиллагааны сурталчилгаа, багш эрдэмтэд, судлаач, оюутны бүтээл дэлгэгдэх аж. Үүний зэрэгцээ аж ахуйн нэгж, компаниуд инновацийн үйл ажиллагааны үр дүн, үинэ техник тзхнологи, бүтээгдэхүүн, үйлчилгээний үзэсгэлэн худалдаа явуулж, эндээс инновацийн хамтын ажиллагаа, түншлэл эхлүүлэх боломж олгохоор төлөвлөжээ.

Энэ өдөр Төрийн ордонд “Инновацийн үндэсний форум” болж, Монголд мэдлэгийн эдийн засгийг хөгжүүлэх үндэс суурийг бүрдүүлэх, шинжлэх ухаан технологи, инновацийг хөгжүүлэх бодлого, стратеги, үйл ажиллагаа, үр дүнгийн талаар оролцогчдод нэгдсэн ойлголт өгч, хэлэлцүүлэг өрнүүлнэ. Тавдугаар сарын 11-12-ны өдрүүдэд “ICIED-2017” олон улсын эрдэм шинжилгээний бага хурал болж, гадаад, дотоодын эрдэмтэд, судлаачид, магистр, доктор, оюутнууд судалгааны ажлын үр дүнгээ танилцуулж,шилдэг бүтээлийг шалгаруулах боллоо.

Мөн “BPA-2017” залуу судлаачдын эрдэм шинжилгээний бага хурал, тавдугаар сарын 12-ноос 14-ний өдрүүдэд залуучуудын гарааны бизнесийн “START-UP WEEKEND” арга хэмжээг зохион байгуулагдаж, энэ хүрээнд залуучуудын гарааны бизнесийг дэмжиж, шилдэг төсөл шалгаруулна гэж мэдээлж байна. “Монголын инновацийн 7 хоног-2017” үйл ажиллагааг БСШУСЯ, Хөдөлмөр, нийгмийн хамгааллын яам, Нийслэлийн Үйлдвэрлэл-инновацийн газар, Шинжлэх ухаан, технологийн сан, ШУТИС хамтран зохион байгуулж байна.

Хөгжлийн бэрхшээлтэй хүүхдүүдийг хүмүүжүүлдэг манайдаа ганц 10-р цэцэрлэг орох оронгүй удаж байгаа талаар цэцэрлэгт хүмүүждэг хүүхдүүдийн эцэг, эхчүүд өнөөдөр нурсан цэцэрлэгийнхээ балгас дээр хүүхдүүдийнхээ хамт жагсаал зохион байгууллаа.

Нийслэлийн Боловсролын Газрын харьяанд шилжин тулгуур эрхтний согогтой хүүхдийн сувиллын ангитай Сувиллын Цэцэрлэг Яслийн 10-р цогцолборт хүнд хэлбэрийн тархины саатай, дауны хам шинжтэй, давхар согогтой нийт 120 хүүхэд хүмүүжиж, эмчлүүлж байна. Бага, дунд, ахлах насны тус бүр хоёр бүлэг буюу нийт зургаан ангитай. Энэ ангиуд байр, савны хүрэлцээгүйн улмаас багын хоёр, дундын хоёр, ахлахын хоёр бүлэг нэгдэн гурван ангид хүмүүжиж байна.

Гэтэл энэ цэцэрлэгийн байрыг одоогоос дөрвөн жилийн өмнө буюу 2013 оны дөрөвдүгээр сард акталж, суурин дээр нь шинэ цэцэрлэг барихаар болсон юм.Шинэ цэцэрлэг барих хүртэл тус цэцэрлэгт хүмүүжиж байсан хүүхдүүдийг өөр цэцэрлэг рүү нүүлгэснээр цаг тутам асаргаа, сувилгаа, эмчилгээ шаардаж байдаг эдгээр хүүхдүүд өнөөдөр өөрийн гэсэн байргүй, айлын цэцэрлэгийн дөрвөн өрөөнд хүмүүжиж байгаа юм.

Эцэг, эхийн төлөөлөл Б.Баясгалан “Манай хүүхэд энэ цэцэрлэгт 2 дахь жилдээ явж байна. Одоо 4 настай. Анх манай хүүхэд баруун тал нь саажилттай байсан, харин одоо 4 мөч нь дөрвүүлээ хөдөлдөг болсон. Үүнд цэцэрлэгийн хамт олон нөлөөлсөн, хүүхэдтэй маш сайн тулж харьцдаг.

Гэвч өнөөдөр улсдаа ганц байдаг энэхүү цэцэрлэгийн байрыг нурааснаар хөгжлийн бэрхшээлтэй хүүхдүүд хүмүүжих боломжгүй болчихоод байгаа. Нэг ангид л гэхэд 20-35 хүүхэдтэй 6 мкв байранд байрлаж байна. Энэ нь хүүхдийн эрхийг зөрчиж буй асуудал юм. Тиймээс төр засаг энэ асуудлыг анхааралдаа авч энэхүү нураасан байрыг яаралтай барихыг мөн бид хүүхдүүддээ цогц үйлчилгээг үзүүлэхийг хүсч байна” гэлээ.

Монгол Улсад хөгжлийн бэрхшээлтэй цэцэрлэгийн насны 2 мянган хүүхэд байна

Үндэсний Статистикийн Хорооны тооцооллоор Улсын хэмжээнд нийтдээ 102,000 гаруй хөгжлийн бэрхшээлтэй иргэд байдгаас цэцэрлэгийн насны (2-5) 2 мянган хүүхэд байдаг байна. Тооллогоор хөгжлийн бэрхшээлтэй бага насны хүүхдийн 39 орчим хувь буюу 780 нь цэцэрлэгт хамрагдаж байгаа юм. Гэтэл энэ насны хүүхдийн 60 хувь нь цэцэрлэгт явдаг гэж бүртгэгдсэнтэй харьцуулбал хөгжлийн бэрхшээлтэй хүүхдүүдийн цэцэрлэгт хамрагдалт бусад хүүхдээс 1.5 дахин бага байна.

Цагдаагийн байгууллагын хяналт шалгалтаар амралтын өдрүүдээр согтууруулах ундаа хэрэглэсэн үедээ тээврийн хэрэгсэл жолоодсон нийт 98 жолоочийг илрүүлж гарч болзошгүй осол, хэргээс урьдчилан сэргийлжээ.

Амралтын өдрүүдэд зам тээврийн осолд дөрвөн хүүхэд өртсөний гурав нь гэрийнхээ гадаа тоглож байжээ.

Дулааны улирал эхэлж хүүхэд багачууд гадаа тоглох, ролик, скүүтер, унадаг дугуй унахдаа зам дээр болон замын ойролцоо тоглох нь их болсон. Мөн жолооч нар орон сууц болон гэр хороолол дундах замд хурдаа тохируулаагүй, анхаарал болгоомжгүй хөдөлгөөнд оролцсоны улмаас бага насны хүүхдүүд осолд өртөж гэмтэж, бэртэж байна гэж Замын цагдаагийн албанаас мэдээллээ.

Бага насны хүүхдүүд нь сониуч зантай, хурдан хөдөлгөөнтэй, автомашины урдуур гэнэт гүйж орох нь бий. Иймд эцэг эхчүүд хүүхдээ үргэлж хараа хяналтандаа байлгах, автомашин ойртон ирж байгаа тохиолдолд хөтлөх буюу тэврэх, мөн аюулгүй газар хүргэх, жолооч нар хороолол дундах замд хурдыг зөвшөөрсөн хэмжээнээс хэтрүүлэхгүй байх, анхаарал болгоомжтой хөдөлгөөнд оролцох шаардлагатай гэж Замын цагдаа нар сэрэмжлүүлж байна.

“Япон дахь Монголын докторын оюутан, судлаачдын эрдэм-шинжилгээний анхдугаар форум” Токио хотноо энэ сарын 5-6-ны өдрүүдэд болжээ. Уг арга хэмжээг “Япон дахь докторын оюутан, судлаачдын бүлгэм”, Монгол Улсаас Япон улсад суугаа Элчин сайдын яам хамтран зохион байгуулсан юм. “Нэг тэмүүлэл, нэг зорилгын төлөө хамтдаа” уриан дор болсон уг форум

хоёр өдрийн турш үргэлжилжээ. Форумд Хоккайдо, Кансай, Кюүшү, Канто зэрэг бүс нутгаас анагаах, боловсрол, эдийн засаг, улс төр, геологи, физик, биологи, мал эмнэлэг зэрэг салбараар суралцаж буй 15 залуу доктор, докторантууд хийж буй судалгаа-шинжилгээний ажлын зорилго, явц, үр дүн, ач холбогдлын талаар илтгэл тавьж, хэлэлцүүлсэн юм. Мөн Японы нэр хүнд бүхий монгол судлаачид болох Тоохокү Их сургуулийн түүх судлалын багш Ока Хироки, Шига Их сургуулийн угсаатан судлалын багш Шимамүра Иппэй, Осака Их сургуулийн бэлчээрийн мал аж ахуй эрхэлдэг бүс нутгийн судлалын тэнхмийн эрхлэгч Имаока Рёоко нарын тавьсан Монголын манжийн үеийн түүх, Чингисийн тухай Монгол-Япон-Америк-Оросын төсөөллийн талаарх харьцуулсан судалгааны үр дүнгийн талаарх лекцийг сонсож, судалгааны онол, аргазүйн тэргүүн туршлага солилцож, сурч мэдсэнээ Монгол орондоо нэвтрүүлэх, нутагшуулах, улс орны хөгжил, өрсөлдөх чадварт хувь нэмэр оуулах арга замын талаар дугуй ширээний ярилцлага, хэлэлцүүлэг хийв.

Форумд оролцогсод судлаачдын бүлгэмийн үйл ажиллагааг өргөтгөн холбоо болгон зохион байгуулахаар болжээ. Форумд ГХЯ-ны Гадаад сурталчилгаа, соёлын харилцааны газрын захирал Х.Мандахцэцэг оролцож, Монгол Улсын гадаад харилцааны сайд Ц.Мөнх-Оргилоос оролцогчдод хандан илгээсэн мэндчилгээг хүргэж, Засгийн газраас хилийн чанад дахь Монголын иргэдэд хандан хэрэгжүүлж буй бодлого, хөтөлбөрийн талаар дэлгэрэнгүй танилцуулга хийж, илтгэгчдэд өргөмжлөл гардуулав.

Монгол Улсаас Япон улсад оршин суугч иргэдийн тоо жилээс жилд нэмэгдэж байна. 2016 оны жилийн эцсийн байдлаар 7636 монгол иргэн Япон Улсад оршин сууж байсны дотор визийн ангиллаар их дээд сургуулийн багш 28, өндөр мэргэшлийн инженер 8, өндөр мэргэжлийн ажилчин 5, компанийн удирдах ажилтан 53, эмч 6, судлаач 6, технологийн болон хүмүүнлэг, олон улсын харилцааны ажилтан 859, дадлагажигч ажилчин 774, урлагийн ажилтан 26, оюутан 2705, гэр бүлийн гишүүд 1361, цагаач иргэн 938, япон хүнтэй гэрлэсэн 410, байнгын оршин суугч иргэн 236 тус тус байсан статистик мэдээ гарчээ.

Японд доктор цол хамгаалахаар суралцаж байгаа болон доктор цол хамгаалаад мэргэжлээрээ ажиллаж байгаа өндөр мэргэжлийн судлаачид гэхэд л 160 гаруй хүн байгаа юм. Монголын докторын оюутан, судлаачдын хувьд Япон Улсад суралцсанаар өндөр мэдлэг боловсрол эзэмших, судалгаа шинжилгээний ажлын туршлага, арга барилд суралцах, дэлхийд тэргүүлэх эрдэмтдийн судалгаанд хамтран оролцох, өөрийн сонирхсон чиглэлээр эрдэм шинжилгээ, судалгааны хөрөнгийн эх үүсвэр олох, хийсэн ажлынхаа үр дүнг дэлхий дахинд таниулах, хэрэглээнд нэвтрүүлэх зэрэг олон давуу талыг олж авдаг. Цаашдаа тэднийг Монголын байгууллагуудтай холбох, нөөц бололцоо, чадварыг нь Монголынхоо хөгжилд ашиглах шаардлагатай байгаа юм.