Month: May 2017

Монгол Үндэсний музей жил бүрийн 5 дугаар сарын 15-ны өдрийг “Гэр бүлийн өдөр” болгон тэмдэглэдэг уламжлалтай. Энэ өдрийг тохиолдуулан Mонголын Үндэсний Музей 2017оны 5 дугаар сарын 15-нд гэр бүлээрээ музей үзэхээр ирсэн үзэгчиддээ үнэ төлбөргүй үйлчлэх юм байна.
Энэхүү арга хэмжээг Монголын үндэсний музей Гэр бүл, Хүүхэд, Залуучуудын Хөгжлийн газартай хамтран зохион байгуулж буй аж.

Чингэлтэй дүүргийн хэмжээнд гамшгаас хамгаалах мэргэжлийн анги, албадын бэлтгэл бэлэн байдлыг хангах, гамшгийн үед хамтран ажиллах уялдаа холбоог сайжруулах, удирдлагын түвшинд гамшгийн үеийн нөхцөл байдлыг хэрхэн үнэлэх, хэрхэн шийдвэр гаргах зэрэг мэдлэг, дадлагыг эзэмшүүлэх гамшгаас хамгаалах иж бүрэн сургууль өнөөдөр эхэллээ.

Чингэлтэй дүүрэг 160 гаруй мянган хүн амтай нийслэлийн томоохон дүүргийн нэг юм. Дадлага сургууль нийслэлийн Засаг даргын 2017 оны А/11 дүгээр захирамж, дүүргийн Онцгой комиссын даргын 07 тоот захирамжийн дагуу 2017 оны тавдугаар сарын 11,12-ны өдөр үргэлжилнэ.

Гамшгаас хамгаалах иж бүрэн сургуульд Чингэлтэй дүүргийн төр захиргааны байгууллагын болон хувийн хэвшлийн 85 аж ахуй нэгж байгууллагын 1352 албан хаагч хамрагдаж байна.

Дадлага сургууль 2 үе шаттай явагдана. Эхнийх нь өнөөдөр дүүргийн удирдлагын түвшинд өгөгдсөн цагийн байдлуудад хариу арга хэмжээ авах штабын дадлага сургууль явагдаж байна. Маргааш газар хөдлөлт, үеэр ус, ой хээрийн түймэр, хүн, мал амьтны гоц халдварт өвчин, нүүлгэн шилжүүлэлт гэсэн цагийн байдлуудад мэргэжлийн анги, албадууд дадлага сургууль хийнэ. Тус дадлага сургуулийг зохион байгуулснаар дүүргийн хэмжээнд гамшгийн эрсдлийг бууруулах, урьдчилан сэргийлэх, томоохон аюулт үзэгдэл, техникийн холбогдолтой осол тохиолдсон үед авах хариу арга хэмжээг хэрхэн зохион байгуулах дадлыг эзэмшүүлэхэд ач холбогдолтой юм гэж нийслэлийн Онцгой байдлын газраас мэдээллээ.

ОХУ болон гадаадын бусад орнуудад түгсэн “Цэнхэр халим” сошиал тоглоом газар аваад байна. Энэхүү тоглоомд нэгдэж буй Монголын хандалт нэмэгдэж байгааг Цагдаагийн ерөнхий газар /ЦЕГ/-аас онцгойлон анхаарууллаа. “Цэнхэр халим” тоглоом нь оролцогчид өдөр тутам даалгавар өгч, даалгавар нь хүндэрсээр амиа хорлоход хзргэдэг аюултай тоглоом болохыг тогтоожээ. Одоогоор “Цэнхэр халим”-тай холбоотой гомдол манай хууль хяналтынханд ирээгүй. Гэвч эцэг эхчүүд, сургуулийн багш, удирдлагууд өсвөр насны хүүхдүүдийн интернэт орчны хэрэглээнд хяналт тавьж байхыг санууллаа. Зөвхөн ОХУ-д л гэхэд 2015 оны арваннэгдүгээр сараас 2016 оны дөрөвдүгээр сарын хугацаанд 130 өсвөр насны хүүхэд, Казакстанд 50 хүүхэд амиа хорлосон гэсэн мэдээ байгаа ажээ.

ЦЕГ-аас цахим орчин дахь гэмт хэрэг, аюултай тоглоом наадгайд оролцохгүйн тулд юунд анхаарах талаар эдгээр зөвлөмжийг гаргажээ.

Цахим орчинд танихгүй хүнтэй битгий найз болоорой

Хувийн мэдээллээ танихгүй хүнтэй битгий хуваалцаарай

Интернэтэд танилцсан хүнтэйгээ биечилж бүү уулзаарай

Уулзах бол ганцаараа бүү очоорой

Эргэлзээтэй сэжигтэй тохиолдлыг аав ээж ах эгч нартаа заавал хэлэхийг санууллаа.

Ингээд Цагдаагийн ерөнхий газрын Эрүүгийн цагдаагийн албаны тасгийн дарга, цагдаагийн хошууч С.Ариунболор дараахь сэрэмжлүүлгийг өгсөн юм.

Эдийн засгийн бодлого, өрсөлдөх чадварын судалгааны төвөөс “Аймгуудын өрсөлдөх чадварын тайлан”-г гаргадаг билээ. Тэгвэл 2016 оны буюу тав дахь удаагийн тайланг гаргаснаа өнөөдөр олон нийтэд танилцууллаа.

Энэхүү тайланд аймгуудын давуу болон сул талуудыг эдийн засгийн тамир тэнхээ, засаглалын үр ашиг, бизнесийн үр ашиг, болон дэд бүтэц гэсэн үндсэн дөрвөн хүчин зүйлийн 180 гаруй шалгуур үзүүлэлтээр харьцуулан гаргадаг аж. Мөн өмнөх жилийн тайлантай харьцуулан хамгийн их өссөн болон буурсан 20 үзүүлэлтийг гаргадаг байна.

Судалгааг хийхэд ХБНГУ-ын Олон улсын хамтын ажиллагааны нийгэмлэгийн Эрдэс баялаг, иж бүрэн санаачилга хөтөлбөр, Азийн сан, МҮХАҮТ, “Мобиком” корпораци, “Ньюком групп” хамтран ажиллажээ.

Судалгаа явуулж эхэлснээс хойш Орхон, Дархан-Уул, Өмнөговь, Сүхбаатар зэрэг аймгуудын өрсөлдөх чадварын оноо тогтмол өндөр гардаг байна. Өнгөрсөн жилийн тайланд Орхон аймаг мөн л тэргүүлсэн бол Өмнөговь, Дархан-Уул аймгууд удаахв байруудад орсон байна. Харин сүүлийн байруудад Архангай, Дундговь, Говь-Алтай аймгууд эрэмбэлэгджээ.

Тайланг танилцуулах үеэр Эдийн засгийн бодлого, өрсөлдөх чадварын судалгааны төвийн ерөнхий захирал Б.Лакшми “Өрсөлдөх чадвар сайтай аймгуудад ажиглагдаж байгаа нийтлэг шинж нь үйлдвэрлэл, дэд бүтэц хөгжсөн ажлын байр болон хүний эрүүл аюулгүй орчинд амьдрах нөхцөлийг бусад аймгуудтай харьцуулахад харьцангуй сайн бүрдүүлсэн байна.

Судалгааг хийж эхэлсэн 2012 онд Орхон аймаг 100 оноогоор тэргүүлж, Дундговь аймаг 27 оноотойгоор сүүлд эрэмбэлэгдэж байсан бол энэ жил Говь-Алтай аймаг 47 оноотойгоор сүүлд эрэмбэлэгдсэн. Энэ жил Дорноговь, Өвөрхангай, Баян-Өлгий зэрэг аймгууд өрсөлдөх чадварын оноогоо хамгийн ихээр ахиулсан бол Архангай, Говь-Алтай, Завхан аймгууд хамгийн их бууралттай нь байв” гэлээ.

Дорноговь аймгийн засаглал болон дэд бүтцийн үзүүлэлтүүд өссөн үзүүлэлттэй гарсан бол Өвөрхангай аймгийн эдийн засаг, бизнесийн орчны үзүүлэлтүүд өссөн нь өрсөлдөх чадьараар тэргүүлэхэд гол нөлөө үзүүлжээ. Харин Архангай аймгийн эдийн засаг болон дэд бүтцийн зарим үзүүлэлтүүд, Говь-Алтай аймгийн бизнесийн орчин болон дэд бүтцийн зарим үзүүлэлтүүд буурсан нь өрсөлдөх чадварын оноо буурахад түлхүү нөлөөлсөн аж.

Судалгааг хийхдээ аймаг тус бүрээс 50, нийт 1,050 бизнес эрхлэгчээс санал асуулга авсан байна. Тэднээс бизнес эрхлэхэд тулгардаг бэрхшээлийн талаар ч асуусан гэлээ. Бизнес эрхлэгчид татвар, зээлийн бодлогоор дэмжих, банкуудын зээлийн хүүг бууруулах, ажлын байр нэмэгдүүлэх, төр хувийн хэвшлийн хамтын ажиллагааг сайжруулах гэсэн хариултыг хамгийн олон удаа өгчээ.