Month: May 2017

Тулгар төрийн 2226 жил, Их Монгол улсын 811 жил, Ардын хувьсгалын 96 жилийн ойн Үндэсний их баяр наадмыг тэмдэглэх хүрээнд үндэсний их баяр наадмын зохион байгуулах хороо, Засгийн газрын хэрэгжүүлэгч агентлаг нийслэлийн Соёл урлагийн газар хамтран урлаг, соёлын арга хэмжээг зохион байгуулахаар бэлтгэл ажилдаа орлоо.

Үндэсний их баяр наадмын өдрүүдэд Төрийн хүндэтгэлийн концерт, Нээлт, хаалтын ёслолын ажиллагаа, Хүй долоо худагт зохион байгуулах урлаг соёлын арга хэмжээ, Улаанбаатарын үдэш- Эх орноо хамтдаа дуулъя” цэнгүүн, Төрийн хүлээн авалтын урлагийн тоглолт, Дэлхийд нэр алдраа дуурсгасан “Монголчуудын бахархал” уран бүтээлчдийн нэгдсэн тоглолт, “Монголын сайхан орноор” уран зургийн үзэсгэлэнг тус тус зохион байгуулах юм.

Онцгой байдлын ерөнхий газрын дэргэдэх Гамшиг судлалын хүрээлэнгээс Монголын Улаан загалмай нийгэмлэгтэй хамтран 2016 оноос эхлэн гамшгаас хамгаалахад тулгамдаж байгаа асуудлаар онол, практикийн бага хурлыг уламжлал болгон зохион байгуулж байна.

Манай орны хувьд нийгэм, эдийн засагт ихээхэн хохирол үзүүлдэг гамшгийн нэг нь зудын гамшиг байдаг.

Тухайлбал, Монгол орны нутаг дэвсгэрт сүүлийн 60 гаруй жилийн 65 хувьд нь их бага хэмжээтэй зуд тохиолджээ. Статистик судалгаанаас үзэхэд зудын улмаас жил тутам дунджаар 1,3 сая толгой мал хорогдож байна. Харин 1944-1945 онд 8.3 сая, 1950 онд 3.5 сая, 1967-1968 онд 2.9 сая, 1976-1977 онд 2.1 сая, 1999-2002 онд 11.2 сая, 2009-2010 онд 9,7 сая, 2015-2016 онд 1.02 сая, нийт 38.7 сая толгой мал хорогдож байжээ. Энэ нь 2016 оны жилийн эцсийн нийт малын 63 хувийг эзэлж байгаа аж.

Тийм ч учраас энэ жилийн онол практикийн бага хурлаар зудын гамшгийн асуудлыг хөндөж, зудын аюулаас эрт сэрэмжлүүлэх, эрсдэлийг бууруулах, малчдын даван туулах чадварыг нэмэгдүүлэх, зудын эрсдэлийг тооцох, зудын гамшгийн сургамж зэрэг гамшгаас хамгаалах үйл ажиллагаанд тулгамдаж буй асуудлын талаар хэлэлцэв.

ОБЕГ-ын тэргүүн дэд дарга, бригадын генерал Г.Ариунбуян “Гамшгаас хамгаалах үйл ажиллагаанд тулгамдаж буй асуудал-2017” онол практикийн бага хурлыг нээж хэлсэн үгэндээ, “НҮБ-ын Ерөнхий Ассамблейгаар батлагдсан “Тогтвортой хөгжлийн зорилтууд”, “Уур амьсгалын өөрчлөлтийн эсрэг Парисын конвенц”, “Сендайн үйл ажиллагааны хүрээ” зэрэг дэлхий нийтээр дагаж мөрдөж буй томоохон баримт бичгүүдийг өөрийн үндэсний онцлогтоо тохирсон нийгэм, эдийн засгийн хөгжлийн хэтийн бодлоготойгоо уялдуулан урт хугацааны стратеги төлөвлөгөөтэйгээр бүс нутаг, үндэстэн, орон нутаг, олон нийтийн түвшинд хэрэгжүүлэх явдал тулгамдсан асуудлын нэг болж байна гэж онцлоод шинжлэх ухааны байгууллагууд хамтран ажиллаж, сайн туршлагаа харилцан солилцох, түгээн дэлгэрүүлэх, бодлого, үйл ажиллагаатай холбоотой сургамжийн талаар мэдээлэл солилцох, гамшгийн эрсдэлийг үнэлэх, зураглах, хянах, бууруулах, эрт зарлан мэдээлэх системийг боловсронгуй болгох, шинжлэх ухааны нээлт, шинэ дэвшилтэт техник технологид суурилсан гамшигтай тэмцэх арга ажиллагааг нэвтрүүлэх нь илүү үр дүнтэй болох нь харагдаж байгаа юм.

Иймээс онол, практикийн бага хуралд оролцож буй эрдэмтэн, судлаач, мэргэжилтнүүд та бүхэн гамшгаас хамгаалах үйл ажиллагааны тулгамдаж буй асуудлуудад анхаарлаа хандуулж, цаашид гамшгаас хамгаалах үйл ажиллагааг шинжлэх ухааны үндэстэй зохион байгуулж, удирдах, дэвшилтэт технологид тулгуурласан шийдлийг олоход үнэтэй хувь нэмрээ оруулна гэж итгэж байна” гэж дурдлаа.

Мөн МУЗН-ийн ерөнхий нарийн бичгийн дарга Н.Болормаа, “Монголын Улаанзагалмайн нийгэмлэг гамшгийн эрсдэлийг бууруулах чиглэлээр үйл ажиллагаа явуулахдаа хоёр асуудалд илүү анхаарч байна. Эхнийх нь бүх асуудалд шинжлэх ухаанч байр суурь, судалгаатай дүгнэлттэй хандах. Бид гамшгийн эрсдэлийг бууруулах чиглэлээр хэдэн ч төгрөг зарцуулж болно. Гэхдээ бид нэг төгрөгний ч үр ашгийг урьдчилан тооцож, шинжлэх ухаанчаар бүх үйл ажиллагаагаа уялдуулах нь хамгийн чухал гэж үзэж, хоёр дах жилдээ энэ онол практикийн бага хурлыг зохион байгуулж байна.

Бидний анхаарч байгаа хоёр дахь асуудал бол гамшгаас хамгаалах эрхзүйн орчинг илүү тодорхой оновчтой болгоход Улаанзагалмайн нийгэмлэг төрд туслах үүргээ биелүүлнэ. УИХ-д Улаанзагалмайг дэмжих парламентын бүлэг байгуулсан. Нийт 19 УИХ-ын гишүүн, улс төрийн намын олон төлөөлөл оролцож гамшгаас хамгаалах эрхзүйн орчинг илүү боловсронгуй болгоход бидэнд дэмжлэг үзүүлж ажиллах юм” гэлээ.

“Гамшгаас хамгаалах үйл ажиллагаанд тулгамдаж буй асуудал-2017” онол, практикийн бага хуралд оролцогчид Онцгой байдлын ерөнхий газар, холбогдох яам, агентлаг, эрдэм шинжилгээний байгууллагуудад хандаж зудын гамшгийн эрсдэлийг бууруулах чиглэлээр цаашид авч хэрэгжүүлэх арга замыг тодорхойлох зөвлөмжийг гаргах юм гэж Онцгой байдлын ерөнхий газраас мэдээллээ.

Нийслэл болон орон нутгийн сургуулийн бага ангийн сурагчид энэ сарын 25-наас амарна. Харин 3-5 дугаар ангийнхан зургадугаар сарын нэгэн, ахлах ангийн сурагчид мөн ирэх сарын 8-наас амрах аж. Тэгвэл цэцэрлэгүүдийн хувьд бүгд зургадугаар сарын 1-нээс зуны амралт нь эхлэх юм байна.

Нийслэлийн Засаг даргын зөвлөлийн ээлжит 19 дүгээр хурлаар нийтийн бие засах газар /City toilet/-ын ашиглалтын үйл ажиллагааны өнөөгийн байдал, тулгарч буй асуудал, цаашид авч хэрэгжүүлэх арга хэмжээний талаархи саналыг Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр танилцуулав.

“Хот тохижилтын газар” ОНӨААТҮГ-ын ашиглалтыг хариуцаж байгаа нийт 19 нийтийн бие засах газраас ашиглалтад эцэслэн хүлээж аваагүй 2 газар байгаа ба 17 газрын байнгын хэвийн ажиллагааны ашиглалтыг хариуцан ажиллаж байна.

Дээрх 17 газрын 4-ийг Хот тохижилтын газар өөрсдөө, 11-ыг нь түрээс болон ашиглалтын гэрээгээр, нийт 15 газрыг ажиллуулж, 88,2% нь байнгын ажиллагаатай байгаа бол байршил муутай, үйлчлүүлэгч ордоггүй нөхцөл шалтгаанаар ашиглалтад хүлээж авсан 2 газар, тодорхой шалтгаанаар ашиглалтад аваагүй 2 буюу нийт 4 газрыг ажиллуулаагүй, түр зогсоосон байна.

Дээрх 19 газрын 6 нь дулаанд, 19 нь цахилгаанд, 18 нь цэвэр усанд, 13 нь бохир усны шугам сүлжээнд холбогдсон, дулааны шугам сүлжээнд холбогдоогүй 13 газар байна. Дулаанд холбогдоогүй 13 газрын халаалтыг цахилгаан хэрэгслэл ашиглаж халаадгаас цахилгааны зардал өндөр буюу нийт ашиглалтын зардлын 50 орчим хувийг эзэлдэг байна.

Ашиглалт хариуцсан байгууллагаас Захирагчийн ажлын албатай байгуулсан гэрээний санхүүжилтийн хуваарилалт нь хариуцаж буй 19 газрыг бүрэн ажиллуулах зардалд хүрэхгүй байгаа тул дээрх зохицуулалтын арга хэмжээг авч, обьектыг байнгын ажиллагаатай байлгах, ахуйн үйлчилгээг иргэдэд хүргэх түвшинд авч буй зохих арга хэмжээ авч байгаа боловч цаашид энэ байдлаар зохицуулахад хүндрэлтэй, нийслэлийн өмчийг ариг гамтай, зориулалтын дагуу бүрэн ашиглах хүрээнд зохих менежментийн арга хэмжээ авч ажиллах шаардлагатай байгаа талаар танилцуулсан юм.

Иймд Захирагчийн ажлын албанаас дээрх 19 газрыг менежментийн гэрээгээр ажиллуулах, эсхүл гэр хороололд байрлах ашиглагдахгүй байгаа нийтийн бие засах газруудыг дуудлага худалдаагаар худалдаалах, хэрэв дээрх байдлаар хэрэгжих боломжгүй гэж үзвэл нийслэлийн өмчид хэвээр үлдээх, иргэдэд үнэ төлбөргүйгээр үйлчилгээ үзүүлэх, улмаар ашиглалтын зардлыг нийслэлийн төсвөөс бүрэн шийдвэрлэх асуудлаар саналууд хэлэлцүүлсэн. Нийтийн бие засах 1 газрыг ажиллуулахад сард 2,5 сая.төгрөг буюу жилд 30,0 сая.төгрөг, нийт 19 газрыг ажиллуулахад жилийн ашиглалт, ажилчдын цалин, нийгмийн даатгалын зардал болон элэгдлийн зардалд 560,0 орчим сая.төгрөг шаардлагатай тооцоо судалгаа гарч байгаа юм.

Улмаар нийслэлийн Засаг даргын зөвлөлийн ээлжит 19 дүгээр хурлаар дээрх асуудлуудыг хэлэлцээд нийтийн бие засах газруудыг бүхэлд нь багцалж, менежментийн гэрээгээр ажиллуулах асуудлыг судалж шийдвэрлэх, нийтийн бие засах газрыг зайлшгүй нэмж байгуулах газар, байршлуудын судалгаа гаргаж танилцуулах, дулаан, цэвэр бохир усны шугам сүлжээнд холбогдоогүй газруудыг инженерийн шугам сүлжээнд холбох шийдлийг гарган, хөрөнгө оруулалтын тооцоог хийж танилцуулах, түүнчлэн шатахуун түгээс станц, банк зэрэг үйлчилгээний байгууллагуудын бие засах газруудыг иргэдэд нээлттэй, үнэ төлбөргүй үйлчилгээ үзүүлэх чиглэлээр холбогдох дүрэм журамд тусгуулж, шийдвэрлүүлэх асуудлуудаар холбогдох чиг үүргийн байгууллагуудад үүрэг болголоо гэж Улаанбаатар хотын Захирагчийн ажлын албанаас мэдээлэв

Ард түмний онц зөвлөл (АТОЗ)-өөс 2017 оны Ерөнхийлөгчийн сонгуульд нэр дэвшигчдийг нэр бүхий улс төрчдийн оффшор бүст нуусан хөрөнгийг эх орондоо буцаан авч ирэх асуудлыг мөрийн хөтөлбөртөө тусгахыг уриалав.

Оффшор бүст нэр бүхий улс төрчид 17 тэрбум төгрөг байрлуулсан тухай мэдээлэл гарсан. Уг хөрөнгийг эх оронд нь буцаан авч ирэх, нуусан этгээдүүдэд хариуцлага тооцох асуудлаар АТОЗ хоёр удаа жагсаал зохион байгуулаад байгаа юм. Гэвч Ерөнхийлөгч, Засгийн газар, УИХ болон хууль хяналтын байгууллагууд тодорхой ара хэмжээ хэрэгжүүлэхгүй байгааг тус зөвлөлийн ерөнхий зохицуулагч С.Батчулуун хэллээ.

Тэрбээр, “АТОЗ-ийг Ерөнхийлөгчийн сонгуультай холбоотойгоор аль нэг улс төрийн хүчний төлөө ажиллаж байна гэсэн хардлага байна. Гэхдээ тийм биш. Бидний ард зөвхөн Монгол Улсын иргэд бий. Ерөнхийлөгчийн сонгуульд өрсөлдөж буй эрхмүүд оффшорын асуудлыг шийдвэрлэх заалтыг мөрийн хөтөлбөртөө оруулах хэрэгтэй. Тэгж чадсан хүнийг АТОЗ болон Монголын ард түмэн дэмжих болно. Харин оффшорын эсрэг асуудлыг мөрийн хөтөлбөртөө оруулаагүй улс төрийн хүчин, нэр дэвшигчийг сонгохгүй. Нэр дэвшигчид иргэдэд олон сайхан амлалт өгнө. Гэвч түүнийг нь хэрэгжүүлэх төсөв хөрөнгө Монгол Улсад байхгүй. Тиймээс оффшор бүст байгаа хөрөнгийг татаж, мөрийн хөтөлбөрөө хэрэгжүүлж, амлалтаа биелүүлэх ёстой. Тэгэхгүй бол дахиад л гадаадаас зээл авах асуудал яригдах болно” гэлээ.

АТОЗ-ын зүгээс Ерөнхийлөгчид нэр дэвшигчдэд тавих хэд хэдэн шалгуур үзүүлэлтийг боловсруулжээ. Тухайлбал, оффшор бүст хадгаламж эзэмшиж буй улс төрчдийг шалгах онцгой комисс байгуулах, Авилгын эсрэг болон Үндэстэн дамнасан зохион байгуулалттай гэмт хэргийн эсрэг концвенцийг хэрэгжүүлэх зэргийг тусгах зэргийг тусгасан байна. Мөн оффшор бүст данс эзэмшиж буй УИХ-ын гишүүдийг эгүүлэн татах, нэр дурьдагдсан этгээдүүдэд хариуцлага тооцох, “Оюутолгой”, “Тавантолгой”, “Эрдэнэт” зэрэг томоохон төсөл хөтөлбөрүүдэд мониторинг, үнэлгээ хийх асуудлыг шийдвэрлэх зэргийг шалгуур үзүүлэлтэд оруулжээ.