Month: May 2017

Б.Янжаа хэмээх монгол бүсгүй “Авьяаслаг шведүүд” шоунд оролцож, “Алтан баззер” хүртжээ. Тэрээр таван настайдаа Шведэд очсон ба оюуны чадвараараа үзэгч, шүүгчдийг гайхшруулсан байна.

Шведийн нийслэл Стокгольм хотын оролцогч Янжаа үзэгчдийн суудлаас огт танихгүй 20 хүнийг тайзан дээр гарган ирж, 90 секундын дотор тэдгээр орон орны хүмүүсийн нэрийг тогтоон, нэрлэж үзүүлжээ.

Үзүүлбэрийн дараа шүүгчид түүнээс “Шоунд түрүүлээд, мөнгөн шагнал хожвол юу хийх вэ” гэж асуухад Янжаа “Шведэд анх удаа ирж буй олон олон хүнд швед хэл түргэн сурахад нь туслах аппликейшн бүтээхийг хүсч байна” гэж хариулжээ.

Янжаа өдгөө 22 настай гэнэ. 2015 онд Хонконгод болсон “Нэр, царай тогтоох олон улсын тэмцээн”-д 15 минутад 187 нэр тогтоож, дэлхийн рекорд эвдэж байсан юм. Мөн тухайн ондоо Ой тогтоолтын дэлхийн аваргад эмэгтэйчүүдийн ганцаарчилсан төрөлд түрүүлж байсан билээ. Үүнээс гадна Б.Янжаа 14 орны хэлээр чөлөөтэй ярьдаг, авъяаслаг нэгэн юм.

Зам, тээврийн салбарын бодлого, үйл ажиллагааг олон нийтэд нээлттэй болгож, иргэд, аж ахуй нэгж, байгууллагуудад хүртээмжтэй үйлчилгээ үзүүлж, санал бодлыг нь сонсох зорилгоор энэ сарын 24-25-ны өдрүүдэд Сүхбаатарын талбайд “Нээлттэй хаалганы өдөрлөг” зохион байгуулах гэж байна.

Тус өдөрлөгт ЗТХЯ, Иргэний нисэхийн ерөнхий газар, МИАТ ТӨХК, УБТЗ ХНН, Монголын төмөр зам ТӨХК, Галт тэрэгний хөдөлгөөн зохицуулалтын нэгдсэн төв, Автотээврийн үндэсний төв, Зам, тээврийн хөгжлийн төв, Далайн захиргаа болон салбарын төслийн нэгжүүд үйл ажиллагаагаа, ажлын үр дүнгээ танилцуулахаас гадна иргэд олон нийтэд чиглэсэн үйлчилгээг хөнгөлөлттэй, түргэн шуурхай үзүүлэх юм байна.

Тухайлбал, Техникийн хяналтын үзлэг оношлогоо хийж зөвлөгөө, зааварчилгаа өгөх, Улс, хот хоорондын ачаа, зорчигч тээвэрлэж байгаа тээврийн хэрэгслийн байршил тогтоох, тээврийн хэрэгслийн улсын дугаар олгох, шилжилт хөдөлгөөн импортын бүртгэл хийх, Тээврийн хэрэгслийн лавлагаа олгох, хасалт хийх зэрэг автотээврийн чиглэлээр үйлчилгээ мэдээлэл авах боломжтой юм. Мөн Мэргэшсэн жолоочийн шалгалт, лавлагаа өгөх, Онлайн тасалбар борлуулалтын системийн үйл ажиллагаатай танилцах, Улс, хот хоорондын нийтийн зорчигч болон ачаа тээвэр, шуудан, жуулчин тээвэрлэлтийн үйлчилгээний талаарх мэдээллийг нэг дороос цогцоор нь авч болох аж.

Түүнчлэн МИАТ ТӨХК-ийн катеринг буюу хоолны үйлчилгээний амталгаа, билет захиалгын үйлчилгээг авахаас гадна АН-2, ТВС-2 зэрэг онгоцууд тус өдөрлөгийн сонирхолтой үзүүлэнгийн нэг болох аж. Мөн хуучин автомашины үзэсгэлэн, шинэ техник технологийн үзэсгэлэн гаргаж, хонжворт сугалааны үйл ажиллагаа зохион байгуулахаар төлөвлөжээ.

Мөн УБТЗ-аас хөгжлийн бэрхшээлтэй иргэдэд зориулсан тусгай галт тэрэгний талаарх танилцуулга мэдээлэл өгч, үйлчилгээг сайжруулж, билет захиалга, интернет захиалга зэрэг үйлчилгээгээ олон нийтэд танилцуулах юм байна.

Энэ сарын 21-ний өдөр буюу ирэх бямба гаригийн 19:30 цагт НӨАТ-ын ээлжит сугалаа болох ажээ. “Боловсрол суваг” телевизээр сугалааны тохирлыг орон даяар шууд дамжуулан үзүүлнэ. Энэ удаагийн тохиролд өнгөрсөн сарын 1-нээс 30-ны хооронд худалдан авалт хийж, бүртгүүлсэн баримтууд хамрагдах юм байна. Супер сугалааны шагналын сан 250 сая төгрөг. Иргэд өнгөрсөн сард худалдан авалт хийсэн баримтаа дөрөвдүгээр сарын 20-ны 23:59 цагаас өмнө www.ebarimt.mn цахим хуудсанд бүртгүүлснээр сугалаанд хамрагдах боломжтой.

Баянгол дүүргийн 4-р хороо буюу Ажилчны гудамжинд байрлах хөөсөнцөр хавтангийн үйлдвэрт гал гарсан. “NOTS” ХХК-ний үйлдвэрт гарсан галыг унтраахаар Нийслэлийн онцгой байдлын гал унтраах гурван анги шуурхай алба ажиллалаа. Галд хүн өртөөгүй бөгөөд галын шалтгааныгодоохондоо мэдээлэх боломжгүй гэлээ.

Хөөсөнцөр хавтангийн үйлдвэрт гарсан галыг онцгой албаныхан унтраах үед ус шүршигч хоолой хүрэхгүйн улмаас зөөврийн усаар галыг унтраажээ. Хүчтэй гал гарсан учраас богино хугацаанд хөөсөнцөр хавтанд гал тарсан ч Онцгой байдлын албаныхан цаг алдалгүй ирж, унтраажээ.

“Ардын үг” иргэдийн зөвлөлдөх аяны ээлжит хэлэлцүүлэг “Бүх нийтээр мод тарих өдөр” буюу өнгөрсөн бямба гаригт боллоо. Энэ өдрийг сонгож хэлэлцүүлэг зохион байгуулсан нь Ерөнхийлөгчийн “Ногоон хөгжил, баялаг бүтээгчдээ дэмжих” чиглэлд хийсэн ажилд “Ардын эксперт”-үүд дүн тавьсантай холбоотой юм. Ерөнхийлөгчийн хувьд бүх нийтээр мод тарих санаачилгыг эхлүүлж, хулгайн мод бэлтгэх, тээвэрлэхийг хориглох шийдвэр гаргасан байна. Мөн баялаг бүтээгчдээ дэмжих, байгаль орчноо хамгаалах чиглэлд олон шинэлэг даацтай санал, санаачилга гаргаж ажилласан билээ. Тиймээс ч хөндлөнгийн, хараат бус “МЕК” судалгааны байгууллагын санамсаргүй түүврийн аргаар сонгосон “Ардын эксперт”-үүд “Ардын үг” иргэдийн зөвлөлдөх хэлэлцүүлэгт оролцож, Ерөнхийлөгчийн “Ногоон хөгжил, баялаг бүтээгчдээ дэмжих” чиглэлд хийсэн ажилд 10-аас 8.7 оноо өглөө.

Монгол Улсын Үндэсний статистикийн хорооноос 2017 оны нийгэм, эдийн засгийн байдлын эхний дөрвөн сарын мэдээллийг гаргажээ. Тухайлбал, Хүүхэд оролцсон гэмт хэрэг өмнөх оны мөн үеэс 39-өөр буюу 14.3 хувиар өсчээ. Харин эмэгтэй хүн оролцсон гэмт хэрэг буурсан үзүүлэлттэй гарсан байна.

Улсын хэмжээнд нялхсын эндэгдэл 359 болж, өмнөх оны мөн үеэс 217-оор буюу 37.7 хувиар буурсан бол эхийн эндэгдэл дөрөвдүгээр сард тав болж, өмнөх оны мөн үеэс 12-оор буюу 70.6 хувиар буурчээ. Харин 100.000 амьд төрөлтөд ногдох эхийн эндэгдэл эхний дөрвөн сард 21.9 болж, өмнөх оны мөн үеэс 45-аар буурсан үзүүлэлттэй гарсан байна.

Улаанбаатар хотод дөрөвдүгээр сард ХДХВ/ДОХ-ын хоёр тохиолдол илэрч, улсын хэмжээнд бүртгэгдсэн нийт тохиолдол 236 болсон байна.

Нийгмийн даатгалын сангийн орлого 647.3 тэрбум төгрөг болж мөн оны өмнөх үеэс 111.1 тэрбум төгрөгөөр буюу 20.7 хувиар буурч зарлага 12.3 хувиар өсчээ.

Өрхийн сарын дундаж орлого 893.3 мянган төгрөг болж, өмнөх оны мөн үеэс 5.2 хувиар өссөн байна. Нэг өрхийн сарын дундаж мөнгөн орлого өсөхөд цалин хөлсний орлого 5.8 хувиар, тэтгэврийн орлого 14.8 хувиар, хөдөө аж ахуйн үйлдвэрлэлийн орлого 9.2 хувиар өссөн нь голлон нөлөөлжээ.

О.ӨНӨР