Month: May 2017

Categories
мэдээ цаг-үе

Х.Ариунбат: Багынхаа мөрөөдлийг гүйцээхийн тулд параглайдингийн спортыг сонгосон

Индонез, Голландын тамирчидтай шагналын тавцнаа

Малайз улсын параглайдингийн үндэсний аварга шалгаруулах Олон улсын нээлттэй тэмцээний цэгэн буултын төрөлд “Paragliding club Mongolia” клубийн багш-нисэгч Х.Ариунбат хүрэл медаль хүртсэн юм. Монгол Улс анх удаа далавч хэлбэртэй шүхрээр өндөрлөг газраас хөөрч нисдэг энэхүү төрлөөр гадны нэр хүндтэй тэмцээнээс медаль хүртсэн нь энэ. Хүрэл медаль хүртсэн Х.Ариунбаттай ярилцлаа.

-Та энэ спортоор хэдэн жил хичээллэж байна вэ?

-2005 оноос параглайдингийн спортоор хичээллэж байна.

-Олон төрлийн спорт бий. Гэтэл та яагаад тэдгээрээс параглайдингийн спортыг сонгосон юм?

-Миний багын мөрөөдөл л дөө. Багаасаа л нисэхийг хүсдэг байлаа. Мөрөөдлөө дагаж энэ спортоор хичээллэсэн. Нэг үгээр багын мөрөөдлөө гүйцээхийн тулд энэ спортыг сонгосон. Би тухайн үед ийм далавч хэлбэртэй шүхэр байдгийг мэддэггүй байлаа. Онгоцны шүхрийг л мэддэг байсан. Надад уг спортын анхны “А” үсгийг зааж энэ спортод хөл тавихад тусалсан хүн бол Ж.Цэлмэг багш. Би өөр ямар нэгэн төрлийн шүхрээр нисч үзэлгүй анх параглайдангаар ниссэн л дээ.

-Параглайдангийг бид кино, гадны бичлэгүүдээс л илүүтэй хардаг. Гэтэл Монголд энэ спортын холбоо, клуб хэдийнэ байгуулагдчихсан юм байна?

-Манай клуб байгуулагдаад хоёр жил гаруй болсон бол холбоо байгуулагдаад удаагүй, саяхан байгуулагдсан.

-Сая оролцож хүрэл медаль хүртсэн тэмцээнийхээ тухай сонирхуулаач?

-Малайзын үндэсний аварга шалгаруулах олон улсын тэмцээн байсан. Би цэгэн буултын төрөлд оролцсон. Газарт тавьсан цэг дээр буух төрөл л дөө. Оноо цуглуулж шилдгүүдээ шалгаруулдаг юм. 28 орны 74 тамирчин өрсөлдсөнөөс алтан медалийг Индонез, мөнгөн медалийг Голландын тамирчин хүртсэн. Харин би хүрэл медалийн эзэн болсон. Энэхүү хүрэл медаль нь агаарын спортын энэ төрлөөр монголчуудын гадны томоохон тэмцээнээс хүртсэн анхны медаль гэдгээрээ онцлог.

-Энэ төрлөөр хичээллэе, сонирхож үзье гэвэл хаана хандвал болох вэ?

-Манай клубийн фэйсбүүк дэх хуудсанд хандахад болно. Уг хуудсанд манай багш, дасгалжуулагчидтай холбогдох утас бий. 88012123, 88045464 гэсэн дугаарын утсуудаар холбогдож болно. Бидэнтэй ирж уулзаад техник хэрэгсэлтэй танилцаж, энэ спортын тухай мэдээлэл аваад ганц удаагийн нислэг хийж болно. Ихэнх хүмүүст шүхрээр буух, нисэх мөрөөдөл байдаг шүү дээ. Мөрөөдөл биш юмаа гэхэд ганц удаа нисээд үзэхсэн гэсэн нууцхан хүсэл байдаг.

-Нэг удаа нисээд үзье гэвэл үнэ ханш нь ямар байх вэ. Нисэхээр очихдоо хувийн зүгээс ямар бэлтгэл хангах ёстой вэ?

-Зуны цагт нэг их айхавтар бэлдээд байх зүйлгүй, хүрээд ирж болно. Бид цаанаас нь бүх хэрэгслүүдийг нь бэлтгээд өгчихнө. Биедээ тохирсон хувцастай ирэхэд л болно. Нэг нислэг нь 50 мянган төгрөгийн үнэтэй байдаг юм.

-Хаанаас нисдэг вэ?

-Хан-Уул дүүргийн Яармагийн Арцатын амнаас хөөрдөг.

-Параглайдингийн спорт хүнд ямар чадвар өгдөг вэ?

-Шүхрээ үүрээд уул руу, өндөрлөг газар руу алхана. Тиймээс байнгын алхалттай. Эрүүл мэндэд маш чухал, хэрэгтэй спорт. Нисэх ер нь гоё шүү дээ. Ямар ч стрессгүй, бүх юмыг мартаад агаарт нисч явна гэдэг чинь гоё л доо. Энэ чинь онгоцны шүхрийн төрлөөс огт өөр. Онгоцны шүхрийн хувьд тээр дээр нисч яваад шүхэрчдээ хаячихдаг. Харин энэ спорт нь ямар нэг уул, довцгийг ашиглаад халсан агаарыг ашиглаад өндөрт хөөрч нисдэг онцлогтой л доо.

-Тэгвэл өвөл яадаг юм?

-Өвлийн улиралд бид шулуун нислэг хийнэ. Салхи ашиглаад жаахан нисч байгаад буучихдаг.

-Тэгвэл зуны улиралд энэ спортоор хичээллэвэл илүү тохиромжтой юм байна?

-Тийм шүү. Манай клуб саяхан дөрвөн хүнийг сургаад дуусгалаа. Малайзад болсон тэмцээнд манай хоёр сурагч надтай хамт явж тэмцээнд оролцож, олон орны шүхэрчидтэй өөрсдийгөө харьцуулаад олон зүйл сураад ирсэн шүү.

-Параглайдингийн далавчтай хүмүүс байвал танайд барьж очоод заалгаад нисч болох уу?

-Ер нь хүмүүст зөвлөхөд далавчаа түрүүлж авахаасаа өмнө яаж нисэх вэ, хэрхэн хөөрдөг вэ гэдгээ сурчихсан нь дээр байдаг юм. Энэ спорт чинь экстрим мөн өртөг өндөртэй спорт учир явцын дунд шантраад буцдаг хүмүүс байдаг. Эхэлж ирж сураад “Энэ спорт надад тохирох нь уу” гэдгээ мэдэж авсныхаа дараа далавчныхаа сонголтыг хийсэн нь дээр.

-Далавч нь хэдий хэрийн хэмжээтэй юм?

-Далавчны хэмжээ нь тухайн тамирчныхаа биеийн жин, өндөр зэрэг үзүүлэлтээс хамаарч янз янз байдаг. Тухайн хүнийхээ жинд нь тохирсон заасан хэмжээ бий л дээ. 60 кг-тай хүн байлаа гэхэд 50-65 кг-ын жинтэй хүмүүсийн нисдэг далавчийг хэрэглэнэ гэсэн үг. Далавч тус бүрт даацын хэмжээ гэж бий. Далавчны урт нь огт хамаагүй. Жиндээ тохирсон далавчаар л нисэх ёстой.

-Далавч нь тэгэхээр төрөлтэй байх нь?

-Тэгэлгүй яахав. Сургалтын далавчаас эхэлнэ. Тухайн далавчаараа сайн нисч сурсны дараа дараагийн шатны далавчаар нисдэг. A, B, C, D гэсэн шатлалаар далавчаа сонгоно. Ерөнхий мэдлэгтэй болж, ер нь боллоо гэж үзвэл В шатны далавчаар нисч эхэлнэ. Энэ мэтээр тамирчны ур чадвар дээшилсээр С, D ангиллын далавчаар нисдэг. D ангиллын далавчаар холын зайнд ниснэ. Холын зайн тэмцээнд цэг заагаад өгчихдөг. Жишээ нь, Яармагаас гараад Тэрэлж хүрэх гэдэг ч юм уу. Цэгийг нь тодорхой заагаад өгчихдөг юм.

-Одоо та бүхний оролцох дараагийн том тэмцээн хэзээ, хаана болох вэ?

-Азийн аварга шалгаруулах тэмцээнд оролцох төлөвгөөтэй байна. Одоогоор уг тэмцээний тов тодроогүй байгаа. Ер нь аливаа тамирчны хувьд дэмжлэг туслалцаа хамгийн чухал. Намайг дэмждэг бүх хүнд баярлалаа. Аав, ээждээ баярлалаа. Ж.Цэлмэг багш, мөн тэмцээнд ороход их дэмжлэг үзүүлсэн “Төрийн банк”-ны хамт олон, орлогч захирал Б.Энхсайхан, гүйцэтгэх захирал Б.Цэндсүрэн нартаа баярлаж талархсанаа танай сониноор дамжуулан илэрхийлж байна.


Categories
онцлох-нийтлэл туслах-ангилал

Баабарын “Фэн Шүй” нийтлэл хэвлэгдлээ

“Өдрийн сонин”-ы лхагва гаригийн дугаар 20 нүүрээр хэвлэгдэн, захиалагчдадаа хүрлээ. Энэ өдрийн дугаарт гарсан нийтлэл, сурвалжлага, ярилцлага, мэдээ мэдээллээс онцолж, тоймлон хүргэж байна.

Улс төрийн хоёрдугаар нүүрт УИХ-ын гишүүн Д.Эрдэнэбаттай хийсэн “Монголбанкны шалгалт улстөржсөн хардалт байсан” ярилцлага нийтлэгдлээ.

Чингэлтэй дүүргийн 49 дүгээр сургуулийн сургалтын менежер Л.Өлзийхишиг энэ сарын 25-ны өдөр орон даяар зохион байгуулагдсан арванхоёрдугаар ангийн математикийн хичээлийн улсын шалгалтын хариултыг цахим сүлжээгээр тараасан хэрэгт буруутгагдаад байгаа. Тэгвэл хариуг задалсан хэмээн буруутгагдаад байгаа П.Өлзийхишиг өөрийгөө буруугүй гэлээ. Тэрээр надаас өмнө аль хэдийнэ тараагдчихсан байсан хэмээн манай сонинд ярилцлага өгсөн байна.

МҮБХ-ны ээлжит “Их Эе” хуралдааныг хуралдуулж шинэ тэргүүнээ сонгосон талаар ээлжит бус “Их Эе”-ийг зохион байгуулах ажлын хэсгийн дарга Үржингийн Хүрэлбаатартай хийсэн “Их Эе” хуулийн дагуу хуралдаж шийдвэр гарсан болохоор шинээр сонгогдсон тэргүүнээ хадаг сүүтэй угтах хэрэгтэй” ярилцлага өнөөдрийн дугаарт нийтлэгдлээ.

“Приус импортлогчид татварын хөнгөлөлт хэрэгжиж эхлэхийг хүлээж байна” өдрийн сурвалжлагыг өнөөдрийн дугаараас хүлээн авч уншина уу. Удтал эсэргүүцэн тэмцсэний эцэст ард түмний унаа болсон приус машин татваргүй үнээр бидэнд хүрэх үү гэдгийг чуулганаар удахгүй хэлэлцэнэ. Энэ талаарх төслийг Сангийн сайд Б.Чойжилсүрэн өнөөдөр Их хурлын даргад өргөн барьсан юм.

“Яг түүн шиг” шоуны бүжигчдийн ур чадвар оролцогчдыг багагүй чимдэгийг үзэгчид маань андахгүй буй заа. Тэгвэл тус шоуны бүжигчдийг бэлтгэдэг “Аim4R” продакшны “The STAGE Assassins” студийн захирал, бүжгийн багш Э.Батзоригтой хийсэн сонирхолтой ярилцлагыг “Соёл, урлаг” булангаас хүлээн авч уншаарай.

Дэлгэрэнгүй мэдээ, мэдээллийг цахимаар уншихыг хүсвэл дараах линкэд бүртгүүлнэ үү. https://admin.dnn.mn/plugins/news/login/

Эдгээр болон бусад цаг үеийн мэдээ мэдээлэл, ярилцлагуудыг “Өдрийн сонин”-ы лхагва гаригийн дугаараас уншаарай.

Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудан, “Улаанбаатар”, “Скай” шуудангийн салбаруудаас очиж авч болох ба сонин борлуулах бүхий л цэгүүд, Хэвлэлийн биржээс худалдан авах боломжтой юм. Мөн “Мөнгөн завъяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдах авч болохыг дуулгая. “Өдрийн сонин”-ы өөрийн байранд ирж худалдан авч бас болно.

“Өдрийн сонин”-той холбоотой бүхий л мэдээллийг Мэдээлэх эрхийн утас 19001987-гоос лавлаж болох ба захиалга өгөхийг хүсвэл 9911-2954, 8811-1375 дугаарт холбогдоно уу. Хэрэв цахим хэлбэрээр нь захиалахыг хүсвэл 88071920 дугаарт холбогдож дэлгэрэнгүй мэдээллийг лавлаарай.

“ӨДРИЙН СОНИН” ӨГЛӨӨ БҮХЭН ТАНТАЙ ХАМТ

Categories
мэдээ улс-төр

​Ж.Мөнхбат: Оюу толгойн 34 хувь зарагдсан гэх худал мэдээлэл түгээж байна

Өнөөдөр Munkhbayasgalan Bayasgalan фэйсбүүк хаягнаас “Рио-тинтод Оюутолгойн 34 хувь зарагджээ” гэсэн мэдээлэл олон нийтийн сүлжээнд түгсэн юм. Тэгвэл энэ мэдээллийг үгүйсгэн Засгийн газрын Хэрэг эрхлэх газрын дарга Ж.Мөнхбат мэдээлэл хийлээ.

Тэрбээр “Нийгмийн сүлжээгээр Munkhbayasgalan Bayasgalan фэйсбүүк хаягнаас Рио тинтод Оюутолгойн 34 хувь зарагджээ гэдэг оргүй худал мэдээлэл. Сонгуультай холбоотой худал мэдээлэл явж байгаад харамсаж байна. Оюутолгой 34 хувь Монголын мэдэлд байгаа. Энэ талаар Засгийн газраас ямар нэгэн шийдвэр гараагүй. Оюутолгой 34 хувийг зарахтай холбоотой ямар нэгэн асуудал яригдахаар боллоо гэхэд УИХ-аар орж шийдэгдэх учраас энэ бол илт гүжирдсэн, Ерөнхийлөгчийн сонгууль болох гэж байгаатай холбоотойгоор санаатайгаар тарааж байгаа мэдээлэл” гэв.

Categories
мэдээ улс-төр

​Ц.Мөнх-Оргил: Хятад иргэд визгүй зорчиж байгаа гэдэг худал мэдээлэл

Өнөөдөр Гадаад харилцааны сайд Ц.Мөнх-Оргил хятад иргэдийг Монголд визгүй зорчиж байгаа гэсэн худал мэдээлэл сонгууль дөхсөнтэй холбоотой хэвлэл мэдээллийн хэрэгслээр тарж байна хэмээн мэдэгдээд дараахь мэдээллийг хийв.

Гадаад харилцааны сайд Ц.Мөнх-Оргил: Сүүлийн үед хэвлэл мэдээллийн хэрэгслээр сонгууль дөхөж байгаатай холбоотой хоёр хөршийн талаар худал хуурмаг мэдээллүүд явж байна. Санаатайгаар төр засгийн бодлогыг буруу талаас нь ойлгуулах гэсэн асуудал явж байна. Энэ Засгийн газар БНХАУ-ын иргэдийг визгүй оруулдаг болох гэж байна гэсэн мэдээллийг удаа дараа хэвлэл мэдээллийн хэрэгслээр тарааж байна. Хариуцлагатайгаар хэлэхэд энэ Засгийн газар тийм шийдвэр гаргаагүй. Өнөөдөр БНХАУ-ын иргэд хууль тогтоомжийн дагуу визээ аваад орж ирж байгаа. Гадаад харилцааны асуудал, тэр тусмаа хоёр хөрштэй холбоотой асуудлыг сонгуулийн тоглоом болгож болохгүй. Тиймээс ийм явуургүй, байгаа байдлыг худал хуурмагаар тайлбарласан худал мэдээлэлд автагдахгүй байхыг хүсч байна.
О.ӨНӨР

Categories
мэдээ эдийн-засаг

​Доллар 2403 төгрөгийн ханштай байна

Долларын ханшийн мэдээг хүргэж байна. “Найман шарга” валют арилжааны төв дээр өнөөдөр 16:50 цагийн байдлаар ам.долларыг 2398 төгрөгөөр авч, 2.403 төгрөгөөр арилжаалж байв. Харин еврог 2680 төгрөгөөр авч, 2690 төгрөгөөр худалдаалж байсан бол Хятадын юанийг 350.0 төгрөгөөр авч, 351.5 төгрөгөөр зарж байна.

Categories
онцлох-нийтлэл туслах-ангилал

Төр төлбөрийг нь хариуцдаг эрүүл мэндийн тусламж, үйлчилгээтэй холбоотой журмыг батлав

Засгийн газрын хуралдаан 2017.05.30-нд болж дараахь асуудлуудыг хэлэлцэн шийдвэр гаргалаа.

Төр төлбөрийг нь хариуцдаг эрүүл мэндийн тусламж, үйлчилгээтэй холбоотой журмыг батлав

Журмыг баталснаар хувийн хэвшлийн эрүүл мэндийн байгууллагын үзүүлэх тусламж, үйлчилгээг нийгмийн даатгалын байгууллагаар дамжуулан төр худалдан авах, улсын эмнэлгийн ачааллыг бууруулах зэрэг олон давуу тал бий болно гэж Хөдөлмөр, нийгмийн хамгааллын яам үзэж байна.
Төр төлбөрийг нь хариуцах удаан хугацааны нөхөх эмчилгээ, гемодиализ эмчилгээг эрүүл мэндийн даатгалын байгууллагаар дамжуулан гэрээгээр санхүүжүүлж эхэлсэн. Ингэснээр хувийн эмнэлгийн үзүүлж байгаа гемодиализийн тусламж, үйлчилгээг төр худалдан авах нөхцөл өнгөрсөн гуравдугаар сараас бүрдсэн юм.
Тухайлбал, хувийн эмнэлэгт нэг удаа 160 мянга орчим төгрөгөөр гемодиализийн эмчилгээг төлбөртэй хийлгэж байсан /7 хоногт гурван удаа 480 мянган төгрөг/ иргэн, даатгуулагчийн эмчилгээний төлбөрийг төр хариуцах болсноор эмчилгээнд мөнгө төгрөг зарахгүй, улсын эмнэлгийн ачаалал ч буурч байна.
Хуульд заасны дагуу:
– жирэмсэн, төрөлт, төрсний дараах үетэй холбоотой эх барихын тусламж, үйлчилгээний зардал
– төрийн өмчийн эрүүл мэндийн байгууллагаас хүүхдэд үзүүлэх зарим тусламж, үйлчилгээ
– халдвар судлал, заавал хийх болон тархвар судлалын заалтаар хийх дархлаажуулалт, халдварт өвчний голомтын ариутгал, халдваргүйтгэл
– яаралтай түргэн тусламж, өрх, сум, тосгоны хэмжээнд үзүүлэх зарим тусламж, үйлчилгээ, гамшиг, нийтийг хамарсан халдварт өвчний дэгдэлтийн үеийн тусламж, үйлчилгээ
– аргагүй хамгаалалт, гарцаагүй байдалд хүний амь нас аврахаар яваад гэмтсэн, өвчилсөн хүний эмчилгээ
– сүрьеэ, хорт хавдар, сэтгэцийн эмгэгийн зарим эмчилгээ
– удаан хугацааны нөхөх эмчилгээ шаардах эмгэгийн болон хөнгөвчлөх эмчилгээний зарим эмийн зардал
– бие махбодын болон бэлгийн хүчирхийлэл, мөлчлөгийн хохирогч нарт үзүүлэх эрүүл мэнд, сэтгэцийн сэргээн засах тусламж, үйлчилгээний зардлыг төр хариуцдаг юм.
“Онцгой комиссын ажиллах журам”-д өөрчлөлт оруулав
Журамд тусгаснаар Улсын онцгой комиссын нарийн бичгийн даргаар онцгой байдлын асуудал эрхэлсэн төрийн захиргааны байгууллагын удирдах албан тушаалд таваас доошгүй жил ажилласан, хурандаа, эсвэл түүнээс дээш цолтой албан хаагчийг томилох юм.
Мөн комиссын Ажлын алба орон тооны таван гишүүнтэй байх бөгөөд Онцгой байдлын ерөнхий газрын орон тооны хязгаарт багтана гэж нэмэлт, өөрчлөлт оруулсан байна.
Гамшгийн голомтод ажиллах, хор уршгийг арилгах, хойшлуулшгүй сэргээн босгох арга хэмжээг удирдан зохион байгуулах, эдгээрт оролцож байгаа байгууллага, хуулийн этгээдийн ажлыг уялдуулан зохицуулах үүрэг бүхий Шуурхай бүлэг томилон ажиллуулах, аймаг, нийслэлийн Онцгой комисс нь гамшгийн улмаас учирсан хохирлыг арилгах, сэргээн босгоход шаардагдах нэмэлт санхүүжилт хүсэхдээ тухайн онд баталсан Засаг даргын нөөц хөрөнгийн зарцуулалтын тайлан, санхүүгийн анхан шатны материалыг Улсын онцгой комисст ирүүлэх ёстойг нэмж тусгажээ.

Товч мэдээ:

– “Багануур”, ”Шивээ Овоо” компанийн өвөлжилтийн бэлтгэлийг хангахын тулд хангалттай хэмжээний дизель түлш, шатахууны нөөц бүрдүүлэн, хөрс хуулалт, их засварыг хугацаанд нь хийж, нүүрсний нөөцийг хэвийн хэмжээнд байлгахыг сайд П.Ганхүү, Ц.Дашдорж болон “Эрдэнэс Монгол” компанийн гүйцэтгэх захирал Ц.Түмэнцогт нарт даалгав.
– Монгол Улсын нэгдсэн төсвийн 2016 оны гүйцэтгэл, Засгийн газрын санхүүгийн нэгтгэсэн тайланг хэлэлцээд “Монгол Улсын 2016 оны төсвийн гүйцэтгэлийг батлах тухай” УИХ-ын тогтоолын төслийг өргөн мэдүүлэхээр тогтов. Төсөл батлагдсанаар 2016 оны орлого, зарлагын нийт хэмжээ батлагдаж, төсвийн ашгийг /алдагдлыг/ тодорхойлох боломж бүрдэх юм.
– Энэ оны нэгдүгээр улиралд сайд, яам, агентлагийн дарга нарт иргэдээс 53830 өргөдөл, гомдол ирүүлсний 50915-ыг нь буюу 94 гаруй хувийг нь хуулийн хугацаанд шийдвэрлэжээ. Иргэд нийгмийн халамжид хамрагдах, мөнгөн тусламж, тэтгэвэр, тэтгэмж, ажил хийх, газар эзэмших, ашиглахтай холбоотой асуудлаар голлон хандсан байна.
– Олон улсын хөрөнгө оруулалтын банк үүсгэн байгуулах тухай хэлэлцээр болон дүрэмд нэмэлт, өөрчлөлт оруулах тухай 2015 оны протоколыг соёрхон батлах тухай хуулийн төслийг УИХ-д өргөн мэдүүлэхээр боллоо. Манай улс Олон улсын хөрөнгө оруулалтын банкны гишүүний хувьд дээрх хэлэлцээр болон дүрэмд орж байгаа нэмэлт, өөрчлөлтийг хүлээн зөвшөөрч, гишүүний эрхээ хадгалах боломжтой болох юм.
– Эдийн засгийн хамтын ажиллагааны олон улсын банк үүсгэн байгуулах болон банкны үйл ажиллагааны тухай 1963 оны 10 дугаар сарын 22-ны өдрийн хэлэлцээр, банкны дүрэмд нэмэлт, өөрчлөлт оруулах тухай протоколыг соёрхон батлах тухай хуулийн төслийг УИХ-д өргөн мэдүүлэхээр боллоо.
– Цагдаагийн алба хаагчдын дүрэмт хувцасны загвар, эдэлгээний хугацаа, дүрэмт хувцасны мөнгөн хангамж олгохтой холбоотой журмыг баталлаа. Цаашид шаардагдах зардлыг өмнөх дүрэмт хувцасны нөөц, эдэлгээний хугацаатай уялдуулан Цагдаагийн ерөнхий газрын төсөвт тусгаж, үе шаттай хэрэгжүүлэхээр тогтлоо.
– Стандартчилал, техникийн зохицуулалт, итгэмжлэлийн тухай хуулийн төслийг хэлэлцээд УИХ-д өргөн мэдүүлэхээр тогтов. Хууль батлагдсанаар стандартчилал, техникийн зохицуулалт, итгэмжлэл, тохирлын үнэлгээ олон улсын нийтлэг жишгийн дагуу явах эрх зүйн орчин, нөхцөл бүрдэх зэрэг олон ач холбогдолтой юм.
– Хөдөлмөр, нийгмийн хамгааллын салбарын ажилтны өдрийг жил бүрийн 05 дугаар сарын гуравдахь бямба гаригт тэмдэглэж байхаар тогтлоо гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Categories
мэдээ улс-төр

2018 оны төсвийн хүрээний мэдэгдлийг анхны хэлэлцүүлгээр батлахыг дэмжив

УИХ-ын Төсвийн байнгын хорооны хуралдаанаар Монгол Улсын нэгдсэн төсвийн 2018 оны төсвийн хүрээний мэдэгдэл, 2019-2020 оны төсвийн төсөөллийн тухай хуулийн төсөл болон хууль батлагдсантай холбогдуулан авах арга хэмжээний тухай УИХ-ын тогтоолын төслийн анхны хэлэлцүүлгийг хийлээ.

Хэлэлцэж байгаа асуудалтай холбогдуулан УИХ-ын гишүүд асуулт асууж, санал хэлж, байр сууриа илэрхийлэв. Төсвийн байнгын хорооны дарга Ч.Хүрэлбаатар “ОУВС-ийн хөтөлбөрт багтсан хэдий ч энэ нь Монгол Улсын эдийн засаг сайжирлаа, тогтвортой боллоо гэсэн баталгаа биш. Иймд Засгийн газар макро эдийн засгийн бодлогын хүрээнд 2018 онд эдийн засгийг богино хугацаанд тогтворжуулах бодлого хэрэгжүүлж, эдийн засгийн өсөлтийг нэмэгдүүлэхэд үр дүнтэй ажиллах хэрэгтэй. Түүнчлэн ОУВС-тай тохирсон зүйл дээрээ хатуу байр суурьтай байх шаардлагатай” хэмээн онцгойлон анхааруулж байлаа.

Ингээд гишүүдийн зүгээс зарчмын зөрүүтэй санал гараагүй тул хууль, тогтоолын төслүүдийг анхны хэлэлцүүлгээр батлах санал гаргаж, хуралдаанд оролцсон гишүүдийн 66,7 хувь нь дэмжлээ.

Categories
мэдээ нийгэм

Нийслэлийн шилдэг сурагчдад шагнал гардууллаа

Эрдэм мэдлэг, авьяас чадвараараа үеийнхнээ манлайлж, хот, улс, олон улсын чанартай олимпиад, уралдаан тэмцээнд тэргүүлэн, амжилт гаргасан сурагчдад Нийслэлийн Засаг дарга С.Батболдын нэрэмжит “Нийслэлийн шилдэг сурагч” шагнал гардууллаа.

Сүхбаатар дүүргийн 11 дүгээр сургуулийн 12 дугаар ангийн сурагч, математикийн хичээлийн улсын олимпиадын аварга Г.Өнөржаргал, Сүхбаатар дүүргийн 1 дүгээр сургуулийн 12 дугаар ангийн сурагч, математикийн хичээлийн улсын олимпиадын аварга Т.Өнөболд, Баянзүрх дүүргийн Их засаг сургуулийн 12 дугаар ангийн сурагч, орос хэлний хичээлийн хотын олимпиадын аварга Д.Цолмон, Чингэлтэй дүүргийн 12 дугаар ангийн сурагч, орос хэлний хичээлийн хотын олимпиадын аварга Б.Дөлгөөн, Сүхбаатар дүүргийн 12 дугаар ангийн сурагч, англи хэлний хичээлийн хотын олимпиадын аварга Б.Хатанбүүвэй, Сүхбаатар дүүргийн Шинжлэх ухаан, технологийн ахлах сургуулийн 12 дугаар ангийн сурагч, англи хэлний хичээлийн хотын олимпиадын аварга Б.Мэнд-Амгалан нарын 22 сурагчид хотын дарга шагналыг нь гардуулан өглөө.

Тэрбээр хот, улс, олон улсын чанартай олимпиад, уралдаан тэмцээнд тэргүүлж, нийслэлийнхээ нэрийг өндөрт өргөсөн сурагчдад баяр хүргээд сурлагын өндөр амжилт хүслээ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Categories
онцлох-нийтлэл туслах-ангилал

Наршихаас сэргийлээрэй

Ойрын өдрүүдэд хэт халуун бүгчим өдрүүд үргэлжлэх төлөвтэй байгаа тул та бүхэнд наршихаас урьдчилан сэргийлэх, наршсан тохиолдолд авах арга хэмжээг хүргэж байна.

Урьдчилан сэргийлэлт :

Амралт зугаалгын үе эхэлсэнтэй холбогдуулан иргэд халуун нар төөнөж байгаа энэ үед наршихаас сэргийлэхдээ дараах арга хэмжээг авна.

Даралт ихтэй, нас өндөр, хүүхэд багачууд, бие тааруухан, ядаргаа ихэссэн, зүрх судасны өвчин, чихрийн шижин зэрэг хүмүүс гэрээс гарахыг аль болох зайлсхийх

Нарны малгай өмсөх, нарны хамгаалалтай шүхэр хэрэглэх

Шингэн ус сайн уух

Хурц нартай үед наранд удаан хугацаагаар явахгүй байх

Илрэх шинж тэмдэг:

Бие суларч тамир тэнхээ алдах

Толгой эргэж, өвдөх

Биеийн халуун нэмэгдэх

Цээж багтран амьсгаа цухалдах

Царайны өнгө цонхийж цайх,

Бөөлжис хүрч, дотор муухайрах

Хөлс гарах нь багасах/ ихсэх/

Нүүр чинэрэн улайж, цээж багтран амьсгаа цухалдах

Авах арга хэмжээ:

Сэрүүхэн нам тайван газарт шилжүүлэн амруулах, / Сүүдэрт, сэрүүн өрөөнд гэх мэт /

Бүлээн шингэн уулгах / чихэртэй ус, цэвэр ус /

Хүйтэн жин тавих

Арьсны нимгэн хэсэгт хүйтэн жин тавих /мөстэй уут тавих юм уу спиртээр биеийг нь арчих/

Массажилж, иллэг хийж , цусны эргэлт нь зогсохоос сэргийлэх хэрэгтэй

Б.УЯНГА

Categories
энтертаймент-ертөнц

Монгол эмэгтэй АНУ-ын нисэх хүчний ахмад болжээ

Монголчууд дэлхийн тавцанд өөрсдийн хүч хөдөлмөрөө үнэлүүлэн явж байгаа сайхан жишээ олон бий. Тэгвэл түүний нэг үлгэр жишээ болсон бүсгүйн талаар таатай мэдээлэл хүргэх гэж байна. Монгол улсын иргэн Ж.Мөнхсаран, АНУ-ын Captain Air forse буюу тус улсын нисэх хүчний ахмад болсон тухай мэдээлэл цахим орчинд тарж байна. Ж.Мөнхсаран нь тус улсад суралцаж төгсөөд нисэх хүчинд ажилд орсон аж.

АНУ-д агаарын хүчний болон хээрийн ангийн ажилтнууд нь гурван шатлалаар цол хүртдэг байна. Харин ахмад цолонд хүрэхийн тулд тус албандаа хоёр жилийн хугацаанд ажилласан байх шаардлагатай байдаг аж.