Month: May 2017

Дэлхийн хүүхдийн утга зохиолын салбарт Нобелийн шагналтай эн зэрэгцэхүйц хэмээгддэг “Ханс Кристиан Андерсений шагнал”-д шинэ оны босгон дээр төрийн соёрхолт тэмдгээр энгэрээ мялаасан Ж.Дашдондог зохиолчийг нэр дэвшүүлжээ. Дэлхийн 33 орны шилдэг 33 зохиолч нэр дэвшсэний нэг нь Жамбын Дашдондог юм. Тэрбээр энэхүү олон улсын нэр хүнд бүхий шагналд 2 дахь удаагаа нэр дэвшиж байгаа бөгөөд энэ жил түүний “Гурван марал”, “Гэр”, “Есөгчин”, “Хар шувууны цагаан түүх” болон “Өөдөө хаясан чулуу” номууд нь нэр дэвшжээ. Дашдондог зохиолч 17 настай дунд сургуулийн сурагч байхдаа “Аргатай хүү” номоо улсын хэвлэлээр анх хэвлүүлснээс хойш 100 шахам ном бүтээж, тэдгээрээс 30 гаруй нь гадаад орнуудад хэвлэгдсэн байна.

Түүний “Аав Ээж Би”, “Аранзэл зээрд”, “Чулуун домог”, “Морьтой үлгэр” зэрэг олон сайхан гайхамшигт зохиолууд, “Сайн байна уу”, “Түүдэг гал”, “Тавтай нойрсоорой”, “Баяртай” зэрэг зуслангийн дуунуудаар нь Монголын үе үеийн хүүхдүүд өсөж хүмүүжсэн билээ.

Олон улсын Ханс Кристиан Андерсены шагнал нь олон улсын өсвөр насны хүүхдүүдийн номын холбооноос 1956 оноос эхлэн зохион байгуулж, Данийн хатан хаан Маргрет II ивээн тэтгэсэн бөгөөд хүүхдийн алдарт үлгэрийн зохиолч Андерсений нэрээр нэрлэсэн аж. Уг шагнал нь хоёр жилд нэг удаа зохион байгуулагдаж, дэлхийн хэмжээний хүүхдийн шилдэг зохиолч болон номын зураачдад олгодог шагнал юм. Одоог болтол нийт 28 зохиолч энэ шагналыг хүртжээ.

О.ӨНӨР

Монгол Улсад Эрчим хүчний салбар үүсч хөгжсөний түүхт 95 жилийн ойн хүрээнд зохион байгуулсан “Эрчим хүчний салбарын хөгжлийн чиг хандлага” сэдэвт эрдэм шинжилгээний бага хурал боллоо. Хуралд төрийн болон хувийн хэвшлийн үйлдвэр, компанийн төлөөлөл, эрдэмтэн докторууд оролцож судалгааныхаа ажлын үр дүн, үйлдвэрлэлд нэвтрүүлсэн бүтээл, оюуны ажлуудаа танилцуулж, хэлэлцүүлэв.

Эрчим хүчний сайд П.Ганхүү хурлыг нээж үг хэлэхдээ “Улс орны хөгжлийн төлөө эрдэм оюунаа зориулж явдаг эрдэмтэн докторууд болон зөвлөх мэргэшсэн инженерүүд та бүхний санал салбарт хамгаас үнэтэй. Хуралд нийт 62 илтгэл ирүүлснээс салбарын хөгжлийн чиг хандлагыг шинжлэх ухааны үндэслэлтэй туурвиж, олон улсын жишигт нийцүүлэн судалгаа хийсэн бүтээлүүдийг хэлэлцүүллээ. Цаашид бид та бүхэнтэй судалгаа шинжилгээ, төлөвлөлт, зохицуулалт зэрэг бүх шатанд хамтран ажиллах болно” гэв. Энэ үеэр Монгол Улсын зөвлөх инженер Д.Чимэддорж “Эрчим хүчний салбарын бодлого, хөгжлийн чиг хандлага”, Академич, доктор, профессор Д.Содномдорж “Монгол Улсын эрчим хүчний аюулгүй байдал”, Академич, доктор, профессор С.Батмөнх “Монголын эрчим хүчний хөгжлийн стратегийн шинжлэх ухааны үндсийг боловсруулах асуудал”, Эрчим хүчний сайдын зөвлөх Ц.Баярбаатар “Ногоон хөгжлийн бодлого” зэрэг нийт 10 гаруй сэдвээр илтгэл тавьж хэлэлцүүллээ.

Эрдэм шинжилгээний бага хурлын төгсгөлд Эрчим хүчний салбарын бодлого, үйл ажиллагаанд тусгах зүйл заалт бүхий илгээлт гаргаж, яам болон үйлдвэр компанийн удирдлага, эрдэмтэн, инженерүүдэд үүрэг чиглэл өглөө.

Өндөр настай ээжийгээ байрныхаа тагтан дээр хөөн гаргаж, улмаар хараан зүхэж байсан бичлэг цахим ертөнцөд тархаад олны дургүйцлийг хүргээд байгаа билээ.

Уг бичлэг дээр гарч байгаа Н хэргийг үйлдэх үедээ согтууруулах ундаа хэрэглэсэн байсан бөгөөд 80 орчим настай эхийгээ “Үхэхгүй, яагаад амьдраад байгаа юм бэ. Аав үхчхээд байхад та яагаад амьд байгаа юм. Үхээд өгөөч” зэргээр харааж, юм шидэж буй бичлэг дээр хэрэг үүсгэжээ.

Дээрх эмэгтэйг цагдаа нар саатуулан. Чингэлтэй дүүргийн Цагдаагийн нэгдүгээр хэлтэст шалгаж эхэлсэн байна. Чингэлтэй дүүргийн эрүүгийн хэргийн шүүхээс зөрчил гаргагч 56 настай эмэгтэй Н-г 7 хоног баривчлах шийдвэр гаргажээ. Түүнийг өчигдөр 23:00 цагийн үед баривчилсан байна.

Харин охиндоо зодуулж, гэр бүлийн хүчирхийлэлд өртсөн эмээг бусад хүүхдүүдэд нь хүлээлгэсэн өгсөн байна.

Б.УЯНГА

Хүндийг өргөлтийн тамирчин М.Анхцэцэгийн дүү М.Номин-Эрдэнэ өнгөрсөн аравдугаар сард гүн түлэгдэж, эмчилгээ хийлгэж байгаа юм. Хүндийг өргөлтийн спортоор хичээллэх сонирхолтой охин БНСУ-д түлэгдлийн эмчилгээ хийлгэхэд 65 сая төгрөг шаардлагатай байгаа ажээ.

Иймд олон нийт тамирчин М.Анхцэцэгийн дүүд туслах хандивын аяныг эхлүүлээд байна. МҮОХ-ны ерөнхийлөгч Д.Загдсүрэн хүндийг өргөлтийн тамирчин М.Анхцэцэгийн дүүгийн эмчилгээний зардалд туслах хандивын аяныг дэмжин, 1 сая төгрөг хандивлалааа. Хандивын өглөгөө өнөөдөр /2017.05.18/ МҮОХ дээр М.Анхцэцэгийн гэр бүлийнхэнд гардуулав.

МҮОХ-ны ерөнхийлөгч Д.Загдсүрэн бусад олимпийн холбоог хандивын аянд нэгдэхийг уриалав.

Бүх төрлийн ярилцлага, дүрс бичлэг, фото зураг авахдаа тухайн хүүхдээс болон түүний асран хамгаалагчаас зөвшөөрөл авах ёстой.

-Тухайн хүүхэд болон түүний асран хамгаалагчид ярилцлагын зорилго, түүнийг юунд ашиглах гэж байгаагаа тайлбарлаж өг.

-Ярилцлага авах хүүхдийг сонгохдоо түүний нас, хүйс, яс үндэс, шашин шүтлэг, гарал үүсэл, боловсолын түвшин, бие бялдрын хөгжил зэргээр нь бүү ялгаварла.

-Хүүхдээс хаана, ямар орчинд ярилцлага авч байгаагаа анхаар. Ярилцлага авах үед байх сэтгүүлч, зурагчдын тоог хязгаарла. Хүүхдэд тухтай, хэний ч дарамт шахалтад орохгүй, чөлөөтэй ярих боломж нөхцлийг бүрдүүл.

-Кино, видео, радиогийн ярилцлага зэрэгт хүүхдийн цаан сонсогдож, харагдах орчин тухайн хүүхдийн амьдрал, асуудлыг хэрхэн илэрхийлж болохыг сайтар бодож үз. Хүүхдийн амьдарч буй гэр орон, орон нутаг, орчин тойрныг санаандгүй харуулснаар хүүхэд аюулд орж болзошгүйг анхаар.

-Хүүхдэд хэзээ ч битгий муухай ханд. Тухайн хүүхдийг шүүмжилсэн, буруушаасан, эсвэл үндэснийх нь ёс, жаягт үл нийцсэн асуулт асуух үйлдэл хийхээс зайлсхий. Хүүхдийг аюулд оруулах, бусдад гутаан доромжлогдох эрсдэлд бүү оруул. Хүүхдийн өмнөх зовлон, шаналалыг бүү сэдрээ.

-Зохиомол ярилцлага бүү хий. Тухайн хүүхдээр өөрт нь огт хамаагүй зүйл хэлүүлэх, үйлдэл хийлгэх ёсгүй хэмээн Гэр бүл, хүүхэд залуучуудын хөгжлийн газраас зөвлөжээ.

Монгол Улсын Боловсрол, Соёл, Шинжлэх ухааны яам, Бүгд Найрамдах Франц Улсаас Монгол Улсад суугаа Элчин Сайдын яам хамтран 2017-2018 оны хичээлийн жилд Франц Улсын их, дээд сургуульд хоёр орны Засгийн газар хоорондын хамтарсан тэтгэлгээр суралцах 10 оюутныг сонгон шалгаруулах юм.

Хүсэлт хүлээн авах эцсийн хугацаа: 2017 оны 5 дугаар сарын 26 байх гэнэ.

Тавигдах шаардлага:

Монгол улсын иргэн байх;

Франц дахь их дээд сургуульд бүртгүүлэх шаардлага хангасан, Монгол Улсад хүлээн зөвшөөрөгдсөн дээд боловсролын бакалаврын дипломтай байх

Суралцахаар сонгосон сургууль, хөтөлбөрт тавигдах франц эсвэл англи хэлний түвшингийн шаардлагыг хангасан байх(niveau B2)

Тэтгэлэгт хамрагдахыг хүсэгч дурдсан баримт бичгийг хоёр хувь /нэг хувь нь франц/эсхүл англи хэл дээр, нөгөө хувь нь монгол хэл дээр/ бүрдүүлэн,

2017 ОНЫ V САРЫН 26-НЫ ДОТОР Францын элчин сайдын яаманд дараах хаягаар ирүүлнэ.

Монгол Улсад суугаа Франц Улсын ЭСЯ

Энх тайвны өргөн чөлөө -15

Соёл, хамтын ажиллагааны Элчин зөвлөх

Ноён Жан Флоран ФИЛТЦ танаа

Улаанбаатар хот

Хөдөлмөрийн яармагийг гадна талбайд Монголын Залуучуудын холбоо, Хөдөлмөрийн төв бирж хамтран “Төгсөгч 2017” хөдөлмөрийн яармагийг зохион байгууллаа.

Оюутан залуусын хөдөлмөр эрхлэлтийг нэмэгдүүлэх, шинэ төгсөгчдийг ажлын байраар хангах, ажил олгогч байгууллагуудад хүний нөөцөө шинэ залуу боловсон хүчнээр өргөжүүлэх боломж олгох зорилготой хөдөлмөрийн яармагт 40 ажил олгогч байгууллаага уг яармагт хамрагдсан байна.

Эдгээрээс “Таван богд”, “Алтан тариа”, Тесо” “Залуучуудын хөдөлмөрийн академи зэрэг 1200 нээлттэй ажлын байранд залуусыг зуучилж байв. Ажил олгогчид нээлттэй ажлын байрандаа анкет авч, тухайн ажлынхаа тавигдах шаардлага, давуу талын талаар танилцуулахаас гадна анкет бөглөх боломжийг бүрдүүлсэн байлаа.

Энэ үеэр төгсөгч нарт ажлын байрны, хөдөлмөрийн зах зээлийн мэдээлэл, ажлын байранд бүртгүүлэх, ярилцлагад орох зэрэг боломжийг боломжийг олгож байлаа. Үүнээс гадна мэргэжлийн чиг баримжаа олгох сургалт, хувь хүний хөгжлийн чиглэлээр илтгэл тавьж байв.

Залуучуудын хөдөлмөрийн төв биржийн захирал Б.Билгүүтэй: Улс орных нь хөгжил, хөдөлмөрийн зах зээлийн тоо хэмжээ, тэлэлт, эдийн засгийн байдлаас хамаатай байх. Ажлын байр, бизнесийн үр ашгаас хамаарч яригдах асуудал юм. Манай улсад ажлын байр байдаг. Харин ажил олгогч байгууллагууд нь ажил эрхлэгч залуучуудынхаа шаардлагыг хангаж чадаж байна уу үгүй гэдэг нь чухал”

Архивын ерөнхий газрын даргаар Дамдинсүрэнгийн Хоролдамбыг томилжээ.

Д.Хоролдамба нь түүхийн ухааны доктор, ШУА-ын шагналт, түүхч, цагаатгах ажлыг удирдан зохион байгуулах улсын комиссын ажилтан, улс төрийн талаар хэлмэгдэгсдийн Судалгааны төвийн эрдэм шинжилгээний ахлах ажилтан, Хархорум” нийгэмлэгийн тэргүүн зэрэг ажлыг хийж байсан нэгэн аж.