Month: May 2017

Монгол улсад Өмгөөллийн байгууллага үүсэн байгуулагдсны ойг тохиолдуулан Монголын Өмгөөлөгчдийн Холбоо, НЗДТГазартай хамтран иргэдэд үнэ төлбөргүй хууль зүйн зөвлөгөө өгөх өдөрлөгийг тав дахь жилдээ зохион байгуулах гэж байна.

Нийслэлийн Засаг дарга бөгөөд Улаанбаатар хотын Захирагч 2017 оныг “Иргэдийн оролцоотой эрх зүйн шинэтгэлийн жил” болгон зарласантай холбогдуулан Монголын Өмгөөлөгчдийн Холбоо НЗДТГазартай байгуулсан санамж бичгийн хүрээнд “Өмгөөлөгч-Танд тусалъя” иргэдэд үнэ төлбөргүй хууль зүйн зөвлөгөө өгөх өдөрлөгийг энэ сарын 26-ны 09:00-17:00 цагт Сүхбаатарын талбайд зохион байгуулах аж.

Долоо хоног бүрийн даваа гаригт УИХ дахь намын бүлгүүд хуралддаг. МАН-ын бүлгийн хурлаар хоёр асуудал хэлэлцсэн байна. Эхний асуудал нь Монгол банкинд хийсэн шалгалтын талаарх ажлын хэсгийн дүгнэлт, дараагийн хэлэлцсэн асуудал нь элчин сайдуудын томилгоо аж. Монголбанкинд хийсэн шалгалтын ажлын хэсгийн ахлагчаар УИХ-ын гишүүн Т.Аюурсайхан ажилласан байна.

МАН-ын бүлгийн зарим гишүүд Монголбанкны шалгалтын тайланг нууцын зэрэглэлд хамруулах нь зүйтэй гэж үзжээ. Учир нь 0,85 хувийн хүүтэй зээлийг нэлээд хэдэн аж ахуй нэгжид олгосон байна. Угтаа бол Монголбанк зээл гаргах эрх зүйн боломж байдаггүй билээ. Гэтэл хууль зөрчиж, маш бага хүүтэй олгосон зээлийн талаарх мэдээллийг задруулахгүй байхыг зарим гишүүд хүссэн байна.

Үүнээс гадна Монголбанк нийтдээ гурван их наяд төгрөгийн алдагдалд оржээ. Энэ нь манай улсын төсвийн тал орчим хувьтай тэнцэх хэмжээний тоо билээ.

Улсын төв банк нь ийм хүнд байдалд орчихсон байхад зөвхөн бүлгийн хурал дээр мэдээллээд цаашид нууцын зэрэглэлд оруулна гэдэг нь эрсдэлтэй юм. Үүнийг нууцлах гээд байгаа шалтгаан нь сонгууль дөхсөний шинж гэж зарим гишүүд дургүйцэж байгаа аж.

Ингээд бүлгийн хурал дээр Т.Аюурсайхан гишүүн тайлангаа танилцуулаад гишүүдэд мэдээлэл болгож, танилцуулга тараасан ч хурлын дараа хурааж авсан байна. Мөн нууцын зэрэглэлтэй материал тул цааш нь задруулахгүй гэдэг гарын үсгийг ч зуруулсан аж.

Гачууртын уулзвараас Налайх-Чойрын уулзвар хүртэлх 20.9 км авто замыг өргөтгөх замын трассын зураг төсөл, түүнийг дагаж хийгдэх газар чөлөөлөлтийн ажлын явцтай танилцлаа. Тусгаарлах зурвас бүхий 4 эгнээ автозамын ажил энэ жил эхлэх юм байна. Одоо Концессийн гэрээний дагуу гүйцэтгэгчийг шалгаруулж, гэрээ байгуулснаар зам барилгын ажил эхэлнэ.

ЯАРМАГИЙН ШИНЭ , ХУУЧИН ГҮҮР ЗУРГААН ЭГНЭЭТЭЙ БОЛНО

Яармагийн шинэ гүүр барих, хуучин гүүр засварлах ажлын явцтай ажлын хэсгийн бүрэлдэхүүн очиж танилцаж, газар чөлөөлөлтийн ажлын явцыг шалгалаа. Ажлын хэсгээс гүйцэтгэгч компанид НМХГ, НАЗХГ, НГА-тай уялдаа холбоотой ажиллаж, эдийн засгийн хямралтай цаг үед бараа мартериалын худалдан авалтыг дотоодын үйлдвэр, компаниудаас авах, тэднийг татан оруулах үүргийг өглөө.

“Яармагийн шинэ гүүр барих, хуучин гүүрийг засварлах төсөл”-ийн хүрээнд ХУД-ийн 2,3,4 дүгээр хорооны нутаг дэвсгэрт 0.36 км урттай, 20.5 м өргөн, нийт 0.738 га талбайг хамарсан гүүрэн байгууламжийн өргөтгөл, шинэчлэлт хийхээр 2017 оны төлөвлөгөөнд туссаны дагуу газар чөлөөлөлтийн ажлыг хийгээд байна.

Ингэснээр Яармагийн шинэ гүүр, хуучин гүүр нийт зургаан эгнээтэй болох бөгөөд гүүрний ажил 2019 оны арваннэгдүгээр сард дуусахаар төлөвлөгдөөд байна. Энэхүү гүүрийг БНХАУ-ын Засгийн газрын 30 сая ам.долларын хөнгөлөлттэй зээлээр барьж байгаа юм. Орбитын уулзвараас Толгойтын эцэс-Үйлдвэрчний эвлэлийн гудамж хүртэл 3.6 км авто замын өргөтгөл шинэчлэл хийгдэж байна

Хөгжлийн банкны санхүүжилтээр Орбитын уулзвараас Толгойтын эцэс Үйлдвэрчний эвлэлийн гудамж хүртэлх авто замын өргөтгөл шинэчлэлтийн ажил хэвийн үргэлжилж байна гэж нийслэлийн Автозамын хөгжлийн газраас мэдээллээ.

Монгол Улсын Ерөнхий Сайдын 2015 оны 04 дүгээр сарын 30-ны өдрийн 107 дугаар захирамж, Монгол Улсын Засгийн Газрын 2015 оны 12 дугаар сарын 14-ний өдрийн 487 дугаар тогтоол, Нийслэлийн Засаг даргын 2016 оны 06 дугаар сарын 28-ны өдрийн А/541 дүгээр захирамж, Зам, тээврийн яамны төрийн нарийн бичгийн даргын 2016 оны 07 дугаар сарын 04-ний өдрийн 228 дугаар тушаалыг тус тус үндэслэн Хан-Уул дүүргийн 8, 14 дүгээр хорооны нутаг дэвсгэрт Улаанбаатар-Хөшигийн хөндийн чиглэлийн 33 км хурдны автозамын трасс батлагдаж, гүйцэтгэгчээр БНХАУ-ын “Чайна Тиэсижү Сивил Инженеринг групп” шалгарч автозамын ажил эхлээд байна.

Нийслэлийн дэд бүтцийг сайжруулах, хот төлөвлөлтийн ажлын хүрээнд хийгдэж буй томоохон бүтээн байгуулалтын уг ажилд иргэн, аж ахуйн нэгж, байгууллага бүрийн оролцоо, дэмжлэг шаардлагатай байна. Иймд Монгол Улсын Захиргааны ерөнхий хуулийн 27 дугаар зүйлийн дагуу сонсох үйл ажиллагаа явуулах гэж байгаа тул доор дурьдсан иргэн, аж ахуйн нэгж байгууллагууд 2017.05.24-нд 10.00 цагаас Хан-Уул дүүргийн Газрын албанд ирж үйл ажиллагаанд оролцохыг хүсье. Лавлах утас 11-344927, 99038500 гэж нийслэлийн Газрын албанаас мэдээллээ

Сонгинохайрхан Зорчигч тээврийн төв буюу Драгон төвд өнөөдөр 11:00 цагт тасалбар түгээх машины /ТҮМ/ нээлтийн арга хэмжээ болно. Тус ТҮМ нь улс, хот хоорондын автобусны нийтийн тээврийн тасалбарыг бэлэн бус гүйлгээний хэлбэрээр худалдаалах бөгөөдүйлчлүүлэгч өөрийн цахим үнэмлэхээ машинд уншуулан зорчих тээврийн хэрэгслээ сонгон мэдээллээ оруулан өөрөө өөртөө үйлчлэх боломжтой болох аж.

ТVМ (Ticket vending machine) машины зааварчилгаа нь Монгол, Англи хэл дээр байх ба дотоодын төгрөгийн (₮) карт болон олон улсын эрхтэй VISA, Master card зэргээр бэлэн бус гүйлгээ хийн, худалдан авсан тасалбарынхаа НӨАТ-ын баримтыг авах боломжтой юм байна.

Ерөнхий боловсролын сургуулийн сурагчид зам тээврийн осолд өртөх тохиолдол ихсэх хандлагатай байгааг Замын цагдаагийн албанаас мэдээлсэн. Иймд Хан-Уул дүүргийн Замын цагдаагийн хэлтсээс харгалзах хүнгүйгээр замын хөдөлгөөнд оролцож байгаа бага насны хүүхдүүдэд хяналт тавин ажиллаж буй юм байна.

Энэхүү ажлын хүрээнд Нийслэлийн 18-р сургуулийн дөрөвдүгээр ангийн сурагч харгалзах хүнгүй замын хөдөлгөөнд оролцож байхыг илрүүлж, тус хүүхдийн ангийн багш нь түүнийг харгалзах хүнгүй замын хөдөлгөөнд оролцуулж байсныг тогтоожээ. Улмаар тус ангийн багшид Замын хөдөлгөөний аюулгүй байдлын тухай хуулийн 54.6-д зааснаар хөдөлмөрийн хөлсний доод хэмжээтэй тэнцэх /240 мянган төгрөг/ хэмжээний мөнгөөр торгож, арга хэмжээ авчээ.

Эцэг, эх, багш сурган хүмүүжүүлэгчид бага насны хүүхдэд тавих хараа, хяналтаа сайжруулахыг зөвлөж байна.