Month: May 2017

Баянзүрх дүүргийн Эрүүгийн хэргийн анхан шатны шүүхэд шүүх хуралдааны танхимд хоолойгоо зүсч, амь насаа егүүтгэхийг завдсан шүүгдэгч Б-д холбогдох хэргийг шүүх хурал өнөөдөр боллоо. Түүний биеийн байдал дээрдсэн бөгөөд хэргийг Сүхбаатар дүүргийн Эрүүгийн хэргийн анхан шатны шүүхэд хэлэлцлээ.

Улмаар шүүх хурлыг ирэх сарын 14-ний өдрийн 10:00 цаг хүртэл хойшлуулах шийдвэр гарсан байна. Учир нь шүүгдэгч Б нь 461 дүгээр ангид хүргүүлсэн яллах дүгнэлтээ гардан авахгүй гэсэн байсан тул хуулинд заасан 72 цаг хүрээгүй гэсэн үндэслэлээр шүүх хурал хойшлогджээ. Харин өнөөдрийн шүүх хурал дээр яллах дүгнэлтээ гардан авсан байна.

Яллагдагч Б Эрүүгийн хуулийн тусгай ангийн 147.2, 145.3-т зааснаар яллагдан, шүүгдэж байсан. Мөн дээр нь нэмэгдээд 245.1 хэрэг бүртгэлт, мөрдөн байцаалт, шүүн таслах ажиллагаанд саад учруулах хэргээр өнөөдөр шүүгдсэн юм. Хэрэв тэрээр гэм буруутай нь тогтоогдвол 10-15 жилийн хорих ялаар шийтгүүлэх юм байна.

Хэргийг сануулбал, Амиа хорлохыг завдсан шүүгдэгчид яаралтай эмнэлгийн тусламж үзүүлж, хоолойд нь 6-7 оёдол тавьж, яаралтай тусламж үзүүлснээр амь насыг нь аварчээ. Тэрбээр шүүх хурлын үеэр “Надад амьд явах сонирхол алга. Би ээжтэйгээ уулзахаар явлаа” хэмээн хоолойгоо зүссэн нь хяналтын камерт бичигдсэн байдаг.

ХХААХҮЯ-наас тавдугаар сарын 26, 27-нд Малчдын улсын зөвлөгөөнийг Төрийн ордонд зохион байгуулна. Зөвлөгөөнд 800 гаруй малчин, фермерүүдийн төлөөлөл оролцох юм байна.

Зөвлөгөөнөөр,

• Төрөөс малчдын талаар баримтлах бодлого,
• Монгол мал үндэсний хөтөлбөр,
• Малын эрүүл мэндийн үндэсний хөтөлбөр,
• Эрчимжсэн мал аж ахуйн үндэсний хөтөлбөр,
• Мал, амьтны эрүүл мэнд тухай,
• Малын генетик нөөцийн тухай хуулийн төсөл,
• Өвөлжилт хаваржилтын нөхцөл байдал,
• Мал төллөлтийн явц, төл бойжилт,
• 2017 оны хадлан тэжээл бэлтгэл ажлын талаар малчдын санал бодлыг сонсож, санал солилцох юм.

Мөн “Мал аж ахуйн салбарын өнөөгийн байдал цаашдын зорилт”, “Малчин өрхийн төлөв байдал цаашид анхаарах асуудал”, “Малын чанар, үржлийн ажлыг сайжруулах боломж” зэрэг сэдвүүдээр илтгэл тавигдах ажээ.

Эх сурвалж: ХХААХҮЯ

Монголын Улсын Ерөнхийлөгчийн 2017 оны ээлжит сонгуулийн сурталчилгаа ирэх сарын 6-нд эхэлнэ.

Сонгуулийн нэгдсэн хуулинд, “Ерөнхийлөгчийн сонгуульд нэр дэвшигч нь сонгуулийн сурталчилгааг санал авах өдрөөс 20 хоногийн өмнө эхлүүлж санал авах өдрөөс нэг хоногийн өмнө дуусгана” хэмээн заасан.

Хуулийн энэхүү хугацаа нь зургадугаар сарын 6-ны өдөр таарч байгаа бол дуусах хугацаа нь 25-ны өдрийн 00 цагаар өндөрлөх юм.

Дашрамд хэлэхэд, Ерөнхийлөгчийн 2017 оны ээлжит сонгууль ирэх сарын 26-нд болно. Харин хилийн чанадад байгаа иргэд ирэх сарын 10-11-ны өдрүүдэд саналаа өгөх юм.

Нийслэлийн Засаг дарга бөгөөд Улаанбаатар хотын захирагч С.Батболд “Монгол наадам” цогцолборын үйл ажиллагаатай танилцав. Нийт 30 мянган хүний суудалтай цэнгэлдэх хүрээлэн, 110 харваач зэрэг харвах боломжтой сурын талбай, 64 баг шагай харвах шагайн талбай болон спорт, соёлын төвүүдийг Хүй долоон худаг дахь “Монгол наадам” цогцолборт барьж байгуулна. Мөн цэвэр усны сан, дулаан, цахилгаан зэргийг бие даан шийдэхээр зураг төслийн ажлыг хийж дуусчээ. Өнгөрсөн жил цанын бааз байгуулах төсөл хэрэгжүүлсэн. 2 сарын хугацаанд 30 мянга гаруй иргэн цанын баазаар үйлчлүүлжээ. “Монгол наадам” цогцолборын дарга Н.Батсүмбэрэл өнөөгийн тавьж байгаа гол зорилго бол жилийн 4 улиралд үйл ажиллагаа явуулах хэмээлээ. Мөн дотоодын аялал жуулчлалыг хөгжүүлэх, нийслэлийн орлогыг нэмэгдүүлэхээр зорьж байна.

Цаашид хүй долоон худагт “Богдын өндөр цогцолбор”, “Нийслэлийн гэрэлт хөшөө”, Морь уналга, сургалтын төв” зэргийг байгуулна. “Монгол наадам” цогцолборын удирдлагууд эхний баяр наадмынхаа ард гарсаны дараа хотын удирдлагуудад хэсэгчилсэн ерөнхий төлөвлөгөө, мастер төлөвлөгөө, хэтийн зорилтуудаа танилцуулахаар төлөвлөжээ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Архангай аймгийн Булган сумын Тамир багийн малчны сарлагаас найман хөлтэй, хоёр толгой, хоёр бөгстэй тугал гарчээ.Малын эмч нар үнээнд хагалгаа хийж, тугалыг гаргаж авсан байна. Улмаар төрөлхийн гажигтай энэхүү тугал гараад удалгүй үхсэн аж.

Чухам яагаад гажигтай гарсан нь одоогоор тодорхойгүй байгаа юм. Гэхдээ малын эмч нар “Энэ төрлийн гажиг нь төрөл ойртох эсвэл ураг бүрэлдэх үеийн эсийн хуваагдлын явцад хуваагдаж чадаагүй ургууд ингэж гарах нь их байдаг” гэж тайлбарлалаа.

Дээрх хагалгааг аймгийн ХХААГ-ын Мал эмнэлгийн албаны дарга, малын их эмч С.Ганбат, малын их эмч Н.Мөнхгэрэл, Б.Түвшинжаргал, С.Дэлгэрбаяр, лаборант Ч.Бадамханд нар хийжээ. Энэ хавар мал эмнэлгийн албаныхан зургаан удаагийн кесарево хагалгаа хийсэн бөгөөд өмнөх таван хагалгаагаар эрүүл тугал гаргаж авсан байна.

Соёмботой уул хэмээн ард түмэндээ хүндлэгдсэн уул Туул голын урдхан талд налайж байдаг. Богд уулын хот руу харсан энгэрийг өмчлөөд дуусч байгаа баячуудад одоо энэ уулыг ухаж, сэндийлэх л үлдсэн бололтой.

Газрын наймаачид Соёмботой уулыг ухаж байна гэх мэдээлэл өчигдрөөс цахим ертөнцөд цацагдсан.

Төрийн соёмбоо тэргүүнд нь залсан энэ уул газрын наймаачдын гараар орчихгүй тэсч байсан ч сонгуулийн дуулианаар далимдуулан ухаад эхэлчихсэн бололтой. Тэгвэл энэ талаар албаны хүмүүс үгүйсгэсэн мэдээлэл өгсөн бөгөөд газар эзэмших эрхтэй иргэн газраа тэгшилж байгаа гэсэн мэдээлэл өгчээ. Сая гаруй хүн амтай метрополис хотын урд талд түмний нүдэн дээр дүнхийж байдаг Богд уулын хөндөгдөөгүй ганц газар болох Соёмботой уулыг минь бүтэн үлдээч өгөөч хотын дарга аа.

О.ӨНӨР