Эдийн засгийн байнгын хороогоор өнөөдөр Монголбанкны 2012-2016 онд явуулсан үйл ажиллагаанд хийсэн шалгалтын дүнг хэлэлцэв. Шалгалтын дүнд хийсэн дүгнэлтийг УИХ-ын гишүүн Т.Аюурсайхан танилцуулав.
Тэрбээр хэлэхдээ: Монголбанкнаас “Үнэ тогтворжуулах” хөтөлбөрийн хүрээнд 4.8 их наяд төгрөгийн зээл гаргасан. Үүний 3.7 их наяд төгрөг нь орон сууцны зээлийн хөтөлбөрт байгаа юм. Үлдсэн 1 их наяд гаруй төгрөг нь өргөн хэрэглээний бараа бүтээгдэхүүний үнэ тогтворжуулах зээлд байгаа юм. Монголбанкны шалгалтын дүнд шатахуун импортлогч 14 компанид 226,4 тэрбум төгрөгийн зээл олгосон гэдэг нь тогтоогдсон. Энэ зээлийг ихэнх аж ахуй нэгж зориулалтын бус зүйлд зарцуулсан. 2012 оноос дэлхийн зах зээл дээр түүхий нефтийн үнэ тогтмол буурсан. Тиймээс манай ажлын хэсэг шатахууны компаниудад зээл олгох шаардлагагүй байсан гэж үзэж байгаа. Мөн Арилжааны банкууд 2,91 хувийн хүү нэмж, 3,8 хувийн хүүтэй зээлийг шатахуун импортлогч компаниудад олгосон гэлээ.
Танилцуулгыг хийсний дараа Байнгын хорооны гишүүдийн асуултад Монголбанкны Ерөнхийлөгч Н.Баяртсайхан тайлбар өгсөн юм.
Н.Баяртсайхан: Ажлын хэсэг Монголбанкинд хийсэн тайлангаа бидэнтэй ярилцаагүй. Бид өнөөдөр Байнгын хороон дээр орж ирээд, та бүхэнтэй хамт сонсож байна. Тиймээс албан ёсоор ажлын хэсгийн дүгнэлтийг авч байж хариулах боломжтой болно. Аль ч улсад төв банкны хараат бус байдлыг хүндэтгэдэг. Төв банкны бүрэн эрхийг хуулиар тогтоосон байдаг. Энэ бүгдийг Ажлын хэсэг, Эдийн засгийн байнгын хороо харгалзаж үзэхийг хүсэж байна гэлээ.
Венесуэль улсад эдийн засгийн хямрал газар авч, тус улсыг удирдаж байсан экс Ерөнхийлөгч Уго Чавесийн төрөлх гэрийг шатаах дээрээ тулсан байна. Өчигдөр цагдаа нар 19 настай оюутныг хөнөөсний дараа ард иргэд хилэгнэн гудамжид гарч түүний гэрийг шатаажээ. 
Түлэнхийн төвийн шинэ барилгыг Кувейт улсын буцалтгүй тусламжаар барих гэрээнд өчигдөр гарын үсэг зурсан талаар тус улсын хэвлэл мэдээллийн байгууллагууд мэдээлсэн байна. 1957 онд баригдсан Түлэнхийн төвийн барилгыг 2011 онд акталж, шинээр барилга барихаар болсон боловч санхүүжилтийн асуудлаас болж гацаад байсан билээ. Гарын үсэг зурах ёслолын ажиллагаа Кувейт Улсын Эль-Кувейт хотод болжээ. Монголын талаас Засгийн газрын хэрэг эрхлэх газрын дарга Ж.Мөнхбат, Кувейтийн талаас Кувейтийн сангийн Ерөнхий захирал Абдулла Ал-Бадер оролцсон байна. Нийт 10 сая ам.долларын өртөгтэй барилгын 8 сая ам.долларыг ийнхүү Кувейт улсаас буцалтгүй тусламж болгон олгохоор болжээ. Түлэнхийн төв 2018 онд нээгдэх юм байна.
Монголын жүдо бөхийн шигшээ багийн тамирчид Хонконгт очоод байна. Энэ сарын 26-28-ны өдрүүдэд Хонконгт жүдо бөхийн насанд хүрэгчдийн Ази тивийн аварга шалгаруулах тэмцээн болох билээ. Тивийн аваргад 28 орны 244 жүдоч өрсөлдөнө. Манай улсаас олимпийн алт, мөнгөн медальт Н.Түвшинбаяр, олимпийн хүрэл медальт Д.Сумъяа, дэлхийн аварга М.Уранцэцэг нарын тэргүүтэй жүдочид зодоглоно. Дасгалжуулагчаар О.Балжинням, Д.Баттулга, Х.Эрдэнэт-Од нар ажиллаж байгаа юм. Мөн жүдо бөхийн Ази тивийн аварга шалгаруулах 2020 оны тэмцээнийг Монгол Улс өөрийн орондоо зохион байгуулах эрхийг авчээ. 
Дэлхийн эрүүл мэндийн 70-р чуулганаас ДЭМБ-ыг ирэх дөрвөн жилд удирдах шинэ ерөнхий захирлыг сонголоо. 2017 оны дөрөвдүгээр сарын 23-ны өдөр Этиоп улсын иргэн Др.Тедрос Адханом Гебрейсус, Их Британи Умард Ирландын нэгдсэн вант улсын иргэн Др.Дэвид Набарро, Пакистан улсын иргэн Др.Саниа Ништар нар өрсөлдөж, ДЭМБ-ын гишүүн орнуудын олонхийн саналаар Др.Тедрос Адханом Гебрейсус сонгогдлоо. Ийнхүү Африк тивийн орнуудаас нэр дэвшигч, ДЭМБ-ын Ерөнхий захирлаар сонгогдсон анхны тохиолдол боллоо. 
Соёмботой уулыг ухсан асуудлаар Байгаль орчин, аялал жуулчлалын яамнаас мэдээлэл хийлээ. Яамнаас хууль бусаар газар ухсан иргэний газрын зөвшөөрлийг нь цуцалсан гэв. 
Эдийн засгийн байнгын хороо хуралдаж байна. Хуралдаанаар Засгийн газрын гадаад, дотоод өрийн удирдлагын байдал, Засгийн газрын гадаад бондыг эргүүлэн төлөх, дахин санхүүжүүлэх чиглэлээр авч байгаа арга хэмжээний талаарх Сангийн сайдын мэдээллийг сонссон байна. Монгол Улс концессын гэрээ хийж эхэлснээс хойш нийт 1,9 их наяд төгрөгийн гэрээ хийжээ. Гэвч бүтээн байгуулалтын өртөг, компанийн ашиг гэх мэтийн хяналт сул байна гэж Байнгын хорооны гишүүд шүүмжилсэн аж. 