-ЗӨВЛӨГӨӨ ФЕЛЬЕТОН-I-
Бодсоноосоо өөрийг ярьж, ярьснаасаа өөрийг хийхийг улс төр гэнэ. Харин хийж мэдэшгүй юмандаа бусдыг итгүүлдэг, хожим яагаад амжаагүйгээ ойлгуулж чаддаг хүнийг улстөрч гэдэг. Улс төр, улстөрч хоёр урвуу пропорциональ харьцаатай байдгийг судлаачид тогтоожээ. Тухайлбал, хаана улс төрийн байдал муу байна тэнд улстөрчид тоймгүй олширдог, заримдаа олширсоор байгаад улс төрөө идчихдэг явдал бий гэлцэнэ.
Харин улс төр сайжрахын хэрээр улстөрчид цөөрч улмаар арилдаг. Манай орны хувьд нэг хүнд ердөө хоёрхон улстөрч ногдож байгаа нь дотоодын нийт бүтээгдэхүүнтэй харьцуулахад туйлын хангалтгүй үзүүлэлт юм гэж улс төр судлаачид үзэж байна.
Иймд сул иргэдийг улстөржүүлэх ажлыг вакцинжуулалттай хавсран зохион байгуулах, түүнчлэн сүүлийн үед мэр сэр үзэгдэх болсон хошой үзэлт болон нам дамнасан (транспартийный) улстөрчдийг олшруулах шаардлага гарч байна. Хүн болгоныг эмч болгож болдоггүй байтал хүн бүрийг улстөрч болгож болдог.
Өдгөө хараахан улстөрч болж амжаагүй яваа “үндэсний цөөнх”д зориулж цөөн хэдэн зүйл зөвлөе. Улстөрч болохын тулд эхлээд сонгуульд өрсөлддөг. Олон түмэн чамайг сонгодоггүй, чи олон түмнээр өөрийгөө сонгуулдаг гэдгийг эхлээд мэдсэн байгууштай.
Хоёрдугаарт, сонгогчид нэр дэвшигчдийн амлалтыг сонгохоос бус биелэлтийг сонгох бололцоогүй. гэхдээ сонгогчдын өмнө хүн хийж болох зүйл амлаж огт болдоггүй. Тэд хүн учраас хүн юуг хийж болох, болохгүйг сайн мэднэ.
Иймээс нэр дэвшигчийн амлалт “Энийг л би яавч хийж чадахгүй дээ” гэсэн зүйлээс эхлэх ёстой. Ингээд л өрсөлдөнө дөө. Сонгуульд ялах үндсэн нөхцөл нь чиний сайн тал бус өрсөлдөгчийн чинь муу тал байдаг. Хэрвээ сонгогдохгүй бол гуних хэрэггүй. Хүмүүс чиний юу хийж чадахгүйг мэдэхгүй өнгөрөх тул сайн талтай.
Харин ийм үед “Ингээд болгочих байсан юм”, “Тэгдэг учиртай юмыг ингэж буруутлаа” гэх мэтээр байнга ярьж сонгогчид “Энэ хүнийг сонгох минь яалаа” хэмээн толгойгоо шаахад хүргэх учиртай. Харин сонгогдвол яах вэ. Алдаа гаргаж болохгүй. Алдаа гаргахгүйн тулд юу ч хийхгүй байх учиртай. “Энэ тэгсэн” гэж муулуулж байснаас бус “энэ тэгсэнгүй” гэж шүүмжлүүлсэн явдал тохиолдоогүй юм шүү.
Онцолж хэлэхэд нэг ч сонгогчид тус хүргэж болдоггүй юм. Хэрэв тэгвэл үлдсэн бусад нь чамайг хардаад сүйд хийнэ. Эмэгтэй сонгогчтой эр эмийн холбоотой, эрийг эмлэдэг гэх мэт нэр дуулах нь наад захын хэрэг. Манай сонгогчид хэн нэгэнд нь тусалдаг улстөрчөөс хэнд нь ч тусалдаггүй тэгш гадуурхдагийг нь сайнд тооцдог онцлогтой. Үүнээс үүдээд тус болдог улстөрчөөс илүү тус болчихмоор сэтгэгдэл төрүүлдэг улстөрч хол явдаг. Сонгуулийн хугацаанд хийх гол ажил бол яагаад амласнаа хэрэгжүүлээгүйг тайлбарлах, өөр ямар чадахгүй юмаа амлах вэ гэдгийгээ бодох хугацаа байдаг. Ингээд танд амжилт хүсье. Дараагийн сонгуулиар нэр дэвшигчийн тоо сонгогчийнхоосоо давахгүй юм аа гэхэд тэнцэх улс төрийн ерөөл тавья.
1993
“Өдрийн сонин”-ы пүрэв гаригийн шинэ дугаар хэвлэгдэн гарлаа. Энэ өдрийн дугаарт гарсан сонирхолтой ярилцлага, даацтай нийтлэл, үйл явдлын мэдээ мэдээллээс тоймлон хүргэе.
МИАТ-ийн Ерөнхий тээврийн агаарын зориулалтын тээврийг хөгжүүлэх хэсгийн ажилтан О.Мөнх-Од: Онгоцны хошууны загварыг өөрчилж АНУ-ын Honeywell компаний TPE-331-12 хөдөлгүүр, Hartzell Propeller Ink компанийн таван алгатай сэнс тавьснаар моторын дуу чимээ, чичиргээ эрс багассан байна. Ер нь бол АН-2-ийн суурин дээр хийгдэж байгаа ТBC-2MC агаарын хөлгийн загвар юм. Энэ онгоцны эд ангийг Америкаас оруулж ирээд ОХУ-д угсраад туршилтаар манайд явуулах гэж байна. Дотоод салоныг нь сайжруулсан. Энэ онгоцыг түргэн тусламж болон орон нутагт зорчигч тээвэрлэх зориулалтаар ашиглана. 10-12 хүний багтаамжтай.
“Эрдэм денвер-Оюун ухаан” ХХК-ий гүйцэтгэх захирал А.Одсайхан: Манайх Авто тээврийн үндэсний төвтэй гэрээ байгуулаад энэ ТҮЦ машиныг өөр компанид захиалан оруулж ирж байгаа. Энэ машины маань ажиллах зарчим нь регистерийн дугаараа хийгээд нэрээ бичээд билетээ захиалах боломжтой. Иргэний үнэмлэх нь нууцын зэрэглэлтэй байдаг учраас одоохондоо иргэний үнэмлэхээр ажиллахгүй. Тагнуулын ерөнхий газраас зөвшөөрлөө авчих юм бол шууд ашиглах боломжтой. Одоогоор туршилтын хоёр машиныг ажлуулж үзэж байна. Нэг нь “Драгон” төв дээр нөгөө нь “Баянзүрх” автобуудал дээр байрлаж байгаа.
Нийслэл хотын төсвийн хөрөнгө оруулалтын төлөвлөлтийн үйл ажиллагаа, нийтийн тээврийн салбарын санхүүгийн тогтвортой байдлыг хамтран бэхжүүлэх чиглэлээр өнөөдөр Дэлхийн банкны Монгол Улс дахь Суурин төлөөлөгч Жеймс Андерсон, Нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүү нар харилцан ойлголцлын санамж бичигт гарын үсэг зурлаа.
“Жеймс Бонд” цувралын анхны долоон ангид тоглосон Британийн нэрт жүжигчин Рожер Мур 89 насандаа таалал төгсчээ. Тэрээр удаан хугацаанд хорт хавдартайгаа тэмцэж байсан талаар гэр бүлээс нь мэдэгдсэн байна.
УИХ дахь Ардчилсан намын бүлэгт нийслэлийн Баянзүрх дүүргийн иргэн О.Алтангэрэл УИХ-ын 29 дүгээр тогтоолын 11 дүгээр дэд заалтыг хүчингүй болгосон УИХ-ын 30 дугаар тогтоол нь Үндсэн хууль зөрчсөн гэж үзээд, Үндсэн хуулийн цэцэд мэдэгдэл гаргах гэж байгаа тухай хүсэлт ирүүлсэн юм.
Тавдугаар сарын 24-ны өдөр ОУВС-гийн Захирлуудын зөвлөл хуралдана. Тус зөвлөлийн хуралдаанаар Монгол Улсыг ОУВС-гийн хөтөлбөрт хамруулах эсэхийг шийдвэрлэх юм. Сангийн сайдын зүгээс энэхүү хөтөлбөр батлагдана гэсэн хүлээлттэй байгаагаа илэрхийлсэн.