Month: May 2017

Засгийн газрын энэ сарын 10-ны өдрийн хуралдаанаар улсын тусгай хамгаалалттай газар авто зогсоолын цогцолбор барих тухай асуудлыг хэлэлцсэн байна. Хуралдаанаас Богд хан уул, Горхи-Тэрэлжийн байгалын цогцолборт газар, Хөвсгөл нуурын байгалийн цогцолборт газарт иргэдийн ая тухтай амрах нөхцөлийг хангасан цогцолбор барих болон онцгой байдал, түргэн тусламж, цагдаа зэрэг шуурхай албаны автомашин саадгүй нэвтрэх автозамын асуудлыг шийдвэрлэхийг холбогдох албан тушаалтнуудад даалгажээ. Мөн цогцолбор болон автозамын барилгын ажлыг Үндэсний их баяр наадмын өмнө гүйцэтгэж дуусгах талаар холбогдох арга хэмжээ авахыг БОАЖ-ын сайд Д.Оюунхорол, Сангийн сайд Б.Чойжилсүрэн, нийслэлийн Засаг дарга бөгөөд Улаанбаатар хотын Захирагч С.Батболд нарт даалгасан байна.

Нийслэлчүүдийн хувьд Богд хан ууланд амралтын өдрөөр явган аялж зугаалах нь элбэг. Зайсан-Баруун ширээтийн аяллын чиглэлд аялагч олон тул Зайсангийн аманд автомашины бөөгнөрөл үүсгэдэг. Сүүлийн үеийн судалгаагаар энэ чиглэлд амралтын өдөр 300-400 автомашин бүхий 4-5 мянган иргэн явган аялахаар ирдэг гэсэн тоо байна. Энэ үед авто зогсоол хүрэлцдэггүйгээс түгжрэл үүсэх зэргээр иргэдээс ихээхэн гомдол санал гарах болжээ. Мөн 1976 онд ашиглалтад орсноос хойш засвар шинэчлэл хийгдээгүй учир эвдрэл гэмтэл ихтэй. Түүнчлэн гал түймэр, осол болсон үед шуурхай албаны машин саадгүй явах нөхцөл боломж бараг үгүй болдог байна. Ийм учраас Засгийн газрын хуралдаанаас иргэдийн ая тухтай зорчих авто зам, авто зогсоолын ажлыг шууд гэрээ байгуулах замаар чанарын өндөр түвшинд шуурхай зохион байгуулж ажиллахыг нийслэлийн Засаг даргад даалгасан байдаг. Нийслэлийн иргэд, гадаадын жуулчдыг дархан цаазат Богдхан ууланд зөв зохистой аялах орчныг бүрдүүлэх, авто замын хөдөлгөөний аюулгүй байдлыг хангах, зогсоолын хүртээмжийг сайжруулах, ойн түймрээс урьдчилан сэргийлэх, шуурхай албаны машин саадгүй нэвтрэх нөхцлийг бүрдүүлж, орчны тохижилтыг сайжруулах зорилгоор энэхүү 2.05 км авто замын шинэчлэлтийн ажлыг шууд гэрээгээр гүйцэтгүүлэхээр болсон байна.

Богд ууланд аялагчдад тусгай хамгаалалттай газар нутгийн дэглэмийг мөрдөн байгальд орчинд ээлтэй, тав тухтай аялах, амрах орчныг бүрдүүлэх, цогцолбор барих ажлын хүрээнд 3 га газарт 264 автомашины зогсоол, мөн дугуйн зогсоол, нийтийн бие засах газар, үйлчилгээний цэг, иж бүрэн гэрэлтүүлэг, борооны ус зайлуулах шугамын ажил, 2.05 км авто замыг шинэчлэх ажил хийгдэх юм байна гэж НЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

Эрүүл мэндийн яамнаас ‘’Эрүүл мэндийн салбарын парк шинэчлэл’’ хэрэгжиж байгаа билээ. Энэхүү ажлын хүрээнд өнөөдөр ЭМЯ гадна талбайд Баянхонгор, Өвөрхангай аймгийн Эрүүл мэндийн газруудад тусгай багаж тоног төхөөрөмжөөр тоноглосон ‘’УАЗ-Пургон’’ авто машиныг гардуулан өгөх арга хэмжээ боллоо.

Яаралтай түргэн тусламжийн 10 гаруй автомашиныг Баянхонгор аймгийн Баацагаан сум, Гурванбулаг, Баянбулаг, Эрдэнэцогт, Баянцагаан сум болон Өвөрхангай аймгийн Өлзийт, Уянга, Нарийнтээл, Баянгол, Баруунбаян-Улаан сумын эмч албан хаагчид сумынхаа иргэдэд эмнэлгийн тусламж үйлчилгээ үзүүлэхэд ашиглах юм.

Баянхонгор аймгийн Баацагаан сумын эрүүл мэндийн төвийн дарга Д.Болормаа энэ үеэр хэлэхдээ “Манай сум 3200 хүн амтай, тал хээр хосолсон бартаа ихтэй газар нутгийн онцлогтой. Өмнөх эмнэлгийн машин маань ашиглалтаас гарсан байсан. Өнөөдөр шинэ пургонтой болж байгаадаа баяртай байна. Одоо бол хүн бүрт хүрэх эрүүл мэндийн тусламж үйлчилгээ маань сайжирна гэдэгт итгэлтэй байна гэв.

Б.УЯНГА

Хүүхдийн зуслангийн үйл ажиллагаа эхлэх гэж байгаатай холбогдуулан Нийслэлийн Хүүхэд, гэр бүлийн хөгжлийн газраас хэвлэлийн бага хурал хийлээ. Өнгөрсөн жил нийслэлд 19 зуслан үйл ажиллагаа явуулсан бөгөөд нийт 16 мянга 540 хүүхэд амарчээ. Энэ онд 27 зуслан үйл ажиллагаа үйл ажиллагаа эхлүүлэх зөвшөөрөл авах мэдэгдлээ ирүүлсэн байна.

Нийслэлийн Засаг даргын 2017 оны 5 дугаар сарын 19-ний өдрийн “Хүүхдийн зуслангийн талаар авах зарим арга хэмжээний тухай” захирамжийн хүрээнд 2017 оны 6 дугаар сарын 5-наас 8-ныг хүртэл хүүхдийн зуслангуудад хяналт шалгалт хийж, шаардлага хангасанд нь үйл ажиллагаагаа эхлүүлэх зөвшөөрөл олгох юм байна. Нийт 27 зуслан хамрагдах аж. Хяналт шалгалтыг нийслэлийн Засаг даргын Тамгын газар, Нийслэлийн Эрүүл мэндийн газар, нийслэлийн Мэргэжлийн хяналтын газар, нийслэлийн Онцгой байдлын газар, нийслэлийн Цагдаагийн газар, нийслэлийн Хүүхэд, гэр бүлийн хөгжлийн газар 3 ажлын хэсэгт хуваагдан зохион байгуулна.

Мөн 6 дугаар сарын 1-нээс 10-ны өдрүүдэд Үндэсний цэцэрлэгт хүрээлэнд хүүхдийн зуслангууд үйл ажиллагаагаа танилцуулах, эрхийн бичиг борлуулах ажлыг зохион байгуулна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

“Guys” хамтлагийн дуучин Х.Бат-Ундрал өнгөрсөн онд Замын-Үүдийн гаалиар хар тамхи оруулж ирж байгаад цагдаа нарт баригдан шалгагдаж, улмаар хорих 461 дүгээр ангид саатуулагдаж байв. Түүнд холбогдох энэ хэргийг Хан-Уул дүүргийн Эрүүгийн хэргийн анхан шатны шүүхэд хэлэлцэж, хоёр жил тэнсэн харгалзах ял оноосон байдаг. Ер нь манай урлаг соёлын нэлээд олон алдартан хар тамхины хэрэгт холбогдож байсныг уншигчид санаж буй биз ээ. Х.Бат-Ундрал өөрийн фэйсбүүк хуудсаар дамжуулан ийн ярьжээ.

Х.Бат-Ундрал: Монгол Улсын үндэсний аюулгүй байдалд ноцтой нөлөөлөхүйц хэмжээнд хүрсэн хар тахал хар тамхины эсрэг хамтдаа дуу хоолойгоо нэгтгэцгээе. Миний хувьд яг өнөөдрөөс нэг жилийн өмнө өөрийн хайртай гэр бүл, найз нөхөд, надад үргэлж урам хайрлаж байдаг та бүгдийнхээ тэр сайхан итгэл сэтгэл рүү ус цацсан нэгэн асуудалд орооцолдсон. Гурван сар гаруйн хугацаанд шалгагдаж, наймдугаар сард нийслэлийн прокурорын газраас шүүхэд хэргийг шилжүүлсэн байдаг. Ингээд 2016 оны аравдугаар сарын 9-нд Хан-Уул дүүргийн шүүхээр миний хэрэг орж, надад хоёр жилийн хорих ял оноосон. Шүүгч надад “Х.Бат-Ундралаа чамд хэлэх үг байна уу” гэхэд нь “Болчимгүй үйлдэл гаргаж, ийм муухай зүйлд орооцолдсондоо харамсаж байна.

Ээжээсээ болон надад урам хайрладаг бүх хүмүүсээс уучлалт хүсч байна. Би дуучин гэдэг утгаараа залууст үлгэр дуурайлал болохын оронд буруу зүйлд орооцолдсондоо өөртөө маш их харамсаж байна. Монгол Улсын төрийн сүлд өршөөж, та бүхэн минь намайг гэмшиж, ухаарч байгааг минь ойлгоосой” гэсэн. Ингээд шүүх хуралдаан болсноос хэсэг хугацааны дараа шүүгч орж ирээд “Чамд хоёр жилийн ял оноож байна. Гэхдээ чиний хэлсэн үг, гэм буруугаа ойлгож ухаарч байгааг чинь сонсоод шүүхийн энэрэнгүй зарчмаар хоёр жилийн ялыг чинь тэнсэх ял болгон өөрчилж байна. Энэ хугацаандаа хар тамхины эсрэг дуу хоолойгоо нэгтгэж, Монголын ард түмэн хүүхэд залуустаа хар тамхины эсрэг байрийг сурталчилж, энэ талын ажил үйлсэд бие сэтгэлээ зориулаарай” гэдэг итгэл хүлээлгэсэн.

Яг энэ цаг хугацаанд сэтгэл санааны хувьд зовж шаналсан хүн миний ээж юм. Тэр үед ээж минь хол байсан. ээжтэйгээ утсаар ярихад шууд л уйлсан, би ч уйлаад, бид юу ч ярилгүй хоёулаа уйлсаар л байсан. Эцэст нь би ээждээ “Ээж минь одоо тайвшир даа, хүү нь тийм муухай зүйл хийхгүй ээ, та хүүдээ итгэж байгаа биз дээ” гэхэд ээж минь “Тиймээ, ээж нь хүүдээ итгэж байна” гэсэн. Би ээждээ нэг л зүйлийг хэлсэн “Ээжээ, хүү нь ахиж таныхаа нулимсыг үзэхгүй ээ, хүүдээ итгээрэй, хүү тань нэг удаа алдлаа, дахиж би алдахгүй ээ гэсэн” хэмээн ярьжээ.

Өнгөрсөн жил Тагнуулын ерөнхий газар, цагдаагийн байгууллага болон хар тамхи, мансуурлын эсрэг үйл ажиллагаа явуулж байгаа төрийн бус байгууллага хамтарч судалгаа хийсэн байдаг. Судалгаагаар нийт 76 мянга гаруй хүн хар тамхи хэрэглэж мансуурч байна. Үүний 60 гаруй мянга нь өсвөр насны хүүхдүүд болон 19-35 насны залуус байна гэх нарийвчилсан судалгааг гаргасан байдаг.

Тагнуулын ерөнхий газраас мэдэгдэл гаргажээ.

Уг мэдэгдэлд “Сүүлийн үед олон нийтийн хэвлэл, мэдээллийн хэрэгслээр тагнуулын байгууллагын харьяаллын “Эх орноосоо урвах” гэмт хэргийг Эрүүгийн хуульд нэмэлт, өөрчлөлт оруулах тухай 2017 оны 05 дугаар сарын 11-ний өдрийн хуулийг батлахад хассан мэтээр буруу ташаа мэдээлэл гарах боллоо.

2002 онд батлагдсан Эрүүгийн хуулийн 79 дүгээр зүйлд заасан “Эх орноосоо урвах” гэмт хэргийг Эрүүгийн хуулийн шинэчилсэн найруулга /2015 он/-д 19.1 /Эх орноосоо урвах/, 19.4 /Гадаадын тагнуулын алба, байгууллага, иргэнтэй хууль бусаар хамтран ажиллах/ дүгээр зүйлүүдэд тус тус обьектив талын үйлдлээр нь хоёр салгаж тусгасан бөгөөд уг гэмт хэрэгт хүлээлгэх ял шийтгэлийн бодлогыг хөнгөрүүлээгүй.

Энэхүү өөрчлөлт нь олон улсын харилцааны хөгжлийн өнөөгийн чиг хандлага, гадаад орнуудын эрүүгийн хууль тогтоомжид энэ төрлийн гэмт хэргийг зүйлчилсэн нийтлэг жишиг, тагнуулын байгууллагаас харьяаллын гэмт хэрэг, түүний дотор тухайн гэмт хэргийн гаралт, шалгаж шийдвэрлэсэн байдалд хийсэн судалгаа, шүүхийн практик болон эрх бүхий байгууллагуудын санал, дүгнэлт зэрэгт үндэслэсэн болохыг мэдэгдэж байна” гэжээ.

ТАГНУУЛЫН ЕРӨНХИЙ ГАЗАР