Month: April 2017

Сонсголын бэрхшээлтэй хүүхдийн тусгай 29
дүгээр сургуулийн хашаанд Сүхбаатар дүүргийн Нийгмийн даатгалын хэлтэс
2015 оны нийслэлийн Засаг даргын захирамжаар “Нийгмийн хамгааллын төв”
барих зориулалтаар 900 м.кв газрыг эзэмших гэрчилгээ авч, барилгын ажил
эхлүүлэхээр ажиллаж байсан юм. Уг захирамж нь Газрын тухай хуулийг
зөрчин төрийн байгууллагаас төрийн байгууллага руу шилжүүлсэн байна.
Монгол улсдаа ганцхан тооцогддог тусгай сургалттай сургуулийн газарт
төрийн байгууллага оффистой болохын тулд барилгын ажил эхлүүлж байгааг
буруу хэмээн нийслэлийн Засаг дарга С.Батболд үзсэн байна. Ийм учраас
өнөөдөр захирамж гаргаж, өмнөх захирамжийг хүчингүй болголоо. Энэ талаар
нийслэлийн Газрын албаны дарга Э.Болорчулуун, НЗДТГ-ын Хууль, эрх зүйн
хэлтсийн дарга А.Даваажаргал нар өнөөдөр мэдээлэл хийсэн юм.

Нийслэлийн Газрын албаны дарга
Э.Болорчулуун “Оны өмнө нийслэлийн Засаг дарга сургууль цэцэрлэгийн
хашаанд газар олгохгүй, олгосон тохиолдолд энэ шийдвэрүүдийг бүгдийг нь
цуцлана” гэж хэвлэл мэдээллээр мэдэгдэж байсан. Түүнчлэн нийслэлийн
Онцгой байдлын газраас гамшиг гарсан тохиолдолд сургуулийн орчмын газрыг
онцгой бүсэд авч, дуудлагаар цуглах газар гэж зарласан байдаг. Өнөөдөр
мөрдөгдөж байгаа Газрын тухай хууль болон Гамшгийн тухай хуулиудыг
үндэслэн тусгай сургалттай 29 дүгээр сургуулийн орчим 900 ам метр
газрыг Сүхбаатар дүүргийн нийгмийн даатгалын хэлтэст олгосныг өнөөдөр
хотын дарга захирамж гарган цуцаллаа. Нийгмийн даатгалын газраас хүсэлт
гаргасан тохиолдолд өөр газар шийдвэрлэж өгөх боломжтой. 29 дүгээр
сургуульд сурч байгаа хүүхдүүдийн эцэг эхчүүдээс сургууль орчмын
тохижилт муу, ойр хавиар зорчиход хөгжлийн бэрхшээлтэй хүүхдүүдэд
хүндрэлтэй байна гэсэн гомдол ирсэн. Цаашид тухайн газрыг чөлөөлж,
тохижилтын ажлыг хийж, хүүхэд сурч, хүмүүжих таатай гадна орчныг
бүрдүүлэх чиглэлээр ажиллана” гэж ярилаа хэмээн нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

2017.03.30-ны өдрийн 08 цаг 25 минутанд Цагдаагийн газрын 7059102 дугаарын утсанд иргэн М-ээс “Жорлонд хүн төрөөд хүүхдээ жорлонд унагасан байна” гэсэн дуудлага мэдээлэл ирсний дагуу мөрдөн байцааагч, цагдаагийн дэслэгч Б.Даваадорж нь тухайн газарт шуурхай очиж түргэн тусламж болон онцгой байдлын аврах бүрэлдэхүүн ирэхийг хүлээж хугацаа алдвал нярай хүүхдийн амь нас хохирч болзошгүй нөхцөл байдал үүссэн тул жорлонгийн гишгүүр модыг трубагаар хөшиж авч, нүх рүү орж жорлонд унасан нярай хүүхдийг гаргаж, амь насыг нь аварч, яаралтай түргэн тусламжийн эмч нарт хүлээлгэн өгсөн гавъяатай үйлс бүтээлээ. Одоо эх, нярай хүүхэд эсэн мэнд Нэгдсэн эмнэлгийн “Төрөх” тасагт хэвтэн эмчлүүлж байна. Гавъяатай үйлс бүтээсэн мөрдөн байцаагч, цагдаагийн дэслэгч Б.Даваадоржид баяр хүргэж, ажилд нь амжилт хүсье.

“Монголын Геологи Хайгуул 2017 чуулганд УУХҮЯ-ны Гадаад хамтын ажиллагааны хэлтсийн дарга Д.Батхүү “Монголын геологи хайгуулын салбарт хөрөнгө оруулах боломж” сэдвээр илтгэл тавьсан юм. Түүнээс хөрөнгө оруулалтын орчин, Оюутолгойн гэрээ, Гачууртын орд зэрэг зарим асуултанд хариулт авсанаа хүргэе.

---

-Монголын геологи, уул уурхайн салбарт хөрөнгө оруулах боломж ямар байгаа вэ, Яамны зүгээс уг асуудалд ямар бодлого баримталж ажиллаж байгаа талаар мэдээлэл өгнө үү?

-Эрдэс баялгийн салбарт хөрөнгө оруулалт татах асуудал үргэлж өрсөлдөөнтэй байдаг учир бидэнд бусад улс орнуудтай өрсөлдөх шаардлага тулгардаг. Тиймээс бид хөрөнгө оруулалт татах боломжийг бүрдүүлэхийн тулд хэд хэдэн зүйл дээр төвлөрч ажиллаж байна. Үүнд нэгдүгээрт, хөрөнгө оруулагчдын хувьд хууль эрхзүйн таатай орчин хамгийн чухал байдаг. Тиймээс бид хөрөнгө оруулагчдын эрх ашгийг хамгаалсан, тэдэнд ээлтэй, тогтвортой хууль эрхзүйн орчныг бий болгох чиглэлд ихээхэн ач холбогдол өгч ажиллаж байна. Хоёрдугаарт, ажиллах орчныг нь бүрдүүлэхийн тулд геологийн хайгуулын талбайг шинээр олгох ажлыг эхлүүлсэн. Уг ажлын хүрээнд өмнө нь олгож байсан талбайг хоёр дахин нэмэгдүүлсэн хэмжээгээр зөвшөөрөл олгох зорилт тавьсан. Цаашид ч хайгуулын талбайн хэмжээг нэмэх төлөвлөгөөтэй байгаа. Улмаар хайгуулын салбар сэргэж, хөгжсөнөөр дараа дараагийн Оюутолгой, Тавантолгой шиг томоохон ордууд нээгдэж Монгол орны эдийн засаг сэргэх боломж бүрдэх юм.

-Хөрөнгө оруулагчдад ээлтэй, таатай хууль эрхзүйн орчныг бүрдүүлэхийн тулд Гэнэтийн ашгийн 68 хувийн татвар, “урт нэртэй хууль”-иудад тусгагдсан заалтуудад тухайлсан ямар өөрчлөлтүүд оруулах вэ?

-Бид өмнө нь алдаатай буруу шийдвэр гаргасны тод жишээ бол Гэнэтийн ашгийн 68 хувийн татвар, Стратегийн салбарт гадны хөрөнгө оруулалтыг татах тухай болон “урт нэртэй” хуулиуд юм. Төр залгамж чанараа хадгалж явах ёстой учраас нэгэнт батлагдсан хуулиудыг шууд цуцалж, өмнөх Засгийн газрын хийсэн ажлыг үгүйсгэж болохгүй. Гэсэн ч бид өмнөх алдаандаа дүгнэлт хийж засч сайжруулах тал дээр анхаарч ажиллаж байгаа.

“Урт нэртэй хууль”-ийн тухайд түүнийг дагаж мөрдөх журмыг сайжруулахын тулд манай яам болон бусад яам, агентлагуудаас бүрдсэн ажлын хэсэг ажиллаж байна. Харин Гэнэтийн ашгийн 68 хувийн татварын тухай хуульд зохицуулалт хийсэн. Мөн Стратегийн салбарт гадны хөрөнгө оруулалтыг татах тухай хуулийг Хөрөнгө оруулалтын шинэ хуулиар зохицуулаад өдгөө дагаж мөрдөж байна.

-Манай геологи хайгуулын салбарт гадны хичнээн орон хөрөнгө оруулагчаар ажиллаж байгаа вэ?

-Өдгөө геологи хайгуулын салбарт Канад, Австрали, АНУ-аас эхлээд БНХАУ, БНСУ, ХБНГУ, Япон зэрэг 20 гаруй орны компани идэвхтэй үйл ажиллагаа явуулж байна.

-Гадны хөрөнгө оруулагчдыг татах зорилгоор хууль эрхзүйн орчныг сайжруулж байгаатай уялдан шинээр орж ирж буй гадны хөрөнгө оруулагчдын тухайд ямар мэдээлэлтэй байгаа вэ?

-Бидний хувьд хөрөнгө оруулагч нь аль улсын иргэн байх нь чухал биш, бүгдэд нээлттэй зарчим баримталж байгаа. Тиймээс манай оронд хөрөнгө оруулахыг хүссэн хэнийг ч бид хүлээж авна. Саяхан Канадын Торонтод болсон PDAC чуулганы үеэр Монголын эдийн засгийн чуулганыг Африкийн төлөөлөгчид сонирхож байсан. Магадгүй тэд бидний туршлагыг судлах зорилготой байсан байх. Гэхдээ Өмнөд Африк зэрэг санхүүгийн боломжтой томоохон орнууд Монгол оронд хөрөнгө оруулах сонирхолтой байгаа эсэхийг үгүйсгэх аргагүй юм.

-Сүүлийн үед УУХҮЯ гадны хөрөнгө оруулагчидтай хамтран ажиллах ямар гэрээ байгуулсан бэ?

-Засгийн газраас хэрэгжүүлж байгаа Алт-2 хөтөлбөрийн хүрээнд, Торонтод болсон PDAC чуулганы үеэр Канадын хөрөнгө оруулалттай Step Gold компанитай санамж бичигт гарын үсэг зурлаа. Тэд манай алтны салбарт 20 сая ам.долларын хөрөнгө оруулалт хийхээр болсон.

Мөн 10 гаруй жилийн хугацаанд яригдсан Канад улстай хөрөнгө оруулалтыг хөхүүлэн дэмжих, харилцан амлах тухай хэлэлцээрийг байгууллаа. Уг хэлэлцээрийн үр дүнд хоёр тал харилцан хөрөнгө оруулсан тохиолдолд хэн нэгнийхээ эрх ашгийг хамгаалах юм. Бид өмнөх Засгийн газрынхаа алдааг шүүмжлэх нь зохимжгүй ч дурдахгүй байхын аргагүй жишээний нэг бол Хан ресурс билээ. Тухайн лицензыг нь хурааж авсан Монгол Улсын Засгийн газар Арбитрын шүүхэд ялагдсан. Бид зарим удирдлагуудыг нь шүүхэд татаж хариуцлага хүлээлгэсэн байдаг. Тиймээс Хан ресурс компанийн жишээг давтахгүйн тулд Канад улстай байгуулсан хэлэлцээрийн дагуу бид төр засгийн алдаатай шийдвэрүүдээс хөрөнгө оруулагчдыг хамгаалах боломж бүрдэж байгаа юм. Түүнчлэн Канад улсад хөрөнгө оруулалт хийсэн манай хөрөнгө оруулагчдын эрх ашиг мөн адил хамгаалагдана гэсэн үг.

-Монгол Улс гадны хөрөнгө оруулагчдад ээлтэй болсон тухайгаа гадаад зах зээлд хэрхэн таниулан сурталчилж байгаа вэ?

-Үнэндээ яг энэ тал дээр учир дутагдалтай зүйл бий. Торонтод болсон хайгуулын салбарын хамгийн том чуулган болох PDAC-д манай улс оролцсон нь хамгийн том сурталчилгаа болсон. Цаашид Монгол Улсыг сурталчилах нэгдсэн брэнд бий болгох санаачлага нь Засгийн газрын бодлого болж, Ерөнхий сайд тус ажлыг ахлаж ажиллаж байгаа. Тиймээс уг ажил тун удахгүй олон нийтэд танилцуулагдах болов уу.

-Та УУХҮЯ-ыг төлөөлж чуулганд оролцож байна. Тиймээс зарим зүйлийг тодруулая. Тухайлбал, Оюутолгойн хөрөнгө оруулалтын гэрээг тойрсон асуудал байна. Уг нь тус гэрээний хэрэгжилт болоод хөрөнгө оруулалтын хэтрэлтийг шалгах ажлын хэсэг нэгдсэн санал дүгнэлтээ Засгийн газарт танилцуулсан байдаг. Тухайлбал, Оюутолгойгоос гарсан баяжмалаас олсон орлого манай банкуудаар дамжилгүй шууд гадаад зах зээлд эргэлддэг. Уг нь манай банкуудаар дамжихад л гүйлгээний шимтгэл нь манайд орж ирэх болно. Энэ асуудал ч дээрх санал дүгнэлтэнд тусгагдсан байдаг. Гэтэл тус санал дүгнэлт гурван Засгийн газрыг дамнасан ч дорвитой ажил хийгдсэнгүй. Тиймээс одоогийн Засгийн газар тус асуудалд ямар арга хэмжээ авч ажиллах вэ?

-Оюутолгойн гэрээтэй холбоотой асуудлыг бид сүүлийн 10 жилийн турш ярьж байгаа. Төр залгамж чанараа хадгалж өмнөх Засгийн газрын хийсэн ажлыг үргэлжлүүлэн авч явах ёстой. Мөн өмнө нь хийсэн аливаа гэрээ хэлцлийг засч залруулан боломжийнх нь хэмжээнд үргэлжлүүлэн авч явах хэрэгтэй. Тиймээс Оюутолгойн гэрээний асуудал дээр эрхзүй болон санхүүгийн тал дээр хоёр ажлын хэсэг байгуулагдаад ажиллаж байгаа. Тун удахгүй тодорхой үр дүн гарах болов уу. Гэхдээ гэрээ байгуулагдсан, тус гэрээний дагуу харилцагч талууд үүрэг хүлээсэн. Тиймээс бид өмнөх алдаагаа засч залруулна. Тэр дундаа Монгол орны язгуур эрх ашгийг хамгаалах чиглэлийг барьж ажиллаж байна. Удахгүй үр дүн гарах болов уу.

-2006 оноос хойш яригдаж байгаа алтны Гачууртын ордын тухайд Засгийн газар ямар бодлого баримталж байгаа вэ. Тус ордыг хэзээнээс ашиглах вэ?

-Популистууд, эх орончид, ТББ-уудын тодорхой хэмжээний нөлөөгөөр тус ордын үйл ажиллагаа зогссон нарийн төвөгтэй асуудал гэдгийг бүгд мэдэж байгаа. Өмнөх Засгийн газрын байгуулсан гэрээ хэлцлийг бид тодорхой түвшинд засч залруулж байна. Одоогоор манай яам тус ордыг хэрэгжүүлэх Сентерра гоулд компанид орд ашиглах гэрээний төслийг боловсруулж өгсөн. Манай ажлын хэсгийнхэн тун удахгүй Хөрөнгө оруулалтын гэрээний төслийг тус компанид өгнө. Улмаар хоёр тал хэлэлцээр хийнэ. Бид уг төслийг энэ онд эхлүүлж оны эцэст үр дүнг нь харах ёстой гэсэн зорилгын дагуу ажиллаж байна.

-Засгийн газрын зүгээс гэрээ хэлцлийн тал дээр ажиллаж байгаа юм байна. Харин яг ажиллах гээд очиход орон нутгийнхан болоод хууль бусаар алт олборлож байгаа хүмүүсийн эсэргүүцэлтэй тулгардаг. Уг асуудлыг хэрхэн зохицуулах вэ?

-Гачууртын орд төдийгүй агуулга өндөртэй, сонирхол татсан том хэмжээний ордуудад орон нутгийнхан болоод хууль бусаар олборлогчдын зүгээс байнга эсэргүүцэлтэй тулгардаг. Уг асуудлыг зөвхөн төрийн хүчээр шийдэхгүй, бид бүхэн хамтдаа шийдвэрлэх ёстой. Төрийн зүгээс орон нутгийн засаг захиргаатай ойлголцож шийдэлд хүрнэ. Харин орон нутгийнхан болоод эсэргүүцэж байгаа хүмүүст уг ордыг ашигласнаар гарах эдийн засгийн үр өгөөжийг таниулах ажлыг төр, хувийн хэвшил, олон нийтийн байгууллагууд хамтарч ажиллаж байж шийдэлд хүрнэ. Тиймээс ард иргэдэд геологи уул уурхайн салбарын ач холбогдолыг ойлгуулах тал дээр мэргэжлийн холбоод ажиллах уриалга гаргаж болох юм.

Эх сурвалж: www.investor.mn

Mongolia Mining олон улсын уул уурхайн үзэсгэлэнгийн долоо дахь удаагийн арга хэмжээ Буянт Ухаа спортын ордонд нээгдлээ.

Дөрөвдүгээр сарын 5-7-ны өдрүүдэд гурван өдрийн турш үргэлжлэх Mongolia Mining олон улсын үзэсгэлэн нь уул уурхайн салбарын техник технологийн хамгийн чухал арга хэмжээ бөгөөд энэ жилийн үзэсгэлэнг Уул уурхай, Хүнд үйлдвэрийн яам, Ашигт малтмал, газрын тосны газар, Монголын үндэсний худалдаа аж үйлдвэрийн танхим, Оюу толгой ХХК дэмжин ажиллаж байгаа бөгөөд уламжлал ёсоор Майнэкс Монгол ХХК, Эрдэнэс Монгол ХХК хамтран зохион байгуулж байна.

Үзэсгэлэнгийн нээлтэнд Монголын үндэсний худалдаа аж үйлдвэрийн танхимын ерөнхийлөгч Б.Лхагважав, “Эрдэнэс Монгол” ХХК-нийн гүйцэтгэх захирал Ц.Түмэнцогт, Мongolia Mining 2017 үзэсгэлэнгийн зохион байгуулах хорооны дарга Т.Баттулга нар оролцон Уул уурхай, хүнд үйлдвэрийн сайд Ц.Дашдорж мэндчилгээ ирүүлэв.

Сайд мэндчилгээндээ Монголчууд маань “саалиа бэлдэхээр саваа бэлд” гэж ярьдаг. Бидэнд угтан бэлдэж, улам сайжруулах олон зүйл байна. Уул уурхайн эрхзүйн орчноо ойлгомжтой, тогтвортой болгох, Хөрөнгө оруулагчдад таатай, найдвартай орчныг бүрдүүлэх, Байгаль орчинд халгүй техник, технологийн нэвтрүүлэх, салбарын бодлогыг хэрэгжүүлэх чадавхийг сайжруулах зэрэг олон зорилго өмнө маань байна.

Салбарын бодлого, үйл ажиллагаатай бүрнээ нийцэж, Монголын уул уурхайн салбарт дэлхийн дэвшилтэт техник, технологи танилцуулах, нэвтрүүлэх, хөрөнгө оруулалтыг нэмэгдүүлэх, ханган нийлүүлэлт, үйлчилгээ үзүүлэх аж ахуйн нэгжийг нэгтгэхэд тодорхой хувь нэмэр оруулж байгаа “Mongolia Mining 2017” олон улсын үзэсгэлэнгийн ажиллагаанд амжилт хүсье гэжээ.

Mongolia mining 2017 үзэсгэлэнд 16 орны 130 орчим компани оролцож байна. Монголд үйл ажиллагаа явуулж байгаа дотоод, гадаадын хөрөнгө оруулалттай компаниудаас гадна Австрали, АНУ, Герман, ОХУ, Япон, БНХАУ, Беларус, Канад, Чех, БНСУ, Энэтхэг, Нидерланд, Казкастан, Турк, Швед зэрэг орнуудаас уул уурхайн ханган нийлүүлэгчид нэг дээвэр дор цуглан бүтээгдэхүүнээ сурталчилж байна.

Сэлэнгэ аймгийн Мандал сум буюу Зүүнхараагийн онцгой байдлын албаны офицер У эхнэрээ хэрцгийгээр хөнөөсөн хэрэгт холбогджээ. Тодруулбал энэ ноцтой хэрэг гуравдугаар сарын 18-нд буюу Монгол цэргийн өдөр гарчээ.

Зүүнхараад үйл ажиллагаа явуулдаг цэрэгжсэн байгууллагуудын дунд марш тактикийн тэмцээн болж, онцгой байдлын офицер шүүгчээр нь ажилласан аж. Тэмцээний дараа архи ууцгааж, шөнө нь гэртээ очоод эхнэрээ зэрлэгээр хөнөөжээ. Эмч нар гэрт нь ороод талийгаачийн цогцсыг харж ч чадахгүй байсан тухай мэдээлэл байна.

Онцгой байдлын офицер У сархад багагүй хүртчихдэг, уухаараа гэр бүлийнхэндээ агсам тавьдаг байсан тухай орон нутгийн иргэд ярьж байна. Түүний ах нь Сэлэнгэ аймгийн Онцгой байдлын албанд ажиллаж байсан нэгэн, садан төрлийнх нь хүн цагдаад нь ажилладаг гэдгийг ч нутгийн иргэд ярив.

Талийгаач эхнэр нь Зүүнхараагийн Хэрх багийн сургуулийн нийгмийн ажилтан байсан гэнэ.

Нийслэлийн цагдаагийн газрын дарга, цагдаагийн хурандаа Ж.Эрдэнэболд “Иргэд, оршин суугчдын оролцоотойгоор камержуулах болзолт уралдааныг өнөөдрөөс эхлүүлж байна. Энэ ажлын хүрээнд орц, гудамж, зам, талбайд хяналтын камер байршуулсан нийслэлийн дүүрэг, хороод, иргэд, СӨХ, хөршийн хяналтын бүлгүүдийг шагнаж урамшуулах юм. Шагналын сан 60 сая төгрөг байна. Камержуулсаны үр дүнд гэмт хэргийг гарсны дараа бус гарахаас нь өмнө урьдчилан сэргийлэх бүрэн боломжтой. Өмнө нь хяналтын камерын тусламжтайгаар гэмт хэргийг цаг алдалгүй илрүүлж байсан олон сайн жишээ бий” гэж ярилаа.

Монгол Улсад Гэмт хэргээс урьдчилан сэргийлэх ажлыг зохицуулах зөвлөл, Нийслэлийн Засаг даргын Тамгын газар, Нийслэлийн цагдаагийн газартай хамтран Нийслэл хотод үйлдэгдэж байгаа гэмт хэргийг бууруулах, урьдчилан сэргийлэх ажлын хүрээнд орон сууцны орц, гадна орчин, гэр хорооллын гудамж, талбайг камержуулж иргэдийн эрүүл, аюулгүй орчинд амьдрах нөхцөлийг бүрдүүлэх, гэмт хэргээс урьдчилан сэргийлэх ажилд иргэд, олон нийтийн оролцоог нэмэгдүүлэх зорилгоор 60 сая төгрөгийн шагналын сантай “Камержуулалт” болзолт уралдааныг энэ сарын 1-ний өдрөөс зургаадугаар сарын 1-ний өдөр хүртэл хоёр сарын хугацаатай зарлаж байна.

Болзолт уралдааны гол зорилго нь иргэд, оршин суугчдын эрүүл аюулгүй орчинд амьдрах нөхцлийг бүрдүүлэх, орон сууц түүний гадна орчин, гэр хорооллын гудамж, хүүхдийн тоглоомын талбай зэрэг газруудыг камержуулах гэмт хэргээс урьдчилан сэргийлэх ажилд иргэд, олон нийтийн оролцоог нэмэгдүүлж нийслэл хотод үйлдэгдэж байгаа гэмт хэргийг бууруулах, урьдчилан сэргийлэхэд оршиж байгаа аж.

Нийслэлийн хэмжээнд 2017 оны эхний гурван сард 4353 гэмт хэрэг бүртгэгдсэн нь өмнөх оны мөн үеэс 556 нэгжээр буюу 11.3 хувиар буурсан үзүүлэлттэй байгаа юм. Үүнээс гэр орон сууцанд 1408 хэрэг бүртгэгдсэн нь өмнөх оны мөн үеэс 21.5 хувиар, гудамж талбайд 947 гэмт хэрэг бүртгэгдсэн нь өмнөх оноос 7.4 хувиар тус тус буурсан аж гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.