Month: April 2017

Ногоон эдийн засгийн төлөөх түншлэлийн “Тогтвортой, хүртээмжтэй эдийн засаг-Тогтвортой хөгжлийн зорилгыг хэрэгжүүлэх нь” сайд нарын бага хурал гуравдугаар сарын 26-28-ны өдрүүдэд ХБНГУ-ын нийслэл Берлин хотод боллоо.

Хуралд улс орнуудын Засгийн газрын сайд, дэд сайд, төрийн нарийн бичгийн дарга, НҮБ-ын төрөлжсан байгууллагуудын удирдлага, Бизнес 20, Оксфам Интернейшнл, Энэтхэгийн ХАА, хөдөөгийн хөгжлийн үндэсний банк, BMW, Ikea зэрэг компанийн удирдлага, Оксфордын их сургууль, Колумбын их сургууль зэрэг дэлхийн шилдэг их сургуулиудын эрдэмтэд, иргэний нийгмийн байгууллагын төлөөлөгчид зэрэг нийт 300 гаруй төлөөлөгчид оролцжээ.

Сайд нарын бага хурлаар Тогтвортой хөгжлийн 2030 хөтөлбөр, Уур амьсгалын өөрчлөлтийн тухай Парисийн хэлэлцээрийг хэрэгжүүлэхэд улс орнуудын оруулах хувь нэмэр, ач холбогдлын талаар санал бодлоо солилцож, ногоон хөрөнгө оруулалт, тогтвортой амьдралын хэв маяг, хүртээмжтэй өсөлт гэсэн үндсэн гурван сэдвийн доор салбар хуралдаанууд болов.

Сайд нарын бага хуралд Байгаль орчин, аялал жуулчлалын дэд сайд Ц. Батбаяр оролцож, тус яамны Ногоон хөгжлийн бодлого, төлөвлөлтийн газрын дарга Т. Булган, Ногоон эдийн засгийн төлөөх түншлэлийн үндэсний зохицуулагч С. Алтанцэцэг нар дагалдан ажиллав.Түүнчлэн, Монголын Банкны Холбооны Дэд дарга, Ариг банкны гүйцэтгэх захирал Д. Төмөрхүү нар оролцлоо.

Бага хурлын эхний өдөр “Тогтвортой хөгжлийн зорилгыг урагшлуулах хүртээмжтэй, ногоон эдийн засаг-Хүлээсэн үүргээ шуурхай биелүүлэх нь” дээд хэмжээний хэлэлцүүлэг, “Ногоон эдийн засгийн анхдагч нар-Шинэлэг арга, бизнесийн загвар, түншлэл” үзэсгэлэн, “Хүртээмжтэй өсөлт ба зохистой хөдөлмөр эрхлэлт”, “Ногоон хөрөнгө оруулалт: Эх орноосоо эхлэх үү? Санхүү, төсвийн бодлого, дотоодын нөөцийг нэмэгдүүлэх нь” “Тогтвортой худалдаа, хөрөнгө оруулалт” зэрэг салбар хуралдаан болж өнгөрөв.

Хурлын хоёрдахь өдөр “Бохирдолгүй дэлхийн төлөө” сэдэвт удирдагчдын нээлттэй ярилцлага болсон бөгөөд энэ үеэр бараа, бүтээгдэхүүний хэрэглээ, хэрэглэгчийн хандлага, хотын нийтийн тээврийн хэрэгсэл, суудлын машиныг цахилгаан машинаар солих боломж, дэд бүтэц зэрэг асуудлыг хэлэлцжээ. Мөн “Өөрчлөгдөж буй үйл явц-Хүртээмжтэй, ногоон эдийн засгийн үзэл баримтлал ба ирээдүйн төлөв”, “Тогтвортой амьдралын хэв маяг өөрчлөлтийн хөдөлгүүр болох нь” сэдэвт хэлэлцүүлэг, “Тогтвортой амьдралын хэв маяг: Хүлэмжийн хийн ялгарал багатай амьдралын хэв маяг”, “Ногоон хөрөнгө оруулалт: Ил тод байдал ба шилжилт- Санхүүгийн салбар тогтвортой хөгжлийг хэрхэн дэмжих вэ?” , “Хүртээмжтэй өсөлт: Ногоон ажлын байр, хөдөлмөр эрхлэлт ба инновацийн эрэлд” зэрэг салбар хуралдаан, “Байгальд ээлтэй гарааны бизнес: Тогтвортой бизнесийг дэмжих сайн туршлага, стратеги” дугуй ширээний нээлттэй ярилцлага болов.

Сайд нарын бага хурлын үеэр БОАЖ-ын дэд сайд Ц. Батбаяр НҮБ-ын Байгаль орчны хөтөлбөрийн гүйцэтгэх захирал Эрик Солэйм, ХБНГУ-ын Байгаль орчин, байгаль хамгаалах, барилга, цөмийн аюулгүй байдлын яамны Парлиаментийн төрийн нарийн бичгийн дарга Рита Шварзелухр Суттер, ХБНГУ-ын Тогтвортой хөгжлийн зөвлөлийн дарга Марлехн Тиеме, НҮБ-ын Сургалт судалгааны хүрээлэнгийн Ногоон хөгжил, уур амьсгалын асуудал хариуцсан менежер Ангус Макэй, Даян дэлхийн ногоон хөгжлийн байгууллагын ерөнхий захирал Фрэнк Ризберман, Энэтхэгийн Тогтвортой хөгжлийн боловсрол төвийн захирал Картикеяа Сарабхай зэрэг байгууллагын удирдлага, төлөөлөгчидтэй тусгайлсан уулзалт хийж, хамтын ажиллагааны өнөөгийн төлөв байдал, ирээдүйн төлөвлөгөө, цаашид авах арга хэмжээний талаар санал солилцов.

БОАЖ-ын дэд сайд Ц. Батбаяр Сайд нарын бага хурлын хаалтын арга хэмжээнд зориулан хэлсэн үгэндээ Ногоон эдийн засгийн төлөөх түншлэлийн оруулсан хувь нэмэр, Монгол Улсын хүрсэн амжилтын талаар дурдаж, Монгол Улсын хэрэгжүүлж байгаа бодлого, үйл ажиллагаа нь түншлэлд нэгдсэн бусад орнуудад сайн туршлага, ногоон хөгжлийн бодит загвар болж байгааг онцлон тэмдэглэсэн байна.

Сайд нарын бага хурлын хаалтын арга хэмжээний үеэр Ногоон эдийн засгийн төлөөх түншлэлийн Хандивлагчдын Удирдах зөвлөлийн уулзалтыг Монгол Улсад зохион байгуулахаар болсоныг зарласан. Хурлыг 2017 оны есдүгээр сарын 18-наас Улаанбаатар хотноо зохион байгуулахаар төлөвлөж байна.

Оффшорчдын эсрэг нэгдсэн хөдөлгөөнөөс, ерөнхийлөгч Ц.Элбэгдорж болон УИХ-ын дарга М.Энхболд нарт шаардлага хүргүүлэх болсон талаараа мэдээлэл хийлээ.

Уг шаардлагад, Их Британи Умард Ирландын Нэгдсэн Вант Улсад элчин сайдаар томилогдон ажиллаж байгаа С.Баяртай холбоотой улс төрийн авилгын асуудал Монгол Улсын нэрийг олон улсад унагааж байгаа тул түүнийг яаралтай эгүүлэн татах, оффшортой асуудлаар С.Баярцогтод холбогдох эрүүгийн хэрэг прокурорын шатанд удааширч байгаад онцгой анхаарч, хэрэг удааширч байгаагийн шалтгааныг олон нийтэд мэдэгдэх шаардлагыг прокурорын байгууллагад хүргүүлж, шаардлагын хувийг Оффшорчдын эсрэг нэгдсэн хөдөлгөөнд ирүүлэхийг тусгажээ.

Түүнчлэн, УИХ-ын дарга М.Энхболдод хаягласан шаардлагад, оффшор данстай нэр холбогдож буй УИХ-ын гишүүдийн бүрэн эрхийг түдгэлзүүлэх саналыг УИХ-ын чуулганд 2017 оны дөрөвдүгээр сарын 10-ны дотор өргөн барихыг шаардсан байна. Тэд дээрх шаардлагынхаа хариуг 4-р сарын 12-ны өдөр 14:00 цагаас Төрийн ордноос хүлээж авах тухайгаа хурлын үеэр мэдэгдсэн юм.

Малын гоц халдварт шүлхий өвчин зүүн аймгуудад гарчээ. Тодруулбал, Дорноговь, Дорнод, Сүхбаатар аймгуудад мал шүлхийгээр өвдсөн нь тогтоогджээ. Өнгөрөгч гуравдугаар сарын сүүлчээр Дорноговь аймгийн Дэлгэрэх сумын Хөх толгой хэмээх газар нутаглаж буй малчин н.Сэндэнпүрэв гэх айлын үхэрт малын гоц халдварт шүлхий өвчний шинж тэмдэг илэрчээ. Дөрөвдүгээр сарын 2-ны байдлаар хоёр голомтын бүсэд 16 хот айлын 27 өрхийн 68 хүн,11616 толгой мал буй бөгөөд шүлхий өвчинд мэдрэмтгий 10657 толгой мал буй. Сэжигтэй бүсэд 32 хот айлын 54 өрхийн 121 хүн, 20975 толгой мал, үүнээс шүлхий өвчинд мэдрэмтгий 19252 үхэр буй аж. Мөн голомтын хоёр бүсийн дөрвөн өрхийн 12 үхэрт дээрх өвчний шинж тэмдэг илэрсэн бөгөөд гурван өрхийн 10 үхрийг устгалд оруулжээ.

Сүхбаатар аймгийн Дарьганга сумын Үүд багийн “Гүнгэрваа” гэдэг газар малчин А-гийн долоон үхэр, мөн багийн “Өрнө дэрс” гэдэг газар малчин Э-гийн суурьт мал, амьтны гоц халдварт “Шүлхий” өвчний шинж тэмдэг илэрч, өвчилсөн малаас дээж авч, Улсын мал эмнэлгийн ариун цэврийн төв лабораторид шинжлүүлэхэд шүлхий болох нь тогтоогдсон байна.

Нийслэлийн Засаг дарга бөгөөд Улаанбаатар хотын Захирагч С.Батболд “Тоёота мотор” корпорацийн Монгол дахь суурин төлөөлөгчийн газрын дарга Цүёоши Авай болон холбогдох албаны хүмүүсийг өнөөдөр хүлээн авч уулзлаа.

Ноён Цүёоши Авай “Бид 2014 оноос хойш Монгол наадмыг ивээн тэтгэж хамтран ажилласаар ирсэн. Энэ удаа дөрөв дэх жилдээ ивээн тэтгэж хамтран ажиллахыг хүсч байна. Үүнээс гадна замын хөдөлгөөний аюулгүй байдлыг сайжруулах чиглэлээр хамтран ажиллах саналтай байна” хэмээлээ.

Нийслэлийн Засаг дарга С.Батболд “Юуны өмнө Үндэсний их баяр Наадмын албан ёсны түншээр хамтран ажилладаг та бүхэнд нийт Улаанбаатарчуудынхаа өмнөөс талархал илэрхийлье. Бид энэ тал дээр татгалзах зүйлгүй. Монгол Улсын Замын хөдөлгөөний аюулгүй байдлын тухай хууль шинэчлэн батлагдаж, ерөнхий боловсролын сургуулийн бага, дунд, ахлах ангийн сурагчдын хичээлийн хөтөлбөрт “Замын хөдөлгөөний дүрэм” орсонтой холбогдуулан ном, сурах бичиг, сургалтын материал, гарын авлага шинээр боловсруулан гаргаж батлуулах, хэвлүүлэх, сургалт сурталчилгааны ажил зохион байгуулахад хамтран ажиллах саналтай байна” гэлээ.

Түүнчлэн ерөнхий боловсролын сургуулийн орчмын гарцыг сайжруулах, гэрэлтүүлгийг өөр ялгах гэрлээр хийх саналыг тухайн үеийн хотын удирдлагаас санал тавьж байсан, уг асуудлаар хамтран ажиллах хүсэлтэй хэвээр гэдгийг тодотгож байв гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Богд уулын дархан цаазат газарт золбин нохой олширч байгааг Богд Хан уулын дархан цаазат газрын албаны хүмүүс санаа зовнин өгүүлж байна. Нийслэл хоттой ойрхоноос гадна аялж зугаалж байгаа хүмүүс дагуулж ирсэн нохойгоо ууланд орхиж төөрүүлдэг зэрэгтэй холбоотой гэнэ.

Богд Хан уулын дархан цаазат газрын Хамгаалалтын захиргааны мэргэжилтэн Д.Банди “Бор гөрөөс, буга, жижиг мэрэгч амьтдад золбин нохой хохирол их учруулдаг. Он гарсаар 15 гаруй гөрөөсийг нохой хөөснийг бид арга хэмжээ авч, амьдрах чадвартайг нь ууланд нь буцааж тавьсан” гэж ярилаа.

Хаврын улиралд нохой устгалын ажлыг Богд Хан уулын дархан цаазат газраас зохион байгуулдаг бөгөөд өнөөдөр 3 дахь удаагийн устгалаа хийж байгаа аж. Богд Хан уулын дархан цаазат газрын Хамгаалалтын захиргааны мэргэжилтэн Д.Банди “Туулын шугуй, Богд ууланд энэ хавар маш их нохой байсан. Бид Хот тохижилтын газраас анчин авч нохой устгал хийдэг. Сүүлийн 2 удаагийн устгалаар 100 гаруй нохой устгасан. Өнөөдөр 4 анчин ажиллаж байна” хэмээлээ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Чингэлтэй дүүргийн VI хорооны иргэн Э.АЛТАНЗАЯА

Айл болгонд шахуу байдаг Хятадаас орж ирсэн цахилгаанаар ажилладаг халуун тогоо гээч зүйл бяцхан жаалуудад ямар аюул тарьж байгааг бид бэлхнээ мэдэх ч үүнээс сэрэмжилж чадахгүй байгаа нь харамсалтай. Хятадад үйлдвэрлэсэн халуун тогооны залгуур богино гэсэн шалтгаанаар газарт тавьж хоол, цай буцалгаж байх үед бага насны хүүхэд дээрээс унах, өөр лүүгээ татсан гэх шалтгаанаар гэмтэж, амь насаа алдах харамсалтай тохиолдлууд буурахгүй байна. Монголчууд дээр үеэс галд хүүхдээ оруулахгүйн тулд орноос уядаг байсан. Одоо ч гэсэн бага насны хүүхэдтэй гэр хорооллын айл өрхүүд уг уламжлалт аргыг хэрэглэх хэрэгтэй. Ингэхэд хүүхдийн эрх зөрчигдөөд байх асуудалгүй бөгөөд халуун усанд түлж шалзалснаас дээр биз дээ. Үнэнийг хэлэхэд энэ халуун тогоог хятадууд бодлогоор үйлдвэрлэж Монголд оруулж худалдаалаад байдаг юм биш биз гэсэн хардлага төрөх боллоо. Манайхан төр нь ч, ард иргэд нь ч бодлогогүй болохоороо үүнийг нь худалдан авч үр хүүхдээ насан туршийн эрэмдэг зэрэмдэг болгоод байх юм. Одоо бүр хүүхдүүдийн анхаарал, сонирхлыг татах тод өнгөтэй залгууртай худалдаалагддаг болчихож. Нялх балчир хүүхдүүд тод өнгөнд дуртай байдаг. Тиймээс ч тэдэнд зориулсан тоглоомуудыг улбар шар, тод ногоон гээд хурц өнгөтэй хийдэг. Харин халуун тогооны залгуур ийм тод өнгөтэй болсныг юу гэж тайлбарлах вэ. Өнгөлөг юманд дуртай нялх амьтан тоглоом гэж хууртагдаад л өөр дээрээ халуун хоол асгана шүү дээ. Түлэнхийн төвд халуун тогоонд түлэгдсэн хүүхдүүд өдөр бүр шахуу ирдэг тухай өр өвтгөм мэдээг бид сонсдог. Тоглоом шиг нь тод өнгөтэй залгууртай ийм халуун тогоо урдаас зөөгөөд байх юм бол учир мэдэхгүй олон нялх үрс минь түлэгдэнэ гэж наймаачид бодоосой. Мэргэжлийн хяналт ч бас ийм тод өнгөтэй залгууртай, аюул дагуулсан халуун тогоонд анхаарал тавиасай. Мөн бага насны хүүхдүүд халуун тогоонд түлэгдэж гэмтэн, амь насаараа хохирч байгаа явдал нь эцэг эх, асран хамгаалагчийн анхаарал болгоомжгүй байдалтай шууд хамааралтай юм.

Хэлэх эрхийн индэрт оролцон үзэл бодлоо илэрхийлэхийг хүсвэл 99650208 дугаарын утсаар холбоо барина уу.

Тэмдэглэл хөтөлсөн Э.МӨНХТҮВШИН