Month: April 2017

МХЕГ-ын дарга, Улсын ерөнхий байцаагч Н.Цагаанхүү мах, махан бүтээгдэхүүн экспортлогч аж ахуйн нэгжүүдийн удирдлагуудыг хүлээн авч уулзаж, хүнсний аюулгүй байдал, эрүүл ахуйн шаардлага хангасан бүтээгдэхүүний талаар санал солилцон, заавар зөвлөмж өглөө.

БНХАУ-ын Чанарын хяналт шалгалт, хорио цээрийн ерөнхий газрын баг тавдугаар сард манай улсад ажиллаж, махны үйлдвэрүүдэд эрсдэлийн үнэлгээ хийнэ. МХЕГ-аас мах, махан бүтээгдэхүүн экспортлогч аж ахуйн нэгжүүдийн хүсэлтийг хүлээн авч, тус газарт хандсанаар ийнхүү эрсдэлийн үнэлгээ хийх баг Монголд ажиллах юм.

Уулзалтын үеэр Махны холбооны гүйцэтгэх захирал Б.Очирбат мах экспортлогчдоо төлөөлөн үг хэлж, мах, махан бүтээгдэхүүн экспорлох үйл ажиллагааг хүндрэл чирэгдэлгүй, шуурхайг шийдвэрлэхийг БНХАУ-ын талд уламжилж өгөхийг хүслээ.

Монгол хүнийг эрүүл, урт удаан, чанартай амьдруулахын төлөөх их үйлст төр ба хувийн хэвшлийн байгууллагуудын түншлэл, хамтын ажиллагаа хамгийн үнэтэй хувь нэмэр оруулдгийн илэрхийлэл болсон нэгэн үйл явдал Хавдар Судлалын Үндэсний Төв дээр өнөөдөр боллоо.

Монгол Эм Импекс Концерн нийгмийн хариуцлагынхаа хүрээнд элэгний С вирусын халдварын эсрэг хамгийн сүүлийн үеийн дэвшилтэт бүтээгдэхүүн болох MyDekla эмийг Хавдар Судлалын Үндэсний Төвд гардууллаа. Ингэснээр 100 өвчтөн элэгний С вирусийн халдвараа үнэ төлбөргүй эмчлүүлэх боломжтой болж байна.

Сүхбаатар аймгийн үзэсгэлэнт хун шувуудын чуулдаг Ганга нуур сүүлийн үед ширгэсээр байгаа талаар мэдээлж байсан. Нуурын ус ингэтлээ ширгэсэн нь нутгийн иргэд, тэр дундаа малчид ихээхэн буруутай гэж зарим хүн хэлж байсан. Байгаль орчны чиглэлээр үйл ажиллагаа явуулдаг төрийн болон төрийн бус байгууллагууд нутгийн иргэдтэй хамтран “Ганга нуураа аваръя, сэргээе” уриатай цөөнгүй ажил санаачлан өрнүүлсэн ч сүхбаатарчууд Ганга нууртайгаа үлдэж, монголчууд хунгийн чуулган дахиж үзэх, эсэх нь бүдэг хэвээр байлаа. Тэгвэл энэ жил БОАЖЯ-наас нуурыг сэргээхэд 200 сая төгрөг төсөвлөсөн гэнэ. Ганга нуурт цутгадаг булаг, шандыг сэргээж, ойр орчимд нь мод тарихад энэ мөнгийг зарцуулах аж.

О.ӨНӨР

Онцгой байдлын ерөнхий газраас Хөвсгөл аймагт зохион байгуулж Гамшгаас хамгаалах иж бүрэн сургуулийн хүрээнд болзошгүй аюул тохиолдсон үед иргэдийг аюулгүй газар түр нүүлгэн шилжүүлэх дадлага сургуулийг Мөрөн сумын хэмжээнд зохион байгууллаа.

Мөрөн сумын нутаг дэвсгэрт зарлан мэдээллийн дуут дохиог зургаан байршилд суурилуулж, болзошгүй аюул тохиолдсон үед иргэдийн аюулгүй газар түр цугларах байршлыг сонгоод байсан юм. Энэ удаагийн дадлага сургууль нь түр цугларах аюулгүй байршлыг иргэдэд таниулах, гамшгийн дараах нүүлгэн шилжүүлэлтийн талаар мэдлэг ойлголт өгөх зорилготой бөгөөд өнөө өглөө 08.30 цагт дуугарсан зарлан мэдээллийн дуут дохиогоор иргэд аюулгүй талбайд цугласан юм.

Газар хөдлөлтийн гамшгийн үеийн нүүлгэн шилжүүлэх дадлага сургуульд Мөрөн сумын 14 багийн иргэд болон Хүмүүнлэгийн ухааны их сургуулийн харьяа “Далай ван” дээд сургууль, МСҮТ, ЕБС, цэцэрлэгийн оюутан сурагчид, нийт 32 мянга гаруй иргэн хамрагдаж, дадлага сургуульд идэвхитэй оролцлоо.

Ийнхүү 32 мянган иргэн аюулгүй талбайд цугласан нь Монгол Улсын хэмжээнд анхны тохиолдол болж байгаа юм гэж Онцгой байдлын ерөнхий газраас мэдээллээ.

Авто тээвэр эзэмшигч аж ахуйн нэгж байгууллага, иргэн та хуулийн дагуу Авто тээврийн болон өөрөө явагч хэрэгслийн албан татвар, Агаарын бохирдлын төлбөр, Авто зам ашигласны төлбөрөө тээврийн хэрэгслийнхээ улсын дугаарын сүүлийн оронгоос хамаарч, 2017 оны 5 дугаар сарын 31-нийг дуустал төлнө.

Татвар төлөгч та:

1, 6-аар төгссөн дугаартай тээврийн хэрэгсэл эзэмшдэг бол 1 дүгээр сард

2, 7-оор төгссөн дугаартай тээврийн хэрэгсэл эзэмшдэг бол 2 дугаар сард

3, 8-аар төгссөн дугаартай тээврийн хэрэгсэл эзэмшдэг бол 3 дугаар сард

4, 9-өөр төгссөн дугаартай тээврийн хэрэгсэл эзэмшдэг бол 4 дүгээр сард

5, 0-ээр төгссөн дугаартай тээврийн хэрэгсэл эзэмшдэг бол 5 дугаар сард төлнө.

Хэрэв та хугацаандаа татвараа төлөөгүй бол замын хөдөлгөөнд оролцуулахгүйг анхааруулж байна. Татвар, төлбөр төлөх цэгүүд дараах цэгүүдэд байрлаж байна.

1.Дүүргийн татварын хэлтсүүдэд 08:30-17:30

2.БЗД, СХД, БГД-ийн Техник үзлэг оношилгооны төвд байрлах татвар хураах цэг 08:30-20:30

3.Нийслэлийн үйлчилгээний нэгдсэн төв (Дүнжингарав, Драгон, Мишээл салбар) 08:30-17:30

4.АТҮТ-ийн Цирк салбар 08:30-17:30

5.32-ын тойрогт Сансар сүлжээ дэлгүүрт 08:30-17:30

6.Саруул зах 08:30-17:30

7.Дэнжийн мянгын дэргэдэх 12-р хорооны байранд 08:30-17:30

8.Монгол Хьюндай автомотив 08:30-17:30

9.Да-Хүрээ захад байрлах татварын цэгийн үйлчилгээ 09:00-19:00 гэж Нийслэлийн Татварын газраас мэдээллээ.

“Март-8”-р хагас нүцгэн жагссан эмэгтэйчүүд маргааш дахин жагсахаар төлөвлөсөн байна. Тэд энэ “Март эмэгтэйчүүдийн хөдөлгөөн” ТББ байгуулж энэ удаад нүцгэн биш үндэсний хувцастайгаа жагсаалд нэгдэхийг уриалжээ.

Жагсаал 12-нд 15:00-18:00 цагийн хооронд Сүхбаатарын талбайд болох бөгөөд “Оффшорчид улс төрийн авлигын эсрэг ээж нарын дуу хоолой” уриатай болох юм байна.

О.ӨНӨР

Австри улсын Вена хотын Ф.Шубертын нэрэмжит Консерваторийн оюутан, морин хуурч Б.Санжаажавын санаачилгаар монгол үндэсний морин хуур хөгжмийг тус сургуулийн сургалтын системд нэвтрүүлж, морин хуурын дөрвөн жилийн сургалттай бакалаврын зэрэг олгох анги нээжээ.

Морин хуурч Б.Санжаажавт тус консерваторийн захирал хатагтай Даниела Эгг хамтын гарын үсэг зурсан эрх, гэрээг гардуулсан талаар тэрээр өөрийн цахим хуудсаар дамжуулан мэдээллээ.

Монгол Улсын ХБК-ийг морин хуурч мэргэжлээр төгссөн тэрээр эдүгээ тус сургуульд урлаг судлалын чиглэлээр суралцдаг. Дэлхийд нэр хүндээр тэргүүлэгчдийн эгнээнд жагсдаг тус сургуулийн сургалтын системд морин хуур хөгжмийг багтаахын тулд тэрээр дөрвөн жилийн сургалтын хөтөлбөр, төлөвлөгөөг сургуулийн сургалтын хөтөлбөртэй нийцүүлэн боловсруулж төсөл өргөн барьсан байна. Төслийг Консерваторийн сургалтын алба, Удирдах зөвлөл хэлэлцээд дээрх шийдвэрийг 2017 оны хоёрдугаар сард гаргажээ.

Ингэснээр Монгол Улсаас болон дэлхийн өнцөг булан бүрээс монголын болон гадаадын оюутнууд Франц Шубертын нэрэмжит консерваторид нарийн мэргэжлийн хөгжмийн боловсрол эзэмшээд зогсохгүй “Морин хуур” хөгжмөөр бакалаврын зэргийг хамгаалан төгсөх бүрэн боломж нээгдэж буй юм. Мөн гадаадын оюутнууд монголын үндэсний хөгжмийг суралцаад зогсохгүй монголын соёл, урлагтай танилцан суралцах боломжтой болж байна.