Month: April 2017

Мах сүүний анхдугаар аяны хүрээнд хаврын цагт хэрэглэх махны нөөцийг бүрдүүлж амжжээ. Энэ жилийн хувьд нөөцийн махыг урьдын адил Улаанбаатар, Дархан, Эрдэнэт хотуудад худалдаалж байгаа юм. Нөөцөд бэлтгэсэн үхрийн ястай махыг 5750 төгрөг, хонины ястай махыг 5400 төгрөг, ямааны ястай махыг 4400 төгрөгөөр худалдаалж эхэлжээ. Тодруулбал, Улаанбаатар хотын зургаан дүүрэгт 108 дэлгүүр, Дархан хотод 118 дэлгүүр, Эрдэнэт хотод 21 дэлгүүрээр тус тус худалдан борлуулж байна гэж салбарын яамнаас мэдээллээ.

Зах зээлд нийлүүлж буй махны үнийг нийслэлийн статистикийн газрын 2017 оны 04 дүгээр сарын эхний долоо хоногийн дүн мэдээтэй харьцуулж үзвэл үхрийн махны үнэ 2195 төгрөг буюу 38.2 хувиар, хонины мах г 1440 төгрөг буюу 26.7 хувиар, ямааны мах 425 төгрөг буюу 9.7 хувиар тус тус хямд байгаа ажээ.

Нөөцийн махыг өнгөрсөн нэгдүгээр сард өвөлжилт хүндэрсэн аймгуудаас бэлтгэсэн билээ. Энэ жилийн хувьд 12 аж ахуй нэгж 15 мянга гаруй тонн махыг нөөцөлж бэлтгэжээ.

Увс аймгийн Цагаанхайрхан суманд өчигдөр буюу энэ сарын 13-нд газар хөдөлсөн 3.6 магнитутын хүчтэй газар хөдлөлт болжээ.

Тодруулбал, Тус сумын төвөөс урд зүгт 34 км-т/ Ө-49010/00’’ У-94029/00’’-т байрлах Далан хуруу багийн “Үзүүрийн булаг” гэдэг газарт өдрийн 1:42 цагт 3.6 магнитутын хүчтэй газар хөдлөлт болсон байна. ОБЕГ-аас тус аймгийн Онцгой байдлын газраар дамжуулан сумын ЗДТГ-ын даргаас тодруулахад иргэдэд чичирхийлэл мэдрэгдээгүй, хохирол байхгүй гэсэн мэдээлэл ирүүлжээ.

Нийслэлийн Засаг дарга бөгөөд Улаанбаатар хотын захирагч С.Батболд, Нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүү нараар ахлуулсан харьяа газар, агентлагийн дарга нар, дүүргүүдийн Засаг дарга нар болон холбогдох албаныхан өнөөдөр Улаанбаатар хотын нийтийн эзэмшлийн гудамж зам гаргах, автомашины зогсоол байгуулах, явган хүний замыг чөлөөлж нээх зарим байршлуудтай танилцлаа.

Нийслэлийн хэмжээнд эрх бүхий байгууллагын зөвшөөрөлгүй эзэмшил газрынхаа хэмжээнээс хэтрүүлэн газар эзэмшиж, ашиглан, хашаа хатгасан 341 иргэн, аж ахуйн нэгж байгууллага байна. Нийтийн эзэмшлийн зам талбай, явган хүний зам, машин орох орц гарцыг хаасан эдгээр иргэн, аж ахуйн нэгжид НМХГ-аас хяналт шалгалт хийн, газар чөлөөлөх хугацаатай албан шаардлага хүргүүлжээ. Энэ талаар НМХГ-ын дарга Л.Эрдэнэчулуун хэлэхдээ “Эзэмших газрынхаа хэмжээг хэтрүүлж, нийтийн эзэмшлийн зам талбайд дур мэдэн хашаа хатгасан, ТҮЦ байгуулсан аж ахуйн нэгж, иргэн олон байна. Тухайлбал, Баянзүрх дүүрэгт гэхэд хамгийн олон буюу 82 зөрчилтэй байршил байна. Бид 4 дүгээр сард байгтаад зөрчилтэй байршлууд дахь байгууллага, иргэдийн хашааг стандарт хэмжээнд хүргэж татуулж, нийтийн эзэмшлийн зам талбайг чөлөөлж, иргэдийн зорчих нөхцлийг бүрдүүлнэ. Газар чөлөөлөх шаардлагаын хугацаанд газраа чөлөөлөөгүй бол төрийн зардлаар татсаны дараа тухайн зардлыг төлүүлэх арга хэмжээ авна.” гэлээ.

Эзэмшил газрынхаа хэмжээнээс хэтрүүлэн газар эзэмшиж, ашиглан, хашаа хатгасан 341 зөрчлийг дүүрэг тус бүрээр хүргэж байна.

Эдгээр байршлаас хотын даргаар ахлуулсан ажлын хэсэг Чингэлтэй дүүргийн 5 дугаар хорооны нутаг дэвсгэр, Лениний музейн баруун талд байрлах орон сууцны урд талаар шинээр гудамж, зам гаргах ажил, тус дүүргийн 4 дүгээр хороо, 5 дугаар сургуулийн баруун талд авто замын хөдөлгөөнд саад болж байгаа гражийг буулгах ажил, Татварын ерөнхий газрын хойд талд шинээр гудамж, зам гаргаж, автомашины газар дээрх болон доорх зогсоол байгуулах ажил, Сүхбаатар дүүргийн 8 дугаар хороо, 64 дүгээр дэлгүүрийн зүүн талаар шинээр гудамж, зам гаргах ажилтай танилцлаа.

Нийслэлийн Авто замын хөгжлийн газрын дарга Ж.Тогтохбаяр хэлэхдээ “ААНБ, иргэд ингэж эзэмшлийн талбайн хэмжээгээ дур мэдэн тэлж, хашаа хатгаснаар галын болон эмнэлгийн машин орох боломжгүй болж, иргэд, хүүхдүүд тусламж авч чадахгүйд хүрэх эрсдлийг бий болгож байна. Эдгээр 341 байршлын нийтийн эзэмшлийн талбайг чөлөөлснөөр хот доторх хөдөлгөөний эрчим 20 гаруй хувиар нэмэгдэнэ гэж тооцоолж байна. Үүнээс гадна хамгийн гол нь иргэдийн аюулгүй байдлыг хангах юм.” хэмээн ярилаа.

Туслах замын нэвтрэх боломжийг нэмэгдүүлж, төв замынхаа түгжрэлийг бууруулдаг туршлага олон улсад бий. Манай улсын нийслэлд туслах замууд байдаг ч зарим аж ахуйн нэгж, иргэд нийтийн эзэмшлийн зам талбайд дур мэдэн хашаа хатгаснаас түгжрэл үүсдэг. Тиймээс иргэдийн аюулгүй зорчих нөхцлийг бүрдүүлэхийн тулд нийтийн эзэмшлийн зам талбайг чөлөөлж, явган хүний замыг нээнэ гэдгийг хотын дарга онцоллоо. Зөвшөөрөлгүй баригдсан хашаа, хайс саадыг буулгаж, нийтийн эзэмшлийн талбайг зориулалтаар нь ашиглаж, авто зам, явган хүний нэвтрэх урсгалуудыг нэмнэ. гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Монголбанкны Хяналтын зөвлөлийн ээлжит хурал саяхан /2017.04.12/ болжээ. Хурлаар Монголбанкны дотоод аудит ба эрсдэл, валютын улсын нөөцийн удирдлагын талаар зөвлөлийн гишүүн Л.Ариунаагийн илтгэлийг сонсож, засаглалын эрсдэлийн үнэлгээ хийх, гадаад өр зээлийн дарамтыг хөнгөвчлөх, зардлыг багасгах талаар Монголбанкинд зөвлөмж өгөх нь зүйтэй гэж үзсэн байна.

Мөн Хяналтын зөвлөлийн 2017 оны үйл ажиллагааны төлөвлөгөө болон гишүүдийн ажил үүргийг шинэчлэн баталлаа. Хяналтын зөвлөлийн үйл ажиллагааны эрх зүйн орчин, бүтцийн тогтолцоог боловсронгуй болгох, Монголбанк, банкны системийн ашиг алдагдал, төлбөрийн тэнцэл, өр авлагын асуудалд онцгойлон анхаарч, Монголбанк болон холбогдох талуудтай илүүтэй хамтран ажиллахын чухлыг Хяналтын зөвлөлийн гишүүд санал нэгтэйгээр онцлон тэмдэглэв.

Хяналтын зөвлөлийн дарга Д.Даваасамбуу Монголбанк дээр 2017 оны гуравдугаар сарын сүүл, дөрөвдүгээр сарын эхээр ажилласан ОУВС-ийн ажлын хэсгийн гишүүдийн Хяналтын зөвлөлийн үйл ажиллагааны талаарх дүгнэлт, саналыг танилцуулсан байна.

П.Н.Шастиний нэрэмжит Улсын Гуравдугаар Төв Эмнэлэг дээр тус эмнэлэгийн зүрхний мэс заслын тасгийн эмч нар болон БНСУ-ын эмч нарын баг ирэх зургадугаар сарын 18-наас 25-ны өдрүүдэд зүрхний төрөлхийн гажигтай хүүхдүүдийг үнэ төлбөргүй үзлэгт хамруулахаар болжээ.

Үзлэгт хамрагдсан хүүхдүүдээс онц хүнд хэлбэрийн эмгэгтэй, яаралтай мэс засал хийх шаардлагатай хүүхдүүдэд тухайн өдрүүдэд Монгол, Солонгос эмч нар хамтран мэс засал хийх аж. Тухайн үзлэгт хамрагдахыг хүссэн хүүхдүүдийн ар гэрийнхэн гуравдугаар эмнэлэгийн Зүрхний мэс заслын тасагт хандах боломжтой юм байна.