Month: April 2017

ОХУ-д сүүлийн үед алан хядах үйл ажиллагаа ихээр гарч байгаатай холбогдуулан тус улсын нутаг дэвсгэр дээр оршин суугаа Монгол иргэдэд Москва дахь Монголын ЭСЯ-наас сэрэмжлүүлэг хүргэжээ.

Зөвхөн Москва хотод л гэхэд 1000 гаруй монгол оюутан суралцдаг гэсэн тоо байдаг ажэ. Тиймээс алан хядагч, амиа золиослогчид ихэнхдээ олон хүн цугласан газрыг сонгон үйл ажиллагаагаа явуулдаг учир онцын шаардлагагүй бол үзвэр үйлчилгээний газар, дэлгүүр худалдааны төвүүд болон хүн ам олноор төвлөрсөн газар явахгүй байхыг Москва дахь ЭСЯ-аас санууллаа.

Мөн сэжиг бүхий царай төрх, үйл хөдлөлтэй хүмүүстэй харилцаанд орохгүй, тиймэрхүү хүмүүсийн тавьж буй санал үйлдэлд хариу өгөхүй, байнгын сонор сэрэмжтэй байснаар та өөрийгөө аюулаас хамгаалах боломжтой юм.

Аливаа асуудал гарсан тохиолдолд тус улсын хууль хяналтын байгууллагад болон ЭСЯ-ны Консулын хэлтсийн шуурхай утсанд холбогдон туслалцаа авахыг Москва дахь ЭСЯ, Консулын хэлтсээс анхаарууллаа.

Монголбанкны Ерөнхийлөгчөөр ахлуулсан ажлын хэсэг Олон Улсын Валютын Сан /ОУВС/-гийн хаврын ээлжит уулзалтад оролцохоор өнөөдөр АНУ-ын Вашингтон хотыг зорилоо. Ажлын хэсгийн бүрэлдэхүүн чуулга уулзалтын үеэр ОУВС-гийн захирал хатагтай Кристин Лагард, Дэлхийн Банкны ерөнхийлөгч Жим Ким, ОУВС –гийн Ази Номхон Далайн газар, Монгол Улсыг хариуцсан захирал Хинам Чой нартай тусгайлан уулзаж, Монголын нийгэм эдийн засгийн байдлын талаар танилцуулахын сацуу “Өргөтгөсөн санхүүжилтийн хөтөлбөр”-т хамрагдах хүсэлтээ илэрхийлэх юм.

Ардчилсан хувьсгалын оюун санааны нэгээхэн илэрхийлэл болсон МоАХ-ны ерөнхий зохицуулагч Санжаасүрэнгийн Зориг агсны мэндэлсний 55 жилийн ой энэ сарын 20-ны өдөр тохиож байгаа билээ.

Төрсөн өдрийг нь тохиолдуулан Монголын Үндэсний музей “Зориг сан”-тай хамтран “Санжаасүрэнгийн Зориг агсны мэндэлсний 55 жилийн ойн үзэсгэлэн”-г олон нийтэд нээлттэй дэлгэн үзүүлхээр болжээ. Уг үзэсгэлэнд түүний гэрэл зураг болон эдлэж хэрэглэж байсан эд өлгийн зүйлсээс түүвэрлэн 100 гаруй үзмэрийг танилцуулах юм байна.

Тодруулбал С.Зоригийн түүхэн гэрэл зургууд, хэрэглэж байсан шатар, өмсөж байсан хослол, цүнх зэргийг болон УИХ-ын гишүүн асан дүү С.Оюундаа бичсэн захидлыг олонд дэлгэх юм байна. Үзэсгэлэн 2017 оны дөрөвдүгээр сарын 14-ний өдрөөс 28-ыг хүртэл Монголын Үндэсний музейн үзэсгэлэнгийн танхимд байршина.

Хилийн чанадад ял эдэлж байгаа манай улсын 32 иргэн ялтан шилжүүлэх гэрээний дагуу эх орондоо ялаа үргэлжлүүлэн эдлэх хүсэлт гаргажээ.

Манай улс нь ялтан шилжүүлэх гэрээг 9 улстай байгуулсан бөгөөд Ялтан шилжүүлэх тухай Европын зөвлөлийн конвенцид 2015 онд нэгдсэн орсноор Европын Холбооны гишүүн 27 улс болон гишүүн бус 19 улстай ялтан шилжүүлэх эрх зүйн орчин бүрдсэн. Энэ хүрээнд өнгөрсөн онд БНХАУ-аас хоёр, БНКаз Улсаас нэг иргэн тус тус шилжүүлэн аваад буй.

Мөн гадаадын 15 улсад манай улсын 33 иргэн нас баржээ. Иймд ГХЯ-ны Консулын хэлтсээс тэдгээрийн төрөл төрөгсдөд мэдэгдэх, тэдэнд тухайн улсын виз авахад туслах, шарил, чандрыг эх оронд нь авчруулах арга замын талаар зөвлөгөө мэдээлэл өгөх, зарим тохиолдолд Иргэдэд туслах сангаас дэмжлэг туслалцаа үзүүлэх зэргээр ажилласан байна.

Улаанбаатар хот энэ онд 660 тэрбум гаруй төгрөгийн хөрөнгө оруулалтыг үйл ажиллагааны зардалд тусгасан байна. Энэ хүрээнд хэд, хэдэн ажлыг өрнүүлэхээр төлөвлөжээ.

Тодруулбал “Эрх зүйн шинэтгэлийн жил” болгон зарласантай холбогдуулан Нийслэлийн эрх зүйн байдлын тухай хуулийг Засгийн газарт өргөн бариад байгаа юм.

Мөн нийслэлийн хүн амын хөдөлмөр эрхлэлтийг нэмэгдүүлэх хөтөлбөрийн хүрээнд нээлттэй өдөрлөгийг зохион байгуулж 3000 орчим ажлын байранд иргэдийг зуучилжээ.

Түүнчлэн нийслэлийн удирдлагууд иргэдийн аюулгүй байдлыг хангахын тулд нэгдсэн камерын системд шилжүүлэх ажлыг эхлүүлэхээр бэлтгэл ажилдаа ороод байна. Харин Улаанбаатар хотын автозамын хувьд анх удаа мастер төлөвлөгөөг боловсруулсан бөгөөд энэ хүрээнд автозамын засвар тэмдэглэгээ, нөхөөс, шинэ зам тавих ажлыг өрнүүлэх аж. Дээрх ажилд 37.5 тэрбум төгрөг зарцуулахаар төлөвлөжээ.

Цаашид хотын удирдлагууд нийтийн тээврийн салбарт бүх төлбөрийн хэрэгслээр автобусанд зорчих боломжийг олгохоос гадна орон нутгаас ирсэн иргэдэд зориулсан нэг удаагийн карт гаргах талаар судалж байгааг албаныхан хэллээ.

Монгол Улсын Шадар сайд У.Хүрэлсүх Дэлхийн Банкны Группийн Худалдаа, өрсөлдөх чадварын газрын Зүүн Ази, Номхон Далайн бүсийн захирал Мона Хаддад-г хүлээн авч уулзав. Уулзалтын эхэнд тэрээр Дэлхийн Банкны Группын Олон Улсын Санхүүгийн Корпорацаас /ОУСК/ Монгол Улсын Засгийн газарт техникийн туслалцаа үзүүлж ирсэнд талархал илэрхийлэв.

Дэлхийн Банкны Группийн Олон Улсын Санхүүгийн Корпорациас өмнө нь манай улсад 2009-2016 онд “Бизнесийн хяналтын шинэтгэл”-ийн төсөл амжилттай хэрэгжиж байсан билээ. Улмаар тус байгууллагаас энэ онд “Хөрөнгө оруулалтын бодлого, Хөдөө аж ахуйн хөрөнгө оруулалтыг дэмжих төсөл” хэрэгжүүлж байгаа юм.Цаашид ОУСК-аас шинээр “Монгол Улсын экспортын төрөлжилтийг нэмэгдүүлэх төсөл”-ийг хэрэгжүүлэхээр зорилт тавин ажиллаж байна.

Харин Дэлхийн Банкны Группийн Худалдаа, өрсөлдөх чадварын газрын Зүүн Ази, Номхон Далайн бүсийн захирал Мона Хаддад хэлэхдээ “Монгол Улсын экспортын төрөлжилтийг нэмэгдүүлэх” төслийн зорилго нь: Шинэ зах зээлд нэвтрэх боломжийг нэмэгдүүлэх, хилийн худалдааны зардлыг бууруулах, тэргүүлэх ач холбогдол бүхий салбарууд, ялангуяа мах, махан бүтээгдэхүүн, сүү, сүүн бүтээгдэхүүний чанарын стандарт, нэмүү өртгийг нэмэгдүүлэх замаар экспортын төрөлжилтийг сайжруулахад Монгол Улсын Засгийн газарт дэмжлэг үзүүлэх юм. Тус төслийн хүрээнд дараах бүрэлдэхүүн ажлуудад төвлөрч ажиллана гэв. Үүнд:

– Импортлогч улс орнуудын тарифын болон тарифын бус, түүнчлэн холбогдох зохицуулалтын саад тотгорыг бууруулах, экспортын бараа бүтээгдэхүүн, түүний дотор малын гаралтай бараа бүтээгдэхүүний чанар, аюулгүй байдлыг нэмэгдүүлэхэд чиглэсэн институц, дадлыг бий болгох замаар зах зээлд (ялангуяа хөрш зэргэлдээ улс орон болон Чөлөөт худалдааны хэлэлцээр хийгдэж буй улс орнуудын хувьд) нэвтрэх чадамжийг дээшлүүлэх;

– Худалдааны хууль эрх зүйн зохицуулалтын уялдааг хангаж хялбарчлах, хилийн хяналт болон түүний үйл явцтай холбоотой хүндрэл, чирэгдлийг бууруулах, худалдааны нэгдсэн порталыг байгуулах замаар худалдааг хөнгөвчлөх, ложистикийг сайжруулах;

– Олон улсад хүлээн зөвшөөрөгдсөн хэм хэмжээ, стандартыг бизнесийн үйл ажиллагаанд нэвтрүүлэх, экспортод чиглэсэн малын гаралтай бүтээгдэхүүний брэнд тэмдэг, гэрчилгээг олгох, экспортын баримжаатай бараа бүтээгдэхүүний өрсөлдөх чадварыг нэмэгдүүлэх, дэлхийн үнэ цэнийн сүлжээнд нэвтрэх, хамрагдахад бизнес эрхлэгчдийн чадамжийг бэхжүүлэх, дэмжлэг үзүүлэхэд чиглэсэн хувийн хэвшлийн чадамжийг бэхжүүлэх зэрэг болно гэв.

Шадар сайд уулзалтын үеэр уг төслийг экспортын баримжаатай үйлдвэрлэлийг хөгжүүлэх, Монголын бараа бүтээгдэхүүнийг гадаадын зах зээлд гаргахад жинтэй хувь нэмэр оруулна гэж тодотголоо. “Монгол Улсын экспортын төрөлжилтийг нэмэгдүүлэх төсөл”-ийн хүрээнд хилийн худалдааны зардлыг бууруулах, мах махан бүтээгдэхүүн, сүү, сүүн бүтээгдэхүүний чанарын стандарт, нэмүү өртгийг нэмэгдүүлэх замаар экспортын төрөлжилтийг сайжруулах ажлыг эрчимжүүлэх юм гэж Шадар сайдын ажлын албанаас мэдээллээ.

НҮБ-ын Боловсрол, шинжлэх ухаан, соёлын байгууллага (ЮНЕСКО)-аас 1995 онд дөрөвдүгээр сарын 23-ны өдрийг “Дэлхийн номын өдөр” болгон зарласан билээ. Энэ өдөр дэлхийн 100 гаруй оронд зохиолч, хэвлэн нийтлэгчдэд хүндэтгэл үзүүлэх, ном уншихын ач холбогдлыг олон нийтэд сурталчлан таниулах арга хэмжээг зохион байгуулж иржээ.

“Дэлхийн номын өдөр”-ийг тохиолдуулан Улсын Их Хурлын Тамгын газрын номын сангаас санаачлан төрийн байгууллагууд, тэдгээрийн ажлын албаны ажилтнуудад шинээр хэвлэгдсэн ном зохиолуудыг танилцуулах, нэг дороос өргөн сонголттойгоор ном худалдан авах боломж олгох зорилгоор Номын өдөрлөгийг Төр засгийн үйлчилгээг эрхлэх газар, хэвлэлийн газруудтай хамтран Төрийн ордонд маргааш зохион байгуулах гэж байна.

Энэхүү арга хэмжээнд “Интерном”, “Аз хур” номын их дэлгүүр, “Непко”, “Мөнхийн үсэг”, “”Мон судар”, “Болор судар”, “Мир ном”, “Сэлэнгэ пресс” зэрэг хэвлэлийн газрууд оролцож, шинэ ном товхимлын дээжээ танилцуулан, хөнгөлөлттэй үнээр худалдан авах боломж олгох юм байна.

Өдөрлөгийн үеэр УИХ-ын Тамгын газрын Ерөнхий нарийн бичгийн дарга Ц.Цолмон Монголын үндэсний номын сан, Хууль зүйн үндэсний хүрээлэнд хандивын ном гардуулж, ЮНЕСКО-гийн Монголын үндэсний комиссоос УИХ-ын Тамгын газрын номын санд ном хандивлах арга хэмжээ болно хэмээн УИХ-ын Хэвлэл мэдээлэл, олон нийттэй харилцах хэлтсээс мэдээллээ.