Month: April 2017

Засгийн газрын ээлжит 17 дугаар хуралдаан болж дараах асуудлуудыг хэлэлцэн шийдвэр гаргалаа.

ТАВДУГААР САРЫН 01-НИЙ ДОТОР БҮХ ТЕНДЕРИЙГ ЗАРЛАЖ ДУУСГАНА

Төсвийн ерөнхийлөн захирагч нарын 2016 оны бараа, ажил, үйлчилгээ худалдан авсан тухай тайлан, үнэлгээний дүнг Сангийн сайд Б.Чойжилсүрэн танилцууллаа.

Үүнтэй холбогдуулан:

• Илэрсэн зөрчил, дутагдалд дүн шинжилгээ хийн, зөрчлөө давтан гаргахгүй байх, энэ онд бараа, ажил үйлчилгээ худалдан авах тайлангийн үнэлгээнд хангалттай буюу түүнээс дээш үнэлгээ авсан байх
• Энэ онд бүх сонгон шалгаруулалтыг цахимаар зарлах
• Урсгал төсвийн болон хөрөнгө оруулалтын төсөл, арга хэмжээний худалдан авах ажиллагааг тавдугаар сарын 01-ний дотор бүх тендерийг зарлаж дуусгах, зургадугаар сарын 15-ны байдлаар шалгаруулалтыг дүгнэж дуусган гүйцэтгэгчтэй гэрээ байгуулж ажлыг нь эхлүүлэх, энэ өдрөөс хойш гэрээ байгуулахгүй байх зэргийг төсвийн ерөнхийлөн захирагч нарт үүрэг болголоо.

УЛСЫН НААДМЫН ТӨСВИЙГ 2.1 ТЭРБУМ ТӨГРӨГӨӨР БАТЛАВ

Тулгар төрийн 2226, Их Монгол Улсын 811, Ардын хувьсгалын 96 жилийн ой, Үндэсний их баяр наадмыг зохион байгуулахад шаардагдах хөрөнгийг 2 тэрбум 107 сая төгрөгөөр баталж, Засгийн газрын нөөц сангаас гаргахыг Сангийн сайдад зөвшөөрлөө.

Наадмын төсвийн гүйцэтгэл, үр дүнд хяналт тавьж ажиллахыг Монгол Улсын Шадар сайд, Үндэсний их баяр наадмыг зохион байгуулах хорооны дарга У.Хүрэлсүхэд даалгалаа.

ЦАЛИНГИЙН ЗЭЭЛИЙН ХҮҮГ БУУРУУЛЖ, ШИМТГЭЛИЙГ ТЭГЛЭНЭ

Төрийн өмчийн сургууль, цэцэрлэгийн багш, эмнэлгийн эмч, ажилтнуудын цалингийн зээлийн хүүгийн хувь хэмжээг бууруулах, шимтгэлийг тэглэх талаар хийж байгаа ажлаа Хөдөлмөр, нийгмийн хамгааллын сайд Н.Номтойбаяр Засгийн газрын гишүүдэд танилцууллаа.

Дээрх зорилтот бүлгийн ажиллагсдын цалингийн зээлийн хүү, шимтгэлийг хоёр үе шаттай бууруулахаар Төрийн банкны удирдлагуудтай урьдчилан тохирсон байна. Эхний ээлжинд төрийн өмчийн сургууль, цэцэрлэгийн багш, эмнэлгийн эмч, ажилтнуудын цалингийн зээлийн шимтгэлийг тэглэж, дараа нь зээлийн одоо төлж байгаа хүү болох жилийн 21.11 хувийг 18 хувь болгон бууруулахаар болжээ. Төрийн банкнаас 48.2 тэрбум төгрөгийн цалингийн зээлийг ойролцоогоор 8316 багш, эмч, ажилтнуудад олгож, тэдгээр нь жилдээ 1-1.6 тэрбум төгрөгийн хүү, шимтгэлийн зардлаас чөлөөлөгдөх урьдчилсан тооцоо гарчээ.

Хөдөлмөр, нийгмийн хамгааллын яамныхан Хаан банкны удирдлагуудтай мөн энэ талын яриа хэлэлцээ хийж байна.

ЗЭЭЛИЙН ХЭЛЭЛЦЭЭРҮҮДИЙГ ДЭМЖИВ

Монгол Улсын Засгийн газар, Азийн хөгжлийн банктай хамтран хэрэгжүүлэх “Нийгмийн халамжийг дэмжих хөтөлбөр-2”, “Банкны салбарыг нөхөн сэргээх, санхүүгийн тогтвортой байдлыг бэхжүүлэх хөтөлбөр”-ийн Зээлийн хэлэлцээрийг хэлэлцэн дэмжиж УИХ-ын холбогдох Байнгын хороодтой зөвшилцөхөөр болов.

“Нийгмийн халамжийг дэмжих хөтөлбөр-2” нь “Эдийн засгийг сэргээх хөтөлбөр”-ийн хэрэгжилтийг дэмжих, эдийн засаг хүндрэлтэй үед эмзэг бүлэгт үзүүлэх сөрөг нөлөөллийг бууруулах, нийгмийн халамжийн хөтөлбөрийг зорилтот бүлэгт чиглүүлэх, төсвийн алдагдлыг нөхөх зорилготой юм.

Эхний хөтөлбөрийг 2015-2016 онд амжилттай хэрэгжүүлсэн хэдий ч эдийн засгийн өсөлт саарч, макро эдийн засгийн хүндрэл, хуримтлагдсан өр, төсвийн алдагдал болон төлбөрийн тэнцлийн дарамтуудыг даван туулах шаардлагатай болсон. Энэ үүднээс Засгийн газар Олон улсын валютын сан, Азийн хөгжлийн банк зэрэгтэй хамтран ажиллаж байна.

Энэ удаа Азийн хөгжлийн банкны 150 сая ам.долларын зээлээр бодлогын 19 арга хэмжээг хоёр үе шаттай хэрэгжүүлэхээр төлөвлөсөн. Зээлийн эргэн төлөгдөх хугацаа 15 жил, эхний гурван жилд үндсэн төлбөрөөс чөлөөлөгдөх бөгөөд хүү нь Лондонгийн банк хоорондын зах зээлийн жилийн хүү дээр 0.6 хувийн шимтгэл, хөрөнгийн нөөцийг баталгаажуулсан хураамж болох 0.15 хувийг нэмсэнтэй тэнцүү байх юм.

БАНКНЫ САЛБАРТ 100 САЯ АМ.ДОЛЛАРЫН САНХҮҮЖИЛТТЭЙ ХӨТӨЛБӨР ХЭРЭГЖҮҮЛНЭ

Банкны зээлийн эргэн төлөлт доголдож, чанаргүй зээлийн хэмжээ нэмэгдсэнээр зээлдэгчдийг санхүүжүүлсэн банкны төлбөрийн чадвар алдагдах, санхүүгийн зуучлалын үндсэн үйл ажиллагаа доголдох бодит эрсдэл үүсдэг. Энэ бүхнээс үүдэн Засгийн газар банкны салбарт бүтцийн шинэчлэл хийж, шаардлагатай санхүүжилтийн хэмжээг нөхөх зорилгоор “Банкны салбарыг нөхөн сэргээх, санхүүгийн тогтвортой байдлыг бэхжүүлэх хөтөлбөр”-ийг Азийн хөгжлийн банкны 100 сая ам.долларын зээлээр хэрэгжүүлэхээр тохиролцжээ.

Зээлийн эргэн төлөгдөх хугацаа 15 жил, эхний гурван жилд үндсэн төлбөрөөс чөлөөлөгдөнө. Зээлийн хүү Лондонгийн банк хоорондын зах зээлийн жилийн хүү дээр 0.6 хувийн шимтгэл, хөрөнгийн нөөцийг баталгаажуулсан хураамж болох 0.15 хувийг нэмсэнтэй тэнцүү байх нь.

Хөтөлбөрийн хүрээнд чанаргүй зээлийг шийдвэрлэх активын удирдлагын компани байгуулах, банкнуудын өрийн дарамтыг шийдвэрлэх тогтолцоо нэвтрүүлэх, санхүүгийн тогтвортой байдлыг хангах зорилгоор холбогдох хууль, журамд өөрчлөлт оруулах, банкны хяналт шалгалтыг сайжруулах, засаглалыг бэхжүүлэх зэрэг бодлогын 12 арга хэмжээ авах юм.

Банкны чанаргүй зээлийн үлдэгдэл өсч, 2016 оны байдлаар эргэн доголдолтой зээл нийт зээлийн 14.2 хувь буюу 1.7 их наяд төгрөгт хүрчээ. Хугацаа хэтэрсэн болон чанаргүй зээлийн нийт зээлд эзлэх хувь өнгөрсөн оны эцэст өнгөрсөн зургаан жилийн хугацааны хамгийн өндөр түвшинд хүрсэн байна.

НЭГ ТЭРБУМ АМ.ДОЛЛАРЫН ХӨНГӨЛӨЛТТЭЙ ЗЭЭЛИЙН ХЭЛЭЛЦЭЭРТ ӨӨРЧЛӨЛТ ОРУУЛАХЫГ ДЭМЖИВ

Монгол Улсын Засгийн газар, БНХАУ-ын Экспорт-Импорт банк хоорондын нэг тэрбум ам.долларын хөнгөлөлттэй зээлийн ерөнхий хэлэлцээрийн нэмэлт өөрчлөлтийн гэрээг УИХ-ын холбогдох Байнгын хороодтой зөвшилцөхөөр боллоо.

Нэг тэрбум ам.доллар хүртэл хэмжээний зээлийг БНХАУ олгох бөгөөд энэ зээлээр дэд бүтэц болон бусад салбарт төсөл хэрэгжүүлнэ. Зээлдэгч талын хүсэлт гаргаснаар зээлээр төслийн гэрээ тус бүрийн үнийн дүнгийн 95 хувийг санхүүжүүлэх зорилгоор ашиглана. Хэрэв төслийн гэрээнд төлөвлөх, худалдан авах ажиллагаа болон барилгын ажил тусгагдсан бол үүнийг зээлдүүлэгчийн санхүүжүүлэх хэмжээнд оруулж тооцно гэсэн утга бүхий нэмэлт өөрчлөлт хийхээр төлөвлөсөн байна.

БНХАУ-аас 20 жилийн хугацаатай, жилийн хоёр хувийн хүүтэй, зээлийн үндсэн төлбөрөөс чөлөөлөгдөх хугацаа нь долоон жил, зээлийн санхүүжилт 85 хувь, Засгийн газрын санхүүжилт 15 хувь байх зээл авах тухай ерөнхий хэлэлцээрийг талууд 2015 оны 11 дүгээр сард байгуулж, мөн сард УИХ соёрхон баталсан юм гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Нийгмийн бодлого, боловсрол, соёл, шинжлэх ухааны байнгын хорооны өнөөдрийн /2017.04.19/ хуралдаанаар Нийгмийн даатгалын үндэсний зөвлөлийн 2016 оны үйл ажиллагааны тайланг хэлэлцлээ.

Тайланг Хөдөлмөр, нийгмийн хамгааллын сайд, Нийгмийн даатгалын үндэсний зөвлөлийн дарга Н.Номтойбаяр танилцуулсан юм.

Нийгмийн даатгалын үндэсний зөвлөл шинэ бүрэлдэхүүнээрээ ажиллаж эхэлснээс хойш таван удаа хуралдаж, 42 асуудлыг шийдвэрлэн, 33 тогтоол, шийдвэрийг гаргажээ.

Зөвлөлийн анхны ажил нь өмнөх онуудад гаргасан шийдвэр, тогтоолуудад хийсэн дотоод аудитын шалгалт байсан аж. Шалгалтын үеэр маш их зөрчил илэрсэн талаар сайд Н.Номтойбаяр танилцуулгадаа дурдсан. Өнгөрсөн дөрвөн жилийн хугацаанд гаргаж байсан тогтоол, шийдвэр дүрэм журмуудын ихэнх шаардлага хангаагүй болохыг тэрбээр мэдээллийнхээ үеэр онцолсон.

Нийгмийн даатгалын сангийн орлого 2016 оны гүйцэтгэлээр 1.809.9 тэрбум төгрөг, зарлага 1.720.3 тэрбум төгрөг байжээ.

Нийгмийн даатгалд 43.1 мянган байгууллага, 2.966.3 мянган даатгуулагч хамрагдсан байна. Монгол Улсын нийт хүн амын 95.1 хувь нь нийгмийн болон эрүүл мэндийн даатгалд хамрагдаж, улсын хэмжээнд үйл ажиллагаа явуулж байгаа 72.2 мянган аж ахуйн нэгж байгууллагын 60 орчим хувь нь нийгмийн даатгалд бүртгэгдсэн байна.

Тэтгэвэр, тэтгэмж, тусламж үйлчилгээ авагчдын тоо /давхардсан тоогоор/ 6.295 мянга байгаа бөгөөд 1.697.7 тэрбум төгрөгийг дээрх үйлчилгээнд зарцуулсан байна.

Хөдөлмөр, нийгмийн хамгааллын сайдын 2016 оны А/13 тушаал, Эрүүл мэнд, нийгмийн даатгалын ерөнхий газрын даргын А/03 тушаалаар Эрүүл мэнд, нийгмийн даатгалын байгууллагын бүтэц орон тоог шинэчлэн тогтоож, одоогоор тус салбарын хэмжээнд 1.543 албан хаагч ажиллаж байгаа аж. Нийт албан хаагчдын гурван хувь нь удирдах албан тушаалтан, 83 хувь нь гүйцэтгэх албан тушаалтан, 14 хувь нь гэрээт болон үйлчилгээний албан хаагчид байгаа юм байна.

Сайд Н.Номтойбаяр нийгмийн даатгалын салбарт хоёр үе шаттай хяналт шалгалтыг хийхээр төлөвлөсөн гээд нэгдүгээр шатны шалгалтыг хийж дуусгасаныг дуулгасан. Нэгдүгээр шатны шалгалтын үеэр 1.1 тэрбум төгрөгийн зөрчил илэрчээ. Үүний 840 сая төгрөгийн зөрчил нь хууль зөрчин тодорхой хүмүүсийн тэтгэврийг үндэслэлгүйгээр нэмсэнтэй холбоотой бол 200 гаруй сая төгрөгийн зөрчил нь иргэдийн тэтгэврийг байх ёстойгоос багаар тогтоосонтой холбоотой юм байна. Нийт нийгмийн даатгалын 136 байцаагчтай холбоотой зарчил илэрсэн аж.

Хөдөлмөр, нийгмийн хамгааллын сайд, Нийгмийн даатгалын үндэсний зөвлөлийн дарга Н.Номтойбаярын хийсэн мэдээлэлтэй холбогдуулан УИХ-ын гишүүн Г.Мөнхцэцэг, А.Ундраа, С.Чинзориг, М.Билэгт, Л.Энх-Амгалан, М.Оюунчимэг нар асуулт асууж байр сууриа илэрхийлсэн.

Гишүүд, элэгний вирусын эсрэг эмийн үнийн хөнгөлөлтөд хэчнээн хүн хамрагдсан, ямар хөнгөлөлт үзүүлж байгаа талаар, хуурамч бичиг баримт бүрдүүлж, нас барсан иргэний нэр дээр тэтгэвэр авч байсан асуудлын талаар тодруулсан. Мөн гадаадад эмчлүүлэхээр явж буй иргэд эх орондоо эрүүл мэндийн чанартай үйлчилгээ авах боломжийг олгохын тулд ямар арга хэмжээ авч байгаа, цалингийн зээлийн хүүг бууруулах боломж бий эсэх талаар лавласан юм.

Сайд Н.Номтойбаярын хариулснаар, элэгний С вирусын эсрэг таван төрлийн эмийг нэг хайрцаг тутамд 210 мянган төгрөгөөр хөнгөлж, даатгалын сангаас дээрх үнийн хөнгөлөлтийг төлжээ. 2016 оны есдүгээр сарын 09-ний өдрөөс хойш элэгний С вирусын эсрэг эмийг эмчилгээний зорилгоор хэрэглэсэн 2.5 мянган даатгуулагчид 1.5 тэрбум төгрөгийг даатгалын сангаас нөхөн олгоод байгаа юм байна.

Итгэмжлэлээр тэтгэвэр авдаг 15.000 иргэн байгааг нэг бүрчлэн шалгахад 30 хувь нь буюу 5000 иргэний асуудал зөрчилтэй гарсан учир зогсоожээ. Энэ нь нас барсан иргэдийн нэрийг барьсан, хуурамч баримт бичиг бүрдүүлсэн асуудалтай холбогдож байгаа аж. Тиймээс яаманд ажлын хэсэг гарган ЦЕГ-ын Эдийн засгийн гэмт хэрэгтэй тэмцэх ажилтнууд, АТГ-тай хамтран хоёр дахь шатны хяналт шалгалтын ажлыг эхлүүлэхээр бэлтгэж байгаа хэмээн сайд хэлсэн.

Түүнчлэн тэрбээр иргэд монголдоо эмчлэх боломжгүй гэсэн шалтгааны улмаас БНХАУ, БНСУ, Тайланд, Японыг их зорьдог гээд жилдээ 400 тэрбум төгрөгийг гадны эмнэлэгт төлдөг гэлээ. Тиймээс Эрүүл мэндийн даатгалын сангийн чөлөөт мөнгөн үлдэгдэл хөрөнгөнөөс япон стандартын жишиг эмнэлгийг барьж ашиглалтад оруулахаар төлөвлөж байгааг дуулгасан. 300 ортой орчин үеийн техникээр тоноглогдсон эмнэлэгт жилдээ 35.000 хүн хэвтэн эмчлүүлж, 500 гаруй мянган хүн амбулаториор үйлчлүүлнэ гэсэн төсөөлөл байгаа аж. Ингэхдээ японы зөвлөх эмч нарыг ажиллуулан зөвлөгөө авч, өөрийн эмч мэргэжилтнүүдээ японд дадлагажуулан солилцохоор тооцон судалгааны ажлаа эхлүүлсэн гэж хэлсэн.

Мөн сайд, арилжааны банкуудтай гэрээ байгуулан тэтгэврийн зээлийн хүүг 15 хувь болгон бууруулсантай адил аргаар цалингийн зээлийн хүүг бууруулж, эхний ээлжинд эмч, багш нарыг хамруулах ажлыг хийхээр төлөвлөж байгаагаа ч мөн дуулгасан юм хэмээн УИХ-ын Хэвлэл мэдээлэл, олон нийттэй харилцах хэлтсээс мэдээллээ.

Улсын Их Хурлын Төрийн байгуулалтын байнгын хорооны хуралдаан өнөөдөр 12 цаг 28 минутад 63.2 хувийн ирцтэй эхэлж, “Зөвлөлдөх уулзалт зохион байгуулах журам батлах тухай” Байнгын хорооны тогтоолын төслийг хэлэлцэв.

Байнгын хорооны дарга Н.Энхболд тогтоолын төслийн талаар хийсэн танилцуулгадаа, Монгол Улсын Үндсэн хуульд нэмэлт, өөрчлөлт оруулах асуудлаар явуулах анхдугаар зөвлөлдөх санал асуулгын түүврийн судалгаа энэ сарын 12-ны өдрөөс эхлэн орон даяар явагдаж байна. Анхдугаар зөвлөлдөх санал асуулгыг зохион байгуулж явуулахад туслалцаа үзүүлэх үүрэгтэйгээр Байнгын хорооноос байгуулагдсан Ажлын хэсэг болон Ажлын дэд хэсэг, санал асуулгыг зохион байгуулах Зөвлөлдөх зөвлөл анхдугаар санал асуулгыг зохион байгуулж явуулах бэлтгэл ажлыг хангахаар өөрсдийн хүлээсэн чиг үүргийнхээ дагуу ажиллаж байна гээд “Зөвлөлдөх уулзалт зохион байгуулах журам батлах тухай” Байнгын хорооны тогтоолын төсөл, тогтоолын хавсралтаар батлах журмын талаар гишүүдэд танилцуулсан юм.

Зөвлөлдөх санал асуулгын тухай хуулийн 11 дүгээр зүйлийн 11.9 дэх хэсэг, Улсын Их Хурлын 2017 оны 24 дүгээр тогтоолын 5 дахь заалтыг үндэслэн Монгол Улсын Үндсэн хуульд нэмэлт, өөрчлөлт оруулах асуудлаар явуулах анхдугаар зөвлөлдөх санал асуулгын “Зөвлөлдөх уулзалт зохион байгуулах журам”-ыг хавсралтаар батлахаар Байнгын хорооны тогтоолын төсөлд тусгажээ.

Тогтоолын төсөлтэй холбогдуулан Байнгын хорооны гишүүдээс асуулт гараагүй бөгөөд харин санал хэлсэн Улсын Их Хурлын гишүүн Д.Лүндээжанцан Улсын Их Хурлын 24 дүгээр тогтоолын хавсралтаар баталсан анхдугаар зөвлөлдөх санал асуулгын 6 сэдвийг хоёр өдөрт багтааж гурав гурваар нь хэлэлцэж мэтгэлцээн өрнүүлэхэд багагүй цаг хугацаа шаардлагатай учраас ойролцоо агуулгатай зарим сэдвийг нэгтгэж хэлэлцэж болох талаар Байнгын хорооны тогтоолын төсөлд тусгахыг санал болгов. Мөн Улсын Их Хурлын гишүүн Н.Цэрэнбат анхдугаар зөвлөлдөх санал асуулгын ач холбогдлын талаар олон нийтэд анхнаас нь зөв ойлголт өгөх, түүнчлэн зөвлөлдөх уулзалтын явц байдлын талаарх мэдээллийг олон нийтэд хэрхэн хүргэхэд Ажлын дэд хэсэг анхаарч ажиллах хэрэгтэй гэдгийг хэллээ.

Ингээд санал хураалгахад хуралдаанд оролцсон гишүүдийн 91.7 хувь нь Монгол Улсын Үндсэн хуульд нэмэлт, өөрчлөлт оруулах асуудлаар явуулах анхдугаар зөвлөлдөх санал асуулгын “Зөвлөлдөх уулзалт зохион байгуулах журам батлах тухай” Байнгын хорооны тогтоолын төслийг батлахыг дэмжлээ гэж Улсын Их Хурлын Хэвлэл мэдээлэл, олон нийттэй харилцах хэлтэс мэдээлэв.

Монгол Улсын Ерөнхий сайд Ж.Эрдэнэбатаас өгсөн үүрэг, чиглэлийн дагуу Батлан хамгаалахын сайдын зөвлөлийн шуурхай хуралдаан өнөөдөр боллоо. Хуралдааныг Батлан хамгаалахын сайд Б.Бат-Эрдэнэ даргалан явуулав.

Сайдын зөвлөлийн хуралдаанаас Тавантолгой дахь Зэвсэгт хүчний сургалтын нэгдсэн төвд 350 дугаар ангийн хээрийн дадлага сургалтын үеэр хоёр цэргийн алба хаагч амь үрэгдсэн ноцтой хэрэгт шууд хамаарал бүхий ажил хариуцсан албан тушаалтнуудад холбогдох хуулийн дагуу хатуу хариуцлага тооцож гурав хоногийн дотор буюу 2017 оны 4 дүгээр сарын 21-ний дотор илтгэхийг Зэвсэгт хүчний Жанжин штаб /дэслэгч генерал Д.Даваа/- д үүрэг болголоо.

Мөн цэргийн алба, сахилга, дэг журам, хөдөлмөрийн аюулгүй байдал, зэвсэг, галт хэрэгсэлтэй холбоотой зөрчил дутагдлуудыг таслан зогсоож, урьдчилан сэргийлэх арга хэмжээ авахыг Зэвсэгт хүчний Жанжин штабт хариуцуулав.

Батлан хамгаалахын сайдын энэхүү тушаалын хэрэгжилтэд хяналт тавьж ажиллахыг Батлан хамгаалахын Ерөнхий хянан шалгагч /хошууч генерал З.Болдбаатар/-т даалгалаа гэжээ.